Альбина Юрату архивӗнчи сӑнӳкерчӗк

Альбина Юрату Мускавра пӗр харӑс ултӑ кӗнекине презентациленӗ. Кун пирки эпир Телеграмри «Пуринчен малтан» канала вуласа пӗлтӗмӗр.

Чӑваш Республикин культурӑн тава тивӗҫлӗ ӗҫченӗ пӗлтӗр ултӑ кӗнеке кун ҫути кӑтартнӑ иккен. Халӗ вӗсене Мускаври Р.И.Рождественский ячӗллӗ вулавӑшра пахаланӑ.

Кӗнеке хаклавне Валентина Черчен, Аида, Ирина Понамарева, Валентина Попова юрӑҫсем, «Ентеш», «Шевле» ансамбльсем хутшӑннӑ.

Чӑваш академи драма театрӗн сӑнӳкерчӗкӗ

Республикӑри ачасемпе ҫамрӑксен вулавӑшӗнче ачасем чӑваш халӑх артисчӗсемпе Геннадий Медведевпа тата Наталия Сергеевӑпа тӗл пулнӑ.

Артистсем хӑйсен пултарулӑх ҫулӗ, сцена ҫинчи пӗрремӗш утӑмӗсем ҫинчен каласа панӑ. Вӗсем ачасем валли ачисем ӑсталӑх класӗсем ирттернӗ май арҫын ачасемпе хӗрачасем артистланса пӑхнӑ.

«Контактра» халӑх тетелӗнчи сӑн

Етӗрне округӗнче ашшӗпе ывӑлӗ, Семеновсем, тӗлӗнмелле илемлӗ картинӑсем хатӗрлеҫҫӗ. Вӗсене пусма татӑкӗсемпе усӑ курса хатӗрлеҫҫӗ.

Картинӑсем самаях пухӑннӑ. Ҫапла курав та йӗркеленӗ. Вӑл Тури Ачак ялӗнчи вулавӑшра нарӑсӑн 10-мӗшӗччен ӗҫлӗ.

Михаил тата Иван хатӗрленӗ картинӑсем тӗрлӗ тӗслӗ мозаикӑна аса илтереҫҫӗ. Питӗ илӗмлӗ вӗсем.

Кӑҫалхи кӑрлачӑн 22-мӗшӗнче Чӑваш халӑх поэчӗ, Ҫеҫпӗл Мишши ячӗллӗ премин малтанхи лауреачӗсенчен пӗри Петӗр Хусанкай (1907-1970) ҫуралнӑранпа 119 ҫул ҫитрӗ. Ҫак ятпа Ҫеҫпӗл Мишши ячӗллӗ преми лауреачӗсем — Раиса Сарпи, Марина Карягина, Юрий Сементер, Валери Туркай, Валерий Гордеев, Олег Цыпленков тата поэзие чунтан юратакан ытти хисеплӗ ҫынсем, ҫанталӑк сивӗ пулнине пӑхмасӑр, манӑҫми поэтӑмӑрӑн Шупашкарти вилтӑприйӗ ҫине чӗрӗ чечексем хунӑ.

Петр Петрович Хусанкая сума суса ҫав кун Богдан Хмельницкий урамӗнчи кивӗ масар ҫумӗнчи пантеон патне пуҫтарӑннисем пурте ун пирки чӗререн тухакан ӑшӑ сӑмахсем каланӑ.

Асӑну митингӗнче Петӗр Хусанкайӑн Чӑваш халӑх поэчӗ Валери Туркай вулакан «Элкере» сӑвви янӑранӑ.

Олег Николаев каналӗнче вырнаҫтарнӑ видеоран илнӗ сӑнӳкерчӗк

Чӑваш Ен Элтеперӗ Олег Николаев МАХри хӑйӗн каналӗнче «Хыпар» хаҫата саламлакан чӑвашла тата вырӑсла пост вырнаҫтарнӑ.

«120 ҫул халӑхпа пӗрле!

Паян эпир «Хыпар» хаҫатӑн – Раҫҫейри чи ватӑ наци хаҫачӗсенчен пӗрин – пирӗн республикӑн кулленхи пурнӑҫне ҫутатса тӑракан кӑларӑмӑн юбилейне паллӑ тӑватпӑр.

Ҫулсем иртнӗҫемӗн хаҫат ячӗ темиҫе те улшӑннӑ, анчах та вӑл Николай Никольский халалне – чӑваш халӑхӗн ырлӑхӗшӗн ӗҫлессине – яланах тӗп вырӑна хунӑ.

Хаклӑ ӗҫтешсем тата хаҫат ветеранӗсем! Сире пархатарлӑ ӗҫӗршӗн, тӳрӗ кӑмӑлӑршӑн тата профессие чунтан юратнӑшӑн тав тӑватӑп. Пултарулӑх ӗҫӗнче вӑй-хал тата вулакансен йышне ӳстерсе пыма сунатӑп. Уявпа!» — тесе ырӑ суннӑ Олег Николаев.

https://yandex.ru сӑнӳкерчӗкӗ

Чӑваш Енре пурӑнакансем Николай Добронравов ячӗллӗ юрӑ поэзийӗн пӗтӗм ҫӗршыври конкурсне хутшӑнма пултараҫҫӗ. Заявкӑсене пуш уйӑхӗн 20-мӗшӗччен йышӑнӗҫ.

Конкурс тӗллевӗ ҫӗршывӑн тӗрлӗ регионӗнчи пултаруллӑ поэтсене тупса палӑртса литература йӑли-йӗркипе юрӑ ӳнерне аталанма пулӑшасси тесе пӗлтернӗ.

Конкурса 8 номинаципе хутшӑнма пулать. Пултарулӑха тӗрӗслесе пӑхас кӑмӑллисен 14 ҫултан кӗҫӗнрех пулмалла.

Тӗп парне — Николай Добронравов ҫуралнӑ кунне халалланӑ концертра ҫӗршыври паллӑ юрӑҫсемпе пӗрле юрлани.

cap.ru сайтри сӑн

Шупашкарта иртекен Пӗтӗм тӗнчери кинофестивале пысӑк улшӑнусем кӗтеҫҫӗ. Кун пирки ЧР Культура министерстви пӗлтерет.

Ӑна 2008 ҫултанпа ҫӗртме уйӑхӗнче ирттереҫҫӗ. Кӑҫал вара кинофестивале кӗркунне йӗркелӗҫ. Ведомство пӗлтернӗ тӑрӑх, вӑл пӗрремӗш хут ҫӗнӗ форматпа пулӗ, ҫӗршыври культура платформинче «Шупашкарти Пӗтӗм тӗнчери искусство тата кино фестивалӗ» ятпа пулӗ.

Программӑра: кино кӑтартасси, пултарулӑх тӗлпулӑвӗсем, концертсем, ӑсталӑх класӗсем, тематика лекцийӗсем, ҫавра сӗтелсем. Паллӑ кино, театр тата музыка ӗҫченӗсене чӗнме палӑртнӑ.

culture.cap.ru сӑнӳкерчӗкӗ

Чӑваш Енӗн Культура министерстви 2025 ҫулшӑн литературӑпа ӳнер премине илме ӗҫсене малалла йышӑнни ҫинчен хыпарлать.

Литература ӗҫӗсене унччен пичетленсе тухнисене; музыка, ӳнер, театр, хореографи тата эстрада ӳнерӗн, дизайн, кинопа телевидени, халӑх ӳнерӗн тата прикладной ӳнерӗн ӗҫӗсене концертсенче, куравсенче, театрсемпе кинотеатрсенче, пичетре, телевиденипе радиора кӑтартнисене тӑратма юрать.

Ӗҫсене кӑҫалхи нарӑс уйӑхӗн 1-мӗшӗччен республикӑн Культура министерствинче, 17 ҫуртри 412-2 пӳлӗмре, йышӑнӗҫ. Ыйтса пӗлмелли телефон номерӗ 8(8352) 56-50-48.

culture.cap.ru сӑнӳкерчӗкӗ

Кӑрлач уйӑхӗн 23-мӗшӗнче Чӑваш Енӗн Наци вулавӑшӗ учрежденин 155 ҫулхине халалланӑ юбилей каҫне ирттерӗ.

«В кругу друзей» (чӑв. Туссемпе пӗрле) ят панӑ мероприятие вулавӑша кӗнеке вулама ҫӳрекенсемпе библиотека ӗҫӗн ветеранӗсене йыхравлӗҫ. Ҫав кунах «Люблю! Читаю! Дарю!» (чӑв. Юратӑп! Вулатӑп! Парнелетӗп!) ыркӑмӑллах кӗнеке марафонӗ пуҫланӗ. Кӗнеке фондне пуянлатма пулӑшнисене тӗрлӗ майпа чыслӗҫ.

Уява «Бард-ковчег» автор юррин клубӗ, «Эхо» пӗрлешӳ, «Эткер» фольклор студийӗ хутшӑнӗҫ.

Мероприяти вулавӑшӑн акт залӗнче 14 сехетре пуҫланӗ.

forum.na-svyazi.ru сӑнӳкерчӗкӗ

Чӑваш Енӗн митрополитечӗ Савватий Шупашкарта православи музейӗ уҫасшӑн. Ун валли Чӑваш Ен митрополийӗ хулари Воробьев композиторсен урамӗнчи 14-мӗш ҫурта пӑхса хунӑ. 1840-мӗш ҫулта хӑпартса лартнӑ ҫав ҫуртра хӑй вӑхӑтӗнче Тӗн училищи пулнӑ.

Иртнӗ ӗмӗрӗн 90-мӗш ҫулӗсен вӗҫӗнче республика ҫурта «Автоматизированные системы» тулли мар яваплӑ обществӑна 2025 ҫул вӗҫӗччен усӑ курма панӑ иккен. Вӑл ҫуртра халӗ пекарня, стриптиз-бар таранах пур.

Чӑваш Ен митрополийӗ ҫурта тавӑрасшӑн, унта православи музейӗ уҫасшӑн. Савватий пачӑшкӑ РФ Патшалӑх Думин депутатӗнчен Анатолий Аксаковран пулӑшу ыйтнӑ.