https://vk.ru/wall-191629825_82739 сӑнӳкерчӗкӗ

Шупашкарти «Салют» культура керменӗнче пӗчӗк чиперккесен конкурсӗ иртнӗ. Сцена ҫине «Чӑваш Енӗн пӗчӗк мисӗ – 2026» конкурсӑн финалне хутшӑнма тивӗҫ пулнисем тухнӑ.

Вӗсем хӑйсен пултарулӑхӗпе паллаштарнӑ. Пӗчӗкскерсем пӗри тепринчен чипер пулнӑ. Ҫулне кура мар чӗрӗскерсем сцена ҫинче хӑйсене тытма пӗлеҫҫӗ.

Тӗп титула — конкурсӑн Гран-прине — Злата Егорова ҫӗнтерсе илнӗ. «Ҫамрӑк» категорире кӑшӑла Диана Тимофеева, Алина Корнилова тата Ксения Петрова илме тивӗҫ пулнӑ.

«Мини» категорире Ксения Михайлова, Анна Тяжелова тата Таисия Краснова ҫӗнтернӗ. «Little» категорири кӑшӑлсене Валерия Слепова, Ксения Кудряшова тата Полина Апанаева тӑхӑннӑ. Пурте маттур, пурте ӑшшӑн саламланине илтме тивӗҫ.

https://vk.ru/photo-211725618_457241286?access_key=703de28b9b87664126 сӑнӳкерчӗк

Пуш уйӑхӗн 26-мӗшӗнче Чӑваш Республикин Наци библиотеки илемлӗ сӑмах юратакансене юрӑпа сӑвӑ уявне чӗнет. Унта Чӑваш Республикин культурӑн тава тивӗҫлӗ ӗҫченӗн, поэтӑн тата журналистӑн, Олег Прокопьевӑн ҫӗнӗ кӗнекине сӳтсе явӗҫ.

Автор куракансене хӑйӗн «Чӑвашӑм, пурӑн!» ятлӑ кӗнекипе паллаштарӗ. Тӗлпулӑва ҫыравҫӑсемпе журналистсем, литература пӗлӗвӗпе аппаланакан ӑсчахсем, педагогсемпе обществӑлла юхӑмсен хастарӗсем тата вулакансем хутшӑнӗҫ. Уявра поэтӑн сӑввисемпе хайланӑ юрӑсем янӑрӗҫ. Вӗсене чӑваш эстрадин ҫӑлтӑрӗсем — Ольга Лукова, Алена Алексеева, Елена Смородинова, Любовь Гордеева, Ирина Лампасова, Михаил Федоров, Дмитрий Моисеев шӑрантарӗҫ. Ҫавӑн пекех Чӑваш Республикин культурӑн тава тивӗҫлӗ ӗҫченӗ Земфира Яковлева ертсе пыракан «Эткер» фольклор ансамблӗ те хӑйӗн пултарулӑхӗпе савӑнтарӗ.

Олег Прокопьевӑн пӗрремӗш сӑввисем «Пионер сасси» (халӗ «Тантӑш») хаҫатра пичетленнӗ. Вӑл – «Шыв ҫинчи сар хӗвел ҫулӗпе» (2008) сӑвӑ пуххи авторӗ.

«Чӑвашӑм, пурӑн!» кӗнеке Чӑваш кӗнеке издательствинче кун ҫути курнӑ. Сӑвӑ пуххине Олег Прокопьев юлашки вӑтӑр ҫул хушшинче ҫырнӑ чи лайӑх хайлавӗсене кӗртнӗ, вӗсен хушшинче малтан пичетленменнисем те пур.

Малалла...

Литература музейӗн сӑнӳкерчӗкӗ

Пуш уйӑхӗн 3-мӗшӗнче Шупашкарти Константин Иванов ячӗпе хисепленекен Литература музейӗнче сӑвӑ-кӗвӗ янӑранӑ. Пултарулӑх ҫыннисене пуҫтарнӑ ҫак мероприятие Тӗнчери ҫыравҫӑсен кунне халалланӑ. Александр Николаевӑн «Тушь, перо, хут» графика куравӗпе те паллашнӑ.

Раҫҫей ҫыравҫисен пӗрлӗхӗн Чӑваш Енри уйрӑмӗн председателӗ, чӑваш халӑх ҫыравҫи Сергей Павлов хӗрарӑмсене ҫурхи уявпа саламланӑ. Арсений Тарасов, Василий Кервен, Анатолий Хмыт, Олег Кульев ҫыравҫӑсем хӗрарӑмсен чӗрине тыткӑнлакан илемлӗ сӑвӑсем вуласа панӑ.

Улькка Эльмень, Светлана Гордеева, Лидия Филиппова, Зоя Сывлӑмпи, Нина Пӑрчӑкан, Галина Кӗмӗл, Раиса Воробьева, Наталия Селезнева, Ольга Васильева, Лариса Петрова, Ольга Австрийская ҫыравҫӑсемпе поэтсем сӑвӑсем вуланӑ. Чӑваш эстради юрӑҫи Роза Степанова юрӑсем шӑрантарнӑ.

https://culture.cap.ru/press_center сӑнӳкерчӗкӗ

Пуш уйӑхӗн 11-мӗшӗнче Шупашкарти Трактор тӑвакансен культура керменӗнче тӗнчипе паллӑ коллектив — Раҫҫей Федерацийӗн Президенчӗн Ӗҫӗсен управленийӗн «Берёзка» патшалӑх академи хореографи ансамблӗ концерт кӑтартӗ.

XX ӗмӗр варринче никӗсленӗ ансамбль паянхи кун та концерт залӗсене туп-тулли пухать.

«Куракансем «Берёзка» концерчӗсене хӑйне евӗрлӗ атмосферӑна лекес тесе курма килеҫҫӗ, — тесе каланӑ коллектив директорӗ Татьяна Сельгмяэ. — Надежда Надеждинапа Мира Кольцова маттур хореографсем хатӗрленӗ репертуара куракансем ӑшшӑн йышӑнаҫҫӗ». Ҫавна май

Шупашкарта та пултаруллӑ «Берёзка» ансамбле куракансем ӑшшӑн йышӑнасса шанаҫҫӗ. Репертуарта шӳтлӗ ташӑ пур, ҫав шутра шӳтлӗ номерсем те.

https://chuvashia.media сӑнӳкерчӗкӗ

Хӗрлӗ Чутай округӗнче «Аваллӑхсӑр малашлӑх ҫук» регионсем хушшинчи фестиваль иртнӗ. Вӑл республика ҫыннисене тата кӳршӗ регионсенчен килнӗ хӑнасене пӗрлештернӗ. Хӗрлӗ Чутайри вӑтам шкул тӑваттӑмӗш ҫул ӗнтӗ хӑй патне пухать.

Фестивале Чӑваш Республикин Вӗренӳ институчӗ тата Хӗрлӗ Чутайри вӑтам шкул пӗрле йӗркеленӗ.

Фестиваль программи сакӑр секцирен тӑнӑ:

1. «Халӑх хитре — йӑлипе»,

2. «Халӑх юрри-кӗвви — чунӑм уҫҫи»,

3. «Ай, ташлар-и ташшине…»,

4. «Халӑхсен туслӑхӗ — ҫӗршыв мӑнаҫлӑхӗ»,

5. «Халӑх йӑли — пурнӑҫ йӗрки»,

6. «Ҫӗр пин тӗрӗ ҫӗршывӗнче»,

7. «Туслӑх асамачӗ»

8. «Пирӗн ҫемьен юратнӑ наци апачӗ».

Фестиваль хӑнисен йышӗнче паллӑ телерадиожурналистсем, ҫыравҫӑсем, художниксем тата ыттисем пулнӑ. Хӑнасем культура еткерне упраса хӑварасси питӗ пӗлтерӗшлӗ пулнине палӑртнӑ. Чӑваш халӑх поэчӗ Раиса Сарпи фестивале чӑтӑмсӑррӑн кӗтнине пӗлтернӗ.

https://chgign.ru сӑнӳкерчӗкӗ

Чӑваш патшалӑх гуманитари ӑслӑлӑхӗсен институчӗ (ЧПГӐИ) тата «Раҫҫейри эрменсен союзӗ» обществӑлла организацин Чӑваш Республикинчи уйрӑмӗ «Чӑваш-вырӑс-эрмен словарӗ» пичетлесе кӑларнӑ. «Ку лексикографи ӗҫӗ Чӑваш Енре пурӑнакан халӑхсен пӗрлӗхӗпе туслӑхӗн хӑйне евӗрлӗ символӗ пулса тӑрать», – тесе шухӑшлаҫҫӗ институтра.

Кӗнекене тӗрлӗ халӑх ҫыннисенчен тӑракан туслӑ коллектив хатӗрленӗ. Ҫак хӑйне евӗрлӗ словаре ӑсталас шухӑша «Раҫҫейри эрменсен союзӗ» обществӑлла организацин Чӑваш Республикинчи уйрӑмӗн председателӗ Александр Ахвердян тытнӑ. Словарӗн ӑслӑлӑх редакторӗ — ЧПГӐИ директорӗ Юрий Исаев.

ЧПГӐИ аслӑ ӑслӑлӑх сотруднӗ Алевтина Долгова ҫапларах палӑртнӑ: «Пирӗн института ҫак сӗнӳпе Чӑваш Енре пурӑнакан эрменсем килчӗҫ, эпир, паллах, пӗрле ӗҫлеме килӗшрӗмӗр. М.М. Геворкянӑн аллинче алӑпа ҫырнӑ чӑваш-эрмен словарӗн пысӑк тетрачӗ пурччӗ, унта эрмен сӑмахӗсен транскрипцийӗсене те палӑртнӑ. Ҫак пысӑк ӗҫе К.Э. Мурадян хатӗрлени паллӑ пулчӗ. Ҫакӑн пек чун-чӗререн парӑнса тата вӑйлӑ тӑрӑшса тунӑ ӗҫ хавхалантарать. Ҫапла майпа эпӗ ҫак чаплӑ ӗҫе — виҫӗ чӗлхеллӗ чӑваш-вырӑс-эрмен словарӗн авторӗсен ушкӑнне лекрӗм.

Малалла...

https://vk.ru/wall-170179245_10788 сӑнӳкерчӗкӗ

Шупашкарта «Йӑла-йӗрке» (Традиции) Пӗтӗм Раҫҫейри фестиваль-конкурсӑн регионти тапхӑрӗ вӗҫленнӗ. Унта 60-а яхӑн хутшӑнаканран 16-шӗ финала тухнӑ.

Жюри йышне Чӑваш Енӗн Культура министерствин ӗҫченӗ Татьяна Дмитриева ертсе пынӑ. Вӑл культура еткерне упраса хӑварасси мӗнле пӗлтерӗшлӗ пулнине палӑртнӑ тата финалистсене Пӗтӗм Раҫҫейри тапхӑрта республика ятне тивӗҫлӗ кӑтартма суннӑ.

Гран-прие тата 200 пин тенкӗлӗх сертификата ҫак коллективсем илме тивӗҫнӗ: «Туслӑх» халӑх хор коллективӗ (Елчӗк муниципаллӑ округӗ), «Фантази» ташӑ коллективӗ (Етӗрне муниципаллӑ округӗ), «Парне» чӑваш халӑх фольклор ансамблӗ (Республикӑри халӑх пултарулӑх центрӗ), «Тивлет» халӑх юрӑпа ташӑ ансамблӗ (Вӑрнар муниципаллӑ округӗ).

Ҫак укҫа-тенкӗпе артистсен тумтирӗсемпе пушмакӗсене ҫӗнетӗҫ.

Регион тапхӑрӗн ҫӗнтерӳҫисем федераци шайӗнче Чӑваш Енӗн пуян культурине кӑтартса 2 миллион тенкӗлӗх грантшӑн ӑмӑртӗҫ.

Ҫӑлкуҫ: pravdapfo.ru

Шупашкар округӗнчи Атайкасси ялӗнче ҫӗнӗ культура ҫурчӗ пулӗ. Ӑна 87 миллион тенкӗпе туса лартӗҫ. Кун пирки Чӑваш Енри тарифсен патшалӑх служби пӗлтернӗ.

Шупашкар округӗн администрацийӗ Шупашкарти пӗр фирмӑпа килӗшӳ алӑ пуснӑ. Ку килӗшӳ тӑрӑх Атайкассинче 150 вырӑнлӑ ялти культура ҫуртне тумалла. Килӗшӳ хакӗ 87 миллион тенкӗпе танлашнӑ. Бюджет укҫине 10,5 процент перекетлени пирки пӗлтернӗ.

Культура ҫуртне строительсен 2027 ҫулхи ҫӗртме уйӑхӗн 1-мӗшӗччен туса пӗтермелле. Ҫавӑн пекех вӗсен электричество, ҫыхӑну, шыв тата канализаци пӑрӑхӗсене вырнаҫтармалла. Ӑшӑ тытӑмне йӗркелемелле тата урамра ҫутӑпа тивӗҫтермелле.

«Контактри» сӑн

Чӑваш Енри орнитолог, биолог, педагог тата общество ӗҫченӗ Альберт Ластухин хӑй ӳкернӗ картинӑсен куравне йӗркеленӗ. Вӑл «Мӗн пур ҫын – пӗртӑван» ятлӑ.

Экспозицире 100 ытла портрет: Раҫҫейри, Азири, Африкӑри, Ҫурҫӗр тата Кӑнтӑр Америкӑри ҫынсен сӑнӗсем. Альберт Ластухин тӗрлӗ халӑх культурипе, йӑли-йӗркипе ҫывӑхрах паллашас тесе тӗнче курса ҫӳренӗ. Ҫак картинӑсене вӑл шӑпах ҫулҫӳревсемпе экспедицисем вӑхӑтӗнче ӳкернӗ.

«Эпӗ кашни портретра ҫын мӗнле пӑхнине тата унӑн чунне уҫса кӑтартма тӑрӑшрӑм», — тенӗ Альберт Ластухин. Унӑн шухӑшӗпе, ҫак курав шкул ачисемшӗн пӗлтерӗшлӗ: вӑл туслӑх пӗр-пӗрне хисепленинчен пуҫланнине ӑнланма май парать.

Куравпа Шупашкарти Халӑхсен туслӑхӗн ҫуртӗнче пуш уйӑхӗ вӗҫӗччен паллашма пулать.

Етӗрне округӗнчи хӑйне евӗр ӑстасем, ашшӗпе ывӑлӗ, пусма татӑкӗсенчен тӗлӗнмелле илемлӗ картинӑсем ӑсталаҫҫӗ. Ашшӗн ӗҫӗсенче ӑс-хакӑл тата йӑла-йӗрке туйӑнать, ывӑлӗ вара ҫӗнӗлӗхсем шырани курӑнать. Иккӗшӗн ӗҫӗсем вара – хӑйне евӗр пӗр тӗнче.

Иван тата Михаил Семеновсен ӗҫӗсемпе унччен Етӗрне округӗнчи Тури Ачак музейӗнче паллашма май пулнӑ. Халӗ вара Шупашкарта та курав уҫӑлӗ. Вӑл Хальхи искусствӑсен центрӗнче (Президент бульварӗ, 1/15-мӗш ҫурта) пуш уйӑхӗн 15-мӗшӗччен ӗҫлӗ, «Семеновсен пусмаран хатӗрленӗ живопиҫӗ» ятлӑ пулӗ.

Курав ыран, пуш уйӑхӗн 4-мӗшӗнче, 16 сехетре уҫалӗ. Унта тӳлевсӗрех кӗртеҫҫӗ.