«Контактра» халӑх тетелӗнчи сӑн

Патӑрьел округӗнчи Шӑнкӑртам ялӗнче пурӑнакан Миникадира Зейдулловна Хамбикова 101 ҫул тултарнӑ.

Вӑл Ыхраҫырми ялӗнче нумай ачаллӑ ҫемьере ҫуралнӑ. Миникадира Зейдулловна – ӗҫ ветеранӗ, яланах тӳрӗ кӑмӑлпа ӗҫленӗ. Ҫак ҫула ҫитсе вӑл тӑваттӑмӗш арӑвне курнӑ.

Кинемей вӑрӑм пурнӑҫ вӑрттӑнлӑхне уҫнӑ: ӑмсанмалла мар, ӳркенмелле мар, пурнӑҫ ҫине оптимистла пӑхмалла.

Кинемее 101 ҫул тултарнӑ ятпа Раҫҫей президенчӗ те саламланӑ, открытка янӑ.

culture.cap.ru сӑнӳкерчӗкӗ

Чӑваш Енри паллӑ музыковед, Михаил Кондратьев, Чӑваш Республикин ача-пӑчапа ҫамрӑксен вулавӑшне хӑйӗн кӗнекисене парнеленӗ.

Михаил Григорьевич — ученӑй-музыковед, искусствоведени докторӗ, профессор, Раҫҫейӗн искусствӑсен тава тивӗҫлӗ ӗҫченӗ. Унӑн ӗҫӗсене хамӑр республикӑра кӑна мар, ун тулашӗнче те аван пӗлеҫҫӗ.

Михаил Григорьевич вулавӑша икӗ томран тӑракан «Избранное»,

«Чувашская музыка в зеркале параллелей», «Степан Максимов» кӑларӑмсене парнеленӗ. Унсӑр пуҫне вӑл А.А. Трофимовӑн «Время – искусство – искусство – знание: проблемы теории и истории стилевых направлений. Живопись. Графика. Скульптура. Архитектура» кӗнекине те илсе пынӑ.

vk.com/gov_cap_ru сӑнӳкерчӗкӗ

«Газпром газораспределение Шупашкар» акционерсен обществин Шупашкарти филиалӗн тӗп инженерне Сергей Леонтьева «Чӑваш Республикин тава тивӗҫлӗ строителӗ» ята панӑ. Хушӑва республика Элтеперӗ алӑ пуснӑ.

Сергей Николаевич газ отраслӗнче 20 ытла ҫул ӗҫлет. 2019 ҫултанпа вара вӑл тӗп инженер пулса тӑрӑшать. Чӑваш Ен Элтеперӗн халӑх тетелӗнчи пабликӗнче пӗлтернӗ тӑрӑх, Сергей Леонтьев хутшӑннипе Шупашкарта тата Шупашкар районӗнче газ объекчӗсем тӑваҫҫӗ тата пуррисене юсаса ҫӗнетеҫҫӗ.

vk.com/club211725618 сӑнӳкерчӗкӗ

Чӑваш Енӗн хальхи вӑхӑтри историйӗн музейӗнче «Зеркало чувашской души» документлӑ курав уҫӑлӗ. Экспозици кӑрлач уйӑхӗн 22-мӗшӗнче 10 сехетре ӗҫлеме пуҫлӗ. Курава чӑваш халӑх поэчӗ Юрий Сементер 85 ҫул тултарнине халаллӗҫ.

Экспозици поэтӑн автобиографийӗпе, сӑввисемпе тата поэмисемпе, фотодокуменчӗсемпе тата ытти паха материалпа паллаштарать. Документсем 1962 ҫултан пуҫласа 2023 ҫулчченхи тапхӑра ҫутатса параҫҫӗ.

Клара Чекушкина архивӗнчи сӑнӳкерчӗк

Паян Клара Чекушкина юрӑҫ 85 ҫул тултарнӑ.

Клара Ивановна Патӑрьел районӗнчи Хирти Шӑхаль ялӗнче 1941 ҫулта ҫуралнӑ. Шупашкарти тата Чулхулари (ун чухне Горький ятлӑ пулнӑ) пединститутсенче вӗреннӗ.

Вӑл Чӑвашоблсовпрофра аслӑ методист та, агрегат завочӗн клубӗнче методист та пулса ӗҫленӗ. Анчах халӑх ӑна юрӑҫ пулнӑран пӗлет. Концертсемпе вӑл ют ҫӗршывсенчи (Чехословаки, Венгри, Финлянди, Япони тата ытти те) сцена ҫине те тухнӑ. Мускаври, Ирландири пӗтӗм тӗнчери фестивальсенче лауреат пулса тӑнӑ.

Клара Чекушкина — Чӑваш Республикин тата Раҫҫейӗн культура тава тивӗҫлӗ ӗҫченӗ.

Юбиляра Шупашкар хулинчи халӑхӑн социаллӑ ыйтӑвӗсене тивӗҫтерекен комплекслӑ центрӗн сайтӗнче ӑшшӑн саламласа ҫырнӑ. Юлашки ҫулсенче Клара Чекушкинӑна асӑннӑ центрӑн социаллӑ ӗҫченӗ киле пырса пӑхса пулӑшать.

chuvbook.ru сӑнӳкерчӗкӗ

Хурлӑхлӑ ку хыпара эпир кая юлса илтрӗмӗр пулин те сире те пӗлтересех килет.

Раштав уйӑхӗн 29-мӗшӗнче Виталий Енӗш чӑваш ҫыравҫи пурнӑҫран уйрӑлса кайнӑ.

Вӑл Канаш районӗнчи Пратьякас Енӗш ялӗнче 1941 ҫулхи юпа уйӑхӗн 19-мӗшӗнче ҫуралнӑ. А.М. Горький ячӗллӗ Литература институтӗнчи курсра вӗреннӗ, Пушкӑртстанри «Ҫӗршыв ҫулӗ» хаҫатра, Шупашкарта тухса тӑнӑ «Капкӑн» журналта ӗҫленӗ.

Виталий Григорьевич – прозаик, куҫаруҫӑ, сатирик, СССР Писательсен союзӗн членӗ, Пушкӑртстан Республикин культура тава тивӗҫлӗ ӗҫченӗ¸ Ф. Карим литература премийӗн лауреачӗ.

«Контактри» сӑн

Шупашкарта пурӑнакан, Корея вӑрҫине хутшӑннӑ Георгий Александров 98 ҫул тултарнӑ.

Ӑна ҫуралнӑ кунпа саламлама Ленин районӗн Патшалӑх хӳтӗлевӗ тата инкеклӗ лару-тӑру енӗпе ӗҫлекен штаб пуҫлӑхӗ Александр Кузнецов килнӗ. Вӑл Георгий Александрова РФ Президенчӗн Владимир Путинӑн саламлӑ открыткине тата асӑнмалӑх парнесем панӑ.

Чӑваш патшаоӑх юрӑпа оашӑ ансамблӗ халӑх тетелӗнче аырнаҫтарнӑ сӑнӳкерчӗк

Раҫҫей халӑх артисчӗ Юрий Васильев 80 ҫул тултарнӑ. Унӑн юбилейӗ Сурхуринче, кӑрлач уйӑхӗн 7-мӗшӗнче, пулнӑ.

Юрий Васильевич – Чӑваш АССР тата РСФСР искусствӑсен тава тивӗҫлӗ ӗҫченӗ, Раҫҫей халӑх артисчӗ, К.В. Иванов ячӗллӗ патшалӑх премийӗн лауреачӗ.

Чӑваш патшалӑх юрӑпа ташӑ ансамблӗн илемлӗх ертӳҫи пулнӑ чухне май репертуара нумай пуянлатнӑ. Унта вӑл 1976 ҫулта ӗҫлеме пуҫланӑ.

Владимир Офаринов стоаницинчен илнӗ сӑнӳкерчӗк

Етӗрнере пурӑнакан Людмила Виноходова паян 100 ҫул тултарнӑ. Кун пирки вырӑнти депутат, Владимир Офаринов, халӑх тетелӗнчи хӑйӗн страницинче хыпарланӑ.

Сумлӑ юбилей ячӗпе кинемее вырӑнти тӳре-шарапа депутат саламланӑ.

Людмила Васильевна 40 ҫул ытла Етӗрнери район больницинче врач пулса ӗҫленӗ.

Кинемее Владимир Путинӑн саламлӑ открыткине те ҫитерсе панӑ.

cap.ru сӑнӳкерчӗкӗ

Ӗнер, кӑрлач уйӑхӗн 2-мӗшӗнче, чӑваш халӑх поэчӗ Раиса Сарпи 75 ҫул тултарнӑ.

Вӑл Патӑрьел районӗнче Нӑрваш Шӑхаль ялӗнче ҫуралнӑ. Литература ӗҫӗпе И.Н. Ульянов ячӗллӗ Чӑваш патшалӑх университетӗнчен вӗренме тухнӑ хыҫҫӑн ӗҫлеме тытӑннӑ.

Раиса Сарпи — 40 ытла кӗнеке, 300 юрӑ, 10 пьеса авторӗ.