Шупашкар хулинче пурӑнакан 17 ҫулти Тимофей Петров «Ну-ка, все вместе!» шоуна хутшӑнса жюри пайташӗсене тӗлӗнтернӗ.

Нумаях пулмасть пирӗн ентеш «Россия 1» каналпа кӑтартакан музыка проектне хутшӑннӑ, вӑл Benson Boone — "In the Stars" ятлӑ юрӑпа сцена ҫине тухнӑ. Питӗ кӑмӑллӑ: жюрисенчен пӗри вӑл ӑна оригиналтан та лайӑхрах юрланине палӑртнӑ.

Каласа хӑварар: Тимофей Мускав хулинче Гнесинсен ячӗллӗ училищере 2-мӗш курсра «Эстрадӑпа джаз юрласси» специальноҫпе ӑс пухать. Кунсӑр пуҫне вӑл ташлать, ку енӗпе ӑсталӑха 9 ҫул туптать. Тата, тӗлӗнмелле те, арҫын ача пулсан та вӑл десертсем хатӗрлеме юратать.

cap.ru сайтри сӑн

Етӗрне округӗнчи Алексеевка ялӗнче пурӑнакан Елизавета Александрова 100 ҫул тултарнӑ. Ӑна ҫавра ҫулпа саламлама тӑванӗсем, кӳршисем, тӳре-шара килнӗ. Вырӑнти клуб артисчӗсем вара юрӑ-ташӑпа савӑнтарнӑ

Елизавета Александровна Етӗрне районӗнчи Ҫӗнӗ Етӗрне ялӗнче хресчен ҫемйинче ҫуралнӑ, тӑватӑ ачаран асли пулнӑ. 5-мӗш класс пӗтерсен хӗрача колхозра ӗҫлеме пуҫланӑ. Каярахпа Шупашкарти строительство компанийӗнче тӑрӑшнӑ. Тивӗҫлӗ канӑва тухсан та малалла ӗҫленӗ, 1998 ҫулччен тӑрӑшнӑ. Вӑл ӗмӗр тӑршшӗпех тӳрӗ кӑмӑлпа ӗҫленӗ.

Паянхи кун Елизавета Александровна сывлӑх енчен аптӑрать, ҫапах вӑл пӗчӗк япаласенчех савӑнӑҫ тупма пӗлет: вӑл пахчари чечексемпе киленме юратать.

Чӑваш патшалӑх оперӑпа балет театрӗн директорӗ Андрей Попов ӗҫрен кайӗ. Кун пирки вӑл халӑх тетелӗнчи страницинче ҫурла уйӑхӗн 7-мӗшӗнче пӗлтернӗ. Анчах ӑҫта каяссине каламан.

Вӑл опера театрӗн директорӗнче 2022 ҫулхи кӑрлач уйӑхӗнченпе ӗҫленӗ. Унччен вӑл Пермь хулинче тӑрӑшнӑ.

Андрей Попов ӗҫленӗ чухне, 2023 ҫулта, «Атӑл Опера» бренд тупӑннӑ. Репертуар та ҫӗнелнӗ, труппа гастрольсене тӑтӑшах ҫӳреме, пысӑк фестивальсене хутшӑнма тытӑннӑ. Ҫавӑн пекех хӑйне евӗрлӗ проект ҫуралнӑ – Рустам Сагдиевӑн «Тӗп ыйту» цифра космос опери. Шухӑшӗ – Поповӑн,спектакле вара нейросетьпе усӑ курса хатӗрленӗ: ӑс-хакӑл интеллекчӗ визуал ӳкернӗ, либретто тата кӗвве ҫырма пулӑшнӑ. Артистсенчен пӗри вара чӑн-чӑн йытӑ-робот пулнӑ.

Республикӑри кардиологи диспансерӗн тухтӑрӗсем, Михаилпа Елена Протасовсем, каллех Эльбрус тӑвӗ ҫине хӑпарнӑ. Вӗсем 5642 метр ҫӳллӗшне 5 сехет ҫурӑра парӑнтарнӑ.

Ҫӑмӑл килмен вӗсене. Маларах юр вӑйлӑ ҫунӑ, 10 метр аякри те курӑнман. Ҫавна май альпинистсен ним курмасӑр Эльбрус ҫине хӑпарма тивнӗ.

Сӑмах май, унччен Протасовсем Килиманджаро тӑвне парӑнтарнӑ. «Ҫӳлте пӗр ансат япалана ӑнланатӑн. Чӗре юн хӑвалать кӑна мар, вӑл ура утма хирӗҫлесен сана малалла тӗкет. Операци пӳлӗмӗнчи эпир пациентсен чӗре таппине йӗркелетпӗр. Кунта вара хамӑрӑнне тӗрӗслетпӗр», — тенӗ Михаил Протасов. Вӑл – юн тымарӗсен хирургӗ тата пай заведующийӗ. Мӑшӑрӗ – тухтӑр анестезиолог-реаниматолог.

cap.ru сайтри сӑн

Ҫӗнӗ Шупашкар хулинче пурӑнакан ветеран Геннадий Кузнецов ҫул тултарнӑ.

Геннадий Семенович 1927 ҫулта Муркаш районӗнчи Шомик ялӗнче ҫуралнӑ. Вӑрҫа вӑл питӗ ҫамрӑкла, 1944 ҫулта, кайнӑ, Ҫурҫӗр флотне лекнӗ, унта катер ҫинче пулеметчик пулнӑ. Киле вӑл 1951 ҫулта кӑна таврӑннӑ. Ун хыҫҫӑн Шупашкар районӗнчи Ҫӗктер вӑрман комбинатӗнче столярта ӗҫленӗ.

Ҫӗнӗ Шупашкар хулин администрацийӗ ветеран пурӑнакан ҫурт фасачӗ ҫине (Первомайски урамӗнчи 44-мӗш ҫурт) астӑвӑм хӑми уҫнӑ.

Геннедий Кузнецов паянхи кун та таса ӑспа пурӑнать. Вӑл саламлама килнӗ хӑнасене тарават кӗтсе илнӗ. Саламлатпӑр!

Ольга Иванова страницинчен илнӗ сӑнӳкерчӗк

Чӑваш кӗнеке издательствинче ӗҫлекен Ольга Иванова сӑввисене альманахра пичетленӗ. Кун пирки вӑл «Контактра» халӑх тетелӗнчи хӑйӗн страницинче кӗскен та сӑпайлӑн пӗлтернӗ.

Пултаруллӑ хӗр кӗнеке хуплашкине тата хӑйӗн сӑввисен странцине ӳкерсе илнӗ, сӑнӳкерчӗксен айне кӗскен «АСӐНМАЛӐХ-САВӐНМАЛӐХ. Большая честь и чудо – быть в числе лучших» тесе ҫырса хунӑ.

Кунта сӑмах «Альманах национальных литератур народов Поволжья, Урала, Северо-Запада и Алтая» ятлӑ кӑларӑм пирки пырать. Асӑннӑ кӗнекене Хусанта ҫӗртме уйӑхӗн вӗҫӗнче иртнӗ Атӑлҫи, Урал, Ҫурҫӗр-Хӗвланӑҫ тата Алтай тӑрӑхӗнчи халӑхсен наци литературин конференцийӗ тӗлне кун ҫути кӑтартнӑ. Тӑван чӗлхепе ҫырнӑ ӗҫсене вырӑсла куҫарса пичетленӗ.

Чӑваш академи драма театрӗн сӑнӳкерчӗкӗ

Ӗнер, утӑ уйӑхӗн 30-мӗшӗнче, Чӑваш Республикин тава тивӗҫлӗ артисчӗ Николай Котеев 65 ҫул тултарнӑ.

«Николай Александрович, Сирӗн пурнӑҫӑр ҫутӑ та савӑнӑҫлӑ пултӑр, ҫывӑх ҫыннӑрсем сире ӑшӑ кӑмӑлпа ачашлӑх парнелеччӗр, тус-юлташӑрсем сире чӗререн ӑнланса, пулӑшса тӑччӑр, ӗҫтешӗрсем сире хисеплеччӗр», — тесе саламланӑ артиста Чӑваш академи драма театрӗ халӑх тетелӗнчи хӑйӗн пабликӗнче.

Николай Котеев 1961 ҫулхи утӑ уйӑхӗн 30-мӗшӗнче Хӗрлӗ Чутайӗнче ҫуралнӑ. 1983 ҫулта Мускаври М.С. Щепкин ячӗллӗ аслӑ театр училищинчен вӗренсе тухнӑ. Ҫав ҫулах Чӑваш академи драма театрӗнче ӗҫлеме пуҫланӑ. 2018 ҫулта ӑна «Чӑваш Республикин тава тивӗҫлӗ артисчӗ» хисеплӗ ят панӑ. Вӑл «Чӗнтӗрлӗ чаршав» театр ӳнерӗн республикӑри конкурсӗнче те палӑрнӑ.

«Контактри» сӑн

Елчӗк округӗнчи Аслӑ Таяпа ялӗнче ҫуралса ӳснӗ Владимир Тяптушкин черетлӗ сериалта ӳкерӗннӗ. Вӑл «Коп-звезда» ятлӑ.

Камитлӗ сериала ТНТ телеканалпа ҫурла уйӑхӗн 3-мӗшӗнче кӑтартма тытӑнӗҫ. Ку Владимир Тяптушкиншӑн – камит жанрӗнчи пӗрремӗш опыт. Вӑл унта Мудров рольне вылять. Хӑй каланӑ тӑрӑх, унӑн сӑнарӗ чее, пултаруллӑ, ҫав вӑхӑтрах хӑйне юратакан ҫын.

Сӑмах май, Владимир Мускавра питӗ ӗҫлӗ пулсан та тӑван тӑрӑхӗ пирки манмасть, килсех ҫӳрет. Вӑл Чӑваш Ене икӗ уйӑхра пӗрре те пулин килме тӑрӑшать. Уншӑн тӑван ялӗ – чи хитре вырӑн. Ҫавӑн пекех вӑл Шупашкар хулинчи тӗп урамсенче уҫӑлса ҫӳреме юратать.

«Контактри» сӑн

Улатӑр хулин хисеплӗ ҫынни Раида Петровна Прусиновская 100 ҫулхи юбилейне паян паллӑ тунӑ.

Вӑл Улатӑрта автоматчик профессине алла илнӗ пӗрремӗш хӗрарӑм. Раида Петровна «Электроавтомат» савутра 20 ҫул ытла ӗҫленӗ, ҫамрӑк специалистсемшӗн наставник пулнӑ. Вӑл хула пурнӑҫне яланах хастар хутшӑннӑ, икӗ хутчен депутата суйланнӑ.

Раида Петровна Ӗҫлӗх Хӗрлӗ Ялавне тата «Тӑван ҫӗршывӑн Аслӑ вӑрҫинче хастар ӗҫленӗшӗн» медале тивӗҫнӗ. 1997 ҫулта ӑна «Улатӑр хулин хисеплӗ ҫынни» ята панӑ.

Саламлатпӑр юбиляра!

https://рус.энциклопедии.наследиечувашии.рф сайтран илнӗ сӑнӳкерчӗк

Николай Селиванова Чӑваш Республикин Хисеп грамотипе чыслама йышӑннӑ. 84 ҫулти хисеплӗ ватта сума сӑвасси ҫинчен калакан Хушӑва Чӑваш Ен Элтеперӗ ӗнер алӑ пуснӑ.

Николай Васильевич — Чӑваш Енӗн агропромышленность комплексӗн ветерансен канашӗн Патӑрьел районӗнчи организаци членӗ.

Николай Селиванов 1942 ҫулхи утӑ уйӑхӗн 1-мӗшӗнче Патӑрьел районӗнчи Кӗҫӗн Арапуҫ ялӗнче ҫуралнӑ. Ҫӗрпӳри ял хуҫалӑх техникумӗнчен тата Мускаври Профсоюз юхӑмӗн аслӑ шкулӗнчен экономиста вӗренсе тухнӑ.

Ӗҫ биографине «Герой» колхозри кӗтӳҫрен пуҫланӑ, унтан Юхмара транспорт бригадин бригадирӗ пулнӑ. 1982-1983 ҫулсенче «Герой» колхозра профком председателӗнче ӗҫленӗ. Унтан ӑна КПСС райкомӗнче пропагандӑпа агитаци пайӗнче инструкторта тӑрӑшма шаннӑ. 1985 ҫултанпа вӑл ял хуҫалӑх ӗҫченӗсен профсоюзӗн райкомне ертсе пынӑ. 1996-2000 ҫулсенче Патӑрьел районӗн администрацийӗн пуҫлӑхӗ пулнӑ, кайран Чӑваш патшалӑх университетӗнче преподавательте тӑрӑшнӑ. 2005 ҫултанпа Мускаври «ВИА-Строй» строительство организацийӗн гендиректорӗнче тӑрӑшнӑ.

Малалла...