htcheb-centr.soc.cap.ru сӑнӳкерчӗкӗ

Шупашкар хулинчи халӑхӑн социаллӑ ыйтӑвӗсене тивӗҫтерекен комплеклӑ центрта тӑрӑшакан Татьяна Андреева авӑн уйӑхӗн 4-мӗшӗнче 50 ҫул тултарнӑ.

Социаллӑ сферӑра вӑл 2019 ҫултанпа тӑрӑшать. Асӑннӑ учреждение хӗрарӑм социаллӗ ӗҫчен пулса вырнаҫнӑ. Хӗрӗх урлӑ каҫнӑ хӗрарӑм ватӑсемпе тата сусӑрсемпе тӳрех пӗр чӗлхе тупма пултарнӑ. Ҫавӑншӑн ӑна хӑй пӑхакан ватӑсем юратаҫҫӗ. Ӗҫтешӗсем вара кирлӗ чухне алӑ пама килӗшнишӗн хисеплеҫҫӗ, сума сӑваҫҫӗ.

«Пирӗн тивӗҫӗмӗр — хӳтлӗхсӗр ҫынсен шанӑҫне тӳрре кӑларасси», — тет иртнӗ эрнекун 50 ҫул тултарнӑ хӗрарӑм. Вӑл кирлӗ пулсан апат пӗҫерсе те, урай ҫуса та, лавккаран апат-ҫимӗҫ, аптекӑран эмел туянса килсе те парать. Ятарлӑ программӑра пӑхса хӑварнӑ ытти ӗҫе те пурнӑҫлать.

«Хыпар - Вести Чувашия» каналтан илнӗ сӑнӳкерчӗк

Чӗмпӗрте Валентина Тарават ҫыравҫӑн пултарулӑх каҫӗ иртнӗ. Кун пирки МАХра «Хырар - Вести Чувашии» каналта пӗлтернӗ.

Мероприятие Валентина Николаевнӑн 80 ҫулхи юбилейне халалланӑ иккен.

Валентина Тарават (Игнатьева) – поэт, прозаик, куҫаруҫӑ, Раҫҫей писательсен союзӗн членӗ. Асӑннӑ ҫӑлкуҫра хыпарланӑ тӑрӑх, поэта тата прозаика юбилейпа саламлама Чӗмпӗр облаҫӗн ӳнерпе культура политикин министрӗ Евгения Сидорова пырса ҫитнӗ. «Библиотека ӗҫченӗсем Валентина Николаевна вулав культурине аталантарас ӗҫе пысӑк тӳпе хывнине палӑртнӑ.

Уява ҫавӑн пекех ҫыравҫӑн тусӗсем, литература ҫыннисем, вӗренекенӗсем, пултарулӑхне кӑмӑллакан ытти ҫын та хутшӑннӑ», — тесе пӗлтернӗ «Хыпар - Вести Чувашия» каналта.

Ҫӗнӗ Шупашкар хулинче пурӑнакан 40 ҫулти Татьяна Шерне «Раҫҫей миссисӗ – 2026» конкурсра мала тухнӑ, пирӗн ентеше «Раҫҫейри Поэзи королеви» ятарлӑ титулпа палӑртнӑ.

Жюрие вӑл сӑвӑпа, хӑй ҫырнӑскерпе, тӗлӗнтернӗ. Татьяна Шерне «Пурнӑҫа таврӑннӑ хӗрарӑм» (выр. «Женщина, которая вернулась к жизни») сӑвва Куклачев ячӗллӗ театр сцени ҫинче вуланӑ.

Татьяна – икӗ ача амӑшӗ, поэтесса. Унӑн пурнӑҫӗ ҫӑмӑл килмен, вӑл хӑйне алла илес тесе нумай ӗҫленӗ. Халӗ вӑл Чӑваш Енре йывӑр лару-тӑрӑва лекнӗ хӗрарӑмсене пулӑшакан ыркӑмӑллӑх фончӗ уҫма ӗмӗтленет.

Саламлатпӑр ентеше!

«Контактри» сӑн

Ӗнер, авӑн уйӑхӗн 1-мӗшӗнче, Патӑрьел тӑрӑхӗнче пурӑнакан Вера Седойкина 100 ҫул тултарнӑ.

Вера Петровнӑн пурнӑҫӗ медицинӑпа ҫыхӑннӑ, вӑл Чкаловскри (халӗ Патӑрьел) пульницӑра ҫур ӗмӗр ытла медсестрара ӗҫленӗ.

Вӑрҫӑ пуҫланнӑ чухне хӗрача колхозра вӑй хунӑ. 1943 ҫулта Пӑвари медицина шкулне вӗренме кайнӑ. Диплом илсен Карел-Финн ССРне ӗҫлеме тухса кайнӑ. Анчах ашшӗ чирлесен каялла киле таврӑнма тивнӗ. Тӑван Чкаловскра вӑл юратӑвне – Виталий Васильевича – тӗл пулнӑ. Вӗсем клубра киносеансра паллашнӑ. Мӑшӑр 70 ҫул пӗрле пурӑннӑ.

Халӗ Вера Петровна – виҫӗ ача амӑшӗ, унӑн пилӗк манук, виҫӗ кӗҫӗн мӑнук пур.

Саламлатпӑр!

2026 ҫулхи авӑн уйӑхӗн 1-мӗшӗнче Шупашкарта Сергей Владимирович Щербаков кӗтмен ҫӗртен вилсе кайнӑ. Вӑл Атӑл тӑрӑхӗнче паллӑ историк-ӑсчах тата кинорежиссер шутланнӑ. Чӑваш халӑхӗн автономине тата патшалӑхне йӗркелес историйӗпе нумай ӑслӑлӑх статйи ҫырнӑ, документлӑ фильмсем ӳкернӗ. Раҫҫей коопераци университечӗн Шупашкарти коопераци институчӗн (филиалӗн) историпе обществознани преподавателӗ пулса ӗҫленӗ. Вӑл пурӗ те 50 ҫулта пулнӑ...

Сергей Щербаков 1975 ҫулхи чӳк уйӑхӗн 21-мӗшӗнче Чӑваш Республикинчи Шупашкар районӗнчи Явӑш ялӗнче ҫуралнӑ. 1978 ҫултанпа Шупашкар хулинче пурӑннӑ. И.Н. Ульянов ячӗллӗ Чӑваш патшалӑх университечӗн истори факультетӗнчен вӗренсе тухнӑ. Шупашкарти 24-мӗш вӑтам шкулта тата Краснодар крайӗнчи Кропоткин хулинчи 45-мӗш лицейра историпе обществознани вӗрентекенӗ пулса ӗҫленӗ. 2002–2005 ҫулсенче Чӑваш Республикинчи Шалти ӗҫсен министерствинче ӗҫленӗ. Унта вӑл Шупашкарти Ленин районӗнчи уголовнӑй шырав пайӗнче хӗсметре тӑнӑ. 2004 ҫулта Чечня Республикинче ӗҫ командировкинче пулнӑ (Раҫҫейри Шалти ӗҫсен министерствин ВОГОиП криминал милицийӗн аслӑ оперуполномоченнӑйӗ пулса тӑрӑшнӑ).

Малалла...

Марина Карягина архивӗнчи сӑн.

Паян, аван уйӑхӗн 1-мӗшӗнче, Марина Карягина тележурналист кукамай пулса тӑнӑ. Саламлатпӑр!

Унӑн Хусан хулинче пурӑнакан хӗрӗ Илемпи паян ирхи пилӗк сехетре хӗр ҫуратнӑ.

«Ҫак кун маншӑн пӗрремӗш класа кайнӑранпах питӗ пӗлтерӗшлӗ, савӑнӑҫлӑ, хумхануллӑ, тӳсӗмсӗррӗн кӗтнӗ кун пулнӑ .

Паян, Пӗлӳ кунӗнче, хӗвеллӗ уява тата та илемлетсе ҫут тӗнчене манӑн пӗрремӗш мӑнук килчӗ, туссем! Эпӗ телейлӗ! Эпӗ – кукамай!» – тесе ҫырнӑ Марина Карягина халӑх тетелӗнчи хӑйӗн страницинче.

«Контактри» сӑн

Чӑваш Енре ҫуралса ӳснӗ Гузелия Сафина каллех Forbes рейтингне лекнӗ. Хальхинче вӑл 400 миллион долларпа танлашакан капиталӗпе 19-мӗш вырӑн йышӑннӑ.

Гузелия Сафина – ТАИФ правлени председателӗн тӗп канашҫи. Вӑл ҫӗршыври чи пуян хӗрарӑмсен списокне 11-мӗш хут лекнӗ.

Палӑртса хӑварар: Гузеляи Сафина Патӑрьел районӗнчи Ксыл-Чишма ялӗнче ҫуралса ӳснӗ. Карьерине бухгалтертан пуҫӑннӑ, 1990 ҫулсенче вара ТАИФ ушкӑнӗн тӗп финансисчӗсенчен пӗри пулса тӑнӑ. Пирӗн ентеш Forbes рейтингне 2014 ҫултанпа (2022-2024 ҫулсемсӗр пуҫне) кӗрет.

Сӑмах май, пӗлтӗр Гузелия Сафина тӑван ялӗнче парк хута янӑ. Вӑл ҫак ӗҫ пуҫаруҫи тата спонсорӗ пулнӑ.

Чӑваш академи драма театрӗн сӑнӳкерчӗкӗ

Авӑн уйӑхӗн 11-мӗшӗнче К. В. Иванов ячӗллӗ Чӑваш академи драма театрӗнче Раҫҫей Федерацийӗн тава тивӗҫлӗ артисчӗ Геннадий Большаков ҫуралнӑранпа 65 ҫул ҫитнине халалланӑ аса илӳ каҫӗ иртӗ.

Геннадий Арсентьевич театрта 1983 ҫултанпа ӗҫленӗ. Театрта пӗлтернӗ тӑрӑх, унпа пӗрле тӑрӑшнисем ӑна ансат психолог тата философ тесе хаклаҫҫӗ. Вӑл калӑпланӑ сӑнарсем чаршав хупӑнсан та сцена ӑстипе пулнӑ.

Актер хӑйӗн пурнӑҫӗнче ытти артистпа пӗрле Мускав, Санкт-Петербург, Хусан, Ӗпхӳ сценисем ҫине тухнӑ. Тӗрӗк халахӗсен «Туганлык» (1991) и «Науруз» (2002) фестивалӗсенче ҫӗнтернӗ.

Аса илӳ каҫӗнче пурнӑҫран ир уйрӑлса кайнӑ ӑстана унпа пӗрле ӗҫленисем, ҫывӑх ҫыннисем аса илӗҫ, фото- тата видеоматериалсем пулӗҫ.

cheb-centr.soc.cap.ru сӑнӳкерчӗкӗ

Шупашкарта пурӑнакан Елизавета Иваноцова паян, ҫурла уйӑхӗн 31-мӗшӗнче, 100 ҫул тултарнӑ.

Елизавета Петровна пурнӑҫӗ вӑл вӑхӑтри ытти чылай ҫынран, тӗрӗссипе каласан, нимпех те уйрӑлса тӑмасть. Вӑл та вӑрҫӑ нуши-тертне тӳснӗ. Хаяр вӑрҫӑ пынӑ ҫулсенче «Буревестник» насус станцийӗнче тӑрӑшнӑ. Уншӑн ӑна та тӗрлӗ юбилей медалӗ парса хавхалантарнӑ.

Кайран вӑл Шупашкарти промышленность тракторӗсен заводне тирпейлӳҫӗне кайса вырнаҫнӑ. Унта 40 ҫул тӑрӑшнӑ.

Паян Елизавета Петровна уйрӑм ҫуртра, хӑтлӑ йывӑҫ пӳртре, пурӑнать. Пахчапа йӑпанмалӑх 6 сотка ҫӗр пур. Икӗ ача амӑшӗн тӑватӑ мӑнук тата мӑнукӗсен ултӑ ача. Кинемей ӑспа-тӑнпа пурӑнать, кил-тӗрӗшӗнче утса ҫӳрет. Чи кирли вара — ҫывӑх ҫыннисем юнашар пулни.

«Контактри» сӑн

Етӗрне хулинче пурӑнакан Алексей Темнов 100 ҫулхи юбилейне паллӑ тунӑ. Вӑл – Тӑван ҫӗршывӑн Аслӑ вӑрҫин ветеранӗ.

Фронта Алексей Федоровича 1943 ҫулта илнӗ. Повестка килнӗ чухне вӑл 17-ри ҫамрӑк пулнӑ. Алексей Темнов I Беларуҫ фронтне лекнӗ, 120 миллиметрлӑ миномет наводчикӗ пулнӑ. Вӑл яланах малти позицире пулнӑ. Пирӗн ентеш пӗтӗм Беларуҫе тенӗ пек ҫуран утса тухнӑ. Ҫакна вӑл паянхи кун та аса илет.

Алексей Темнов Варшавӑна ирӗке кӑларнӑ ҫӗре хутшӑннӑ, Одер юханшывӗ урлӑ каҫнӑ. Ҫӗнтерӗве Махачкалари госпитальте кӗтсе илнӗ. Ҫав вӑхӑт тӗлне вӑл виҫӗ хутчен вӑйлах аманнӑ: снаряд ванчӑкӗсем унӑн аллине аркатса пӗтернӗ, кӗлетки суран ӑшӗнче пулнӑ. Вӑрҫӑ пӗтсен Алексей Темнов чылай ҫул лаша савутӗнче ӗҫленӗ, унтан «Сурские зори» турбазӑна ертсе пынӑ. Ҫав вӑхӑтрах общество ӗҫӗсене те хастар хутшӑннӑ.

Юбиляр патне РФ президенчӗн Владимир Путинӑн саламлӑ открытки те ҫитнӗ.