https://cheb-centr.soc.cap.ru сӑнӳкерчӗкӗ

Хальхи вӑхӑтра пирӗн республикӑра вӑрҫӑ ветеранӗсене (кунта вӑрҫа хутшӑннисем ҫеҫ мар, тылра ӗҫленисем те, блокадӑри Ленинградра пурӑннисем те, ача чухне фашистсен узникӗ пулнисем те кӗреҫҫӗ) саламлаҫҫӗ. Ӗнер Шупашкар хулинчи халӑхӑн социаллӑ ыйтӑвӗсене тивӗҫтерекен комплекслӑ центр ӗҫченӗсем 106 ҫулти Мария Столяровӑна саламлама килне кайнӑ.

Мария Михайловна 1920 ҫулхи пуш уйӑхӗн 20-мӗшӗнче Муркаш районӗнчи Нискасси ялӗнче ҫуралнӑ. Вӑл 38 ҫул тӗрлӗ шкулта учитель пулса тӑрӑшнӑ. Малтан Етӗрне районӗнчи шкулсенче тимленӗ, кайран Шупашкарти 6-мӗш вӑтам шкулта ачасене пӗлӳ тӗнчине илсе кӗнӗ.

Кинемей паян Шупашкарта пурӑнать. Унӑн ача-пӑча ҫук, анчах ӑна тӑванӗн хӗрӗ тирпейлӗ пӑхса пурӑнать.

https://rus.team/ сӑнӳкерчӗкӗ

Чӑваш Енре Ревель Фёдоров художник ҫуралнӑранпа 100 ҫул ҫитнине халалласа тӗрлӗ мероприяти ирттерме палӑртаҫҫӗ. Ҫавна май республикӑра халех йӗркелӳ комитечӗ туса хума йышӑннӑ. Йышӑнӑва пурнӑҫа кӗртессишӗн Чӑваш Енӗн Культура, национальноҫсен ӗҫӗсен тата архив ӗҫӗн министерстви яваплӑ пулӗ.

Ревель Фёдорович — Чӑваш Енӗн икӗ хутчен патшалӑх премийӗн лауреачӗ, Раҫҫейӗн ӳнер академийӗн ылтӑн медальне тивӗҫнӗ, Наукӑпа ӳнерӗн Петров академийӗн чӑн пайташӗ, Раҫҫейӗн халӑх художникӗ, профессор.

Ревель Фёдоров 1929 ҫулхи раштав уйӑхӗн 29-мӗшӗнче Вӑрмар районӗнчи Аслӑ Чак ялӗнче ҫуралнӑ. Малтан Шупашкарти ӳнер училищинче вӗреннӗ, унтан 1963 ҫулта Харьковри ӳнер институтӗнчен вӗренсе тухнӑ. Унта, сӑмах май каласан, Алексей Кокель живопись ӑсти ӗҫленӗ.

Росгвардин Чӑваш Республикинчи Управленийӗн ӗҫченӗ Александр Максимов аслӑ лейтенант «Раҫҫейӗн хисеплӗ донорӗ» ята тивӗҫнӗ. Кӑкӑр паллине тата удостоверение ӑна Республикӑри юн илекен станцире савӑнӑҫлӑ лару-тӑрура панӑ.

Александр Максимов – лицензи-разрешени ӗҫӗн центрӗн офицерӗ. «Донор пулни – кама та пулин пурнӑҫне ҫӑлма шанчӑк пани», - тет Александр. Вӑл 2009 ҫултанпа юн парать. Ҫак таранччен Александр донорсен юнӗн банкне 19 литра яхӑн юн панӑ.

Сӑмах май, Росгвардин регионти Управленийӗ юн памалли акцисене тӑтӑшах ирттерет. Кӑҫал вӗсем акцие ведомство йӗркеленнӗренпе — 10 ҫул, йӗрке хуралӗн ҫарӗсем йӗркеленнӗренпе 215 ҫул ҫитнине халалланӑ.

Чӑваш академи драма театрӗн сӑнӳкерчӗкӗ

Паян, ҫу уйӑхӗн 1-мӗшӗнче, Чӑваш Республикин тава тивӗҫлӗ артисчӗ Александра Зайцеван ҫуралнӑ кунӗ. Вӑл 65 ҫул тултарать.

Вӑл 1961 ҫулхи ҫу уйӑхӗн 1-мӗшӗнче Шӑмӑршӑ районӗнчи Палтиел ялӗнче ҫуралнӑ. Мускаври М.С. Щепкин ячӗллӗ Аслӑ театр училищинче (институтӗнче) чӑваш студийӗнче вӗреннӗ. 1983 ҫулта унтан вӗренсе тухнӑ хыҫҫӑн ӑна К.В. Иванов ячӗллӗ Чӑваш патшалӑх академи драма театрӗн труппине илнӗ, ҫавӑнтанпа вӑл унта ӗҫлет.

Александра Зайцеван юбилейӗ ячӗпе театрта ҫу уйӑхӗн 6-мӗшӗнче юбилей каҫӗ пулӗ. Театрӑн пресс-служби «Контактра» халӑх тетелӗнчи хӑйӗн пабликӗнче пӗлтернӗ тӑрӑх, ҫав каҫ «артист хӑйӗн ҫавра ҫулне Флорид Буляков пьесипе лартнӑ «Карчӑксем качча каяҫҫӗ» камитпе паллӑ тӑвӗ».

Виталий Михайлов страницинчен илнӗ сӑнӳкерчӗк

Паян, ака уйӑхӗн 30-мӗшӗнче, Красноармейски тӑрӑхӗнчи Упи ялӗнчи Сергей Петров эстрада юрӑҫи сцена ҫине тухнӑранпа 20 ҫул ҫитнине халалласа концерт лартма палӑртнӑ. Унта Уява Надали, Д. Никифоров, Надина, С. Павлов, Н.Яковлева тата ытти эстрада юрӑҫи хутшӑнӗ.

Сергей Петров Упинчи кану центрӗн менеджерӗ пулса тӑрӑшать. Вӑл 1989 ҫулта Красноармейски районӗнчи Тусай ялӗнче ҫуралнӑ. Чӑваш патшалӑх университечӗн культурологи факультетӗнчен вӗренсе тухнӑ, Чӑваш патшалӑх педагогика университетӗнче музыка енӗпе пӗлӗвне туптанӑ. Пушкӑртстанри тата Чӑваш Енри шкулсенче музыка предмечӗ вӗрентнӗ.

Вӑл — «Шетмӗпе Ҫавал кӗввисем» фестиваль лауреачӗ, Нестер Янкас ячӗллӗ пӗрлӗхӗн 2019 ҫулхи преми лауреачӗ.

forum.na-svyazi.ru сӑнӳкерчӗкӗ

Ака уйӑхӗн 15-мӗшӗнче Василий Евдокимов фотограф пурнӑҫран уйрӑлса кайнӑ.

Василий Леонтьевич 1947 ҫулта Сӗнтӗрвӑрри районӗнчи Тукай ялӗнче ҫуралнӑ. Вӑл профессилле ӑста пулман. Илеме туйма пӗлекенскер сӑн ӳкерме юратнӑ. Ҫапла майпа Шупашкар кӳлмекне епле туни те сӑнланса юлнӑ. Ара, шӑпах унта стройкӑра ӗҫленӗ те ҫав маттур ар.

Шупашкара вӑл иртнӗ ӗмӗрӗн утмӑлмӗш ҫулӗсен ҫурринче куҫса килнӗ. Платник пулса ӗҫленӗ, строительство техникумӗнче каҫхи уйрӑмра вӗреннӗ.

Прораб пулса вӑл Кӳкеҫре «Паха тӗрӗ» фабрикӑн цехӗсене хӑпартма хутшӑннӑ, автобус паркӗсене тунӑ тата ялсене газ кӗртнӗ ҫӗрте ӗҫленӗ.

1979–1983 ҫулсенче Василий Евдокимов Шупашкар кӳлмекне тума хутшӑннӑ. Стройкӑна яланах фотоаппаратпа кайнӑ. fotocheb.ru архивӗнче унӑн 1977-1988 ҫулсенчи икҫӗре яхӑн сӑнӳкерчӗкӗ упранать иккен. 2024 ҫулта Хальхи вӑхӑтри ӳнер центрӗнче унӑн ӗҫӗсен «Рождение Чебоксарского залива» (чӑв. Шупашкар кӳлмекӗ ҫурални) курав та ӗҫленӗ.

forum.na-svyazi.ru сайтран илне сӑнӳкерчӗк

Чӑваш Енӗн промышленность министрӗ пулса ӗҫленӗ Сергей Лекарев Ҫӗнӗ Шупашкар хула пульницинче тӗп врачӑн администраципе хуҫалӑх енӗпе ӗҫлекен ҫумӗ пулса тӑрӑшать.

Сергей Лекарев эпир маларах асӑннӑ ведомствӑра 2020 ҫулхи пуш уйӑхӗнченпе министр ҫумӗ пулса тимленӗ, унтан тепӗр уйӑхран, министр тивӗҫне пурнӑҫлама тытӑннӑ. Тепӗр пилӗк уйӑхран каллех министр ҫумӗ пулса тӑнӑ. 2024 ҫулхи ҫӗртме уйӑхӗнче ӑна министрӑн тивӗҫӗсене пурнӑҫлама шаннӑ, тепӗр икӗ уйӑхран министр тилхепине тыттарнӑ. 2025 ҫулхи авӑн уйӑхӗнче вӑл ӗҫрен кайнӑ. Ун чухнехи ҫав хушура «урӑх ӗҫе куҫнӑран» тесе палӑртнӑ.

Хальхи вӑхӑтра экс-министр Ҫӗнӗ Шупашкарти хула пульницинче тӑрӑшать. Тӗп врач пулса асӑннӑ учреждение Николай Уруков ертсе пырать.

pravdapfo.ru сайтран илнӗ сӑнӳкерчӗк

Чӑваш Енри паллӑ художник тата общество ӗҫченӗ Юрий Пичугин пурнӑҫран уйрӑлса кайнӑ. Вӑл 70 ҫулта пулнӑ.

Юрий Пичугин — Чӑваш Республикин культурӑн тава тивӗҫлӗ ӗҫченӗ, 1996-1999 ҫулсенче Шупашкар хулин тӗп художникӗ пулнӑ.

Вӑл — Шупашкарта 2003 тата 2008 ҫулсенче хӑвӑрт утассипе иртнӗ Европа тата Тӗнче кубокӗсен талисманӗн авторӗ.

Юрий Викторович 1955 ҫулхи раштав уйӑхӗн 3-мӗшӗнче ҫуралнӑ. 2002-2013 ҫулсенче Чӑваш Енри Реклама паракансемпе реклама хатӗрлекенсен ассоциацине ертсе пынӑ, 2020 ҫулччен «Чӗрӗ журналта» блог тытса пынӑ.

Юрий Пичугин художникпа Шупашкарта ыран, ака уйӑхӗн 30-мӗшӗнче, Ведени соборӗнче (вӑл Константин Иванов урамӗнчи 21-мӗш ҫуртра вырнаҫнӑ) 11 сехетре сывпуллашӗҫ.

Шупашкарти 2-мӗш вӑтам шкул сӑнӳкерчӗкӗ

Чӑваш Республикин Экологипе ҫутҫанталӑкпа усӑ курассин ӑслӑлӑхпа тӗпчев институчӗн директорӗ пулма Анжелика Гордеевӑна ҫирӗплетнӗ. Асӑннӑ институт республикӑн Ҫутҫанталӑк ресурсӗсен тата экологи министерствине пӑхӑнать.

Анжелика Владимировна унччен ҫав институтра методологипе ӗҫе йӗркелекен пай пуҫлӑхӗнче тӑрӑшнӑ.

Директор пулма ӑна ака уйӑхӗн 24-мӗшӗнче ҫирӗплетнӗ. Йышӑнӑва республикӑн Министрсен Кабинечӗн Председателӗн тивӗҫне пурнӑҫлакан Олег Марков алӑ пуснӑ.

vk.com/litmusey сӑнӳкерчӗкӗ

К.В. Иванов ячӗллӗ Литература музейӗнче (вӑл Шуашкарти Ленинград урамӗнче вырнаҫнӑ) Юхма Мишши ҫыравҫӑн 90 ҫулхине халалласа «Чӑвашлӑх ҫыравҫи» курав уҫӑлнӑ.

Ҫавна музейра экскурси иртнӗ. Курава уҫма Чӑваш патшалӑх ҫамрӑксен театрӗн артисчӗсем Алевтина Семенова тата Николай Тарасов хутшӑннӑ. Вӗсем «Шурҫамка» спектакль сыпӑкне кӑтартнӑ. Чӑваш патшалӑх пукане театрӗн артисчӗсем Елена Хорькова тата Алина Каликова «Непослушный цыплёнок Шип» спектакльти сыпӑка кӑтартнӑ. Асӑннӑ ӗҫе театрта 20 ҫула яхӑн лартнӑ. Пукане театрӗпе Юхма Мишши 50 ҫула яхӑн туслӑ ҫыхӑну тытать. Унӑн пӗрремӗш пьесине театрта 1976 ҫулта лартнӑ. Унтанпа сцена ҫине унӑн 13 спектакльне кӑтартнӑ.