«Контактри» сӑн

«Пуринчен малтан» телеграм-канал пӗлтернӗ тӑрӑх,Ҫӗмӗрле округӗн «Вперед» хаҫачӗн тӗп редакторне сумлӑ ятпа чысланӑ. Анна Аношина Чӑваш Республикин культурӑн тава тивӗҫлӗ ӗҫченӗн ятне тивӗҫнӗ. Хушӑва Чӑваш Республикин Элтеперӗ Олег Николаев алӑ пуснӑ.

Анна Аношкина район хаҫатне 2017 ҫултанпа ертсе пырать. Издательство ӗҫӗнче вӑл 2006 ҫултанпа вӑй хума тытӑннӑ. Хӑйне пултаруллӑ йӗркелӳҫӗ пек кӑтартса Анна Аношкина ертӳҫӗ должноҫӗ таран ҫитнӗ. Сӑмах май, вӑл пӗлтӗр Мускавра Владимир Путин президентӑн пресс-конференцине хутшӑннӑ.

Чӑваш академи драма театрӗн сӑнӳкерчӗкӗ

Паян Иван Мучи актер, писатель-сатирик ҫуралнӑранпа 130 ҫул ҫитнӗ. Кун пирки Чӑваш патшалӑх академи драма театрӗ халӑх тетелӗнчи хӑйӗн страницинче аса илтерет.

«Иван Мучи – Иван Илларионов ҫыравҫӑн хушма ячӗ. Пурнӑҫ ҫулӗ вӑрӑмах пулман унӑн. Апла пулин те ячӗ-сумӗ халӑхра, республика пичетӗнче лайӑх ҫирӗпленсе юлнӑ.

Граждан вӑрҫи хыҫҫӑн вӑл Хусанти пӗрремӗш чӑваш театрӗнче артист пулса ӗҫленӗ. 1922 ҫулта театрпа пӗрле Шупашкара куҫса килнӗ. Пӗр вӑхӑт «Канаш» хаҫат редакцийӗнче вӑй хунӑ. И.Мучи чӑвашсен сатира журналне, «Капкӑна», пуҫласа яраканӗ», — аса илтернӗ хыпарта.

cheb-centr.soc.cap.ru сӑнӳкерчӗкӗ

Шупашкарта пурӑнакан Вера Ятманова паян 102 ҫул тултарнӑ. Кинемее ҫав ятпа Шупашкар хулинчи халӑхӑн социаллӑ ыйтӑвӗсене тивӗҫтерекен комплекслӑ центрӑн ӗҫченӗсем саламланӑ. Юлашки вӑхӑтра кинемее асӑннӑ учрежденин социаллӑ ӗҫченӗ киле пырса пулӑшса тӑрать.

Вера Ятманова Етӗрне районӗнче ҫуралнӑ. Вӑл вӑхӑтри нумай ҫын пек вӑрҫӑ вӑхӑтӗнчи тата ун хыҫҫӑнхи ҫулсенчи терте те курнӑ. Кайран, Ял хуҫалӑх институтӗнчен вӗренсе тухсан, зоотехникра ӗҫленӗ. Кайран вӗсем упӑшкипе Шупашкар куҫса килнӗ, кунта Электроаппаратура заводне ӗҫе вырнаҫнӑ.

Мӑшӑр икӗ хӗр ҫуратса ӳстернӗ. Паян ватӑ ҫынна мӑнукӗ тата мӑнукӗн икӗ ачи пӑхать, социаллӑ ӗҫчен вара пулӑшса тӑрать.

Халӗ ватӑ ҫын урама тухса ҫуреймест-ха, анчах хваттерте утса ҫӳрет. вӑй ҫитернӗ ӗҫе хӑех пурнӑҫлать.

vk.com/chansamble21 сӑнӳкерчӗкӗ

Ӗнер, авӑн уйӑхӗн 24-мӗшӗнче, Лолита Чекушкина композитор 60 ҫул тултарнӑ.

Лолита Васильевна 1972-1980 ҫулсенче С. Максимов ячӗллӗ ача-пӑча музыка шкулӗнче фортепиано класӗнче вӗреннӗ. Унтан Шупашкарти Ф. Павлов ячӗллӗ музыка училищинче тата Чулхулари М. Глинка ячӗллӗ патшалӑх консерваторийӗнче вӗреннӗ.

1989-2000 ҫулсенче Вырӑс драма театрӗнче музыка пайӗн заведующийӗнче тӑрӑшнӑ, преподаватель те пулса тимленӗ. Республикӑри тӗрлӗ культура учрежденийӗпе тачӑ ҫыхӑну тытса ӗҫлет, вӗсем валли кӗвӗ-ҫемӗ хайлать.

Комсомольски округӗнчи Владимир Мунтайкина «Чӑваш Республикин тава тивӗҫлӗ механизаторӗ» хисеплӗ ят панӑ. Ку наградӑна вӑл ял хуҫалӑх тытӑмӗнче нумай ҫул тӑрӑшса ӗҫленӗшӗн тивӗҫнӗ.

Шӑпа ӑна ҫамрӑк чухнех механизатор профессийӗ патне илсе ҫитернӗ – 1977 ҫулта «Урожай» колхозра ӗҫлеме тытӑннӑ. Канашри училищӗре професси илсен, салтака кайса килсен хӑйӗн пурнӑҫне ял хуҫалӑхӗпе ҫыхӑнтарнӑ.

Халӗ кашни ир вӑл уя тухать, сехечӗ-сехечӗпе руль умӗнче ларать. Ака-суха-и, тыр-пул пухса кӗртмелле-и, выльӑх апачӗ хатӗрлемелле-и – йӑлтах лайӑх пурнӑҫлать Владимир Васильевич.

"Контактри" сӑн

Пирӗн ентеш, Ҫӗнӗ Шупашкар пики Дарья Нагорнова, «Титаны» кӑларӑма хутшӑнӗ.

Вӑл – спорт гимнастики енӗпе тӗнче чемпионки, Олимп вӑййисен кӗмӗл призерӗ. Дарья ТНТ телеканалти реалити-шоура тупӑшӗ.

Вӑл кӑларӑмӑн пӗрремӗш сезонне хутшӑннӑ ӗнтӗ. Анчах улттӑмӗш тапхӑр хыҫҫӑн вӑйӑран тухса ӳкнӗ. Хальхинче вӑл унта мӑшӑрӗпе, Олимп вӑййисен чемпионӗпе Никита Нагорныйпа, пӗрле хутшӑнӗ.

Кӑларӑмӑн виҫҫӗмӗш сезонӗ авӑн уйӑхӗҫ 21-мӗшӗнче 21 сехетре пуҫланӗ.

Чӑваш академи драма театрӗн сӑнӳкерчӗкӗ

Паян Чӑваш патшалӑх академи драма театрӗн ӗҫченӗн Галина Зотован юбилей иккен. Культура учрежденийӗн халӑх тетелӗнчи пабликӗчи хыпарта хӗрарӑм миҫерине каламан.

Галина Зотова бутафори хатӗрлекен ӳнер мастерскойӗн ертӳҫинче тӑрӑшать иккен.

«Галина Николаевна, сире ҫирӗп сывлӑх, ырлӑх-пурлӑх, телей, савӑнӑҫ тата вӑрӑм кун-ҫул сунатпӑр! Сирӗн ӗмӗтӗрсем яланах пурнӑҫланччӑр, пурнӑҫӑрта савӑнӑҫлӑ та кӑмӑллӑ самантсем кашни кун пулччӑр.

Ӗҫре ҫитӗнӳсем хавхалантарччӑр, ҫемьере юратупа татулӑх хуҫаланччӑр», — саламласа ҫырнӑ хыпарта.

"Контактри" сӑн

Улатӑрти нимеҫӗ Зоя Бусоргина 60 ҫултан иртнӗ пулсан та ҫамрӑксенчен юлмасть. Вӑл вӗсемпе тачӑ ҫыхӑнса ӗҫлет.

Хальхи вӑхӑтра ав Зоя Витальевна Чулхулара иртекен Ҫамрӑксен фестивальне хутшӑнать. Унта 450 яхӑн нимеҫӗ мероприятие ирттерме пулӑшать. Ҫав шутра – пирӗн ӗнтеш те.

Зоя Витальевна унта хӑнасене кӗтсе илет. Вӑл обществӑшӑн питӗ усӑллӑ пуласшӑн.

chgign.ru сӑнӳкерчӗкӗ

Нумаях пулмасть Чӑваш Енӗн Наци вулавӑшӗнче «Ачасен чи ҫывӑх тусӗ» ятлӑ куҫса ҫӳрекен куравне йркеленӗ. Экспозицие Николай Ытарай ача-пӑча ҫыравҫин пурнӑҫӗпе тата пултарулахӗпе паллаштарас тӗллевпе йӗркеленӗ.

Мероприяти вӑхӑтӗнче тухса калаҫакансем хушшинче Чӑваш патшалӑх гуманитари ӑслӑлӑхӗсен институчӗн ӑслӑлӑх ӗҫченӗ Надежда Ефремова-Ильина та пулнӑ. Вӑл Н.В. Васильев (Ытарай) пурнӑҫӗпе пултарулӑхӗ ҫинчен каласа панӑ. Николай Ытарай пултаруллӑ ача-пӑча ҫыравҫи кӑна мар, тӑван халӑх сӑмахлӑхне ырми-канми пуҫтаракан пулни, Ытарай Тӗпчев институчӗн штатра тӑман ӗҫченӗ пулнӑ май комплекслӑ фольклор экспедицийӗсене тулай чӑвашӗсем патне тухса ҫӳрени ҫинчен каласа кӑтартнӑ. Кун пирки институтра пӗлтернӗ.

chgign.ru сӑнӳкерчӗкӗ

Чӑваш патшалӑх гуманитари ӑслӑлӑхӗсен институчӗн ӗҫченӗсем Алтайра «Алтай – прародина тюрков. К истории зарождения тюркской цивилизации» (чӑв. Алтай — тӗрӗксен тӑван ҫӗршывӗ. Тӗрӗк цивилизацийӗ пуҫланса кайнин историйӗ) ятпа иртекен II Пӗтӗм тӗнчери конференцие хутшӑннӑ.

Мероприяти авӑн уйӑхӗн 16-18-мӗшӗсенче иртнӗ. Ӑна славянсемпе тӗрӗксен тӗнчине, этносӗ пуҫланса кайнине халалланӑ. Унта Раҫҫейри, Беларуҫри, Венгринчи, Казахстанри, Кӑркӑстанри, Узбекистанри, Туркменистанри, Азербайджанри патшалӑх ӗҫченӗсем, историксем, тюркологсем, алтаистсем, археологсем, лингвистсем пырса ҫитнӗ. Чӑваш Енрен форума гуманитари ӑслӑлӑхӗн директорӗ, филологи наукисен докторӗ Юрий Исаев тата ӑслӑлах ӗҫченӗ, филологи наукисен кандидачӗ Эдуард Лебедев хутшӑннӑ.