Пелегейӑн архивӗнчи сӑн

Республика кунӗнче Шупашкара Пелагея килӗ. Вырӑс юррисене юрлаканскер Пӗтӗм Раҫҫейри «Раҫҫей ҫӑл куҫӗсем» фестивалӗн гала-концерчӗ хыҫҫӑн сцена ҫине тухӗ. Концерт Хӗрлӗ тӳремре пулӗ.

Кӑҫал та «Раҫҫей ҫӑлкуҫӗсем» фестиваль, Пӗтӗм чӑвашсен Акатуйӗ, «Руҫ ӑстисем» Пӗтӗм Раҫҫейри конкурс иртӗҫ. Ҫавӑн пекех ытти мероприятисем пулӗҫ.

Кӑҫал Республика кунӗ Шупашкарта тата Шупашкар округӗнче иртӗ. Аса илтерер: пӗлтӗр республикӑн тӗп уявне Раҫҫейри паллӑ юрӑҫ Татьяна Кортукова килнӗ.

cap.ru сайтри сӑн

Чӑваш Республикинче инкеклӗ лару-тӑру режимне йышӑнас ыйтӑва пӑхса тухаҫҫӗ. Ку паян пилотсӑр вӗҫекен аппаратсем тапӑннипе ҫыхӑннӑ.

«Штабра йышӑнусем турӑмӑр, республика пӗлтерӗшлӗ инкеклӗ лару-тӑру режимне йышӑнасси пирки ыйтӑва пӑхса тухатпӑр», — тенӗ республика вице-премьерӗ Сергей Артамонов.

Аса илтерер: паян шкулсене дистанци мелӗпе вӗренме янӑ, Шупашкарта общество транспортне вӑхӑтлӑха ҫӳреме чарнӑ. Халӗ экспертсем тӑкака шутлаҫҫӗ.

Хальхи вӑхӑтра 16 ҫын аманни пирки пӗлтереҫҫӗ. Шел те, пӗр ҫын вилнӗ.

МАХри «Хыпар-Вести Чувашии» каналтан илнӗ сӑнӳкерчӗк

Красноармейскинче «Ял пурнӑҫӗ» район хаҫачӗн парнисемшӗн ӑмӑрту иртнӗ. Старта ҫӑмӑл атлетсем тухнӑ.

МАХри «Хыпар-Вести Чувашии» каналта пӗлтернӗ тӑрӑх, ҫӑмӑл атлетсен эстафетине кӑҫал Раҫҫейри Халӑхсен пӗрлӗхӗн тата Чӑваш Республикинчи Халӑхсен туслӑхӗн ҫулталӑкне халалланӑ.

Ӑмӑртӑва садике ҫӳрекенсен, шкул ачисен, предприяти-организацире ӗҫлекенсен, ветерансен пӗрлештернӗ 23 команди хутшӑннӑ.

Спортсменсене Красноармейски округӗн пуҫлӑхӗн ҫумӗн тивӗҫӗсене пурнӑҫлакан Олег Николаев, «Хыпар» издательство ҫурчӗн директорӗ - тӗп редакторӗ Дмитрий Моисеев, «Ял пурнӑҫӗ» хаҫат редакторӗ Валентина Багадерова ӑнӑҫу суннӑ.

Ҫӗнтерӳҫӗсене кубоксемпе, дипломсемпе, медальсемпе тата асӑнмалӑх парнесемпе хавхалантарнӑ.

mintrud.cap.ru сӑнӳкерчӗкӗ

Йӗпреҫ районӗнчи ватӑсем ретроташӑ каҫне пухӑннӑ. Унта вӗсем совет саманинчи евӗр тумланса пуҫтарӑннӑ, ташӑ каҫӗнче иртнӗ ӗмӗрӗн 60-70-мӗш ҫулӗсенчи юрӑ-кӗвӗ янӑранӑ.

Дискотекӑна пухӑннисем ҫамрӑк чухне юрра-кӗвве пластинкӑсемпе тата катушкӑллӑ магнитофонпа итленине аса илнӗ. Дискотека вӑхӑтӗнче соет саманинчи хитсем: «Песняры» вокалпа инструментсен ансамблӗн, «Самоцветы» ушкӑнӑн, Муслим Магомаевӑн тата ют ҫӗршыври композицисем янӑранӑ. Ара шӑпах ҫав кӗвӗ-ҫемӗпе хӑй вӑхӑтӗнче твист, рок-н-ролл тата лирикӑлла вальс ташланӑ.

«Эпӗ хама ҫак каҫ ҫамрӑк чухнехилле туйса савӑнтӑм», — тесе каланӑ ретроташӑ каҫне хутшӑннӑ Ирина Петрова тава тивӗҫлӗ канури ватӑ.

motosota.ru сайтри сӑн

Лайӑх хыпар: кӗҫӗх Ҫӗнӗ Шупашкартан Куславкка хулине автобус ҫӳреме тытӑнӗ.

Ҫӗнӗ маршрут 515 номерпе пулӗ. Вӑл ыран, ҫу уйӑхӗн 4-мӗшӗнчен, ҫӳреме пуҫлӗ.

Маршрут ҫинче пӗтӗмпе 11 автобус пулӗ. Вӗсем кашни 60 минутран ҫӳрӗҫ. Куславккана ҫити билет хакӗ — 277 тенкӗ. Билета укҫапа та , карттӑпа та туянма май пулӗ.

Сӑмах май, Ҫӗнӗ Шупашкарпа Куславкка хушшинче – 93 ҫухрӑм.

«Чеб.ру» сайтри сӑн

Ырантан Шупашкартан Махачкалана тата Калининграда самолетпа вӗҫме май пулӗ. Рейссене «Аэрофлот» авиакомпани пурнӑҫлӗ.

«Шупашкар – Калининград» рейс эрнере 4 хут пулӗ: ытларикун, кӗҫнерникун, эрнекун тата вырсарникун. Рейс Шупашкартан 23:15 сехетре вӗҫсе тухӗ те Калининграда 01:45 сехетре ҫитӗ.

«Шупашкар – Махачкала» рейс эрнере 3 хут пулӗ: тунтикун, юнкун тата шӑматкун. Вӑл Шупашкартан 23:50 сехетре тухса Дагестана 02:40 сехетре ҫитӗ.

Ҫапла ырантан Шупашкарти аэропорт талӑкӗпех ӗҫлеме тытӑнӗ. Махачкалапа Калиниграда рейссем юпа уйӑхӗччен вӗҫӗҫ.

vk.com/chuv_kray пабликран илнӗ сӑнӳкерчӗк

Андрей Малаховӑн телекӑларӑмне чӑваш фермерне йыхравланӑ.

Ҫӗршыври паллаӑ телеертӳҫӗ Андрей Малахов ертсе пыракан «Привет, Андрей!» кӑларӑмне ентешӗмӗре чӗннӗ. Ҫав ҫын Элӗк муниципаллӑ округӗнчи Кирилл Степанов фермер.

Шоуна «Россия 1» (чӑв. Раҫҫей 1) каналпа кӑтартаҫҫӗ.

Чӑваш каччи телешоун черетлӗ кӑларӑмӑн хӑни пулӗ. Вӑл ӳкерӗннӗ передачӑна ҫу уйӑхӗн 2-мӗшӗнче эфира кӑларӗҫ.

Ялта ӳснӗ Кирилл ачаранпах ял хуҫӑлӑхӗпе кӑсӑкланнӑ. Малтан мускус кӑвакал ӗрчетсе пӑхнӑ, кайран хуҫалӑха пысӑклатса пынӑ. Степановсен картишӗнче паян 100 ытла ӑратлӑ выльӑхпа кайӑк-кӗшӗк, ҫав шутра павлинпа страус та пур. Унсӑр пуҫне пахчаҫимӗҫ тата тӗрлӗ чечек ӳстереҫҫӗ.

«Юрлама эпӗ пӗлместӗп, анчах Андрей валли парне хатӗрлерӗм. Мӗнле парне хатӗрленине сирӗн курмаллах», — тесе ҫырнӑ Кирилл хӑйӗн блогӗнче.

rakitnoeadm.gosuslugi.ru сайтри сӑн

40 ҫулти хӗрарӑм Аслӑ Британири арҫын вилмелле чирлӗ тесе ӗненнӗ те укҫасӑр тӑрса юлнӑ. Ҫапла вӑл ӑна 800 пин тенкӗ ытла куҫарса панӑ.

Ку Красноармейски округӗнчи хӗрарӑмпа пулса иртнӗ. Вӑл сусӑр ача ӳстерет, тӗрлӗ ыркӑмӑллӑх чатӗсенче тӑрать. Вӗсенчен пӗринче ун патне хӑйӗнпе «ют ҫӗршыв арҫынни» тесе паллаштарнӑ ҫын ҫырнӑ. Вӑл чирлӗ имӗш, виличчен сусӑр ачасене 2,5 млн доллар парса хӑварасшӑн, укҫана посылкӑпа янине пӗлтернӗ. Хайхи арҫын укҫан /5 пайне хӗрарӑма хӑйӗн валли хӑварма ирӗк панӑ.

Анчах хӗрарамӑн таможньӑшӑн, ытти тӑкакшӑн кӑна тӳлемелле имӗш. Ҫапла вӑл хӑй пухса пынӑ 820 ытла пин тенкине куҫарса панӑ.

cap.ru сайтри сӑн

Кӑҫал Чӑваш Енре Ҫӗнтерӳ парачӗ тата уяв салючӗ пулмӗ. Кун пирки ЧР Элтеперӗ Олег Николаев халӑх тетелӗнчи страницинче пӗлтернӗ.

Элтепер ӑнлантарнӑ тӑрӑх, ку халӑха хӑрушсӑрлӑхпа тивӗҫтерессипе ҫыхӑннӑ. Кӑҫал «Вилӗмсӗр полк» акци те куҫӑн майпа иртмӗ. Анчах, Олег Алексеевич каланӑ тӑрӑх, Ҫӗнтерӳ кунӗ ячӗпе уяв пулӗ, мероприятисем вырӑнти лапамсенче иртӗҫ. Кашни вырӑн тӗлӗшпе хӑрушсӑрлӑх паспортне ҫирӗплетнӗ, вӗсенче хӑрушсӑрлӑх службисем ӗҫлӗҫ.

Аса илтерер: 2024 ҫулта та Шупашкарта Ҫӗнтерӳ парачӗ, салют пулман. Пӗлтӗр вара иртнӗ.

Малашне Ҫӗрпӳрен Шупашкара ҫӳрекен 173-мӗш маршрутпа «Каскад» суту-илӳ центрӗнче вырнаҫнӑ «Пехет» агромаркета ҫитме май пулӗ.

Халӗ маршрутка суту-илӳ центрӗ патӗнче аялти парковкӑра чарӑнать. Ку – маршрут вӗҫӗ. ЧР Транспорт министерстви ӑнлантарнӑ тӑрӑх, маршрута халӑха «Пехете» ҫӳреме меллӗ пултӑр тесе тӑснӑ.

Автобуссем кунсерен кашни 10-20 минутран ҫӳреҫҫӗ. Ирхине Шупашкартан пӗрремӗш рейс 6:20 сехетре тухать, Ҫӗрпӳрен – 5:20 сехетре. Юлашки рейс Шупашкарта – 20:40 сехетре, Ҫӗрпӳре – 20:00 сехетре.

Маршрут Ҫӗрпӳрен тухса Шупашкарти Хулаҫум вокзалӗ патне ҫитет, унтан «А.Николаев урамӗ» чарӑну урлӑ Ленин проспекчӗпе, Карл Маркс урамӗпе каять, «Модӑсен ҫурчӗ» чарӑнӑва ҫитсе Президент бульварӗпе «Каскад» патне хӑпарать.