cap.ru сайтри сӑн

Тӑвай округӗнче кӗҫӗн суд приставӗ Сергей Тимофеев парӑмҫӑ патне килне пынӑ. Унӑна ӑна суд приставӗсен уйрӑмне илсе ҫитермелле пулнӑ.

Анчах кил умне ҫитнӗ те тӗтӗм шӑршине туйнӑ. Вӑл пӳртрен тухнӑ. Алӑкӗ те уҫах пулнӑ. Шалта ҫын пулма пултарать тесе пристав унта кӗнӗ. Вӑл тӗпелте плита ҫинче кастрюль ларнине асӑрханӑ, унран тӗтӗм йӑсӑрланса тухнӑ.

Темиҫе минутран ҫулӑм тухма пултарнӑ. Пристав плитана сӳнтернӗ, кастрюле унтан илнӗ те пӳрте уҫӑлтарнӑ.

Кайран ҫакӑ палӑрнӑ: кил хуҫи апат пӗҫерме лартнӑ та кӳрши патне каҫнӑ. Мӗн пулса иртнине пӗлсен вӑл пристава чун-чӗререн тав тунӑ.

Ҫапах пристав хӑйӗн ӗҫне пурнӑҫланӑ: парӑмҫа суд приставӗсен уйрӑмне илсе ҫитернӗ.

Чӑваш Енре йӑлари хытӑ каяша ятарлӑ компани турттарма тытӑннӑранпа ку пулӑшушӑн килсерен укҫа тӳлемелле. Анчах пурте тӳлемеҫҫӗ иккен. «Ситиматик Чувашия» компани пӗлтернӗ тӑрӑх, парӑмлисен йышӗ 82 пин ҫынна ҫитсе кайнӑ. Йӑлари хытӑ каяша турттаракан регионти оператор парӑма шыраса илессипе калӑпӑшлӑ акци ирттерессине пӗлтернӗ. Ун вӑхӑтӗнче парӑм 500 тенкӗрен пысӑкрах пулсан та ӑна шыраса илесшӗн.

Компанире пӗлтернӗ тӑрӑх, ҫынсем маларах парӑм пысӑк пулмасан ӑна тӳлемесен те тесе шухӑшлама пултарнӑ. Ятарлӑ асӑрхаттару хучӗ ярса панӑ хыҫҫӑн ҫынсене малтан кӑмӑлпа тӳлеме вӑхӑт парӗҫ, кайран ирӗксӗр шыраса илӗҫ. Ку ӗҫе суд тата суд приставӗсем урлӑ тӑвӗҫ. Суд е суд приставӗсем урлӑ шыраса илнӗ чух патшалӑх пошлинине тата ытти тӑкака та тӳлеме тивӗ.

www.cap.ru сӑнӳкерчӗкӗ

Чӑваш Енри хӑш-пӗр ҫемьене пушар пирки систерекен хатӗрсем тӳлевсӗр лартса парӗҫ. Вӑл хатӗрсене нумай ачаллӑ ҫемьесенче, пурнӑҫри йывӑр лару-тӑрури ҫемьесенче, социаллӑ хӑрушлӑхри ҫемьесенче вырнаҫтарӗҫ.

Пушар пирки систерекен хатӗре (вӑл тӗтӗм тухсан сасӑ кӑларса асӑрхаттарать) вырнаҫтарма республика хыснинчен 1,4 миллион тенке укҫа уйӑрнӑ.

Инкеклӗ ӗҫсен министерствин Чӑваш Енри управленийӗ ыйтнипе укҫана Улатӑр, Красноармейски тата Тӑвай районӗсене валеҫсе панӑ. Унччен вӑл тӗллевпе кӗмӗле ытти муниципалитета та уйӑрса панӑ.

Патшалӑх хыснинчен уйӑрнӑ укҫапа ятарлӑ ҫав хатӗрсене туянӗҫ тата вырнаҫтарса парӗҫ.

«Контактра» халӑх тетелӗнчи сӑн

Кӗҫех Улатӑр хулинче историри пулӑмсене курма пултарӑпӑр. Ҫурла уйӑхӗн 28- мӗшӗнче хула хӗрринче 1812 ҫулхи пулӑмсене кӑтартӗҫ.

Авалхи тумтир тӑхӑннӑ ҫӗр ытла реконструктор Тӑван ҫӗршыв вӑрҫин ҫапӑҫӑвӗсене кӑтартӗҫ. Ҫакна пирӗн паллӑ ентеш Петр Кикин ҫуралнӑранпа 250 ҫул ҫитнине халаллӗҫ. Вӑл Бородино ҫывӑхӗнче паттӑррӑн ҫапӑҫнӑ, Мускаври Ҫӑлавҫӑ Христос храмӗн строительствине пысӑк тӳпе хывнӑ.

Ҫак кун Улатӑрта артиллеристсемпе пехотинецсем вырӑс ҫарӗсен хӑватлӑ контратакине кӑтартӗҫ. Тӗтӗм эффекчӗ ҫав тапхӑра тата лайӑхрах туйма май парӗ.

Ҫапӑҫу хыҫҫӑн курма килнисене пӑтӑпа сӑйлӗҫ. Ҫавӑн пекех ҫапӑҫу туса кӑтартнисемпе сӑн ӳкерӗнме май пулӗ.

zebra-tv.ru сайтри сӑн

Вӑрмар округӗнчи 22 ҫулти каччӑ хӗрпе пулас тесе 300 пин тенкӗсӗр тӑрса юлнӑ.

Хайхи каччӑ Шупашкар хулинче темиҫе сехетлӗхе хваттер тара илнӗ те «каҫхи лӗпӗше» чӗнме шухӑшланӑ. Вӑл сайта кӗрсе хӗр суйланӑ, ун патне шӑнкӑравланӑ. Лешӗ телефон ҫыхӑнӑвӗшӗн тӳлеме 2900 тенкӗ ыйтнӑ. Унтан килнӗшӗн страховка тума 29500 тенкӗ куҫарма хушнӑ. Хайхи «хӗр» юлашки тӳлев ун патне ҫитмен тесе ӗнентернӗ, каччӑна икӗ хут ытларах куҫарма ӳкӗте кӗртнӗ.

Кайран каллех тӗрӗс мар куҫарнӑ-мӗн, 59 пин тенкӗ ыйтнӑ. «Хӗр» каччӑна хӑрата-хӑрата татах та татах укҫа куҫарттарнӑ.

Ҫапла каччӑ 300 пин тенкӗ ытла куҫарнӑ, анчах нимӗнле «хӗре» те кӗтсе илеймен. Улталаннине ӑнлансан вӑл полицие кайнӑ.

«Лиза Алерт» шыравпа ҫӑлав отрячӗн архивӗнчи сӑн

Элӗк тӑрӑхӗнче вуннӑмӗш кун ӗнтӗ 36 ҫулти арҫынна шыраҫҫӗ. Ку ӗҫе «Лиза Алерт» шыравпа ҫӑлав отрячӗн хастарӗсем те хутшӑнаҫҫӗ.

Андрей Николаевич Долгов килтен утӑ уйӑхӗн 3-мӗшӗнче тухса кайнӑ. Унтанпа вӑл ӑҫта пулни паллӑ мар. Андрей Долгов Элӗкре пурӑнать.

Вӑл 164 сантиметр ҫӳллӗш, ырхан кӗлеткеллӗ, ҫӳҫӗ тӗттӗм, куҫӗ хӑмӑр. Килтен кайнӑ чухне тӗттӗм хӗрлӗ тӗслӗ куртка, камуфляж тӗслӗ шӑлавар, ҫавӑн тӗслех калуш тӑхӑннӑ пулнӑ.

Ҫак арҫын пирки мӗн те пулин пӗлетӗр пулсан ҫак номерсемпе шӑнкӑравлама ыйтаҫҫӗ: 8 800 700-54-52 (Раҫҫейре тӳлевсӗр), 89777084704 Кирейчик (Екатерина) .

Шупашкарта утӑ уйӑхӗн 21-мӗшӗнче ЧР Наци вулавӑшӗнче уҫӑ шахмат турнирӗ иртӗ. Ӑна Пӗтӗм тӗнчери шахмат кунне халалласа йӗркелеҫҫӗ.

Мероприяти «Чӑваш Енри ҫырласем» проект пулӑшнипе йӗркеленет. Унта пурте, сывлӑх енчен кӑлтӑксем ҫук тӑк, хутшӑнма пултараҫҫӗ.

Ҫӗнтерӳҫӗсемпе призерсене 10 категорире палӑртӗҫ. Вӗсене медальсемпе, дипломсемпе тата мероприяти партнерӗ тивӗҫтернӗ ҫӗр ҫырлипе чыслӗҫ. Тӗп парне – пӗр ещӗк ҫӗр ҫырли.

Палӑртса хӑварар: мероприяти партнерӗ – хресчен-фермер хуҫалӑхӗн пуҫлӑхӗ Валерий Егоров.

«Контактри» сӑн

Канаш округӗнчи ЗАГС пайне Алексеевсене чыслама чӗннӗ. Николай Алексеевичпа Алевтина Николаевна пӗрле 55 ҫул пурӑнаҫҫӗ, вӗсем изумруд туя паллӑ тунӑ.

Вӗсен юратӑвӗ тӑван ялӗнчех, Ухманра, ҫуралнӑ. Вӗсем пӗрле ӳснӗ, пӗрле вӗреннӗ. Юрату туйӑмӗ вара ҫамрӑксен чӗринче Николай Алексеевич салтакран таврӑннӑ хыҫҫӑн хӗмленме тытӑннӑ.

Мӑшӑр ӗмӗр тӑршшӗпе тӳрӗ кӑмӑлпа ӗҫленӗ. Николай Алексеевич Ленин ячӗллӗ колхозра техника эксплуатацийӗ енӗпе инженерта тӑрӑшнӑ. Алевтина Николаевна вара Ухман вӑтам шкулӗнче кӗҫӗн классене вӗрентнӗ.

Алексеевсем виҫӗ ача ҫуратса ӳстернӗ. Халӗ сакӑр мӑнукӗпе, икӗ кӗҫӗн мӑнукӗпе савӑнса пурӑнаҫҫӗ.

zur-ufa.ru сайтри сӑн

Ҫӗмӗрле округӗнче урнӑ чире тупса палӑртнӑ. Ку Мӑн Улхаш ялӗнче пулнӑ.

Йытӑ урнӑ чирпе аптӑранине лабораторире ҫирӗплетсен ЧР Элтеперӗн хушӑвӗпе килӗшӳллӗн ҫак ялта карантин пулнине палӑртнӑ.

Урнӑ чирпе аптӑранӑ йытӑ — Совет урамӗнчи 46-мӗш ҫуртра пурӑнакансен. Ҫак вырӑнтан 1,9 ҫухрӑм радиусра карантин шутланать. Ӑна пӑрахӑҫличчен чӗрчунсене илсе тухма тата илсе кӗме, чӗрчунсен ярмӑрккисене ирттерме, тискер чӗрчунсене илсе тухма юрамасть.

Ҫынсене вара килти чӗрчунсене ирӗке кӑларма сӗнмеҫҫӗ, вӗсен кирек мӗнле чир палӑрсанах ветеринара чӗнмелле.

«Контактри» сӑн

Чӑваш Республикинчи шыравҫӑсем 82 ҫул каялла Тӑван ҫӗршывӑн Аслӑ вӑрҫинче пуҫ хунӑ хӗр-медик виллин юлашкисене тупнӑ.

Вӗсем хальхи вӑхӑтра Карелире ӗҫлеҫҫӗ. Унта 1944 ҫулта Видлица ҫывӑхӗнче хӑрушӑ ҫапӑҫусем пынӑ. Шӑпах унта совет салтакӗсем Ладога кӳлли патӗнче тӑшмана каялла чакарнӑ.

Чӑваш Енри шыравҫӑсемпе ытти регионтисем те ӗҫлеҫҫӗ. Вӗсемпе пӗрле Хӗрлӗ Ҫарӑн медицина службин кӗҫӗн лейтенанчӗн виллин юлашкисене чавса тупнӑ.

Халӗ ҫав вырӑнта шыравсем малалла пыраҫҫӗ. Тен, хыпарсӑр ҫухалнӑ ытти салтакӑн виллин юлашкисене тупма май килӗ.