mintrud.cap.ru сӑнӳкерчӗкӗ

Ӗнер, пуш уйӑхӗн 31-мӗшӗнче, республикӑн ӗҫ тата социаллӑ хӳтлӗх министрӗ Алена Елизарова асӑннӑ ведомствӑна пӑхӑнса тӑракан учрежденисен директорӗсемпе тӗл пулнӑ. Министр 2026 ҫул валли хыснаран уйӑрнӑ укҫапа пӗлсе усӑ курмалли пирки сӑмах хускатнӑ, ҫав шутра — тӗплӗ юсав ирттернӗ чухне тата социаллӑ инфраструктурӑна юсаса ҫӗнетнӗ вӑхӑтра.

Республикӑра ваттисен ҫурчӗсене юсаса ҫӗнетесшӗн. Йӳҫкассинчи, Турханти психоневрологи диспансерӗсене, Шомикпа Атратьри интернат-ҫуртсене юсама 104 миллиона яхӑн тенкӗ уйӑрӗҫ. Кӳкеҫри интернат-ҫуртӑн пурлӑхпа техника базине ҫӗнетесшӗн, Шупашкарти ачасен реабилитаци центрӗ валли тӗрлӗ оборудовани туянасшӑн. Ун валли тепӗр 11 миллион тенкӗ уйӑрма палӑртнӑ.

«Контактри» сӑн

Раҫҫей тава тивӗҫлӗ юрӑҫи ШАМАН Канаш хулинче кинемейрен пӗр витре ҫӗрулми туяннӑ. Кун пирки вӑл «Контактра» халӑх тетелӗнчи страницинче пӗлтернӗ.

Юрӑҫ Канашра Пензӑна кайнӑ чухне чарӑннӑ. Пуйӑс кӗтнӗ чухне вара вӑл хулапа паллашма шухӑшланӑ. Вокзал ҫывӑхӗнче, ӑна хирӗҫ урамра, ШАМАН сутакан кинемейрен пӗр витре ҫӗрулми туяннӑ, ытлашши укҫана каялла илмен.

«Чукун ҫул мана ҫӗнӗ хуласемпе малалла паллаштарать. Хальхинче пуйӑс кӗтнӗ вӑхӑтра илемлӗ Канаш хулипе паллашрӑм. Пуйӑса каялла телейлӗ таврӑнтӑмӑр, пушӑ алӑпа мар», — ҫапла ҫырнӑ юрӑҫ хӑйӗн страницинче.

Чӑваш Енре вӑхӑтлӑха теле- тата радиовещание чарса лартӗҫ. Анчах пур округра та мар. Ку пилӗк округа пырса тивет.

Паян 10:00-16:00 сехетсенче Куславкка округӗнчи Елчӗк ялӗнче эфир пулман. 9 сехетрен пуҫласа 16 сехетчен вара Етӗрне округӗнчи Канаш ялӗнче трансляци пулман.

Ыран, акан 1-мӗшӗнче, 11:00-17:00 сехетсенче Елчӗк округӗнчи Аслӑ Елчӗк ялӗнче эфира чарса лартӗҫ. Ака уйӑхӗн 2-мӗшӗнче вара 10 сехетрен пуҫласа 16 сехетчен Вӑрнар округӗнчи Малти Ишек ялӗнче трансляцие чарӗҫ. Ака уйӑхӗн 3-мӗшӗнче Сӗнтӗрвӑрри округӗнчи Хуракасси ялӗнче 10 сехетрен пуҫласа 16 сехетчен эфира чарӗҫ.

ЧР Цифра министерстви пӗлтернӗ тӑрӑх, планра палӑртнӑ профилактика ӗҫӗсем пулӗҫ.

cap.ru сайтри сӑн

Чӑваш Енре ака уйӑхӗн 10-мӗшӗнчен пуҫласа пушара хирӗҫле режим вӑйра пулӗ. Ку йышӑнӑва Чӑваш Ен Правительствин председателӗ Сергей Артамонов алӑ пуснӑ.

Документра пушар тухас хӑрушлӑх пысӑк территорисене палӑртнӑ. Унта 236 ял-сала, ача-пӑча уйлӑхӗсем, сад пӗрлешӗвӗсем кӗнӗ.

Аса илтерер: пушара хирӗҫле режима кашни ҫулах йышӑнаҫҫӗ, анчах тӗрлӗ вӑхӑтра. Ку ҫанталӑк мӗнле пулнинчен килет. Акӑ, тӗслӗхрен, 2021 ҫулта кун пек режим акан 25-мӗшӗнче кӑна вӑя кӗнӗ. Юлашки виҫӗ ҫулта вара ака уйӑхӗн 1-мӗшӗнче палӑртнӑ.

«Контактра» халӑх тетелӗнчи сӑн

Юр кайса пӗтмен-ха, анчах Чӑваш Енре хура ҫӗленсем хӗл ыйхинчен вӑраннӑ.

Ун пек ҫӗлене «Сӑрҫи» зповедникӑн Улатӑр пайӗнче асӑрханӑ. Ӑна унта тӑрӑшакан специалистсем курнӑ.

Хура ҫӗлен ӑшӑ асфальт патне шуса тухнӑ. Хӑрушлӑх пуррине сиссен кӗпер айне пытаннӑ. Кайран вара, темиҫе минутран, каялла таврӑнса ҫӑмхаланса выртнӑ.

Ҫанталӑк сивӗрех пулнӑран хальлӗхе ҫӗленсем питех хастар мар.

cap.ru сайтри сӑн

Нумаях пулмасть Правительство ларӑвӗнче республикӑри пассажир транспорчӗн аталанӑвне сӳтсе явнӑ.

Пӗлетӗр ӗнтӗ: муниципалитет предприятийӗсен никӗсӗ ҫинче патшалӑх перевозчикне йӗркеленӗ, вӑл ЧР Транспорт министерствине пӑхӑнса тӑракан Чӑваш транспорт управленийӗ. Ун валли 2023 ҫулта 153 троллейбус тата 47 автобус туяннӑ. Юлашки 5 ҫулта пӗтӗмӗшле илсен республикӑна 221 троллейбус кӳрсе килнӗ. Чӑваш Ен республикӑра пурӑнакансене экологи тӗлӗшӗнчен таса транспортпа тивӗҫтерес енӗпе Раҫҫейре пӗрремӗш вырӑн йышӑннӑ.

Ларура ҫавӑн пекех лимитсӑр Пӗрлехи проездной тӑвасси пирки калаҫнӑ. Кунашкал проездной автобусра та, тролейбусра та ҫӳреме май парать. Анчах ку ыйту тӗлӗшпе мӗнле йышӑну туни пирки паллӑ мар.

cheb.mk.ru сайтри сӑн

Ҫу уйӑхӗн 2-мӗшӗнчен Шупашкартан Махачкалана самолет вӗҫме тытӑнӗ. Билетсене перевозчик сайтӗнче сутма тытӑннӑ ӗнтӗ. Паянхи кун билет 7 пин тенкӗрен пуҫласа тӑрать.

Рейссене «Аэрофлот» пурнӑҫлӗ. Самолет Шупашкартан Махачкалана эрнере виҫӗ хутчен вӗҫӗ: тунтикун, юнкун тата шӑматкун. Рейс ҫӗрле ҫула тухӗ: 23 сехет те 50 минутра. Ҫур ҫӗр иртни 2 сехет те 40 минутра Дагестана ҫитӗ. Махачкаларан вара ытларикун, кӗҫнерникун, вырсарникун вӗҫсе килӗ. Рейсра Airbus A320 самолетсем пулӗҫ. Вӗсен икӗ класлӑ компановка: «Эконом» тата «Бизнес».

Палӑртса хӑварар: Махачкалана пӗрремӗш рейс 2025 ҫулхи ҫӗртме уйӑхӗнче уҫӑлнӑ.

«Контактри» сӑн

Муркаш округӗнчи Ятман ялӗнче пурӑнакан Родионовсем пӗрлешнӗренпе 60 ҫул ҫитнине паллӑ тунӑ. Вӗсем пӗр-пӗрне ачаранпах паллаҫҫӗ, мӗншӗн тесен пӗр шкулта вӗреннӗ. Ун чухне, коридорта пӗр-пӗринпе ҫапӑнса иртсе кайнӑ чухне, ҫулсем иртсен ҫемье чӑмӑртасси пирки шухӑшламан та вӗсем.

Феликс Михайлович – Чӑваш патшалӑх ял хуҫалӑх интститучӗн пӗрремӗш выпускникӗ. Диплом илсен вӑл пурнӑҫне ял хуҫалӑхӗпе ҫыхӑнтарнӑ. Роза Романовна вара медучилище пӗтернӗ, ФАПра, район пульницинче ӗҫленӗ.

Мӑшӑр икӗ ача ҫуратса ӳстернӗ. Паянхи кун Родионовсен – 5 мӑнук, 4 кӗҫӗн мӑнук. Пӗр мӑнукӗ хальхи вӑхӑтра ятарлӑ ҫар операцийӗнче медсестрара ӗҫлет.

Упӑшкипе арӑмӗ – 89 ҫулта. Ҫапах ахаль лармаҫҫӗ – кил хуҫалӑхне тытса пыраҫҫӗ.

forum.na-svyazi.ru сайтран илнӗ сӑнӳкерчӗксем

Мускавра «Краса ЖКХ-2025» (чӑв. Ҫурт-йӗрпе коммуналлӑ хуҫалӑх илемӗ) пӗтӗм Раҫҫейри II конкурс иртнӗ. Ӑна ҫурт-йӗрпе коммуналлӑ хуҫалӑхри професси квалификацийӗ енӗпе ӗҫлекен союз йӗркеленӗ. Конкурса ҫӗршывӑн тӗрлӗ кӗтесенчен, пурӗ 49 регионтан, 587 заявка пырса ҫитнӗ.

Чӑваш Ен чысне «Уют» (чӑв. Хӑтлӑх) тата «Платина» управляющи компанисенче халӑхпа ҫыхӑну тытакан специалистсем Ольга Андрияновӑпа Екатерина Дмитриева, «УК № 1» компанири участок мастерӗ Татьяна Ильина тата «Волжский-3» компанин бухгалтерӗн ҫумӗ Ирина Ильина хутшӑннӑ. Вӗсенчен иккӗшӗ «Нумай хваттерлӗ ҫурта тытса тӑрассине йӗркелекен информаци службин специалисчӗ» номинацире ҫӗнтернӗ. Ольга Андриянова «Ҫурт-йӗрпе коммуналлӑ хуҫалӑх потребителӗсемпе ӗҫлекен сервис-менеджер» евӗр палӑрнӑ.

Регион управленийӗн центрӗн пабликӗнчен илнӗ сӑнӳкерчӗк

Чӑваш Енри хӑш-пӗр муниципалитета автобуспа ҫыхӑнтарӗҫ. Ҫакӑ унти район центрӗсенчи пульницӑсене пӗр-пӗринпе пӗрлештерсе пӗтернипе, ҫынсем вара ун пек тусан кайса ҫӳреме меллӗ мар тесе пӑшӑрханнипе ҫыхӑннӑ. Официаллӑ хыпарта кун пирки каламан-ха, анчах эпир сире унччен халӑх пӑшӑрханӑвӗ пирки пӗлтернӗччӗ.

Ака уйӑхӗнче муниципалитетсем хушшинче 5 автобус маршручӗ уҫӗҫ: «Куславкка – Ҫӗнӗ Шупашкар», «Йӗпреҫ – Канаш», «Элӗк – Хӗрлӗ Чутай», «Шӑмӑршӑ – Патӑрьел» тата «Елчӗк – Патӑрьел».

Автобуссем кашни сехетре пӗрре ҫула тухӗҫ, вӗсем пульницӑсем ӗҫленӗ вӑхӑтра хутлӗҫ.

Кунсӑр пуҫне 146-мӗш «Шупашкар – Хыркасси – Салапайкасси» тата 630-мӗш «Етӗрне – Ҫӗмӗрле» ҫул укҫине пӗр пек тытса тӑма палӑртнӑ.