«Контактри» сӑн

Чӑваш Республикинче «Чӑваш Ен миссисӗ – 2026» конкурс финалӗ иртнӗ. Мероприяти К.В.Иванов ячӗллӗ Чӑваш патшалӑх академи драма театрӗнче иртнӗ.

Конкурс пӗтӗмлетӗвӗсем тӑрӑх, «Чӑваш Ен миссисӗ – 2026» ята Анастасия Павлычева тивӗҫнӗ. «Вице-миссис» титула вара харӑсах икӗ чиперук ҫӗнсе илнӗ: Елена Новик тата Алёна Кутузова.

«Хӗрарӑмӑн илертӳлӗх тапхӑрӗ ӗмӗр тӑсӑлма пултарать. Ҫак конкурс – ҫакна ӗнентерекенни», — тенӗ пӗрремӗш «Вице-миссис» ята тивӗҫнӗ Елена Новик конкурс хыҫҫӑн.

cap.ru сайтри сӑн

2027 ҫул Ӑслӑлӑхпа технологисен ҫулталӑкӗ пулӗ. Ҫакна ЧР Пуҫлӑхӗ ҫумӗнчи Общество канашӗн ларӑвӗнче йышӑннӑ. Ҫулталӑк темине республикӑра пурӑнакансем «Чувашия Онлайн» порталта ирттернӗ сасӑлавра суйланӑ. Сӑмах май, унта юпа уйӑхӗн 21-26-мӗшӗсенче 5 вариантран пӗрне суйлама май пулнӑ.

Сӗннӗ вариантсен хушшинче Ӑслӑлӑхпа технологисен ҫулталӑкӗ, Цифра пуласлӑхӗн ҫулталӑкӗ, Ҫемье йӑлипе наставничество ҫулталӑкӗ, Амӑшӗпе ача сывлӑхӗн ҫулталӑкӗ, Тараватлӑхпа туризм ҫулталӑкӗ пулнӑ. Пӗрремӗшӗшӗн сасӑлава хутшӑннӑ 3700 ҫынран 1791-шне килӗшнӗ вӑл. Ку – ҫурринчен ытларах.

ЧР Элтеперӗ Олег Николаев тематикӑна ырланӑ, вӑл регион аталанӑвӗшӗн пӗлтерӗшлӗ пулнине палӑртнӑ.

obltv.ru сайтри сӑн

Канаш хулинчи пӗр колледжра 3-мӗш курсра вӗренекен хӗр парӑмсенчен хӑтӑлас тенӗ те… Анчах ку пач урӑхла ҫаврӑнса тухнӑ.

Хӗр паллашу сайтӗнче микрозаймсене хупма пулӑшакан каччӑпа калаҫма тытӑннӑ. Хайхи виртуаллӑ «эксперт» ӑна ҫӗнӗ займ илме сӗннӗ, вӑл унчченхи парӑмсене хупма пулӑшать-мӗн.

Студентка пӗр хӑрамасӑр ӑна паспортне сӑн ӳкерсе ярса панӑ, телефон, банк карттин номерӗсене тата электрон почтӑн адресне те пӗлтернӗ. Смс-ҫырупа килнӗ кодсене те калама хӑраман.

Кун хыҫҫӑн палламан ҫын унӑн 75 пин тенкине вӑрланӑ. Ку кӑна мар-ха. Кунсӑр пуҫне ҫак ҫынпа ҫыхланнӑ хыҫҫӑн студенткӑн парӑмӗ тата пысӑкланнӑ: унӑн тепӗр 10 займ тупӑннӑ.

Хӗрӗн ирӗксӗрех полици уйрӑмне кайса пулӑшу ыйтма тивнӗ.

cap.ru сайтри сӑн

Чӑваш Республикинче йӑлана кӗнӗ тӑрӑх «Ӳнерсен каҫӗ» акци иртӗ. Чӳк уйӑхӗн 3-мӗшӗнче, Халӑхсен пӗрлӗхӗн кунӗ умӗн, республика ҫыннисене Чӑваш наци музейӗнче тата Чӑваш патшалӑх ӳнер музейӗнче кӗтеҫҫӗ.

Наци музейӗнче хӑнасем вӑхӑт ҫулҫӳревне тухӗҫ: пӑхӑр ӗмӗрӗнчи тӑм савӑт-сапаран пуҫласа гобеленсем таран. Ҫавӑн пекех сехет механизмӗсен вӑрттӑнлӑхӗсем пирки хатӗрленӗ куравпа паллашӗҫ, ӑсталӑх класне хутшӑнӗҫ.

Ӳнер музейӗнче 14:00-16:00 сехетсенче автор ӑсталӑх класӗсем пулӗҫ, 16:00-18:00 сехетсенче вара Шупашкарти В.П.Воробьев ячӗллӗ 2-мӗш музыка шкулӗн шӑпӑрланӗсем юрӑсемпе савӑнтарӗҫ. Ҫав кунах музейра куравсемпе паллашма май пулӗ.

Палӑртса хӑварар: «Ӳнерсен каҫӗ» акципе килӗшӳллӗн иртекен мероприятисене «Ҫемье» наци проекчӗн Пушкин карттипе кӗме май пулӗ.

На.связи порталтан илнӗ сӑнӳкерчӗк

Чӑваш Енре вак укҫа ылмаштармалли акци иртӗ. Вӑл паянтан, юпа уйахӗн 26-мӗшӗнчен, пуҫланнӑ. Акци чӳк уйӑхӗн 7-мӗшӗнче вӗҫленӗ.

«Монетная неделя» (чӑв. Вак укҫа эрни) ята панӑ пӗтӗм ҫӗршыври акци вӑхӑтӗнче банксем, магазин-партнёрсем вак укҫана хут укҫапа ылмаштарӗҫ е банкри счет ҫине комисси тӳлемесӗр куҫарса парӗҫ.

Пӗтӗм Раҫҫейри акцие Перекет банкӗ, Россельхозбанк, «Кузнецкий» банк, НБД-Банк, Газпромбанк, ВТБ, Альфа-Банк, Барс Банк, ҫавӑн пекех «Пятерочка» тата «Магнит» суту-илӳ сечӗн магазинӗсем хутшӑнӗҫ.

Вак укҫана йышӑнакан точкӑсем 77 адреспа вырнаҫнӑ: Улатӑрта, Канашра, Куславккара, Ҫӗнӗ Шупашкарта, Ҫӗрпӳре, Шупашкарта, Вӑрнарта, Кӳкеҫре, Ҫӗмӗрлере, Етӗрнере, Элӗкре, Патӑрьелте, Йӗпреҫре, Комсомольскинче, Красноармейскинче, Муркашра, Пӑрачкавра, Тӗрлемесре, Вӑрмарта, Шӑхасанта, Шӑнкӑртамра, Елчӗкре.

Малалла...

cap.ru сайтри сӑн

Чӑваш патшалӑх аграри университечӗ уҫӑлнӑранпа 95 ҫул ҫитнӗ. Савӑнӑҫлӑ уяв К.В.Иванов ячӗллӗ Чӑваш патшлӑх академи драма театрӗнче иртнӗ.

Уява аслӑ шкалта ӗҫленӗ, халӗ те унта тӑрӑшакан преподавательсем, студентсем, университетран вӗренсе тухнисем пухӑннӑ. Вӗсене саламлама сумлӑ хӑнасем ҫитнӗ: Чӑваш Республикин Элтеперӗ Олег Николаев, ЧР Патшалӑх Канашӗн председателӗ Леонид Черкесов, министерствӑсемпе ведомствӑсен представителӗсем, университет партнерӗсем.

Регион ертӳлӗхӗ Чӑваш патшалӑх аграри университечӗ агропромышленноҫ комплексӗн аталанӑвне пысӑк тӳпе хывнине, пысӑк квалификациллӗ кадрсем хатӗрленине палӑртнӑ.

Чи лайӑх ӗҫченсемпе преподавательсене патшалӑх наградисемпе тата хисеп хучӗсем панӑ.

Чӑваш Республикинче «Сӑрҫи» заповедникре фотокапкӑн хӑмӑр упасем шыва кӗнине ӳкерсе илнӗ. Ку паян, юпа уйӑхӗн 23-мӗшӗнче, пулнӑ.

Пушар тухсан шыв илмелли пӗве патӗнче вырнаҫтарнӑ фотокапкӑн икӗ упа ҫури шыва кӗнине ӳкерсе илнӗ. Ҫав вӑхӑтра вӗсене амӑшӗ, пысӑк упа, сӑнаса тӑнӑ.

Упа ҫурисем шывра синхрон ишекен спортсменсем пекех ишнӗ. Амӑшӗ вӗсенчен куҫ вӗҫертмен.

«Сӑрҫи» заповедникре пӗлтернӗ тӑрӑх, Улатӑрти участокра упасен шучӗ стабильлӗ.

Палӑртса хӑварар: Чӑваш Енре хальхи вӑхӑтра 64 хӑмӑр упа шутланать. Пӗлтӗр вӗсен шучӗ 53 пулнӑ.

cheb.ru сӑнӳкерчӗкӗ

Пурнӑҫ йӳнелсе мар, хакланса пынине эпир тахҫанах хӑнӑхса ҫитрӗмӗр пулӗ ӗнтӗ. Халӗ, ав, ҫак уйӑхран ҫӳп-ҫап турттарнишӗн унчченхинчен икӗ хут ытларах тӳлеме тытӑнӑпӑр.

Нумай хваттерлӗ ҫуртсенче пурӑнакансем уйӑхсерен 139 тенкӗ те 55 пус кӑларса хума пуҫлӗҫ, уйрӑм ҫуртсенче пурӑнакансем — 149 тенкӗ та 85 пус. Ку вӑл — кашни ҫын пуҫне.

Унччен 60 тенкӗрен пуҫласа 73 тенкӗ таран тӳленӗ ҫынсем квитанцири ҫӗнӗ цифрӑна аван туйса илӗҫ.

«Ситиматик Чӑваш Ен» регионти оператор хака республикӑн Тариф служби ҫирӗплетнине пӗлтерет.

Сӑмах май каласан, кӳршӗллӗ регионсенче те хак йӳнӗ мар. Саранск хулинче хак унчченхи 150 тенкӗрен 167 тенке ҫитнӗ, Чӗмпӗр облаҫӗнче нумай хваттерлӗ ҫуртсенче пурӑнакансем 143 тенкӗ тӳлеҫҫӗ, уйрӑм ҫуртсенчисем — 147 тенкӗ.

forum.na-svyazi.ru порталтан илнӗ сӑнӳкерчӗк

Чӑваш Енре вейп сутма пӑрахӗҫ. Маларах ун пек саккуна ҫӗршыври хӑш-пӗр регионта йышӑнкаларӗҫ-ха. Сӑмахран, кӳршӗллӗ Тутарстанра.

Пирӗн республикӑра никотинлӑ электрон тытӑма 2027 ҫулхи пуш уйахӗн 1-мӗшӗнчен пуҫласа 2032 ҫулхи пуш уйӑхӗн 1-мӗшӗччен сутма чарӗҫ. Табакпа никотинлӑ ытти продукцие лицензи пулсан ҫеҫ сутма юрӗ. Лицензи илме 20 пин тенкӗ парса патшалӑх пошлини илмелле.

Ҫӗнӗ йӗрке 2 490 суту-илӳ точкине пырса тивӗ. Лицензи панипе хыснана 50 миллион тенкӗ укҫа килӗ.

Лицензи парас ыйтӑва республикӑн Экономика аталанӑвӗн министерстви тӗрӗслесе тӑрӗ, вӑлах лицензи парӗ. Кун валли министерствӑн штатне ӳстерӗҫ. Хыснаран ҫак тӗллевпе 7,27 миллион тенкӗ уйӑрмалла. Унсӑр пуҫне тата ӗҫ вырӑнӗпе тивӗҫтерме тепӗр 636 пин тенкӗ кирлӗ пулӗ.

Шупашкарти аэропорт сайтӗнчен илнӗ сӑнӳкерчӗк

Шупашкарти аэропортра интернет хӑвӑртрах ӗҫлеме пуҫланӑ. Халӗ унта мобильлӗ даннӑйсене ҫеккунтра 180 МБит таран уҫласа илме пулать. Телеком-инфраструктурӑна «Мегафон» компани вӑйлӑлатнӑ.

Шупашкарти аэропорт тӗплӗ юсав хыҫҫӑн хитреленсе-хӑтлӑланса кайнине эпир пӗлетпӗр-ха. Авӑн уйӑхӗнче вара перрона тата самолет вӗҫсе хӑпариччен ҫӳреме кирлӗ ҫула ҫӗнетсе пӗтернӗ.

Ҫыхӑнӑва лайӑхлатассипе те ҫине тӑнӑ. 4G сеть тытассипе ҫыхӑннӑ тӗп ӗҫе 2024 ҫул вӗҫӗнче туса ирттернӗ, кӑҫалхи кӗркунне валли ҫуртӑн хӗвелтухӑҫ енчи лаптӑкӗнчи, ҫав шутра паспорт тӗрӗслевӗ витӗр тухакан зонӑри, ҫыхӑнӑва вӑйлатнӑ.

Шупашкарти аэропорт Чӑваш Енпе Атӑлҫи тӑрӑхӗнче пӗлтерӗшлӗ вырӑн йышӑнать. Пӗлтӗр ку аэропорт пулӑшӑвӗпе 645 пин ҫын усӑ курнӑ. Пассажирсем уйӑхсерен 2,5 Тбайт таран интернет-даннӑйпа усӑ кураҫҫӗ. Ансат чӗлхепе каласан, ку вӑл «Экипаж» фильма смартфонпа 1,2 млн хутчен пӑхма ҫитет. Унсӑр пуҫне тата вӗҫсе каяс умӗн авиапассажирсем ҫывӑх ҫыннисем патне шӑнкравлаҫҫӗ. Ҫапла вӗсем уйӑхсерен 24,5 пин минут калаҫаҫҫӗ.