Промышленноҫ аталанӑвӗн фончӗн ертӳҫине Евгений Теллина ӗҫрен кӑларни пирки пӗлтӗрнӗччӗ. Халӗ ӑна ЧР промышленноҫ министрӗн ҫумне лартасси пирки хушу тухнӑ.

Аса илтерер: вӑл Промышленноҫ аталанӑвӗн фондне 3 ҫул ертсе пынӑ. Евгений Теллин Елчӗк районӗнче 1982 ҫулта ҫуралнӑ, И.Н.Ульянов ячӗллӗ Чӑваш патшалӑх университетӗнчен «Тӗнче экономики» специальноҫпе вӗренсе тухнӑ.

Хале ЧР промышленноҫ тата энергетика министрӗн Сергей Лекаревӑн икӗ ҫум: Дмитрий Гринев и Евгений Теллин.

russian.alibaba.com сайтри сӑн

Чӑваш продукцине чикӗ леш енне те ӑсатаҫҫӗ. Экспорт ытларах Китая, Казахстана, Монголие каять.

Китая чӑх ури ӑсатаҫҫӗ. Ҫулталӑк пуҫланнӑранпа Китая 2,2 пин тонна шӑнтнӑ чӑх ури янӑ. Казахстана вара — 55 тонна ӗне ашӗ, 60 тонна сӗт юр-варӗ, кайӑк-кӗшӗк валли 20 тонна комбикорм.

Монголире вара чӑваш мороженӑйне ӑсатаҫҫӗ — кӑҫал унта 12 тонна ҫак пылак ҫимӗҫе янӑ.

Чӑваш Енри промышленноҫ аталанӑвӗн фончӗн ертӳҫине Евгений Теллина ӗҫрен кӑларнӑ. Ҫапла йышӑннӑ ӗнер Министрсен Кабинечӗн пуҫлӑхӗ.

Вӑл ку должноҫре 3 ҫула яхӑн ӗҫленӗ, ку пукана 2022 ҫулхи авӑн уйӑхӗнче йышӑннӑ.

Евгений Теллин унччен, 2004-2020 ҫулсенче, банк тытӑмӗнче ӗҫленӗ. Промышленноҫ аталанӑвӗн фондне 2020 ҫулта килнӗ, 2021 ҫулхи юпа уйӑхӗнче ертӳҫӗ ҫумӗ пулса тӑнӑ. «Чеб.ру» информацийӗ тӑрӑх, ӑна ЧР промышленноҫ министрӗн пӗрремӗш ҫумне лартма пултараҫҫӗ.

Инкеклӗ лару-тӑру министерстви тунӑ сӑн

Паян ҫӗрле Етӗрне округӗнчи Юманай ялӗнче ҫурт ҫунма пуҫланӑ. Вӑрман урамӗнчи йывӑҫ ҫурта ҫулӑм ярса илнӗ.

Шел те, 66 ҫулти кил хуҫи урама тухса ӗлкӗреймен. Пушар 86 тӑваткал метр ҫинче алхаснӑ, ӑна 7 специалист тата 3 техника сӳнтернӗ.

Халӗ пушар мӗнрен тухнине тӗпчеҫҫӗ. Сӑмах май, иртнӗ талӑкра республикӑра икӗ пушар пулнӑ.

Шупашкарта Ҫӗнҫӗпӗрти арҫын подъездсенчи велосипедсемпе самокатсене вӑрласа ҫӳренӗ. Велосипедсем хулари Новоилларионовски, М.Павлов, Богдан Хмельницкй тата ытти хӑш-пӗр ҫӗрти ҫуртсенчен ҫухалнӑ. Вӑрӑна видеокамера ӳкерсе илнӗ. Ҫын япалине черетлӗ хутчен вӑрласан вӑл велосипеда иртен-ҫӳрене туянма сӗннӗ. Кун пирки ҫынсем йӗрке хуралҫисене пӗлтернӗ.

34 ҫулти арҫын унччен судпа айӑпланнӑскер иккен. Хальлӗхе ӑна 70 пин тенкӗ ытла тенкӗлӗх 5 хутчен вӑрланӑ тесе шухӑшлаҫҫӗ.

Чӑваш патшалӑх пукане театрӗн сӑнӳкерчӗкӗ

Шупашкарта кӑҫал та пукане театрӗсен «Карусель сказок» (чӑв. Юмахсен каруҫҫелӗ) фестивалӗ иртнт. Мероприятисем ҫӗртме уйӑхӗн 22-24-мӗшӗсенче пулӗҫ.

Театр ҫав кунсенче 15 ытла коллектива йышӑнӗ.

Аса илтерер: фестивалӗн пӗрремӗш тапхӑрӗ ҫу уйӑхӗн 7-10-мӗшӗсенче пулса иртнӗ. Хальхи – иккӗмӗш тапхӑр.

Фестиваль программине Республика кунне тата Тӑван ҫӗршывӑн аслӑ вӑрҫинче ҫӗнтернӗренпе 80 ҫул ҫитнине халалланӑ.

Чӑваш патшалӑх академи драма театрӗнче Мускаври Борис Щукин ячӗллӗ театр институтне вӗренме кӗме ӗмӗтленекенсене суйласа илмелли пӗрремӗш тур иртӗ. Артист пулас текенсене ҫӗртме уйӑхӗн 18-мӗшӗнче 12 сехетре хаклӗҫ.

Ҫамрӑксен пултарулӑхне хак параканни – асӑннӑ аслӑ шкулта ӗҫлекен Валерий Маркин. Вӑл – актер ӑсталӑхӗн кафедрин доценчӗ, «Актёр ӑсталӑхӗ» курсӑн илемлӗх ертӳҫи.

Студентсем Мускавра 4 ҫул вӗренӗҫ, унтан вӗсене Чӑваш патшалӑх академи драма театрӗ ӗҫе илӗ. Вӗреннӗ вӑхӑтра Чӑваш Ен стипенди тӳлесе тӑрӗ тата общежитипе тивӗҫтерӗ.

Чӑваш Енӗн Юстици ӗҫӗсен комитечӗн сӑнӳкерчӗкӗ

Суда документсене онлайн-сервиссем урлӑ ҫитерме пулать. Мӗнпур документ электронлӑ (скан е файл) пулмалла. Стандарт форматсем: PDF, DOC, DOCX тата ыттисем.

Вӗсене квалифициллӗ электрон майпа алӑ пусса (УКЭП/КЭП) ҫирӗплетмелле. Унсӑр май килмӗ.

Тата тӗрӗс сервиса суйласа илмелле:

пӗтӗмӗшле юрисдикци е РФ Аслӑ судне валли — Патшалӑх пулӑшӑвӗсен порталӗ урлӑ.

Пӗтӗмӗшле юрисдикци судне документсене «Правосудие» ГАС урлӑ та пама пулать. Унта патшалӑх пулӑшӑвӗсен порталӗ урлӑ кӗмелле.

РФ Арбитраж судне тавӑҫ тӑратма «Мой арбитр» порталпа усӑ курмалла. Ун урлӑ суд ларӑвне те онлайн хутшӑнма май килет.

Чӑваш патшалӑх ҫамрӑксен театрӗн сӑнӳкерчӗкӗ

Шупашкарта урамра кино кӑтартма тытӑннӑ. Чӑваш патшалӑх ҫамрӑксен театрӗн «Ҫеҫпӗл» кинозалӗ кинона урамра кӑтартать. Ҫӑвӑн малтанхи уйӑхне Тӑван ҫӗршывӑн аслӑ вӑрҫинче ҫӗнтернӗренпе 80 ҫул ҫитнине халаллӗҫ.

Ҫӗртме уйӑхӗн 4-мӗшӗнче «Отряд Светлячков» фильм кӑтартнӑ. Тӳлевсӗр черетлӗ кинона ҫӗртме уйӑхӗн 18-мӗшӗнче курма май килӗ. Ун чухне «Пять сыновей Марии» кинона йыхравлаҫҫӗ. Енчен ҫанталӑк начар пулсан, ҫумӑр ҫусан кинона пӗчӗк залта кӑтартӗҫ.

ru.freepik.com сайтри сӑн

Ҫӗртмен 1-мӗшӗнче «Свобода» ӑратлӑх савучӗн тракторист-машинисчӗ уйра ӗҫлекен комбайна тӗрӗсленӗ чухне аманнӑ. Вентилятор унӑн сулахай аллинчи тӑватӑ пӳрнине татнӑ. Медицина пӗтӗмлетӗвӗ тӑрӑх, ку – сывлӑха йывӑр сиен кӳни.

Халӗ Патшалӑх ӗҫ инспекцийӗ лару-тӑрӑва уҫӑмлатать. Тӗрӗслев хыҫҫӑн должноҫри ҫынсем айӑплипе айӑплӑ маррине палӑртӗҫ. Материалсене Следстви комитечӗн Чӑваш Енри следстви управленине ярса парӗҫ.