Спектакльти самант. Ҫӑлкуҫ: cap.ru

Нарӑсӑн 28-мӗшӗнче Ҫеҫпӗл Мишши ячӗллӗ Ҫамрӑксен театрӗнче «Тӗтрери чӗрӗп» юмахӑн премьери иртрӗ. Ӑна Сергей Козлов кӗнеки тӑрӑх Байрас Ибрагимов режиссёр лартнӑ. Спектакль умӗн театр директорӗн ҫумӗ, Чӑваш Республикин тава тивӗҫлӗ артисчӗ Наталья Ахмед кӑҫал вуннӑ пинмӗш билет туяннӑ куракансене саламларӗ. Вӗсене «Тӗтрери чӗрӗп» юмах валли ятарласа хатӗрленӗ парнесемпе тивӗҫтерчӗҫ.

Спектакль куракансене асамлӑ та философиллӗ юмах тӗнчине кӑтартса пачӗ. Вӑрман тӗлӗнмелле тӗнче пулса тӑчӗ. Видеоэффектсем, капӑр тумтирсемпе декорацисем, актерсен ӑста вӑййи «тӗтрен» асамлӑхне питӗ лайӑх кӑтартса пачӗҫ. Ашшӗ-амӑшӗ хӑйсен ачисемпе пӗрле Чӗрӗпӗн ҫулҫӳревне чунтан-чӗререн киленсе пӑхса ларчӗҫ. Чӗрӗп сӑнарне Елизавета Лаврова ҫамрӑк артистка калӑпларӗ.

Спектакль хыҫҫӑн ашшӗ-амӑшӗ хӑйсен шухӑшне пӗлтерчӗҫ. Спектакль вӗсен кӑмӑлне тивӗҫтерчӗ. Ку постановка пӗчӗк ачасем валли те, аслӑраххисем валли те юрӑхлӑ пулнине палӑртрӗҫ.

Ҫамрӑксем билетсене «Ҫемье» нацпроектӑн пайӗ пулса тӑнӑ Пушкин карттипе туянма пултараҫҫӗ.

ҪҪХПИ тунӑ сӑн

Вӑрнар округӗнче полицейскисем ҫул хӗрринче «Волга» ҫутнӑ фарӑсемпе ларнине асӑрхасан чарӑннӑ. Патнерех пынӑ та салонра шурса кайнӑ, тӑнне ҫухатнӑ водитель ларнине курнӑ.

Анчах вӗсем алӑка уҫайман – питӗрӗнчӗк пулнӑ. Полицейскисен кантӑка ҫӗмӗрме тивнӗ. Вӗсем 62 ҫулти арҫынна урама йӑтса кӑларнӑ, васкавлӑ медпулӑшу чӗннӗ. Тухтӑрсем киличчен пакунлисем ӑна пӗрремӗш медпулӑшу пама пуҫланӑ, чӗрине массаж тунӑ. Васкавлӑ медпулӑшу ҫитиччен арҫын тӑна кӗнӗ.

Каярахпа ҫав арҫын мӗншӗн ҫапла хӑтланнине полицейскисене ӑнлантарнӑ: ӗҫре йывӑрлӑхсем пулнӑран вӑл хӑйӗн ҫине алӑ хума тӑнӑ иккен.

Прокуратура тунӑ сӑн

Элӗк округӗнчи Этмен выҫҫӑлккинче пысӑк инкек пулнӑ. Унта икӗ хӗрарӑм юр айне пулса вилнӗ.

Чӑваш Республикин прокуратури малтанлӑха палӑртнӑ тӑрӑх, вӗсем пӳрт тӑрринчен юр антарнӑ вӑхӑтра юр йӑтӑнса аннӑ. Шӑпах вӗсем ҫине ӳкнӗ. Иккӗшӗ те ҫавӑнтах вилнӗ.

Халӗ йӗрке хуралҫисем ӗҫ-пуҫа уҫӑмлатас тесе ӗҫлеҫҫӗ. Прокуратура следстви умӗнхи тӗрӗслеве сӑнаса тӑрӗ.

Красноармейски муниципаллӑ округа кӗрекен Еншик Чуллӑ ялӗнчи коллектив конкурсра палӑрнӑ. Вӗсем малти вырӑнах тухайман та, анчах унта тивӗҫлипех хутшӑннӑ. Регионсем хушшинчи конкурс ячӗ – «Ҫухалнӑ ҫӑлкуҫ». Еншик Чуллӑ ялӗнчи «Эншей» ушкӑн конкурсра 5-мӗш вырӑн йышӑннӑ.

Ушкӑна ҫухалнӑ ҫӑлкуҫа хӑтланӑшӑн конкурса йӗркелекенӗсем диплом парса тата 30 000 тенкӗлӗх парнепе савӑнтарнӑ.

Вырӑнти хастарсене каярах Красноармейскинчи вулавӑшра чысланӑ, нумай ӑшӑ сӑмах каласа хавхалантарнӑ, ырласа та мухтаса ҫунатлантарнӑ. Кун пирки Вырӑнти хастар Виталий Михайлов халӑх тетелӗнчи хӑйӗн страницинче хыпарланӑ, коллектива конкурса тивӗҫлипе хутшӑннӑшӑн ӑшшӑн саламланӑ, малашне те маттур пулма суннӑ.

Ҫӑлкуҫ: https://obrazov-yaltch.edu21.cap.ru

Н.А. Петров ячӗллӗ Елчӗк вӑтам шкулӗнче вӗренекен тӑваттӑмӗш класс ачисем республика шайӗнче иртнӗ ӑс-тӑн вӑййисенче малти вырӑнсене йышӑннӑ.

Кӗҫӗн ҫулхи шкул ачисен XXXI «Чӗлхе ӑстисем» ӑс-тӑн вӑййисен турӗ нарӑс уйӑхӗн 20-мӗшӗнче онлайн мелпе иртнӗ. Ӑмӑртура республикӑри мӗнпур хуласемпе муниципаллӑ округсенчи 700 ытла ача хутшӑннӑ. Елчӗк муниципаллӑ округӗнчен ӑс-тӑн вӑййисене Н.А. Петров ячӗллӗ Елчӗк вӑтам шкулӗнче вӗренекен ачасем хутшӑннӑ.

Эрнекун пӗтӗмлетӳ тунӑ. Елчӗк ачисем хӑйсене питӗ лайӑх кӑтартма пултарнӑ. «Тӑван (чӑваш) чӗлхе» номинацире Александр Мудрецовпа Мария Васильева виҫҫӗмӗш вырӑн йышӑннӑ. «Тӑван (чӑваш) чӗлхипе илемлӗ вуласси» номинацире Егор Харлампьев вара пӗрремӗш вырӑна тухнӑ, Майя Григорьева иккӗмӗш вырӑн йышӑннӑ.

ogirk.ru сайтри сӑн

Нарӑс уйӑхӗн 26-мӗшӗнче Иркутскри Мӑшӑрлану керменӗнче 80 мӑшӑр ҫемье ҫавӑрнӑ. Вӗсенчен пӗрисем – Жигаловӑри София Бузикова тата Денис Шевченко. Каччӑпа хӗр Мӑшӑрлану керменне чӑваш наци тумӗпе килнӗ.

Иркутскри Мӑшӑрлану керменӗнче чӑваш туйӗ мӗнле иртнине кӑтартнӑ. Каччӑпа хӗрӗн ашшӗ-амӑшӗ ятарласа Жигаловӑран килнӗ. Хӗрӗн амӑшӗ Лилия Бабокина каланӑ тӑрӑх, ҫамрӑксем пӗрлешме шутласан туя мӗнле тӑвасси пирки иккӗленӳ пулман – чӑваш наци тумӗпе кӑна. Мӑшӑрлану керменне тӑванӗсем те чӑваш тумӗпе килнӗ.

Официаллӑ пай хыҫҫӑн чӑваш туйӗнчи йӑла-йӗркене кӑтартнӑ. «Чӑвашсен туй йӑли-йӗрки 2 уйӑх тӑсӑлать. Эпир паян ҫак илемлӗ йӑлан пӗр пайне кӑна туса кӑтартӑмӑр», — тенӗ ун чухне Иркутскри «Юлташ» чӑваш наци культура центрӗн председателӗ Вероника Тимофеева.

«Контактри» сӑн

Вӑрнар округӗнчи культура ҫуртӗнче йӗркеленнӗ «Тивлет» юрӑпа ташӑ ансамблӗ Республикӑри пултарулӑх ушкӑнӗсен «Йӑла-йӗрке» фестиваль-конкурсра Гран-при ҫӗнсе илнӗ.

Палӑртар: конкурс икӗ турпа иртет. Пӗрремӗшӗ – суйлав тапхӑрӗ. Унта ярса панӑ видеоматериалсенчен чи лайӑххисене суйлаҫҫӗ. Финалта вара ушкӑнсем сцена ҫине тухаҫҫӗ.

Финалта «Тивет» юрӑпа ташӑ ансамблӗ «Вӑйӑ картинче» юрӑпа ташӑ композицине кӑтартнӑ. Ҫапла вӗсем Гран-при илнӗ. Кунсӑр пуҫне ушкӑн 200 пин тенкӗ гранта тивӗҫнӗ. Ку укҫапа вӗсем сцена ҫине тухмалли костюмсем ҫӗлӗҫ.

Ҫӑлкуҫ: cap.ru

Чӑваш Ен Элтеперӗ Олег Николаев ялсене аталантарасси пирки хӑйӗн шухӑшне пӗлтернӗ. Вӑл палӑртнӑ тӑрӑх, ял ҫыннисен хулари пек пурӑнмалли майсем пулмалла. «Ку вӑл пирӗн инвестици меслечӗ: ҫын хӑйне меллӗ тата шанчӑклӑ туймалли, мегаполисри мӗнпур сервиссемпе усӑ курмалли, ҫав хушӑрах ялти пурнӑҫӑн мӗнпур лайӑх енӗсене сыхласа хӑвармалли тавралӑха йӗркелесси. Ҫак ӗҫе технологи тата республикӑри кашни ҫыншӑн уйрӑм майсем туса парассине тӗпе хурса малалла тӑсӑпӑр», — тенӗ вӑл.

Ҫак тӗллевпе килӗшӳллӗн «Ял территорийӗсене комплекслӑ аталантарасси» программа пурнӑҫланать. Унпа килӗшӳллӗн ялсенче культура ҫурчӗсемпе шкулсене юсанӑ. Ҫӗнӗ оборудовани илсе панӑ. Ҫавӑн пекех спортпа туслӑ пулмашкӑн футбол тата хоккей вылямалли вырӑнсем йӗркеленӗ.

Чӑваш Енри ял хуҫалӑх министрӗ Андрей Макушев пӗлтернӗ тӑрӑх, ҫак программа валли 2025 ҫулта 2,6 миллиард тенкӗ уйӑрнӑ пулнӑ. 2026 ҫул валли вара калӑпӑш 3,1 миллиард тенке ҫитнӗ.

Программа ял ҫыннисене пурӑнмалли ҫурт-йӗр туянма та пулӑшать. Пӗлтӗр 12 ҫемье ҫурт лартма укҫа илнӗ. Тата 31 ҫын ҫӑмӑл ял ипотекипе усӑ курнӑ.

Ял ҫыннисем хӑйсем те айккинче тӑмаҫҫӗ, ялсене илемлетме хутшӑнаҫҫӗ.

Малалла...

Юр кӗлеткесенчен пӗри. Ҫӑлкуҫ: cap.ru

Шупашкарта «Хӗллехи фантази» конкурс-фестиваль вӗҫленнӗ. Вӑл ача пахчисем хушшинче иртнӗ. Ку мероприятие кӑҫал палӑртакан Халӑхсен туслӑхӗпе пӗрлӗхӗн ҫулталӑкне халалласа йӗркеленӗ. Конкурс кӑрлачӑн 26-мӗшӗнчен пуҫласа нарӑсӑн 27-мӗшӗччен пынӑ.

Пӗр уйӑх хушши воспитательсемпе ачасем тата вӗсен ашшӗ-амӑшӗ тӑрӑшса юр кӗлеткесем ӑсталанӑ — вӗсене ача пахчин картишӗнче вырнаҫтарнӑ. Юр кӗлеткесем хитре кӑна мар, ачасене выляма хӑрушсӑр пулмалли ҫине тимлӗх уйӑрнӑ. Жюри ку тӗлӗшпе тимлӗ хакланӑ.

Конкурса виҫӗ номинаципе ирттернӗ: «Юмах туслӑ пулма вӗрентет», «Спорт юлташсене пӗрлештерет» тата «Раҫҫей – туслӑ ҫемье». Кашни номинацирех ҫӗнтерӳҫӗсене палӑртнӑ. Сӑмахран, пӗрремӗш вырӑнсене 88-мӗш, 128-мӗш, 205-мӗш тата 105-мӗш ача пахчисем йышӑннӑ.

Конкурса хутшӑннӑ кашни ҫынна, ачасемпе ашшӗ-амӑшӗсене, пурне те тав тунӑ. «Хӗллехи фантази» ача пахчисене илемлетнӗ. Унсӑр пуҫне ачасем уҫӑ сывлӑшра хӑйсем тунӑ юр кӗлеткисемпе выляма пултараҫҫӗ.

Ҫалкуҫ: cap.ru

Чӑваш Енри Халӑхсен туслӑхӗн ҫуртӗнче Пӗтӗм тӗнчери тӑван чӗлхе кунне халалласа «Халӑхсен туслӑхӗн чӗлхипе» ятлӑ литературӑпа музыка каҫӗ иртнӗ. Унта тӗрлӗ наци ачисем, чӑваш ҫыравҫисемпе сӑвӑҫисем хутшӑннӑ. Ачасем тӑван ҫӗршыв, туслӑх тата кил-йыш ҫинчен эрмен, тутар, чӑваш, узбек тата вырӑс чӗлхисемпе сӑвӑсем вуланӑ.

Халӑхсен туслӑхӗн ҫурчӗн директорӗ Сергей Иванов пухӑннисене уявпа саламланӑ. Вӑл тӑван чӗлхене упрама, унпа калаҫма чӗнсе каланӑ. Лариса Петровӑпа Ирина Кошкина чӑваш сӑвӑҫисем ачасене чӗлхе урлӑ туслӑх ҫулне хывма май пурри ҫинчен каласа панӑ. Тутар автономийӗн ертӳҫи Хайдяр Сафиуллин Габдулла Тукайӑн «Тӑван чӗлхе» сӑввине вуласа панӑ.

Тӗлпулура ачасем «Чӗлхесен йывӑҫне» хӑйсен тӑван чӗлхипе ҫырнӑ ырӑ сунӑмӗсемпе илемлетнӗ. Сӑвӑсене чи лайӑх вуланӑ ачасене кӗнекесем парнеленӗ. Ку мероприяти Олег Николаевӑн «Ярко в Чувашии» проектӑн пӗр пайӗ пулса тӑнӑ.