novokosino.mos.ru сайтри сӑн

Улатӑр округӗнчи Алтышевӑри 80-ри кинемей ҫухални пирки ӗнер кӑна пӗлтернӗччӗ. Ӑна икӗ кун вӑрманта ҫухалса ҫӳренӗ хыҫҫӑн, телее, тупнӑ, вӑл чӗрӗ-сывах.

Аса илтерер: кинемей авӑнӑн 7-мӗшӗнче вӑрмана кӑмпана кайнӑ та киле таврӑнман. Ӑна тӳрех полицейскисем, «Лиза Алерт» нимеҫисем шырама пуҫланӑ, вӑрманта сасӑ тата ҫутӑ сигналӗсем панӑ.

Кинемее ҫав кунах тупайман. Ӗнер ӑна хӑйӗн килӗнчен темиҫе километрта асӑрханӑ. Ватӑскер ҫухалса ҫӳресен те кӑмпапа туп-тулли карҫинккине аллинчен яман, пӗрлех йӑтса ҫӳренӗ. Ӑна тухтӑрсен пулӑшӑвӗ кирлӗ пулман, ҫавна май тӳрех киле ӑсатнӑ.

www.cap.ru сӑнӳкерчӗкӗ

Чӑваш Енри ачасен правине хӳтӗлекен уполномоченнӑй тата Чӑваш Енри профессионал медиаторсен ассоциацийӗ килӗштерсе ӗҫлесси ҫинчен калакан килӗшӗве алӑ пуснӑ.

Документа ачасен хӳтӗлевҫи Алевтина Федорова тата ассоциаци президенчӗ Екатерина Саламатова алӑ пусса ҫирӗплетнӗ.

Медиатор тӗллевӗ — тавлашуллӑ ыйтӑва суда ҫитмесӗр, калаҫса татӑлса, пӗр-пӗрин шухӑшне шута илсе тата тӗпе хурса татса пама вӗрентесси.

Ҫемьере ӑнланманлӑх сиксе тухсан та калаҫса татӑлнине нимӗн те ҫитмест. Шӑпах ҫав ыйтупа ӗҫлӗҫ те профессилле медиаторсем. Ҫак йӗркесен авторӗ пӗлнӗ тӑрӑх, ассоциаци прездиденчӗ чылай ҫул юристра ӗҫленӗ, унӑн психологи пӗлӗвӗ те пур.

«Лиза Алерт» шыравпа ҫӑлав отрячӗн архивӗнчи сӑн

Улатӑр округӗнче 80 ҫулти хӗрарӑма шыраҫҫӗ. Вӑл вӑрмана кайсан ҫухалнӑ.

Раиса Семеновна Маштанова Алтышево ялӗнчен. Вӑл авӑн уйӑхӗн 5-мӗшӗнче вӑрмана кайнӑ та киле таврӑнман. Ӑна халӗ «Лиза Алерт» нимеҫисем шыраҫҫӗ. Ун пирки мӗн те пулин пӗлекенсене ҫак номерсемпе шӑнкӑравласа пӗлтерме ыйтаҫҫӗ: 8 800 700-54-52 (Раҫҫейре тӳлевсӗр), Тучка (Дарья) — 89176602633, Симба (Наталия) — 89196666680.

Кинемей мӗнлерех пулнине санӳкерчӗкре курма пулать. Вӑл килтен кайнӑ чухне мӗн тӑхӑнни паллӑ мар.

«Контактри» сӑн

Шӑмӑршӑ округӗнче, «Чӑваш вӑрманӗ» наци паркӗнчи «Липовый кРай» кану уҫланкинче, Кӑмпа фестивалӗ иртнӗ.

Кӑҫал вара кӑмпа чӑннипех те нумай — ҫумӑрӗ те ҫурӗ-ха та. Фестивальте хӑнасем кӑмпаран, вӑрман ҫимӗҫӗсенчен хатӗрленӗ апат-ҫимӗҫе туянма пултаранӑ: пыл, ҫырла, кӑмпа, эмел тата чей курӑкӗсем, сувенирсем…

Пултарулӑх коллективӗсем тата артистсем вара юрӑ-ташӑпа савӑнтарнӑ.

"На связи" форумри сӑн

Патӑрьел округӗнче вӑрманта 6 ҫын кӑмпана кайсан ҫухалса кайнӑ. Кун пирки полицие кӑнтӑрла пӗлтернӗ.

Ҫак ҫынсем Люля поселокӗ ҫывӑхӗнче кӑмпана кайнӑ. Анчах вӗсем шала кӗрсен каялла тухмалли ҫула тупайман.

Кун пирки шӑнкӑравласа пӗлтерсен вӗсене полицейскисем тата нимеҫӗсем шырама тытӑннӑ. Малтан вӗсен машинине тупнӑ. Ун хыҫҫӑн сасӑ тата ҫутӑ сигналӗсем пама тытӑннӑ. Ҫапла кӑмпаҫӑсем тупӑннӑ.

karelia-irbis.ru сайтри сӑн

Чӑваш Енре ретропуйӑс ҫӳреме пуҫлӗ. Ҫапла пӗлтернӗ Горький чукун ҫулӗн ертӳҫи Сергей Дорофеевский.

Пуйӑс «Шупашкар – Канаш» маршрутпа ҫӳрӗ.

Сӑмах май, ун пек ретропуйӑссем Чулхула облаҫӗнче пур. Вӗсем «Чулхула – Арзамас», «Чулхула-Московский-Чулхула – Сортировочный» маршрутсемпе ҫӳреҫҫӗ. Удмурт Республикинче вара «Чайковский экспресс» ҫула тухать. Киров хулинче Ҫӗнӗ ҫулхи уявсенче ретропуйӑс ҫӳрет.

forum.na-svyazi.ru сайтран илнӗ сӑнӳкерчӗксемпе усӑ курнӑ

«Университет — Кӳкеҫ» маршрутпа хутлакан 153-мӗш автобус сехетре пӗр рейс тӑвӗ.

Асӑннӑ маршрутпа ҫӳреме республикӑн Транспорт министерстви Мари Элти «Фортуна» тулли мар яваплӑ обществӑпа килӗшӗве авӑн уйӑхӗн 3-мӗшӗнче алӑ пуснӑ.

Ирхи пӗрремӗш рейс 6 сехет те 50 минутра ҫула тухмалла, каҫхи юлашки рейс — 19 сехет те 50 минутра. Пӗтӗмпе 12 рейс пулӗ.

cap.ru сайтри сӑн

Муркаш округӗнчи ҫӑлавҫӑсен кил хуҫисене ҫӗленрен ҫӑлма кайма тивнӗ. Ку авӑн уйӑхӗн 2-мӗшӗнче пулнӑ.

Нискассинче пурӑнакан арҫын килте тирпейленӗ чухне ҫӗлен пулнине асӑрханӑ. Вӑл самай пысӑк пулнӑ. Кил хуҫи тӳрех ҫӑлав службине шӑнкӑравланӑ. Анчах ҫӑлавҫӑсем ҫитиччен ҫӗлен урама шуса тухса кайнӑ.

Килте ҫӗлен асӑрхасан мӗн тумалла-ха? Чи малтан тавралла пӑхмалла. Тен, унта татах пур. Кайран майӗпен айккинелле кайса ҫӑлав службине шӑнкӑравламалла.

forum.zarulem.ws порталта вырнаҫтарнӑ скриншот

Чӑваш Енре пурӑнакансем машина кредитпа туянаҫҫӗ. Вӑтамран 1,2 миллион тенкӗ илеҫҫӗ, ӑна 5 ҫул та 3 уйӑх хушши тӳлесе пыраҫҫӗ.

Автокредит утӑ уйӑхӗнче илнисем вӑтамран 1,18 миллион тенкӗ парӑма кӗрсе кайнӑ. Вӑл укҫана вӗсем 63,6 уйӑхра тӳлесе татасшӑн. Ку цифрӑна Кредит историйӗн наци бюровӗ пӗлтернӗ.

Чӑваш Енре пурӑнакансем 2023 ҫулхи раштав уйӑхӗнче вӑтамран 1,24 миллиион тенкӗ автокредит илнӗ пулсан 2024 ҫул вӗҫӗнче ку сумма 1,09 миллион тенкӗпе танлашнӑ.

ШӖМ тунӑ сӑн

Тӑвай салинче 68 ҫулти арҫын 3-мӗш класс ачине мотоблокпа ҫапса кайнӑ.

Ку инкек ӗнер 12 сехет ҫурӑра пулнӑ. Тивӗҫлӗ канури арҫын Тӑвайра мотоблокпа пынӑ. Сарай еннелле пӑрӑннӑ чухне вӑл ҫулпа утса пыракан арҫын ача ҫине пырса кӗнӗ.

Ачан ури суранланнӑ, ӑна пульницӑна илсе кайнӑ, тухтӑрсем медпулӑшу панӑ хыҫҫӑн киле янӑ.

Ҫакӑ паллӑ: тивӗҫлӗ канури арҫын ӳсӗр пулман. Халӗ тӗрӗслев пырать.