«Контактри» сӑн

Етӗрне тӑрӑхӗнчи Барышевсем 55 ҫул пӗрле пурӑннине паллӑ тунӑ.

Вӗсем Анат Ачак ялӗнче кун кунлаҫҫӗ. Николай Ивановичпа Серафима Гавриловна 1969 ҫулта паллашнӑ, икӗ ҫул туслӑ ҫӳресен ҫемье ҫавӑрнӑ.

Вӗсем мӗн тивӗҫлӗ канӑва тухичченех тӑван колхозӗнче ӗҫленӗ. Вӗсен иккӗшӗн пӗтӗмӗшле ӗҫ стажӗ 45 ҫулпа танлашать.

Барышевсем пӗр ывӑл ҫуратса ӑна ура ҫине тӑратнӑ. Ывӑлӗ Александр хальхи вӑхӑтра ятарлӑ ҫар операцине хутшӑнать.

«Контактри» сӑн

Улатӑрти Гороховсем «Ашшӗ-амӑшӗн мухтавӗ» ордена тивӗҫнӗ. Хушӑва РФ Президенчӗ Владимир Путин алӑ пуснӑ.

Ольгӑпа Сергей Гороховсем 20 ҫул ытла пӗрле пурӑнаҫҫӗ. Вӗсен 5 ывӑлпа 5 хӗр ҫитӗнет. Сергей — диакон. Аслӑ ывӑлӗ Павел та унӑн ҫулӗпе кайнӑ.

ЧР Элтеперӗ Олег Николаев Гороховсене ордена тивӗҫнӗ ятпа саламланӑ.

riadagestan.ru сайтри сӑн

Куславкка тӑрӑхӗнчи арҫын паллакан хӗрарӑмӑн 500 пин тенкине вӑрланӑ. Ҫав хӗрарӑм упӑшки ятарлӑ ҫар операцине хутшӑннӑ, унта пуҫ хунӑ.

Ҫав кун арҫын ун патӗнче хӑнара пулнӑ. Хайхискер хӗрарӑм асӑрхаман чухне унӑн телефонне тытса банк сарӑмне кӗнӗ, 500 пин тенке хӑйӗн счечӗ ҫине куҫарнӑ.

Тепӗр кунхине те вӑл ун патне хӑнана килнӗ. Хальхинче хваттерте упраннӑ 96 пин тенке вӑрласа кайнӑ.

Арҫын куншӑн явап тытнӑ. Суд ӑна 4 ҫуллӑха тӗрмене хупма йышӑннӑ.

cap.ru сайтри сӑн

Красноармейски округӗнче чи лайӑх ялсене палӑртнӑ. Пӗрремӗш ушкӑнра 49 ҫын таран пурӑнакан ялсен хушшинче Ҫӗнӗ Выҫли ялӗ ҫӗнтернӗ, 700 пин тенке тивӗҫнӗ. Иккӗмӗш вырӑнта – Тури Типҫырма тата Тватпӳрт. Вӗсем 300-шер пин тенке тивӗҫнӗ.

Иккӗмӗш ушкӑнра (50 ҫынран ытларах пурӑнакан ялсем) Упи ялӗ ҫӗнтерсе 1,5 млн тенке тивӗҫнӗ. Иккӗмӗш вырӑнта – Йӗпрем (1 млн тенкӗ), виҫҫӗмӗш вырӑна 4 ял пайланӑ: Пӑрӑнтӑк, Васнар, Вӑрманкас тата Кӳлхӗрри. Вӗсем 550-шер пин тенке тивӗҫнӗ.

cap.ru сайтри сӑн

Паян республикӑна беспилотниксем тапӑнсан 1 ҫын аманнӑ. Кун пирки ЧР Сывлӑх сыхлавӗн министерстви пӗлтерет.

Тухтӑрсем унӑн сывлӑхне вӑтам йывӑр пек хаклаҫҫӗ. Пациент пульницӑра, унӑн пурнӑҫӗшӗн хӑрушлӑх ҫук.

Аса илтерер: паян ирхине Шупашкара тата Шупашкар округӗнчи Явӑш ялне беспилотниксем вӗҫсе килнӗ.

«Контактри» сӑн

Улатӑр округӗнче ҫак кунсенче ҫур ӗмӗр пӗрле пурӑнакан Анатолипе Валентина Батмановсене чысланӑ.

Вӗсен юратӑвӗ Мордва Республикинчи Урусово ялӗнче пуҫланнӑ. Анатолий Андреевич салтакран таврӑнсан ашшӗ-амӑшӗпе пӗрле Валентинӑна ҫураҫма кайнӑ.

Батмановсем икӗ хӗр ҫуратса ӳстернӗ. Халӗ виҫӗ мӑнукӗпе савӑнса пурӑнаҫҫӗ.

Эсир юлашки 10 ҫулта сӑвӑрсене ӑҫта курнӑ? Вырӑс географи обществин республикӑри уйрӑмӗ «Упрас тесе тупма» проект пуҫарать.

Ҫак кӑшлакан чӗрчуна Раҫҫейӗн Хӗрлӗ кӗнекине кӗртнӗ. Пирӗн республикӑра вӗсем сайра тӗл пулаҫҫӗ, пӗтес хӑрушлӑх та пур.

Ака-ҫу уйӑхӗсенче ӑсчахсем республикӑра савӑрсен колонийӗсене тупас тӗллевпе экспедицие кайма хатӗрленеҫҫӗ. Ҫавна май ҫынсене те пулӑшма ыйтаҫҫӗ: юлашки 10 ҫулта сӑвӑрсене ӑҫта курнине пӗлтермелле. Пӗлтерме ансат, ҫак сайтра формӑна кӑна ҫырса тултармалла: https://forms.yandex.ru/u/697728b084227c1ad2fb5a37/.

forum.na-svyazi.ru вырнаҫтарнӑ сӑнӳкерчӗк

Элӗксем хӑйсен район больницинче Хӗрле Чутайӗнчи больницӑпа пӗрлештерессине хирӗҫ. Ҫавна май вырӑнти хастарсем митинга тухнӑ. Митинга йӗркелекенсем пӗлтернӗ тӑрӑх, унта 80 ытла ҫын тухнӑ: тухтӑрсем, амӑшӗсем, пенсионерсем, районта пурӑнакансем.

Пухӑннисем Элӗкри район больницине хӑй тӗллӗн ӗҫлеттерме ыйтнӑ, резолюцие республикӑн Сывлӑх сыхлав министерствине тата Правительствине ярса парасшӑн. Больницӑна пӗрлештерессине хирӗҫлесе кунсӑр пуҫне пин ҫын алӑ пуснӑ.

ШӖМ тунӑ сӑн

Вӑрмар округӗнче 31 ҫулти хӗрарӑма хирӗҫ ҫул ҫине тухса тепӗр машинӑран иртсе кайма тӑнӑшӑн водитель правинчен хӑтарнӑ. Кайран вӑл правасӑрах машинӑпа ҫӳренӗшӗн пӗрре мар явап тытнӑ.

Анчах уншӑн ик айкки те тӑвайкки пулнӑ. Пӗлтӗрхи чӳк уйӑхӗнче вал каллех руль умне ларнӑ. Ӑна Вӑрмар поселокӗ ҫывӑхӗнче пакунлисем чарнӑ.

Суд ӑна 120 сехет ӗҫлеттерме йышӑннӑ. Хӗрарӑма 1,5 ҫул права памӗҫ. Кунсӑр пуҫне 2 млн тӑракан машинина патшалӑх валли конфискациленӗ.

chuvbook.ru сӑнӳкерчӗкӗ

Чӑваш Енӗн кӗнеке издательствине «Чӑваш Ен» издательствӑпа полиграфи комплексӗпе пӗрлештерме йышӑннӑ. Ун пек йышӑнӑва республикӑн Экономика аталанӑвӗн министерстви пӗлтӗрех, раштав уйӑхӗн 19-мӗшӗнче, алӑ пуснӑ-ха.

Сӑмах май каласан, асӑннӑ икӗ организаци те акционерсен обществи шутланать. Вӗсене пӗрлештерес ӗҫ пуш уйӑхӗн 31-мӗшӗнче вӗҫленмелле.