Чӑваш Енри студенткӑсем Инна Григорьевӑпа Елена Торговцева Пӗтӗм Раҫҫейри «Я ЛЮБЛЮ РОССИЮ-2026» (чӑв. "Эпӗ Раҫҫее юрататӑп") чемпионатра ҫӗнтернӗ.
Маттур та пултаруллӑ хӗрсем Шупашкарти апатлану технологийӗпе коммерци техникумӗнче вӗренеҫҫӗ. Иннӑпа Елена конкурса «Шыв айӗнчи хула халапӗсем» проектпа хутшӑннӑ, «Чи лайӑх экскурси маршручӗ» номинацире ҫӗнтернӗ. Проект аудиогид, видеоконтент тата интерактив пулӑшнипе Шупашкарти кӳлмекпе ҫуран утса паллашма май парать.
Палӑртса хӑвармалла: финалта Раҫҫейри 20 ытла регионти ҫамрӑксем хутшӑннӑ.
Пуш уйӑхӗн 28-мӗшӗнче Шупашкарта, Чӑваш патшалӑх ӳнер музейӗнче, «Его величество Гобой!» концерт кӑтартӗҫ. Ӑна Раҫҫей халӑх артисчӗ, Чӑваш Енре ҫуралнӑ Анатолий Любимова хисеплесе хатӗрленӗ. Музыкант пуш уйӑхӗн 22-мӗшӗнче 85 ҫул тултарнӑ.
Программӑна классика музыкин шедеврӗсенчен хатӗрленӗ. Вӗсем пурте — гобой валли тӗрлӗ ҫулта ҫырнӑ юрӑ-кӗвӗ. Концерт музыка ӑстине сума сунине, унӑн пултарулӑхне хакланине тата сума сунине кӑтартса пама тивӗҫ.
Сцена ҫине Шупашкарти Ф.П. Павлов ячӗллӗ музыка училищин преподавателӗсем, студенчӗсем тата ку вӗренӳ заведенийӗнче тӗрлӗ ҫулта вӗреннисем тухӗҫ. Ҫав шутра — Чӑваш Республикин тава тивӗҫлӗ артисчӗ Алексей Гурьев (гобой), Чӑваш Республикин культурӑн тава тивӗҫлӗ ӗҫченӗ Элла Леонтьева (гобой), Ирина Никитина (гобой), Татьяна Иванова (флейта), Николай Кадыков ертсе пыракан симфони оркестрӗ. Мускаври хӑнасем те пулӗҫ.
Шупашкарти 39-мӗш шклута «Этномода» дефиле иртнӗ. Модельсен ролӗнче вӗренекенсем пулнӑ. Ҫапла май вӗсем пирӗн ҫӗршывра пурӑнакан халӑхсем пирки каласа кӑтартнӑ.
Чи малтан шкул ачисем хӑнасем валли экскурси ирттернӗ. Вӑл е ку халӑхӑн наци тумӗ мӗнпе пуян? Ҫамрӑк ӳнерҫӗсем хӑйне евӗр тӗпчев ирттернӗ.
Пӗр блока чӑваш халӑхӗн тумне халалланӑ. Сцена ҫине модель тухмассерен ертӳҫӗсем кӑсӑклӑ пулӑмсем пирки каласа кӑтартнӑ.
Палӑртса хӑвармалла: ку уява 100 ытла шӑпӑрлан хутшӑннӑ. Ӑна Чӑваш Республикинчи Хӗрарӑмсен пӗрлӗхӗ пуҫарнӑ «Халӑхсен туслӑхӗн вӑйӑ карти» ҫӗнӗ проектпа килӗшӳллӗн йӗркеленӗ.
Республикӑна кӑмӑллӑ хыпар ҫитнӗ: Шупашкарти 117-мӗш ача пахчи Пӗтӗм Раҫҫейри «Хальхи йышши ача пахчи» конкурсра чи лайӑххи пулса тӑнӑ!
Тупӑшу хӗрӳ иртнӗ: унта 1000 ытла шкул умӗнхи вӗренӳ учрежденийӗ хутшӑннӑ. Шупашкарти ача пахчи вӗсен йышӗнче пӗр иккӗленмесӗрех мала тухнӑ. Ҫапла вӑл Хальхи йышши ача пахчисен реестрне кӗнӗ. Эппин, ҫак учреждени ачасемшӗн хӑтлӑ, унта аталанмалли условисем вӑйлӑ пулнине тепӗр хутчен ҫирӗплетет.
Ҫак ача пахчинче вӑй хуракан Надежда Григорьева педагогӑн ӗҫне уйрӑммӑн палӑртнӑ. Ӑна «Чи лайӑх педагог-новатор» номинацире чысланӑ. Вӑл ҫак хисепе ачасене вӑйӑ урлӑ вӗренме пулӑшакан ҫӗнӗ программӑсене пурнӑҫланӑшӑн тивӗҫнӗ.
Шупашкарти кӳлмекре вырнаҫнӑ Анне палӑкӗ кивелнӗ, ҫавна май ӑна кӗҫех юсӗҫ.
Хальхи вӑхӑтра тӗплӗ юсав ӗҫӗсен проект документацине тӑвакана палӑртма аукцион ирттереҫҫӗ.
Малтанхи хак – 4 237 069 тенкӗ. Конкурса хутшӑнма заявкӑсене ака уйӑхӗн 8-мӗшӗччен йышӑнаҫҫӗ.
Пӗлтӗр монумент мӗнле лару-тӑрура пулнине хакланӑ. Подрядчикӑн ҫав пӗтӗмлетӗве тӗпе хурса проект документацине хатӗрлемелле. Обьект 46 метр ҫӳллӗш, сарлакӑшӗпе вӑрӑмӑшӗ – 25,3-шер метр.
Пахалӑхсӑр ҫӗвӗсене тасатмалла тата ҫӗнӗрен сварка тумала, бетонсене ҫӗнетмелле, ҫурӑксене сапламалла, арматурӑна коррозирен тасатмалла, постамент ҫинчи гранит плитасене улӑштармалла тата ытти те. Проектра ҫак ӗҫсене тумаллине пӑхса хӑварнӑ. Ӗҫсене кӑҫал раштав уйӑхӗн 21-мӗшӗччен вӗҫлемелле.
Пуш уйӑхӗн 30-мӗшӗнчен пуҫласа республикӑра регион пӗлтерӗшлӗ ҫулсем ҫинче вӑхӑтлӑх чарусем пулӗҫ. Ку мерӑсем 6 тоннӑран ытларах таякан йывӑр тиевлӗ машинӑсене пырса тивет.
Ҫав кунран пуҫласа Шупашкарта кунашкал машинӑсене укҫа тӳлесен кӑна кӗртӗҫ – вӗсем ятарлӑ пропуск туянӗҫ. Ку укҫа ҫула юсама кайӗ. Ҫул-йӗр хуҫалӑхӗн ӗҫченӗсем ӑнлантарнӑ тӑрӑх, юр ирӗлнӗ тапхӑрта тата ейӳ вӑхӑтӗнче ҫул тӗпӗ нӳрелет, ҫавна май хӑвӑрт арканать.
Шупашкарта тӗрӗслев пункчӗсем хулана кӗмелли вырӑнсенче пулӗҫ: Канаш, Сӗнтӗрвӑрри, Улатӑр, Етӗрне тата Вӑрнар ҫулӗсем ҫинче.
Ку чару пассажирсене илсе ҫӳрекен автобуссене, юсав ӗҫӗсем пурнӑҫлакан бригадӑсене транспортне тата экстреннӑй служба машинисене пырса тивмест.
Хастар яш-кӗрӗмпе хӗр-упраҫ валли ырӑ хыпар пӗлтӗмӗр. Вӗсене Ҫамрӑксен форумне йыхравлаҫҫӗ.
Мероприяти пуш уйӑхӗн 28-мӗшӗнче Шупашкарта иртӗ. Вӑл Чӑваш наци музейӗнче (Хӗрлӗ лапам, 5/2) 10:00 сехетре пуҫланӗ.
«Форумӑн тӗллевӗ — чӑвашла калаҫмалли хутлӑх йӗркелесе тӗрлӗ енпе тӑрӑшакан ҫамрӑксен ӗҫӗсемпе, пултарулӑхӗпе тата проекчӗсемпе паллашасси», — тесе пӗлтернӗ форум пирки халӑх тетелӗнчи хӑйӗн пабликӗнче «Ҫамрӑксен хаҫачӗ».
Ҫамрӑксен форумне хӑна пек кӗме ҫак каҫӑпа регистрациленмелле: https://forms.gle/2CY1Gz14VNNr6v789.
Туссем, унта кайма кая юлман-ха. Эсир те, сирӗн пӗлӗшӗрсем те регистрациленме пултараҫҫӗ. Ҫын ҫине тухнине, ырӑ ҫӗнӗ хыпарсемпе хавхаланнине нимӗн те ҫитес ҫук.
Шупашкарти шкул ачи «Ҫулталӑкри вулакан» ята тивӗҫнӗ. Ҫавӑн пек ырӑ тӗслӗх кӑтартнӑ Татьяна Савельева.
Татьяна Шупашкарти 20-мӗш шкулта 3-мӗш класра ӑс пухать. Вӑл ҫулталӑкра 108 кӗнеке вуласа тухнӑ. Ҫапла вӑл Республикӑри ачасемпе ҫамрӑксен библиотекинчен «Ҫулталӑкри вулакан – 2025» ята тивӗҫнӗ.
Татьяна Савельевӑна Халӑхсен туслӑхӗн ҫуртӗнче Пӗтӗм Раҫҫейри «Ача-пӑча кӗнеке эрни» акципе килӗшӳллӗн иртнӗ «Раҫҫейри кӗнеке мозаики» уявра чысланӑ. Ӑна парнепе те хавхалантарнӑ: «АнимаТус» студире вӗренмелли сертификат панӑ. Унта Татьяна хӑйне мультфильм хатӗрлес ӗҫре тӗрӗслӗ.
Ӗнер, пуш уйӑхӗн 21-мӗшӗнче, 22:10 сехетре Шупашкарта хӑрушӑ авари пулнӑ: унта 47 ҫулти хӗрарӑм вилнӗ.
ШӖМ пӗлтернӗ тӑрӑх, авари Трактор тӑвакансен проспектӗнчи ҫул ҫаврӑнӑшӗнче Тасатакан сооруженисем патӗнче пулнӑ. «Сузуки» иномарка рулӗ умӗнче ларнӑ 52-ри арҫын дистанцие пӑхӑнмасӑр ВАЗ-2115 машинӑпа ҫапӑннӑ, унтан юпа ҫине пырса тӑрӑннӑ. Аварире «Сузукире» пулнӑ 47 ҫулти хӗрарӑм вилнӗ. Тепӗр иккӗшӗ, 48-ти хӗрарӑмпа 52-ри арҫын, аманнӑ.
«Сузуки» водителӗ ӳсер пулни паллӑ, вӑл хӑй суранланман. ВАЗ-2115 машина водителӗ те аманман. Халӗ ӗҫ-пуҫа уҫӑмлатаҫҫӗ.
Пуш уйӑхӗн 28-мӗшӗнче Чӑваш таврапӗлӳҫисен пӗрлӗхӗ (ертӳҫи - Сергей Сорокин) Чӑваш Енӗн Наци вулавӑшӗпе (ертӳҫи - Роза Лизакова) Чӑваш таврапӗлӳҫисен регионсен хушшинчи «Чӑваш тӑрӑхӗ Раҫҫей историйӗнче» форумне ирттерӗ.
Форума Чӑваш таврапӗлӳҫисен пӗрлӗхӗн Красноармейскинчи уйрӑмӗн пилӗк ҫынран тӑракан делегацийӗ те хутшӑнӗ. Кун пирки пӗрлешӗвӗн секретарӗ Виталий Михайлов халӑх тетелӗнчи хӑйӗн страницинче пӗлтернӗ. Йышра асӑннӑ пӗрлешӗвӗн председателӗ, тӗп вулавӑш ӗҫченӗ, хисеплӗ таврапӗлӳҫӗ Светлана Гурьева; Нестер Янкас ячӗллӗ пӗрлӗх пайташӗ Виталий Михайлов пулӗ.
Мероприятие Чӑваш Ен Вырӑс патшалӑхне хӑй ирӗкӗпе кӗнӗренпе 475 ҫул ҫитнине,Раҫҫейри Халӑхсен пӗрлӗхӗн ҫулталӑкне тата Чӑваш Республикинчи Халӑхсен туслӑхӗн ҫулталӑкне халалланӑ.
Форумра историпе, культурӑпа, чӗлхепе, таврапӗлӳпе ҫыхӑннӑ тӗрлӗ ыйтусене сӳтсе явӗҫ, таврапӗлӳ кӑларӑмӗсен 2025 ҫулхи конкурсне пӗтӗмлетӗҫ, чи хастаррисене наградӑлӗҫ.
Таврапӗлӳҫӗсене, наука тата вӗрентӳ, библиотекӑсемпе музейсен, архивсен ӗҫченӗсене, шкул ачисене, вӑтам профессиллӗ тата аслӑ пӗлӳ паракан заведенисенче вӗренекен студентсене, таврапӗлӳ ӗҫӗпе интересленекен учрежденисемпе организацисен представителӗсене форума хутшӑнма чӗнеҫҫӗ.
+6.3 °C