Чӑваш Енӗн Наци вулавӑшӗн «Варкӑш» литература клубӗнче Николай Сорокинӑн «Тӑлӑх арӑм минтерӗ» кӗнекине сӳтсе явнӑ. Кӗнеке издательствин ӗҫченӗ Ольга Австрийская хыпарланӑ тӑрӑх, вырӑсларан чӑвашла Вера Александровӑпа Евгений Турхан куҫарнӑ. Кӗнекене савнисен романӗ тесе палӑртнӑ.
Мероприятие «Чӑваш кӗнеки» центрӑн ӗҫченӗ Татьяна Семенова ертсе пынӑ.
Николай Сорокин 1941 ҫулхи утӑ уйӑхӗн 8-мӗшӗнче Тутарстанри Теччӗ районӗнчи Аслӑ Ӑнӑ ялӗнче ҫуралнӑ. Журналист, публицист, ҫыравҫӑ ТАССӑн Тутарстан Республикинчи ятарлӑ корреспонденчӗ, Хусанта тухса таракан «Сувар» хаҫата никӗслекенӗ, тӗп редакторӗ тата «Шурӑмпуҫ» литература журналӗн тӗп редакторӗ пулнӑ. Вун икӗ кӗнеке авторӗ, ҫав шута «Вечная Волга» роман-трилоги те кӗрет (2006–2008, 2013), чӑвашла «Аттеҫӗм Атӑл» ятпа тухнӑ (2017). «Вера древнего народа» документлӑ фильм ӳкернӗ. Тутарстан Республикин, Раҫҫей Федерацийӗн культурӑн тава тивӗҫлӗ ӗҫченӗ. Николай Михайлович 2021 ҫулхи утӑ уйӑхӗн 5-мӗшӗнче ҫут тӗнчерен уйрӑлса кайнӑ.
Ака уйӑхӗн 15-мӗшӗнче Шупашкарта танго фестивалӗ иртӗ. «Tango-Fest» пӗтӗм тӗнчери IV фестиваль Чӑваш патшалӑх филармонийӗнче пулӗ. Мероприяти 19 сехетре пуҫланӗ. Унта аргентина ташшине юратакансем кайса курма пултараҫҫӗ. Фестивальте чӑннипех те хӗрӳ ташӑсем пулӗҫ, ӑста артистсем сцена ҫине тухӗҫ. Танго урлӑ вӗсем чун хӗрӳлӗхне кӑтартса парӗҫ. Ҫакӑ алӑ-ура хусканӑвӗнче ҫеҫ мар, пит-куҫ вылявӗнче, куҫра та витӗр курӑнса тӑрӗ.
Пӗтӗм тӗнчери фестивале кӑҫал Астор Пьяццолла ҫуралнӑранпа 105 ҫул ҫитнине халалланӑ. Вӑл — XX ӗмӗрӗн иккӗмӗш ҫурринчи композитор, танго нуэво стиле пуҫарса яраканӗ.
Фестивале Илья Алексеев аккордеонист, «NUAR orchestra» ансамбль тата «Salon del Tango» ушкӑн ташӑҫисем хутшӑнӗҫ.
Ака уйӑхӗн 1-мӗшӗ кулӑш кунӗ тетпӗр те К.В. Иванов ячӗллӗ Чӑваш патшалӑх академи драма театрӗнче ҫав кун куракансене ятарлӑ программӑна йыхравланӑ.
Унта пырса ҫитнисем «Ах, кама-ши савмалла?», «Ҫимӗк каҫӗ», «Туя туй пек тӑвар-и?» спектакльсенчи кулӑшла сыпӑксене пӑхса киленнӗ.
Театрӑн пресс-служби халӑх тетелӗнчи хӑйӗн пабликӗнче хыпарланӑ тӑрӑх, Раҫҫей тава тивӗҫлӗ артисчӗсем Любовь Федорова, Владимир Семенов тата Чӑваш халӑх артисчӗ Геннадий Медведев театрта, гастрольсенче пулса иртнӗ путишле самантсене аса илсе култарнӑ. Вӗсем Кӗлпук Мучи (Ефим Никитин) пысӑк кулӑш ӑсти пулнине аса илсе каласа кӑтартнӑ. Куракансем умне Кӗлпук Мучин пьесипе хатӗрленӗ «Хуняма» спектаклӗн сыпӑкӗпе те тухнӑ. Ӑна Василий Иванов режиссёр лартнӑ.
Шупашкара Пушкӑртстанри оперӑпа балет театрӗн артисчӗсем килӗҫ.
Кӳршӗ республика артисчӗсем Чӑваш патшалӑх оперӑпа балет театрӗнче иртекен Балет фестивальне хутшӑнӗҫ.
Ака уйӑхӗн 3-4-мӗшӗсенче вӗсем куракансене «Спартак» тата «Бахчисарайский фонтан» постановкӑсемпе паллаштарӗҫ.
Сӑмах май, 14-22 ҫулсенчи ачасемпе ҫамрӑксем билетсене Пушкин карттипе туянма пултараҫҫӗ.
Ака уйӑхӗн 24-мӗшӗнче Чӑваш Республикин тава тивӗҫлӗ артисткипе Ольга Петровӑпа тӗлпулу иртӗ. Сцена ӑстин пултарулӑхне хаклакансене Чаваш патшалӑх пукане театрне йыхравлаҫҫӗ. Мероприяти 18 сехет те 30 минутра пуҫланӗ.
Ҫав каҫ артисткӑпа тӗл пулнисӗр пуҫне «Шап-шурӑ мӑшӑр» музыка клипӗн презентацийӗ те пулӗ.
Мероприятие Чӑваш чӗлхи эрнине халалланӑ. Тӗлпулу чӑвашла иртӗ.
Унта пухӑннисем Ольга Петрован кун-ҫулӗпе, пултарулӑхӗпе паллашма пултарӗҫ, чуне унӑн музыка енне хӑҫан туртӑнма пуҫланине пӗлӗҫ, юрӑ ҫырма мӗн хавхалантарни пирки каласа кӑтартӗ.
Пултарулӑх каҫне Пукане театрӗн артисчӗсем те хутшӑнӗҫ. Вӗсем чӑваш ташшине ташлӗҫ, чӑвашла юрӑсем шӑрантарӗҫ.
Пултарулӑх каҫне хутшӑнас тесен https://quicktickets.ru/cheboksary-teatr-kukol/e520 каҫӑпа иртсе тӳлевсӗр билет туянмалла.
Чӑваш Енӗн Наци вулавӑшӗнче «Хождение за словом» (чӑв. Тӗрленет сӑмах тӗрри) проектпа паллаштарнӑ. Ҫавӑн чухнех вулавӑшра ҫавӑн ятлӑ курав уҫӑлнӑ. Ӑна чӗрӗ халӑх сӑмахне пухнӑ икӗ ҫынна халалланӑ. Ҫав датӑсем — «Толковый словарь живого великорусского языка» словарь авторӗ Владимир Даль (1801-1872) ҫуралнӑранпа 225 ҫул ҫитни тата «Чӑваш чӗлхи словарӗн» авторӗ Николай Ашмарин (1870-1933) ҫуралнӑранпа 155 ҫул ҫитни.
Курав экспозицине сайра тӗл пулакан кӑларӑмсенчен, архиври документсенчен, ҫырусенчен, литература тата ӑслӑлах ӗҫӗсенчен, Николай Ашмаринпа Владимир Даль публикацийӗсенчен, тӗрлӗ тӗпчевҫе аса илӗвӗнчен хатӗрленӗ. Тата, паллах, Владимир Даль хатӗрленӗ тӑватӑ томлӑ «Толковый словарь живого великорусского языка» словарьпе Николай Ашмаринӑн 17 томлӑ «Чӑваш чӗлхи словарӗ» пулнӑ.
Шупашкарти аэропорт пуш уйӑхӗн 29-мӗшӗнчен ҫуркуннепе ҫуллахи режимпа ӗҫлеме пуҫланӑ. Ҫӗнӗ график юпа уйӑхӗн 24-мӗшӗччен пырӗ. Кун пирки Шупашкарти аэропортӑн пресс-служби хыпарланӑ.
Кӑҫал ҫӗршывӑн кӑнтӑр енчи регионӗсене самолетсем ытларах вӗҫӗҫ. Ҫав шутра – Сочие, Махачкалана, унсӑр пуҫне тата Калининграда та. Ҫӗршывӑн хӗвеланӑҫ енче вырнаҫнӑ ҫак хулапа вӑл тӑрӑха та туристсем кӑмӑллаҫҫӗ.
Шупашкарти аэропорт ют ҫӗршывсене вӗҫекен рейссене уҫасси пирки те калаҫу ирттерет-мӗн. Хальлӗхе хӑш ҫӗршыв пирки уҫӑмлатман та, анчах «Ҫыхӑнура» форумра Бакупа Анталья хулисем пирки сӑмах пырать тесе асӑнса хӑварнӑ.
Ҫуркуннепе ҫуллахи сезонта Мускав, Санкт-Петербург, Сочи, Минеральные Воды, Сургут, Махачкала, Калининград тата Новосибирск хулисем пур.
Чӑваш патшалах академи драма театрӗнче ака уйӑхӗн 3 тата 4-мӗшӗсенче «Паттӑрсем вилмеҫҫӗ» спектакль кӑтартӗҫ.
Театр хӑйӗн сайтӗнче ку ӗҫ пирки ҫапларах хыпарланӑ: «пурнӑҫ пӗлтерӗшӗ, чыспа тивӗҫ, туслӑхпа юрату хӑвачӗ ҫинчен каласа кӑтартакан психологиллӗ драма. Ӑна Раҫҫей Паттӑрне, Елчӗк тӑрӑхӗнчи Тускелте ҫуралса ӳснӗ Николай Петров аслӑ лейтенанта халалланӑ. Раҫҫей ывӑлӗн ҫынлӑхне, тӗрӗслӗхне кӑтартать, тӗрлӗ халӑх ҫынни пӗртӑванла кар тӑни пысӑк вӑй пулнине ӗнентерет.Паттӑрсем вилмеҫҫӗ, вӗсен ячӗ халӑх асӗнче ӗмӗр-ӗмӗр пурӑнать — ҫакӑн ҫинчен ку истори».
Спектакле Раҫҫей Федерацийӗн, Азербайджан, Калмӑк тата Тыва Республикисен искусствӑсен тава тивӗҫлӗ деятелӗ Борис Манджиев лартнӑ. Ҫутӑ художникӗ — Ильшат Саяхов, художник-постановщик — Георгий Пашин, хусканусен режиссёрӗ — Светлана Яковлева, композиторӗ — Андрей Галкин, режиссёра пулӑшаканӗ — Николай Иванов.
Пуш уйӑхӗн 27-мӗшӗнче уявлакан Театр кунӗ умӗн пирӗн республикӑра XXVI хут ӗнтӗ «Чӗнтӗрлӗ чаршав» конкурс иртет. Унӑн ҫӗнтерӳҫисене ҫав кун Чӑваш патшалӑх филармонийӗнче чысланӑ.
Чи лайӑх спектакль ятне Чӑваш академи драма театрӗн «Хуркайӑк ҫулӗ» ӗҫӗ тивӗҫнӗ. Унӑн режиссёрӗ — Раҫҫейӗн искусствӑсен тава тивӗҫлӗ ӗҫченӗ Борис Манджиев (сӑнӳкерчӗкре).
«Чи лайӑх хӗрарӑм ролӗ» номинацире ҫак спектакльте Чӗкеҫ сӑнарне калӑпланӑ Надежда Зубкова тивӗҫнӗ. «Чи лайӑх арҫын ролӗ» номинацире Вырӑс драма театрӗнче лартнӑ «Дядюшкин сон» спектакльте Мозгляков ролӗнче вылякан Александр Смышляев ҫӗнтернӗ.
«Чи лайӑх сценографи» — Чӑваш пукане театрӗн «Черная курица, или Подземные жители» спектакльне илемлетнӗ Эмиль Капелюш, Юрий Сучков.
«Музыка енчен спектакле чи лайӑх илемлетни» номинацире Чӑваш патшалӑх оперӑпа балет театрӗн «Мы хотим танцевать» спектакльне илемлетнӗ Александр Гриханкин палӑрнӑ.
«Иккӗмӗш планри чи лайӑх роль» номинацире Чӑваш патшалӑх ҫамрӑксен театрӗн «Ҫӑкӑр чӗлли» спектаклӗнче Лисук сӑнарне калӑпланӑ Алина Зайцева палӑрнӑ.
«Ачасем валли лартнӑ чи лайӑх спектакль» — Чӑваш патшалӑх сӑнавлӑ театрӗн «Праздник непослушания» спектаклӗ, унӑн режиссӗрӗ – Андрей Аверин.
Пуш уйахӗн 26-мӗшӗнче Чӑваш наци вулавӑшӗнче Олег Прокопьевӑн «Чӑвашӑм, пурӑн!» кӗнекин хатлавӗ иртнӗ. Халӑх чылаййӑн пухӑннӑ: ҫыравҫӑсем, журналистсем, ӑсчах-литературоведсем, педагогсем, таврапӗлӳҫӗсем…
Олег Прокопьев ҫак кӗнеке мӗнле ҫурални пирки каласа кӑтартнӑ, хӑш-пӗр сӑввине вуланӑ. Унӑн сӑввисене ыттисен те вулас кӑмӑл ҫуралнӑ. Чӑваш Республикин тава тивӗҫлӗ артистки Надежда Кириллова, Олег Прокопьевӑн хӗрӗ Салампи, Чӑваш наци вулавӑшӗн вулаканӗ Сергей Пятаков, Муркаш округӗнчи Калайкасси шкулӗн ачисем сӑвӑ йӗркисене вуланӑ. Ҫавӑн пекех унӑн сӑввисемпе хывнӑ юрӑсене шӑрантарнӑ: Елена Смородинова, Ольга Лукова, Эдуард Андреев, Алена Алексеева, Любовь Гордеева, Дмитрий Моисеев, Ирина Лампасова, Раиса Казакова-Сейт, «Эткер» фольклор ансамблӗ…
Хӑнасем те тухса калҫнӑ. Акӑ, тӗслӗхрен, филологи ӑслӑлӑхӗсен докторӗ Виталий Родионов авторӑн сӑввисем хӑйне евӗр пулнине палӑртнӑ.
Ҫак кӗнекепе Чӑваш наци вулавӑшӗнче паллашма пулать.
+9.3 °C