forum.zarulem.ws порталтан илнӗ сӑнӳкерчӗк

Шупашкар хулинче пӗр хӗрарӑм-водитель хирӗҫ килмелли ҫулпа ним пулман пек пынӑ. Пӑтӑрмах хулари «Питомник» чарӑну ҫывӑхӗнче пулса иртнӗ.

«Ауди» машинӑпа ҫула тухнӑ хӗрарӑм Иван Яковлев проспекчӗпе ҫавӑн пек пынӑ. Унтан ӑна нумай хваттерлӗ ҫуртсен картишне кӗме меллӗрех пулнӑ иккен.

Хӗрарӑм йӗркене пӑснине куракансем пулнӑ, вӗсем видеона халӑх тетелӗнче вырнаҫтарнӑ хыҫҫӑн ҫул-йӗр хӑрушсӑрлӑхӗн инспекторӗсем машинӑна Канаш шосси ҫинче тытса чарнӑ. Кун пек тума «Хӑрушсӑр хула» камерисем пулӑшнӑ.

Руль умӗнче Улатӑрти 43 ҫулти хӗрарӑм пулнӑ. Вӑл хӑйӗн айӑпне йышӑннӑ, Шупашкарта сайра пулнипе ӑҫталла пӑрӑнмаллине арпаштарса ятӑм тесе ӗнентерме пӑхнӑ.

Хирӗҫ килекен ҫулпа пынӑшӑн хӗрарӑма 7,5 пин тенкӗлӗх штраф хурса парӗҫ тата ҫур ҫул таран водитель прависӗр хӑварӗҫ.

Чӑваш Енӗн Инкеклӗ ӗҫсен министерствин сӑнӳкерчӗкӗ

Иртсе кайнӑ талӑкра пирӗн республикӑра виҫӗ пушар пулнӑ. Ун вӑхӑтӗнче гараж тата мунча ҫуннӑ. Ку вӑл йӑлтах пӗр килте пулса иртмен-ха.

Маларах эпир виҫӗ пушар терӗмӗр те, тепӗр пушар Шупашкарта пулнӑ. Унта, телее, пурлӑх шар курман. Щорс урамӗнчи уҫӑ территорире каяш ҫуннӑ.

Халӗ вара маларах асӑнса хӑварнӑ инкек пирки тӗплӗнрех пӗлтерер.

Муркаш районӗнчи Тереҫ ялӗнче мансардӑллӑ гараж ҫунӑ. Вут-ҫулӑм 30 тӑваткал метр лаптӑк ҫинче алхаснӑ.

Шупашкар районӗнчи Ярӑска ялӗнче мунча хыпса илнӗ. Пушарпа кӗрешекенсем 20 тӑваткал метр ҫинчи пушара сӳнтернӗ. Инкекре, телее, ҫын пиҫсе кайман, нкама та сӗрӗм тивмен, вилмен. Шел те, кил хуҫисем самай шар курнӑ. Вӑрӑран юлать, вутран юлмасть тесе ваттисем ахальтен каламан вӗт.

Инкелӗ лару-тӑру министерстви тунӑ сӑн

Шупашкар хулинчи «Ярмӑрккӑ» пасарта павильонсенчен пӗри ҫунма тытӑннӑ. Ку ҫурла уйӑхӗн 28-мӗшӗнче пулнӑ.

Инкеклӗ лару-тӑру министерствин ӗҫченӗсем вырӑна хӑвӑртах ҫитнӗ. Унта 8-мӗш ретри 40-мӗш вырӑн ҫунма тытӑннӑ. Пушар 2 тӑваткал метр лаптӑк ҫинче сарӑлнӑ.

Ҫак кун Чӑваш Енри ҫӑлавҫӑсем тӑватӑ пушар сӳнтернӗ. Уруков урамӗнчи 1-мӗш ҫуртри пӗр хваттерти кухня ҫунма тытӑннӑ. Вӑрмар районӗнчи Ҫӗнӗ Мӑнтӑр ялӗнче стадионта пушар тухнӑ. Ҫавӑн пекех Шупашкар районӗнчи Шӗнерпуҫ ялӗнче мунча ҫуннӑ.

Сӑмах май, ку уйӑхра Шупашкарти «Мега Молл» суту-илӳ центрӗнче пушар пулнӑччӗ. Унта маччаран ҫакӑнса тӑракан светильник ҫунма пуҫланӑ. Лавккари ӗҫченсем пушара ҫӑлавҫӑсем киличчен сӳнтерме ӗлкӗрнӗ.

Паян халӑх тетелӗнчи тӗрлӗ пабликра Ҫӗнӗ Шупашкарти «Химпромпа» ҫыхӑннӑ хӑрамалла хыпар сарӑлнӑ. Унччен ӑна суя аккаунтпа усӑ курса пӗлтернӗ, кайран Ҫӗнӗ Шупашкар хула админстрацийӗн пуҫлӑхӗн Александр Алексеевӑн суя аккаунтне те туса хунӑ.

Хула пуҫлӑхӗн администрацийӗ ячӗпе ҫырнинче паян ирхине предприятире инкек пулнӑ, лару-тӑрӑва хула администрациӗ тӗрӗслесе тӑрать тесе шӑрҫаланӑ, килти чӳречене хупса хума сӗннӗ.

Халӑха кун пек минретнипех лӑпланман, «Химпром» предприятин суя аккаунтне йӗркеленӗ. Унта та сиенлӗ япаласем сывлӑша лекни пирки хыпарланӑ.

Ҫав вӑхӑтрах МАХри «Первый чувашский» канал халӑх тетелӗнче чӑн хыпара ҫеҫ ӗненмелли пирки сӗнсе хыпарланӑ май Ҫӗнӗ Шупашкар хула администрацийӗн тата «Химпромӑн» официаллӑ аккаунчӗсене кӗрсе пӑхма сӗннӗ.

«Лиза Алерт» шыравпа ҫӑлав отрядчӗн сӑнӳкерчӗкӗ

Ҫӗрпӳ районӗнче ӗнер, ҫурла уйӑхӗн 27-мӗшӗнче, 93 ҫулти мучи ҫухалнӑ. Ватӑ ҫынна халӗ «Лиза Алерт» шыравпа ҫӑлав отрячӗн хастарӗсем шыраҫҫӗ.

93 Евстафий Христофоров Ҫӗрпӳ районӗнчи Кӗҫӗн Тивӗш ялӗнче пурӑннӑ. Ӗнер вӑл килӗнчен тухса кайнӑ та каялла таврӑнман.

Мучи 163 сантиметр ҫуллӗш, начаркка пӳ-силлӗ, ҫӳҫӗ кӑвакарнӑ, куҫӗ кӑвак тӗслӗ.

Килтен тухнӑ чухне мучи кӑвак курткӑпа, хура шӑлаварпа, хура кроссовкипе пулнӑ.

Куракан-пӗлекен пулсан «Лиза Алерт» шыравпа ҫӑлав отрядне 8 800 700-54-52 хӗрӳ линипе (ку лини тӳлевсӗр, унпа шӑнкӑраваланӑшӑн укҫа тӳлемелле мар) ҫыхӑнма ыйтаҫҫӗ. Е отрядӑн хастарӗсемпе те ҫыхӑнма пулать: Искричӑн (Викторийӑн) телефон номерӗ 89876687081, Кирейчикӑн (Екатеринӑн) — 89777084704.

forum.zarulem.ws порталтан илнӗ сӑнӳкерчӗк

Шупашкар хулинче туй каччи машинӑсӑр тӑрса юлнӑ.

Каферен тухакан ӳҫӗр арҫынна куракансем пулнӑ. Вӗсем хайхи этем BMW машина рулӗ умне кӗрсе ларнине те асӑрханӑ. «Маншӑн пулсан ик айкки те тӑвайкки», — тесе тӑман, йӗрке хуралҫисене шӑнкӑравласа пӗлтернӗ.

Ют ҫӗршывра туса кӑларнӑ машина ӑҫталла ҫул тытнине «Хӑрушсӑр хула» тытӑм камерисем пулӑшнипе тупса палӑртнӑ. Ҫул-йӗр хӑрушсӑрлӑхӗн экипажӗ автомобиле Максим Горький проспектӗнче, «Амазони» парк тӗлӗнче, хӑваласа ҫитнӗ те унӑн ҫулне пӳлсе хунӑ.

Руль умӗнчи ӳсӗр арҫын туй каччи пулнӑ. Мускав облаҫӗнчи Реутов хулинче пурӑнакан 40 ҫулти арҫынна ӳсӗрле руль умне ларнӑшӑн 2024 ҫулта водитель прависӗр пӗрре хӑварнӑ иккен. Правана иличчен ун темиҫе уйӑх ҫеҫ тӑрса юлнӑ. Халӗ ун тӗлӗшпе пуҫиле ӗс пуҫарнӑ. Машинӑна вара ятарлӑ стоянкӑна ӑсатнӑ. Дознавательсем машинӑна патшалӑх валли туртса илме суда тухма палӑртаҫҫӗ иккен.

Паян Шупашкарта самай ҫулланнӑ водитель велосипедист ҫине пырса кӗнӗ. Инкек Гагарин урамӗнчи 3-мӗш ҫурт патӗнче пулса иртнӗ.

Йӗрке хуралҫисем малтанласа палӑртнӑ тӑрӑх, ирхи 6 сехет те 45 минутра ҫурт умӗнчи территоринчен тухнӑ чухне электровелосипедпа пыракан 41 ҫулти арҫынна асӑрхаман та вӑл ун ҫине пырса кӗнӗ.

Шар курнӑ арҫынна ҫийӗнчех больницӑна илсе кайнӑ. Ӑна унта тӗрӗсленӗ тата пулӑшнӑ хыҫҫӑн килне янӑ.

Сӑмах май каласан, ҫул ҫинчи инкеке лекнисенчен иккӗшӗ те урах пулнӑ.

Ку тӗслӗх ҫула тухсан питех те асӑрханса ҫӳремелли пирки аса илтерет. Тепӗр тесен, ҫуран ҫӳрекенсем тимсӗр пирки те пӑтӑрмах сиксе тухать. Апла пулин те водителех айӑплаҫҫӗ, мӗншӗн тесен машина пысӑк хӑрушлӑх кӳрекен транспорт шутланать.

ШӖМ тунӑ сӑн

Ӗнер, ҫурла уйӑхӗн 26-мӗшӗнче, 15 сехет те 50 минутра Шупашкар хулинче Сӗнтӗрвӑрри ҫулӗ ҫинче «Ирбис» заправка тӗлӗнче «Шупашкар – Ҫӗнӗ Шупашкар» маршрутпа ҫӳрекен 101-мӗш «С» автобус тата «Лада Гранта» ҫапӑннӑ.

«Гранта» рулӗ умӗнче ларнӑ 34 ҫулти водитель сылтӑмалла пӑрӑннӑ чухне тӗп ҫулпа Ҫӗнӗ Шупашкар еннелле каякан автобуса ирттерсе яман. Ҫав самантра автобусра 30 яхӑн пассажир пулнӑ

«Лада Гранта» водителӗ тата унти 32 ҫулти пассажир хӗрарӑм аманнӑ, вӗсене пульницӑна илсе кайнӑ. ЧР ШӖМӗ пӗлтернӗ тӑрӑх, автобусра пулнӑ пассажирсем тухтӑрсенчен пулӑшу ыйтман.

Ҫакӑ паллӑ: икӗ водитель те урӑ пулнӑ. Анчах автобус водителӗн диагностика картти пулманран ун тӗлӗшпе административлӑ протокол ҫырнӑ.

forum.zarulem.ws порталта вырнаҫтарнӑ сӑнӳкерчӗк

Ҫӗрпӳре ӳсӗр водителе тытса чарнӑ. Эрех ӗҫсе лартнӑ арҫын «Лада Веста» машинӑра пӗччен пулман, салонта унӑн 10 ҫулти ывӑлӗ ларса пынӑ.

Патшалӑхӑн ҫул-йӗр хӑрушсӑрлӑхӗн инспекторӗсем шурӑ тӗслӗ «Лада Веста» автомобиле асӑрханӑ. Пакунлисен экпиажне асӑрхасан водитель пӑлханма пуҫланӑ. Машинӑна чарӑнма ыйтсан вӑл газ ҫине пусса малалла вӗҫтернӗ. Анчах инспекторсенчен тарса ӳкме май килмен. Ҫул-йӗр инспекторӗсем машинӑна чарса лартнӑ.

Руль умӗнче Канаш районӗнче пурӑнакан 38 ҫулти арҫын пулнӑ. Вӑл арӑмӗпе тата ачипе больницӑна кайнӑ тесе ӗнентерме хӑтланнӑ. Хӑйӗн чӗлхи хытах ҫыхланнӑ.

Канаш районӗнчи ӳсӗр ҫав арҫыннӑн машинине штрафстоянкӑна ӑсатнӑ. Унӑн пысӑк штраф тӳлеме, водитель прависӗр юлма тивӗ. Тата ҫул ҫитменнисен ыйтӑвӗпе ӗҫлекен комиссие те ӑна чӗнӗҫ.

max.ru/progorod21 каналта вырнаҫтарнӑ сӑнӳкерчӗк

Куславкка районӗнчи Якунькасси ялӗнче кинемей виллине тупнӑ.

84 ҫулти хӗрарӑм хӑйӗн хуҫалӑхӗнчи нӳхрепре выртнӑ.

Вырӑна Раҫҫей Федерацийӗн Следстви комитечӗн Чӑваш Енри управленийӗн Куславкка районӗнчи ӗҫченӗсем пырса ҫитнӗ. Вӗсем малтанласа палӑртнӑ тӑрӑх, кинемей нӳхрепри шӑши таврашне пӗтерес тесе малтанхи кун унта пластик савӑт ҫунтарнӑ. Тепӗр кунне ватӑ ҫын нӳхрепе аннӑ.

Унта ансан ватӑ ҫынна япӑх пулса кайма пултарнӑ тесе шухӑшлаҫҫӗ, мӗншӗн тесен усал сывлӑш уҫӑлса пӗтеймен.

Нӳхрепре шар куракансем унччен те пулман мар. Ҫавӑнпа та унта аниччен ӑна уҫӑлтарнине нимӗн те ҫитмест. Сыхлакана Турӑ сыхлать тесе ваттисем ахальтен каламанах пулӗ. Халӗ кинемейӗн ҫывӑх ҫыннисен пысӑк хуйха чӑтса ирттерме тивӗ.