"Контактри" сӑн

Пӗтӗм тӗнчери «Артек» ача-пӑча центрӗнче «Пысӑк тӑхтав» конкурса пӗтӗмлетнӗ. Чӑваш Енри виҫӗ шкул ачи унта 1 милион тенкӗлӗх сертификата тивӗҫнӗ.

Вӗсем – Ҫӗнӗ Шупашкарти 18-мӗш лицейри Соня Степанова, Шупашкарти 5-мӗш гимназири Екатерина Аврамова, Ҫӗрпӳри 1-мӗш шкулти Елена Ракчеева.

Сӑмах май, конкурса, Чӑваш Енри 19 шкул ачи хутшӑннӑ.

"Контактри" сӑн

Мускав ҫывӑхӗнчи Ногинскри ҫӑлав центрӗ ҫумӗнче Раҫҫей Инкеклӗ лару-тӑру министерствин дрон операторӗсен конкурсӗ иртнӗ. Унта тӗрлӗ регионти 11 специалист хутшӑннӑ.

Пирӗн ентеш Петр Кадкин опытлӑ ТОП-5 специалист йышне кӗнӗ. Жюри вӑл условлӑ «катастрофа» вырӑнӗнче шар курнӑ ҫынсене тупса вӗсем ӑҫта, миҫере, мӗнле суранланнине хӑвӑрт палӑртнине уйрӑмах мухтанӑ.

Зайцевсен архивӗнчи сӑн

Ҫӗмӗрлери Зайцевсен ҫемйи Раҫҫейри «Ҫулталӑкри ҫемье» конкурсра палӑрнӑ. Вӗсем «Нумай ачаллӑ ҫемье» номинацире малти вырӑна йышӑннӑ.

Зайцевсем тӑватӑ ывӑл ӳстереҫҫӗ. Мӑшӑр килӗштерсе пурӑнать.

Палӑртмалла: конкурс кӑҫалхипе тӑххӑрмӗш хут иртнӗ. Унта 388 ҫемье хутшӑннӑ. Вӗсенчен 88-шӗ тӗрлӗ номинацире ҫӗнтернӗ.

ptoday.ru сайтри сӑн

Ҫитес ҫул ӗҫ укҫин чи пӗчӗк виҫине ӳстерме палӑртнине пӗлтернӗччӗ. РФ Патшалӑх Думин депутачӗсем саккун проектне пӑхса тухнӑ.

Пӗрремӗш вулаврах 2025 ҫулта ӗҫ укҫин чи пӗчӗк виҫине пысӑклатма йышӑннӑ. Депутатсем ӑна 22440 тенкӗпе танлаштарма йышӑннӑ.

Кандинский нейросеть сӑнӳкерчӗкӗ

Ачасӑррисене налук тӳлеттересшӗн. Ҫак шухӑша РФ Патшалӑх Думин депутачӗ Андрей Гурулев каланӑ. Вӑл шухӑшланӑ тӑрӑх, ҫав укҫапа тӑлӑхсемпе ача ҫурчӗсене пулӑшма май пулать.

Евгений Федоров депутат ача ҫуккисене алимент тӳлекенсемпе пӗр шайра хакламалла, вӗсен тупӑшне кура тытса юлакан налука ӳстерме сӗннӗ.

Раҫҫей Правительствин социаллӑ пурнӑҫ тата экономика тӗпчев институчӗн директорӗ Алексей Зубец вара ашшӗ-амӑшӗ пулайманнисене 30-40 пин таран тӳлеттерме сӗннӗ.

"Контактри" сӑн

Грегори РМ лаша каллех ҫитӗнӳсем тунӑ. Вӑл «Супер-Дерби» ӑмӑртура ҫӗнтернӗ. Лаша Раменскри ипподромра 2400 метра чупса рекорд лартнӑ. Унӑн кӑтартӑвӗ – 3.00,4 минут. Йӗвене опытлӑ маҫтӑр Вадим Кулыгин тытса пынӑ.

Палӑртмалла: Грегори РМ Шупашкарти В.И.Чапаев ячӗллӗ лаша савутӗнче ҫуралнӑ. Ӑна 2021 ҫулта аукционра чи пысӑк хакпа сутнӑ. Вӑл кӑҫал ҫурла уйӑхӗнче те «Дерби» ҫӗнтерӳҫи пулнӑ.

m.market.yandex.ru сайтри сӑн

Раҫҫейре «Тимӗр укҫа эрни» акци пуҫланнӑ. Унпа килӗшӳллӗн юпа уйӑхӗн 20-мӗшӗччен банксенче вак укҫана банкнотӑсемпе комиссисӗрех улӑштарма пулать. Е ӑна счет ҫине куҫарма май пур.

Чӑваш Енре акцие Россельхозбанк, Сбербанк, Газпромбанк, ВТБ, «Кузнецкий» банк тата ытти кредит организацийӗ хутшӑнаҫҫӗ.

«Чувашский край» Телеграм-каналти видеоран илнӗ скриншот

Шупашкарти Валентина Алексеева «Раҫҫей пики 2024» илем конкурсӗнче ҫӗнтернӗ. Конкурса ӗнер, юпа уйӑхӗн 5-мӗшӗнче, пӗтӗмлетнӗ.

Аса илтерер: пирӗн республикӑран конкурса икӗ пике хутшӑннӑччӗ. Вӗсем — Валентина Алексеева тата Алла Кадеева.

Ҫӗнӗҫкл уявӗсенче 11 кун канӑпӑр. Ҫакна РФ премьер-министрӗ Михаил Мишустин алӑ пусса ҫирӗплетнӗ.

Ҫӗнӗ ҫулхи каникул раштав уйӑхӗн 29-мӗшӗнче пуҫланӗ те кӑрлачӑн 8-мӗшӗнче вӗҫленӗ. Виҫӗ хутчен 4-шар кун канӑпӑр: ҫу уйӑхӗн 1-4-мӗшӗсенче, ҫу уйӑхӗн 8-11-мӗшӗсенче, ҫӗртмен 12-15-мӗшӗсенче. Унсӑр пуҫне чӳк уйӑхӗн 2-4-мӗшӗсенче ӗҫлемелле мар.

"Чӑваш тӗнчи" пабликри страницӑран илнӗ сӑнӳкерчӗк

Чӑваш Енри икӗ хӗр илем конкурсне хутшӑннине Чӑваш халӑх сайчӗ пӗлтернӗччӗ-ха. Халӗ «Раҫҫей пики» сайтра онлайн сасӑлав пуҫланнӑ.

Ҫӗнтерӳҫӗ ятне тивӗҫесшӗн ӑмӑртакан 50 пике хушшинче Чӑваш Енри икӗ хӗр – Валентина Алексеева тата Алла Кадеева.

Пикесемшӗн кашни ҫын талӑкра пӗр хутчен сасӑлама пулать.

Нумай сасӑ пухнӑ 10 хӗр финалисткӑсен топ-20 списокне лекӗҫ.