Ӗҫе кайсан е профессие пула шар курнӑ ҫынсем Чӑваш Енри санаторисенче сипленейӗҫ. Кун пирки Социаллӑ фондӑн Чӑваш Енри уйрӑмӗнче пӗлтереҫҫӗ.
Асӑннӑ уйрӑм санаторипе курорта кайса сипленме путевкӑсем парать. Анчах ӑна илме медицинӑпа социаллӑ экспертиза бюровӗ хатӗрленӗ ятарлӑ программа пулмалла. Санаторире сипленме ҫыннӑн эпир маларах асӑннӑ фондӑн уйрӑмне заявлени памалла. Е патшалӑх пулӑшӑвӗсен порталӗ урлӑ, е уйрӑмӑн клиент службине ҫитсе.
Чӑваш Енре 4 санаторие кайма пулать. Вӗсем ҫаксем: «Чӑваш Ен», «Чӑваш Ен курорт», «Волжские зори» тата «Надежда».
Ҫӗмӗрлери 9-мӗш гимназире вӗренекенсене тухтӑрсен пулӑшӑвӗ кирлӗ пулнӑ. Вӗсен пыршӑлӑх инфекцийӗн симптомӗсем пулнӑ.
Пӗр ачана пульницӑна вырттарма тивнӗ. Ыттисем килте педиатр сӑнаса тӑнипе сипленеҫҫӗ. Ку ыйтӑва республикӑри Сывлӑх сыхлавӗн министерстви те куҫран вӗҫертмест.
Хальхи вӑхӑтра ял-хулара ача-пӑча мотоциклпа вӗҫтерсе ҫӳренине час-часах курма пулать. Ӗнер Шупашкар районӗнчи Янашкасси ялӗнче 12 ҫулхи ача питбайкпа пынӑ. Хӑйӗнпе пӗрле вӑл 15 ҫулти пассажира та лартнӑ.
Урапа ҫулӗпе пынӑ чухне яш руле айккинелле пӑрса янӑ та мотоцикл ҫаврӑнса ӳкнӗ.
Инкекре яшсем аманнӑ, ҫамрӑк водитель вара пульницӑра, травматологи уйрӑмӗнче, сипленӗ.
Питбайк хуҫи — 12-ри ачан ашшӗ-мӗн. Ӑна административлӑ майпа явап тыттарӗҫ. Йӗрке хуралҫисене вӑл ӗнентернӗ тӑрӑх, ывӑлӗ мотоцикла хӑй тӗллӗн, ашшӗнчен ыйтмасӑр чӗртсе тухнӑ имӗш.
Улатӑр округӗнчи пульницӑра ҫамрӑк педиатр ӗҫлеме тытӑннӑ. Вӑл унта «Земство тухтӑрӗ» патшалӑх программипе усӑ курса кайнӑ.
Михаил Зайцев ача чухнех педиатр пулма ӗмӗтленнӗ. 5-мӗш класра пулас професси пирки сочинени ҫырма ыйтсан та вӑл кун пирки каланӑ. Ҫавӑнтанпа унӑн шухӑшӗ улшӑнман.
Сӑмах май, пӗлтӗр ку программӑпа 62 тухтӑр тата вӑтам звенори 37 медӗҫчен усӑ курнӑ.
Паян, ака уйӑхӗн 30-мӗшӗнче, ирхи 8 сехет ҫитеспе Шупашкарти Трактор тӑвакансен проспектӗнчи 83-мӗш ҫурт тӗлӗнче 9 ҫулти ача инкеке лекнӗ.
Ача ҫав вӑхӑтра светофорӑн ирӗк паракан ҫутипе ҫул урлӑ каҫнӑ. Самокатпа пыраканскер ҫине «Лада Икс-рей» автомобиль пырса кӗнӗ. Вӑл та светофорӑн ирӗк паракан ҫутипе пӑрӑннӑ.
Ачана тухтӑрсен пулӑшӑвӗ кирлӗ пулса тухнӑ.
Ака уйӑхӗн 25-мӗшӗнче Шупашкарта 38 ҫулти хӗрарӑма Мари Элтан килнӗ арҫын таптаса кайнӑ.
Инкек Университет урамӗнче 13 сехет 40 минутра пулса иртнӗ.
Ҫуран каҫакансене иртмелли ҫулпа каҫакан 38 ҫулти хӗрарӑма Мари Элтан килнӗ 52 ҫуоти арҫын «Лада Калина» машинӑпа пырса кӗнӗ.
Шар курнӑ хӗрарӑма тухтӑрсем пулӑшнӑ.
Республикӑн вӑрҫӑ ветеранӗсен клиника госпиталӗн гериатрне Нина Сидоровӑна «Чӑваш Республикин тава тивӗҫлӗ врачӗ» хисеплӗ ят панӑ.
Нина Сидорова — аслӑ категориллӗ тухтӑр. Вӑл госпитальте терапи уйрӑмӗнче ӗҫлет, Республикӑн гериатри центрне ертсе пырать.
«Ватлӑхри чир-чӗр тесе лӑпланса лармалла мар, тухтӑрсенчен пулӑшу ыйтмалла», — тет республикӑра гериатри службине пуҫарса яраканӗсенчен пӗри пулнӑ тухтӑр. Медицинӑри унӑн стажӗ 36 ҫул ытла.
Пӗлтӗрхи кӗркунне Сӗнтӗрвӑрринче автошкулсенчен пӗрин директорӗ «зебрӑпа» ҫул урлӑ каҫакан хӗрарӑм ҫине пырса кӗнӗ.
«Рено Дастер» рулӗ умӗнчи арҫын ӗнентернӗ тӑрӑх, ҫанталӑк условийӗ начар пулнӑ, ҫавӑнпа вӑл ҫул урлӑ каҫакан ҫынна курман.
Йӗрке хуралҫисем палӑртнӑ тӑрӑх, водитель ҫынсем ҫул урлӑ каҫнине курма пултарнӑ, анчах машина хӑвӑртлӑхне чакарман. Хӗрарӑм сывлӑхне вӑл пысӑк сиен кӳнӗ.
Автошкул директорне суд 1 ҫуллӑха ирӗкрен хӑтарма йышӑннӑ, анчах водитель правине туртса илмен.
Шупашкарти 5-мӗш гимназире шкул ачине хӗненӗ. Ку пӑтӑрмах кӗҫнерникунах пулса иртнӗ иккен, анчах республикӑн Вӗренӳ министерстви ҫавӑн пирки шӑматкун ҫеҫ хыпарланӑ. Унта ведомство лару-тӑрӑва тӗрӗслесси пирки ӗнентернӗ.
Пиллӗкмӗш класра вӗренекен икӗ арҫын ача тантӑшне хӗненӗ иккен. Шар курнине васкавлӑ пулӑшу машинипе пульницӑна илсе кайнӑ.
Етӗрне тӑрӑхӗнчи арҫынна васкавлӑ медпулӑшу тухтӑрӗсем иккӗмӗш пурнӑҫ парнеленӗ теме пулать. Ака уйӑхӗн 10-мӗшӗнче вӑл ӗҫе кайма тухнӑ. Ӑнсӑртран кӑкӑрӗ тӗлӗнчен ыратма тытӑннӑ, сывлама йывӑр пулнӑ. Вӑл тӳрех машинине чарнӑ та васкавлӑ медпулӑшу чӗннӗ.
Анатолий Мурзин фельдшер, Марина Гаврилова медсестра, Алексей Ломоносов водитель вырӑна часах ҫитнӗ. Тухтӑрсем пациентӑн инфаркт пулнине ӑнланнӑ, часрах тромболезис тунӑ. Ҫак препарат юн тымарӗнчи тромба ирӗлтерет. Кун хыҫҫӑн арҫынна пульницӑна илсе ҫитернӗ.
«Инфаркт чухне пӗрремӗш сехет – чи пӗлтерӗшли. Тромболезис вӑхӑтра тусан чӗрене ҫӑлма пулать. Ҫавӑнпа кӑкӑр тӗлӗнчен ыратнине туйсанах васкавлӑ медпулӑшӑва шӑнкӑравлӑр», - теҫҫӗ тухтӑрсем.
+9.3 °C