Раштав уйӑхӗнче Шупашкарти 36 ҫулти сварщик Европӑран машина туянма шутланӑ. Анчах машинӑсӑр та, укҫасӑр та тӑрса юлнӑ.
Вӑл тӗнче тетелӗнче реклама тупнӑ та каҫӑ ҫине пуснӑ. Ҫапла «менеджерпа» ҫырӑнма пуҫланӑ – хайхискер машина тупма тата документсене хатӗрлеме пулӑшать-мӗн.
«Менеджер» 1,5 млн тенкӗ куҫарма ыйтнӑ. Арҫын куҫарма тӑрсан банк операцие тӑватӑ хутран кая мар пӑрахӑҫланӑ. Анчах арҫын банк ӗҫченӗсене ҫав палламан ҫын ӑна улталаманнине ӗнентерме пултарнӑ. Ҫапла вӑл 1,5 млн тенкӗсӗр юлнӑ. Ку укҫаран пӗр пайӗ – кредит илнӗскер.
Кун тӗлӗшпе пуҫиле ӗҫ пуҫарнӑ.
«Газпром газораспределение Шупашкар» акционерсен обществин Шупашкарти филиалӗн тӗп инженерне Сергей Леонтьева «Чӑваш Республикин тава тивӗҫлӗ строителӗ» ята панӑ. Хушӑва республика Элтеперӗ алӑ пуснӑ.
Сергей Николаевич газ отраслӗнче 20 ытла ҫул ӗҫлет. 2019 ҫултанпа вара вӑл тӗп инженер пулса тӑрӑшать. Чӑваш Ен Элтеперӗн халӑх тетелӗнчи пабликӗнче пӗлтернӗ тӑрӑх, Сергей Леонтьев хутшӑннипе Шупашкарта тата Шупашкар районӗнче газ объекчӗсем тӑваҫҫӗ тата пуррисене юсаса ҫӗнетеҫҫӗ.
Шупашкарти тухтӑрсем ҫынсене начарланма пулӑшаҫҫӗ. Хулари тӗп пульницӑра Начарланма пулӑшакан шкул ӗҫлет. Унта хӑйсем тӗллӗн начарланайман ҫынсем пулӑшу ыйтса пыраҫҫӗ.
Пульницӑн тӗп тухтӑрӗ, Татьяна Маркелова эндокринолог вӗсене биоимпедансометри текен тӗрӗслеве тухма сӗннӗ, начарланас тесен мӗн ҫисе мӗн ӗҫмеллине вӗрентнӗ.
Тухтӑр каланӑ тӑрӑх, ӑшаланӑ тата ҫуллӑ апата сахал ҫимелле. Кунне икӗ литра яхӑн тӑрӑ шыв (лимон касӑкӗ хушса) ӗҫни апата лайӑх ирӗлме пулӑшать, иммунитета лайӑхлатать, апат ҫиес килнине чакарать.
Сывлӑх шкулне +7 (8352) 23-45-00 телефонпа шӑнкӑравласа ҫырӑнма пулать.
Шупашкарти скульптор Андрей Молоков Санкт-Петербургра иртекен «КроншЛед» пӑр скульптурисен фестивальне хутшӑнать. Вӑл раштавӑн 27-мӗшӗнче пуҫланнӑ, ыран вӗҫленет.
Кӑҫалхи фестивале Раҫҫейри халӑхсен халапӗсемпе эпосӗсене халалланӑ. Пирӗн ентеш «Уйӑх ҫинчи хӗр» чӑваш халӑх юмахне тӗпе хурса пӑртан композици касса кӑларнӑ.
Палартмалла: фестивале Раҫҫейри тата Казахстанри 12 хулари 20 ӑста хутшӑнать. Скульптурӑсем валли Мурманск облаҫӗнчен тата Пермь Енрен 200 тонна ытла пӑр кӳрсе килнӗ.
Шупашкарта пурӑнакан 50-ри хӗрарӑм интернетра арҫын-тус тупнӑ хыҫҫӑн 2 млн тенкӗсӗр тӑрса юлнӑ.
Хайхи юлташ ӑна брокер счечӗ уҫса укҫа нумай ӗҫлесе илни пирки юптарнӑ. Ун хыҫҫӑн хӗрарӑмӑн та инвестицисемпе тупӑш тӑвас килсе кайнӑ. Ҫӗнӗ тусӗ ӑна «финанс аналитикӗн» номерне панӑ. Ҫав «аналитик» каланипе хӗрарӑм телефонӗ ҫине сарӑм лартнӑ та вӑл кӑтартнӑ счетсем ҫине укҫа куҫарса тӑнӑ. Ҫапла 2 млн яхӑн тенкӗ куҫарнӑ.
Каярахпа унпа «брокер компанийӗн ӗҫченӗ» ҫыхӑннӑ, тепӗр 7 пин доллар куҫарма ыйтнӑ. Вара тин хӗрарӑм ултавҫӑсен серепине лекнине ӑнланнӑ.
Паян Клара Чекушкина юрӑҫ 85 ҫул тултарнӑ.
Клара Ивановна Патӑрьел районӗнчи Хирти Шӑхаль ялӗнче 1941 ҫулта ҫуралнӑ. Шупашкарти тата Чулхулари (ун чухне Горький ятлӑ пулнӑ) пединститутсенче вӗреннӗ.
Вӑл Чӑвашоблсовпрофра аслӑ методист та, агрегат завочӗн клубӗнче методист та пулса ӗҫленӗ. Анчах халӑх ӑна юрӑҫ пулнӑран пӗлет. Концертсемпе вӑл ют ҫӗршывсенчи (Чехословаки, Венгри, Финлянди, Япони тата ытти те) сцена ҫине те тухнӑ. Мускаври, Ирландири пӗтӗм тӗнчери фестивальсенче лауреат пулса тӑнӑ.
Клара Чекушкина — Чӑваш Республикин тата Раҫҫейӗн культура тава тивӗҫлӗ ӗҫченӗ.
Юбиляра Шупашкар хулинчи халӑхӑн социаллӑ ыйтӑвӗсене тивӗҫтерекен комплекслӑ центрӗн сайтӗнче ӑшшӑн саламласа ҫырнӑ. Юлашки ҫулсенче Клара Чекушкинӑна асӑннӑ центрӑн социаллӑ ӗҫченӗ киле пырса пӑхса пулӑшать.
Паян Клара Чекушкина юрӑҫ 85 ҫул тултарнӑ.
Клара Ивановна Патӑрьел районӗнчи Хирти Шӑхаль ялӗнче 1941 ҫулта ҫуралнӑ. Шупашкарти тата Чулхулари (ун чухне Горький ятлӑ пулнӑ) пединститутсенче вӗреннӗ.
Вӑл Чӑвашоблсовпрофра аслӑ методист та, агрегат завочӗн клубӗнче методист та пулса ӗҫленӗ. Анчах халӑх ӑна юрӑҫ пулнӑран пӗлет. Концертсемпе вӑл ют ҫӗршывсенчи (Чехословаки, Венгри, Финлянди, Япони тата ытти те) сцена ҫине те тухнӑ. Мускаври, Ирландири пӗтӗм тӗнчери фестивальсенче лауреат пулса тӑнӑ.
Клара Чекушкина — Чӑваш Республикин тата Раҫҫейӗн культура тава тивӗҫлӗ ӗҫченӗ.
Юбиляра Шупашкар хулинчи халӑхӑн социаллӑ ыйтӑвӗсене тивӗҫтерекен комплекслӑ центрӗн сайтӗнче ӑшшӑн саламласа ҫырнӑ. Юлашки ҫулсенче Клара Чекушкинӑна асӑннӑ центрӑн социаллӑ ӗҫченӗ киле пырса пӑхса пулӑшать.
Шупашкарта пурӑнакан, Корея вӑрҫине хутшӑннӑ Георгий Александров 98 ҫул тултарнӑ.
Ӑна ҫуралнӑ кунпа саламлама Ленин районӗн Патшалӑх хӳтӗлевӗ тата инкеклӗ лару-тӑру енӗпе ӗҫлекен штаб пуҫлӑхӗ Александр Кузнецов килнӗ. Вӑл Георгий Александрова РФ Президенчӗн Владимир Путинӑн саламлӑ открыткине тата асӑнмалӑх парнесем панӑ.
Шупашкар округӗнчи 18-ти хӗр, Шупашкарти колледжра вӗренекенскер, ашшӗн ячӗпе 850 пин тенкӗ кредит илнӗ те пӗтӗм укҫана ултавҫӑсене куҫарса панӑ.
Палламан ҫын хӗре кредит илнӗ хыҫҫӑн укҫана «хӑрушсӑр счет» ҫине куҫарма хушнӑ. Хӑйне шӑнман пӑр ҫине лартса янине вӑл кая юлса ӑнланнӑ.
Ку тӗслӗх тӗлӗшпе пуҫиле ӗҫ пуҫарнӑ.
Ҫӗнӗ ҫул чӑрӑшӗсене Шупашкарти «Ковчег» зоокӗтес чӗрчунсем валли йышӑнать. Ку акци пиллӗкмӗш ҫул ӗнтӗ иртет. Кӑҫал вӑл кӑрлачӑн 14-мӗшӗнчен пуҫласа нарӑсӑн 1-мӗшӗччен пулӗ. Зоокӗтес чӗрӗ, типсе кайман чӑрӑшсене, хырсене тата пихтӑсене кӑна йышӑнать. Вӗсене юнкунран пуҫласа вырсарникунччен 10:00-18:00 сехетсенче Николаев паркне илсе пымалла.
Зоокӗтес ӗҫченӗсем палӑртнӑ тӑрӑх, лӑсӑллӑ йывӑҫ чӗрчунсемшӗн усӑллӑ, вӑл вӗсемшӗн вылямалли тетте те пулса тӑрать. Лӑсӑллӑ йывӑҫсене чӗрчунсем айне те сарса параҫҫӗ.
Кашни йывӑҫшӑн «Ковчег» зоокӗтесе кӗрсе курма 1 ача-пӑча билечӗ параҫҫӗ.
+11.3 °C