Ҫӗрпӳ округӗнче Первомайски ялӗ ҫывӑхӗнче 72 ҫулти хӗрарӑм путса вилнӗ.
Вӑл плотинӑра шыва кӗнӗ чухне путнӑ. Унта шыва кӗмелли ятарлӑ вырӑн ҫук. Водолазсем унӑн виллине шыв тӗпӗнче тупса ҫыран хӗррине илсе тухнӑ.
Шыва кӗмелли сезон пуҫланнӑранпа республикӑра 4 ҫын путса вилнӗ. Ачса илтерер: Улатӑрта 12-ри хӗрача путнӑ, Канашра 17-ри ҫамрӑкӑн пурнӑҫӗ пӗвере татӑлнӑ.
Чӑваш Енри тухтӑрсем Алла Пугачевӑн пурнӑҫне ҫӑлнӑ. Вӑл чутах эндокардита пула вилмен.
41 ҫулти Аллӑна Улатӑртан санавиаципе илсе килнӗ. Малтан унӑн ӳт температури хӑпарнӑ, апат анма пӑрахнӑ, ӳчӗ кӑвакарнӑ, вӑйӗ пӗтнӗ. Ӑна вертолетпа Республикӑри кардиологи диспансерне илсе ҫитернӗ. Унти хирургсем кӑткӑс операци тунӑ.
«Ылтӑн алӑллӑ тухтӑрсене тав. Манӑн икӗ ача. Халӗ каллех вӗсемпе пулайӑп», – тенӗ Алла Пугачева.
Ҫак кунсенче Улатӑрта Мускав урамӗпе Октябрь Революцийӗн тӳремӗ пӗрлешнӗ ҫӗрте МиГ-29 истребителе постамент ҫине вырнаҫтарнӑ.
Самолета хулана ҫу уйӑхӗн 19-мӗшӗнче илсе ҫитернӗ, ҫав кунах ӑна пуҫтарма тытӑннӑ. Кайран сӑрласа постамент ҫине вырнаҫтарнӑ.
Сӑмах май, Улатӑрта Тӑван ҫӗршывшӑн Аслӑ вӑрҫи пуҫланиччен аэроклуб пулнӑ. Вӑрҫӑ вӑхӑтӗнче хулара 46-мӗш саппас авиаци полкӗ вырнаҫнӑ.
Улатӑрта ҫынсене коммуналлӑ пулӑшушӑн ытларах тӳлетттернӗ. Пӑтӑрмаха вырӑнти прокуратура ҫирӗплетсе панӑ.
Ӑшӑшӑн нумай тӳлеме тивни пирки надзор органне ҫынсем систернӗ. Хайхисем евитленӗ тӑрӑх, вӗсен килӗнче газ счётчикӗсем пур, анчах ресурспа тивӗҫетерекен «Чӑвашгаз» организаци нормативпа тӳлеме хистенӗ. Прокуратура тӳлеве ҫӗнӗрен шутласа пама хистенӗ. Нормативпа тата счётчикпа тӳленин уйрӑмлӑхӗ 1,3 миллион тенӗрен иртнӗ.
Чӑваш Енри Улатӑр хули пирки Мускавра та каласа кӑтартаҫҫӗ. Ун пирки общество транспортӗнчи информаци хӑми ҫинче курма пулать.
«Чӑваш Республикинчи ҫак хула 1552 ҫулта никӗсленнӗ. Унта — 90 ытла ҫурт-палӑк. Ҫав шутра – чукун ҫул деповӗ, ӗлӗкхи чиркӳсем», - ҫапла паллаштараҫҫӗ Мускаври общество транспортӗнче.
Чӑваш Енри пӗр ҫын масар ҫинчи картана вӑрланӑ.
Чӑваш Енӗн Шалти ӗҫсен министерствинче пӗлтернӗ тӑрӑх, ӑна пӗри вил тӑпри ҫине тимӗр карта тытма ыйтнӑ. Лешӗ тепӗр вил тӑпри ҫинчен куҫарса кайнӑ.
Пӑтӑрмах пирки ака уйӑхӗн вӗҫӗнче 61 ҫулти хӗрарӑм пӗлтернӗ.
Улатӑрти 33 ҫулти арҫынна пӗрисем тимӗр карта тытма пӗлтӗрхи ҫурла уйӑхӗнче ыйтнӑ. Унччен судпа айӑпланнӑ арҫын тепӗр ҫӗртен куҫарса кайса вырнаҫтарнӑ.
Аслӑ Ҫӗнтерӳ пулнӑранпа 80 ҫул ҫитнӗ май республикӑри округсем тӑрӑх машинӑсен колонни ҫӳрет. Ку авточупу ака уйӑхӗн 21-27-мӗшӗсенче иртет. Вӑл «Ҫӗнтерӳ ҫулӗпе» ятлӑ. Маршрут Сӑр хӳтӗлев чикки пулнӑ вырӑнсен ҫывӑхӗпе иртет.
Колонна Шупашкартан Етӗрнене кайма тухнӑ. Кайран Хӗрлӗ Чутая, Ҫӗмӗрлене, Пӑрачкава, Улатӑра ҫитӗҫ.
Юлашкинчен Куславкка тӑрӑхӗнчи «Чӗмсӗр чикӗсен строителӗсене» мемориал патӗнче чарӑнӗҫ.
Шупашкарта пурӑнакан 100 ҫулхи Зинаида Канова патӗнчен ҫак кунсенче халӑх татӑлма пӗлмест. Ун патне журналистсем те пӗрмай пыраҫҫӗ, ӑна шкул ачисем те саламлаҫҫӗ. Паян вара кинемей патӗнче Чӑваш Ен Элтеперӗ Олег Николаев тата Шупашкар хулинчи халӑхӑн социаллӑ ыйтӑвӗсене тивӗҫтерекен комплекслӑ центрӗн директорӗ Светлана Милкина пулнӑ.
Зинаида Андреевна Мордва Республикинчи Смольково ялӗнче ҫуралнӑ, Улатӑрта ӳснӗ, унта нумай ҫул пурӑннӑ. Халӗ вӑл Шупашкарта пурӑнать. Тӑван ҫӗршывӑн аслӑ вӑрҫи вӑхӑтӗнче Зинаида Канова радиотелеграфист пулна, Берлина ҫитнӗ.
Зинаида Андреевна – питӗ кӑмӑллӑ ҫын. Унпа темччен калаҫма пулать. Ун патне хӑнана пыракансем кинемее пурте Ҫӗнтерӳ кунӗпе саламлаҫҫӗ.
Улатӑрти ращара 26 йывӑҫ ҫухалнине хула ҫыннисем асӑрханӑ. Вырӑна Вӑрман хуралӗн инспекторӗсем ҫитнӗ. Вӗсем 4 хурӑн, 5 юман тата 17 тирек ҫуккине палӑртнӑ.
Материалсене Улатӑрти полици уйрӑмне пӑхса тухма панӑ. Ведомство йывӑҫсене кам каснине тӗпчӗ.
Йывӑҫ каснине асӑрхасан ҫак номерсемпе шӑнкӑравлама ыйтаҫҫӗ: 8 (8352) 40-24-00 тата 8-800-100-94-00.
Улатӑрти депутата йӗрке хуралҫисем тытса чарнӑ. Вӑл наркотик упранӑ тесе шутлаҫҫӗ.
Иван Самойлов – Улатӑр районӗн депутатсен пухӑвӗн депутачӗ, «Пӗрлӗхлӗ Раҫҫей» парти пайташӗ. Кунсӑр пуҫне вӑл – ача-пӑча спорт шкулӗн директорӗ.
ЧР Элтеперӗ Олег Николаев кун пек ҫынсен патшалӑх тата муниципалитет управленийӗнче ӗҫлемелле маррине палӑртнӑ.
+9.3 °C