Чӑваш Енре ӗнертенпе Инкеклӗ лару-тӑру режимӗ пулнине пӗлтернӗччӗ. Специалистсем пилотсӑр вӗҫекен аппаратсем Шупашкарти ҫуртсене мӗн чухлӗ тӑкак кӳнине шутланӑ – 20 миллион ытла тенкӗлӗх.
Аса илтерер: 15 ҫурт сиенленнӗ, вӗсенчен 10-шӗ – нумай хваттерлӗ ҫурт, пӗри – ача пахчи. 14 ҫын аманнӑ. Ӗнер ЧР Сывлӑх сыхлавӗн министерстви пӗлтернӗ тӑрӑх, 7 ҫын пульницӑра сипленет, тепӗр 7-шӗ ¬– килте, вӗсен йышӗнче ача та пур.
Ӗнер шар курнӑ ҫынсене техникум общежитийӗнче вырӑн сӗннӗ. Тӑватӑ ҫын килӗшнӗ, ыттисем тӑванӗсем патӗнче хӳтлӗх тупнӑ.
Етӗрне районӗнчи пӗр ялта пурӑнакан арҫынран коллекторсем укҫа тавӑрса пама тапӑннӑ. Вӑл вара ҫав вӑхӑтра салтакра пулнӑ, кивҫен укҫа паракан нимле организацирен те укҫа илмен. Арҫын пулӑшу ыйтса прокуратурӑна ҫул тытнӑ.
Надзор органӗ тӗрӗсленӗ те 2023 ҫулхи утӑ уйӑхӗнче ҫав ҫын ячӗпе икӗ микрофинанс организацийӗнче 22 пин тенкӗ ют ҫын укҫа илнине палӑртнӑ. Укҫана илме арҫыннӑн паспорт даннӑйӗпе тата кивӗ абонент номерӗпе усӑ курнӑ.
Ҫавна май йӗрке хуралҫисем улталакансем тӗлӗшпе пуҫиле ӗҫ пуҫарнӑ, арҫынна кӑмӑл-сипет тӗлӗшӗнчен шар кӑтартнӑшӑн кредит организацине укҫа тӳлеттерме ыйтса суда тавӑҫпа тухнӑ. Суд прокуратура ыйтнине тивӗҫтернӗ.
Ултавҫӑсем тӗлӗрменни, вӗсем ҫынна шӑнман пӑрпа лартса ямалли ҫӗнӗрен те ҫӗнӗ мелсем шыраса тупни пирки таҫта та асӑрхаттараҫҫӗ. Апла пулин те ӗненекенсем тупӑнсах тӑраҫҫӗ.
Элӗк районӗнчи пӗл ялта пурӑнакан 63 ҫулти арҫын патне унӑн пуҫлӑхӗ пулнӑ сӑнӳкерчӗклӗ аккаунтран ҫырса янӑ. Телефон номерӗ курӑнман пулин те арҫын смсра ҫырнине ӗненнӗ. Унтан Федерацин хӑрушсӑрлӑх службинчен текен ҫын шӑнкӑравланӑ. Ял ҫынни пурне те ӗненнӗ, мӗн каланине итленӗ.
Банкри мӗнпур укҫине илсе темле счет ҫине укҫа куҫарса пама хушсан та каланине тунӑ. Юрать-ха, питӗ пысӑках сумма мар — пурӗ 235 тенке арҫын хулана кайсах ултавҫӑсене куҫарса панӑ.
«Новочебоксарский» теплица комплексӗнчи Екатерина Аввакумова пахчаҫӑ-агроном «Лучший по профессии» (чӑв. Профессире чи лайӑххи) конкурсра «Пахчаҫӑ» номинацире ҫӗнтернӗ. Наградӑпа ӑна ҫӗршывӑн ял хуҫалӑх министрӗ Оксана Лут чысланӑ. Пӗрремӗш вырӑн йышӑннӑшӑн 1 миллион тенкӗ преми панӑ.
Екатерина Аввакумова унччен республикӑри ҫавӑн пек конкурсра ҫӗнтернӗ, кайран вӑл федераци шайӗнчи ӑмӑртӑва хутшӑннӑ.
Йӗпреҫ округӗнчи медсестра ултавҫӑсене 3 млн ытла тенкӗ куҫарса панӑ. Ун патне «пульницӑн тӗп тухтӑрӗ» шӑнкӑравланӑ, кӗҫех унпа ФСБ ӗҫченӗ ҫыхӑнассине пӗлтернӗ.
Кӑштахран чӑнах та «ятарлӑ службӑран» шӑнкӑрав килнӗ. Хайхискер каланӑ тӑрӑх, хӗрарӑм ячӗпе такам Украина ҫарӗсене куҫарса пама кредит илнӗ. Ку ӗҫе чарса лартма часрах пӗтӗм укҫана «шанчӑклӑ» счет ҫине куҫарма хушнӑ.
Пухнӑ укҫине счет ҫинчен илнӗ, машинине сутнӑ, тӑванӗсемпе ӗҫтешӗсенчен кивҫен ыйтнӑ. Пӗтӗмпе 3 млн ытла тенкӗ куҫарса панӑ. Хӗрарӑм ултавҫӑ хушнипе ҫӗнӗ телефон туяннӑ, мӗн ҫырӑннине хуратнӑ, укҫа куҫарма кӳршӗ хулана кайнӑ. Хӑйне улталанине вӑл виҫҫӗмӗш кунхине кӑна ӑнланнӑ.
Улатӑр хулин пуҫлӑхӗн ҫумӗ пулнӑ ҫынна суд тунӑ.
Следстви тата суд палӑртнӑ тӑрӑх, хула пуҫлӑхӗн ҫумӗ — архитектура, хула строительствин, транспорт пайӗн пуҫлӑхӗ 2022 ҫулхи пуш тата авӑн уйӑхӗсенче уйрӑм усламҫӑран 115 пин тенкӗ сӗтев илнӗ.
Суд тӳре-шарана 3 ҫул та 2 уйӑхлӑха юсанмалли колоние ӑсатма йышӑннӑ, унсӑр пуҫне унӑн 2,8 миллион тенкӗ штраф тӳлемелле.
Шупашкарта пурӑнакан 57 ҫулти хӗрарӑм эзотерикӑпа кӑсӑкланма тапранса кайнӑ. Кӑсӑкланни ҫеҫ ҫитмен-ха, темле курсра вӗренес тенӗ.
Мессенджерсенчен пӗринче малтан вӑл эзотерика каналне ҫырӑннӑ, кайран онлайн-курса вӗренме илесси пирки пӗлтерӳ асӑрханӑ. Курса ҫырӑнас тесе темле каҫӑпа иртнӗ, унта банк карттин реквизитне кӑтартнӑ. Хӗрарӑмӑн укҫине, пурӗ 60 пин тенкӗ, куҫарса кайнӑ. Анчах никам та ниме те вӗрентмен, мӗншӗн тесен хӗрарӑмпа ҫыхӑнӑва тухма пӑрахнӑ.
Ҫак кунсенче Шупашкарта ашшӗ-амӑшӗн хӳттисӗр юлнӑ 30 ҫамрӑк хваттер уҫҫине илнӗ. Вӗсене савӑнӑҫлӑ лару-тӑрура панӑ.
Хваттерсем хӑтлӑ ҫуртра вырнаҫнӑ. Унта ҫав самантрах пурӑнмашкӑн куҫма пулать.
Сӑмах май, кӑҫал ҫак категорие кӗрекен 452 ҫынна хваттерпе тивӗҫтерме палӑртнӑ. Хальхи вӑхӑтра 367-шӗ валли пурӑнмалли кӗтес туяннӑ, тепӗр 78-шӗ ҫурт-йӗр сертификатне илнӗ. Ҫитес ҫул тӑлӑхсене хваттерпе тивӗҫтерме хыснаран 1,4 миллиарда яхӑн тенкӗ уйӑрӗҫ.
Элӗк округӗнчи ҫамрӑк фермер тата блогер Кирилл Степанов РФ Ял хуҫалӑх министерстви йӗркеленӗ «МедиаПоле» наци премийӗн ҫӗнтерӳҫи пулса 1 млн тенке тивӗҫнӗ.
Палӑртмалла: финала 79 регионтан пурӗ 1500 ытла заявка килнӗ. Кирилл Степанов тусӗпе Максим Соколовпа пуҫарнӑ «Айда по деревням» туризм маршручӗ жюри пайташӗсене тыткӑнланӑ. Ҫӗнсе илнӗ 1 млн тенкӗпе вӗсем туристсене ҫӗр каҫмалли условисем туса парасшӑн.
«Айда по деревням» проект питӗ интереслӗ. Вӑл хӑнасене чӑваш ялӗсемпе паллаштарма пулӑшать. Унта хутшӑнакансем фермӑсене кайса кураҫҫӗ, наци апат-ҫимӗҫне тутанса пӑхаҫҫӗ.
Кӑҫал Раҫҫейре «Тимӗр укҫа эрни» акци икӗ хутчен иртнӗ. Ҫав вӑхӑтра Чӑваш Енре пурӑнакансем банксене 3 тоннӑна яхӑн тимӗр укҫа илсе килнӗ. Ҫапла 2,3 миллион тенкӗ ҫаврӑнӑша кӗнӗ.
Акци ака тата авӑн уйӑхӗсенче иртнӗ. Кӗркуннехи акци тухӑҫлӑрах пулнӑ. Ун чухне ҫынсем банксене 370 пин ытла тимӗр укҫа илсе пынӑ. Ҫуркуннехипе танлаштарсан, ку 20 процент нумайрах. Ҫынсем ытларах 10 тата 1 тенкӗллисене илсе пынӑ.
-9.7 °C