Чӑваш Енри пенсионер ултавҫӑсене 8,5 миллион тенкӗ куҫарса панӑ. Ку Ҫӗнӗ Шупашкарти арҫынпа пулнӑ.
65 ҫулти пенсионер патне вӑл ӗҫленӗ предприятин «хальхи ертӳҫи» тесе паллаштарнӑ ҫын шӑнкӑравланӑ. Украинӑна укҫа куҫарман-и тесе тӗрӗсленине пӗлтернӗ. Хайхискер пенсионера хӑратса пӗтернӗ, унӑн тӑванӗсем пирки йӑлтах пӗлнине каланӑ.
Кунпа вӗҫленмен-ха. Кайран арҫын патне «майор» текне ҫын шӑнкӑравланӑ. Вӑл пӗтӗм укҫине «ФСБ курьерне» парса яма хушнӑ.
Ултавҫӑсем арӑмӗн укҫине те куҫарса пама ыйтсан тин пенсионер хӑйне шӑнман пӑр ҫине лартса хӑварнине ӑнланнӑ та полицие кайнӑ.
Мускав политехника институчӗн Шупашкарти филиалӗнче вӗренекен Даниил Бровкин Атӑлҫи федераци округӗнче иртекен «иВолга» ҫамрӑксен форумне хутшӑнать.
Вӑл форумра – чи хастаррисенчен пӗри. Куншӑн ӑна хаклӑ парнепе хавхалантарнӑ – Даниил Сколковӑри акселераторта вӗренме пултарӗ. Вӗренӳ сертификачӗ – 100 пин тенкӗлӗх.
Ҫак сӑнӳкерчӗкре вӑл – Анатолий Вассерманпа. Вӑл ӑс-тӑн вӑййисене хутшӑнакан паллӑ вӑйӑҫӑ.
Чӑваш Енри маршруткӑран тухса ӳкнӗшӗн 500 пин тенкӗ шыраса илнӗ. Ку пӑтӑрмах 2023 ҫулхи нарӑс уйӑхӗнче пулнӑ.
Хӗрарӑм 325-мӗш маршруткӑна ларма тӑнӑ. Анчах ҫав вӑхӑтра водитель хускалса кайнӑ, алӑка вара хупман.
Ҫавна пула хӗрарӑм маршруткӑран тухса ӳкнӗ те пӗҫӗ шӑммине хуҫнӑ. Унӑн виҫӗ больницӑра выртма тивнӗ. Кайран ӑна операци те тума тивнӗ.
Хӗрарӑм перевозчикран 1 млн тенкӗ шыраса илесшӗн пулнӑ. Анчах суд хака чакарнӑ, 500 пин тенкӗ тӳлеттерме йышӑннӑ.
Чӑваш Енри нумай ачаллӑ хӗрарӑма ача ҫуратни пирки суя справка туса Амӑшӗн капиталне илнӗшӗн явап тыттарӗҫ.
Ҫакӑ паллӑ: 2019 ҫулхи ака уйӑхӗнче 35-ри хӗрарӑм Пермь хулинче ача ҫуратнӑ тесе суя справка тутарнӑ. Кун хыҫҫӑн ҫуралнине ӗнентерекен свидетельство туса 450 пин ытла тенкӗ амӑшӗн капиталне илнӗ.
Документсем тӑрӑх, хӗрарӑмӑн 4 ача пулмалла пулнӑ. Анчах чӑннипе унӑн виҫӗ ача анчах: 2000, 2001 тата 2004 ҫулсенче ҫуралнӑскерсем. Вӗсемшӗн вӑл Амӑшӗн капиталне илеймен, мӗншӗн тесен ӑна 2007 ҫул хыҫҫӑн кӑна пама тытӑннӑ.
Чӑваш Енре пурӑнакансем ултавҫӑсен аллине час-часах лекеҫҫӗ. Кӑҫал ҫур ҫулта ҫавна пула пирӗн ентешсем укҫа сахал мар ҫухатнӑ: палламан ҫынсене 531 миллион тенкӗ куҫарса панӑ.
Йӗрке хуралҫисем ултавҫӑсен чи анлӑ сарӑлнӑ схемӑсем пирки каласа кӑтартнӑ.
Палламан ҫынсем ытларах чухне шӑнкӑравласа хӑйсемпе банк ӗҫченӗ тесе паллаштараҫҫӗ, укҫана «хӑрушсӑр счет» ҫине куҫарма ыйтаҫҫӗ. Тепӗр схема – инвестицисем хывса тупӑш илме, суя сайтсенче тавар туянма сӗнеҫҫӗ.
Йӗрке хуралҫисем ҫирӗппӗнех асӑрхаттараҫҫӗ: харпӑр даннӑйсене ют ҫынна пӗлтермелле мар. Смспа килнӗ кода та вӑрттӑнлӑхра тытмалла.
Чӑваш Ен те Атӑла сыватмалли федераци программине хутшӑнни пирки эпир унччен пӗлтернӗччӗ-ха. Ҫавна май регионта тасатмалли сооруженисем тумалла. Ӑна 2024 ҫулхи чӳк уйӑхӗнчех хута ямалла пулнӑ. Анчах ӗҫ паян кун та тӑрать.
Регионсенче тасатмалли сооруженисене тӑвас ӗҫе ҫирӗп тӗрӗслесе тӑракан РФ Патшалах Думин депутачӗ Жанна Рябцева Шупашкарти «Ҫӗнӗ хула» микрорайонти туса пӗтермен сооруженисен сӑнӳкерчӗке Телеграмри хӑйӗн каналӗнче вырнаҫтарнӑ.
Объекта тума хыснаран 336,1 миллион тенкӗ уйӑрнӑ, ӗҫ графикран 177 кун юлса пырать. Унсӑр пуҫне сооружение туса 100 миллиона яхӑн нумайрах укҫа кирлӗ теҫҫӗ-мӗн. «2024 ҫулхи утӑ уйӑхӗнче эпир пӗрремӗш хут тӗрӗсленӗ хыҫҫӑн объекта пуҫласа юхтарса кайнӑ. Халӗ, хӑвӑрах куратӑр, ҫӗнӗрен тума ансатрах», – тесе палӑртнӑ Жанна Рябцева.
Чӑваш Ен ертӳҫисем объекта 2026 ҫулсӑр та туса пӗтереймессине пӗлтернӗ-мӗн.
Чӑваш Енри патшалӑхӑн мӗнпур пурлӑхне приватизацилесшӗн, тепӗр майлӑ каласан, сутса ярасшӑн.
Республикӑн Экономика аталанӑвӗн тата пурлӑх хутшӑнӑвӗсен министерствинче пӗлтернӗ тӑрӑх, 2026-2028 ҫулсенчи приватизаци планӗн проектне хатӗрленӗ.
Патшалӑх пурлӑхне пуянсене сутса ярса 2026 ҫулта 23,5 миллионран кая мар тенкӗ тупӑш курасшӑн, 2027 ҫулта — 23 миллион тенкӗ ытла, 2028 ҫулта — 21,3 миллион тенкӗ.
Паянхи куна Чӑваш Енӗн харпӑрлӑхӗнче 5 унитарлӑ предприяти, 19 акционер обществин акцийӗсем, тулли мар яваплӑ 3 обществӑри тӳпе, 2 акционер обществи шутланать-мӗн.
Чӑваш Ен йӗлтӗрпе роллер ҫулнетумалли контракта пӑрахӑҫланӑ. Ӗҫ хакӗ 1 миллиард тенке таран тӑнӑ. Ҫав ҫула туса пӗтерме те вӑхӑт ҫитнӗ, анчах Республикӑн перлехи заказчик служби Мускав облаҫӗнчи «Геолайн Технологии» обществипе контракта татнӑ.
Ҫула маларах Росстройконтроль тӗрӗсленӗ те кӑлтӑк тупса палӑртнӑ. Аялти сий татӑк-татӑкӑн ишӗлет иккен.
Унта, сӑмах май каласан, килес ҫулхи нарӑс уйӑхӗнче ҫӗршыв шайӗнчи биатлон ӑмӑртӑвне ирттерме палӑртнӑ. Вӑл хыпара Раҫҫейӗн биатлонистсен союзӗ 2025-2026 ҫулсенчи календарь планне тӗпе хурса хыпарланӑччӗ.
Шупашкарти управляющи компанисенчен пӗрин ҫынсене коммуналлӑ пулӑшушӑн ытларах тӳлеттерес килнӗ. Сӑмах «Новый город» (чӑв. Ҫӗнӗ хула) управляющи компани пирки пырать.
Ҫурт-йӗре тытса тӑнишӗн тӳлемелли тарифа вӑл кӑҫалхи кӑрлач уйӑхӗнчен ӳстерсе янӑ. Ҫӗнӗ йӗрке А.М. Токарев композиторр урамӗнчи 18-мӗш ҫурта пырса тивнӗ. Ун пек йышӑнӑва тӑвиччен управляющи компани хваттерсен хуҫисемпе канашламан.
Республикӑн сурт-йӗр инспекцийӗ управляющи компание ҫынсенчен ытлашши илнӗ укҫана тавӑрса пама хушнӑ. Предприяти ӗҫчене тӗлӗшпе административлӑ ӗҫ пуҫарнӑ.
Шупашкарта пурӑнакан арҫын ултавҫӑсене 3 миллион тенкӗ ытла куҫарса панӑ. Полицие вӑл мар, унӑн тӑванӗсем шӑнкӑравласа пулӑшу ыйтнӑ.
50 ҫулти арҫын патне ҫӗртме уйӑхӗнчех пӗр хӗр шӑнкӑравланӑ. Укҫа ӗҫлесе илмелли мел пур тесе сӗннӗ. Арҫын килӗшнӗ те телефонне лешӗ каланӑ сарӑма вырнаҫтарнӑ. Укҫа ӗҫлесе илес тесе 3 миллион та 150 пин тенкӗ инвестици хывнӑ. Ку укҫана вӑл банкран кредит илнӗ. Анчах арҫын кайран укҫана тавӑрас тенӗ — май килмен, счета блокировка тунӑ.
-11.7 °C