cap.ru сайтри сӑн

Улатӑр округӗнчи Миренки ялӗнче ҫӗнӗ фельдшерпа акушер пункчӗ уҫӑлнӑ. Халӗ унта пурӑнакансен медпулӑшу илме инҫе каймалла мар.

Ҫӗнӗ ФАПра пациентсене йышӑнма хӑтлӑ та меллӗ. Унтах профилактика мероприятийӗсем ирттереҫҫӗ, кирлӗ пулсан васкавлӑ медпулӑшу параҫҫӗ.

Сӑмах май, кӑҫал округри Чуварлей тата Стемас ялӗсенчи фельдшерпа акушер пункчӗсене тӗпрен юсанӑ. Ҫапла халӗ 2,5 пине яхӑн ҫынна тухтӑрсем хӑтлӑ ҫуртра йышӑнаҫҫӗ.

cap.ru сайтри сӑн

Республикӑра гриппа тата ОРВИпе чирлекенсен йышӗ ӳссе пырать. Ҫапла пӗлтерет ЧР Сывлӑх сыхлавӗн министерстви.

Ведомство хыпарланӑ тӑрӑх, кӗркунне вӗҫӗнчех пӗр эрнере 4,2 пин ҫын чирленине шута илнӗ. Унтанпа вара кӑтарту ӳссе кӑна пырать. Пульницӑсенче аслисемпе ачасем валли резерв койкӑсем хатӗрленӗ, вируспа кӗрешекен препаратсемпе антибиотиксен саппасне те пысӑклатаҫҫӗ. Лару-тӑру ҫивӗч пулнине кура республикӑра экстреннӑй канашлу иртнӗ.

t.me/Chuv_today сӑнӳкерчӗкӗ

Чӑваш Енри ветеринарсем кӑҫал 56 пин те 902 йытӑпа 63 пин те 809 кушака урнӑ чиртен прививка тунӑ.

Ветеринарсем каланӑ тӑрӑх, ку чир ҫынсемшӗн те хӑрушӑ. Килте пурӑнакан чӗрчун та ку чире ҫаклатма пултарать тесе хӑратаҫҫӗ, ҫавӑнпа та прививка тунине нимӗн те ҫитмест. Прививкӑна патшалӑхӑн ветеринари клиникисенче тӳлевсӗр тӑваҫҫӗ.

cap.ru сайтри сӑн

Ҫак кунсенче Патӑрьел округӗнчи Чӑваш Ишекӗнче ҫӗнӗ фельдшерпа акушер пункчӗ уҫӑлнӑ. Ялта ФАП кирлӗ тесе пӗлтӗр ял старости, ӗҫ ветеранӗ Пантелеймон Шихранов ЧР Элтеперӗ Олег Николаев патне ыйтупа тухнӑ.

Ҫавӑн пекех округра Ыхраҫырминче тата Турханта ҫӗнӗ ФАПсем уҫӑлнӑ. Вӗсене халӗ 4 пин ҫын сывлӑхне тӗрӗслеме ҫӳрӗ. Ҫавӑн пекех Комсомольски округӗнчи Кӗҫӗн Каҫал ялӗнче пӗтӗмӗшле практика тухтӑрӗн офисӗ ӗҫлеме пуҫланӑ.

rkod.med.cap.ru сӑнӳкерчӗкӗ

Канаш районӗнчи 52 ҫулти хӗрарӑма флюорографи тусан вӑл ракпа чирлине тупса палӑртнӑ.

Шкулта ӗҫлекен хӗрарӑм ҫулсерен медицина терӗслевӗ витӗр тухнӑ. Хальхинче флюрографи тунӑ чухне тухтӑрсем унӑн ӳпкинче улшӑну пуррине асӑрханӑ.

Хӗрарӑм ӳсӗрмен те, сывлӑш пӳлӗннипе те аптӑраман, хӑйне аван туйнӑ. Флюорографи хыҫҫӑн ӑна МРТ тата биопси тума хушнӑ. Усал чир пирки илтсен хӗрарӑм кулянса ӳкнине тавҫӑрма йывӑр мар. Анчах онколог ӑна лӑплантарнӑ: чир шала кайман, сире пулӑшма пулать. Хӗрарӑма операци тунӑ, халӗ вӑл чиртен малалла сипленет.

max.ru/cheb121 каналтан илне сӑнӳкерчӗк

Чӑваш Енре пурӑнакансене тухтӑрсем ҫӗнӗ йышши мелпе операци туса ура татассинчен ҫӑлса хӑварма пуҫланӑ. Атеросклерозӑн чи йывӑр хӑрушлӑхӗнчен пӗри — ура ишемийӗ.

Вӑрмар районӗнчи пӗр ялта пурӑнакан 60 ҫулти Маргаритӑшӑн 50 утӑм утасси те чӗр нуша пулнӑ. Унӑн уринчи юн тымарӗсенчен 80 процентӗнче юн ҫывӑрса ларнӑ. Хӗрарӑм урасӑр юласран пуринчен ытла хӑранӑ.

Кальциленсе ларнӑ юн тымарӗсене Республикӑн кардиодиспансерӗнчи мобильлӗ атеротомӗ пулӑшнипе тасатнӑ. Пӗр сехете яхӑн пыракан операци хыҫҫӑн пациентсем тепӗр куннех ура ҫине тӑраҫҫӗ, утса ҫӳреме тытӑнаҫҫӗ иккен.

forum.na-svyazi.ru сӑнӳкерчӗкӗ

Шупашкарта пурӑнакан 54 ҫулти арҫын сывлӑш пӳлӗннипе аптӑранӑран тухтӑрсем патне кайнӑ. Унсӑр пуҫне унӑн ури шыҫнӑ, юн пусӑмӗ пысӑк пулнӑ.

Тухтӑрсем малтанласа тӗрӗсленӗ чух электрокардиограмма та туса пӑхнӑ, анчах темле пӑтӑрмах асӑрхаман. Вӗсем холестерин кӑшт пысӑкраххине ҫеҫ палӑртнӑ.

Стенокарди диагнозпа арҫынна кардиологи уйрӑмне сиплеме вырттарнӑ. Анчах унта сипленсен те арҫын хӑйне япӑх туйнӑран компьютер томографийӗ туса пӑхнӑ. Ҫавӑн чухне вӑл ракпа чирлине палӑртнӑ.

Олег Николаевӑн ТГ-каналӗнчен илнӗ сӑнӳкерчӗк

Шупашкарти темиҫе класа ачасем йышлӑ чирленӗрен карантина хупнине эпир ӗнер пӗлтернӗччӗ-ха. Республикӑра гриппа тата ОРВИпе ҫеҫ мар, ковидпа та чирлекенсем пур иккен. Пӗтӗмпе хальлӗхе 39 ҫынна шута илнӗ. Кун пирки ӗнер Чӑваш Енӗн Правительствинче ирпе иртнӗ планеркӑра пӗлтернӗ.

Раштав уйӑхӗн 1-7-мӗшӗсенче ОРВИпе чирлисене 7 пине яхӑн тӗслӗх шута илнӗ, ҫав шутран 107 ҫын гриппа чирленӗ, 39-ӑн —короновируспа.

pravdapfo.ru сӑнӳкерчӗкӗ

Шупашкар хулинчи 28 шкулти 80 класа каратина хупнӑ. Вӗсене халӗ инҫет сыхӑну мелӗпе вӗрентеҫҫӗ. Хулари 3-мӗш лицей пӗтӗмпех дистанци мелӗпе вӗренет.

Сӑмах май каласан, ОРВИпе тата гриппа чирлекен нумай. Юлашки икӗ эрнере грипа тата ОРВИне пула пульницӑна лекнисен йышӗ Чӑваш Енре 1,8 хут ӳснӗ.

chuvashia.media сӑнӳкерчӗкӗ

Улатӑр тӑрӑхӗнче тата тепӗр фельдшерпа акушер пункчӗ уҫӑлӗ. Вӑл Миренки ятлӑ ялта пулӗ. Халӗ ӑна тӗплӗн юсаҫҫӗ. Ҫурта ҫывӑх вӑхӑтра газ кӗртӗҫ.

«Пирӗн ялти фельдшер питӗ лайӑхскер. Юсаса ҫӗнетнӗ фельдшерпа акушер пунктӗнче ӑна ӗҫлеме та лайӑхрах пулӗ, пире кӗрсе тухма та», – ФАП уҫасса хавхаланса кӗтеҫҫӗ-мӗн ял ҫыннисем.