ЧР ШӖМ сӑнӳкерчӗкӗ

Улатӑр хулинче пӗр водитель машинӑпа ача ури ҫине пырса кӗнӗ. 69 ҫулти водитель йӗрке хуралҫисене ӗнентернӗ тӑрӑх, вӑл машина умӗнче шуҫса ӳкнӗ ачана асӑрхаман имӗш.

Инкек ӗнер, нарӑс уйӑхӗн 5-мӗшӗнче, Улатӑрта пулса иртнӗ. 15 ҫулти яш «Chevrolet» машина урапи айне пулнӑ. Ҫул хӗрринче тӑнӑ чухне ача шуҫса ӳкнӗ, машина вара ун ури урлӑ каҫса кайнӑ та чарӑнса та тӑман.

cheb-centr.soc.cap.ru сӑнӳкерчӗкӗ

Инсульт тӳссе ирттернӗ хыҫҫӑн килтен тухайман ҫынсене Шупашкарта киле пырса та пулӑшаҫҫӗ. Хулари халӑхӑн социаллӑ ыйтӑвӗсене тивӗҫтерекен комплекслӑ центрта пӗлтернӗ тӑрӑх, депрессие кӗрсе кайнисене хӑйсен вӑйне шанма пулӑшас тӗллевпе Лира Саминова психолог киле кайса та пулӑшать.

Акӑ, сӑмахран, 46 ҫулти Анастасия (ятне ылмаштарнӑ) инсульт хыҫҫӑн чунтан хуҫӑлнӑ. Лира Александровна хӗрарӑм патне килне кайса ҫӳрет, ӑна лӑпланма пулӑшать тата малашлӑха ҫирӗппӗн пӑхма шанчӑк кӳрет.

«Контактри» сӑн

Кӑмӑллӑ хыпар: Чӑваш Енре пурӑнакан Марина Исаевӑпа Артем Румянцев Пӗтӗм Раҫҫейри «Будем жить» премие тивӗҫнӗ.

Ӑна онкологипе кӗрешекенсене тата чире парӑнтаракансене параҫҫӗ.

Марина Исаевӑна «Чи лайӑх медицина сестри» ята панӑ. Вӑл Республикӑри онкологи диспансерӗнче 10 ҫул ытла ӗҫлет. Артём Румянцев вара «Пациентӑн хӑйне евӗрлӗ историйӗ» номинацире мала тухнӑ. Саламлатпӑр ентешсене!

cap.ru сайтри сӑн

Республикӑри катастрофа медицинин центрӗн васкавлӑ медпулӑшу бригади пациентӑн пурнӑҫне ҫӑлнӑ – вӗсем унӑн чарӑнса ларнӑ чӗрине ӗҫлеттерсе янӑ.

Шӑнкӑрав килсен Дарья Мустафина тухтӑр тата Маргарита Ильина фельдшер пациент патне ҫула тухнӑ. Арҫын ӗҫленӗ хыҫҫӑн кӑкӑр тӗлӗнчен хӗссе ыратма пуҫланине каланӑ. Тухтӑрсем унӑн сывлӑхне тӗрӗсленӗ: пысӑк хӑрушлӑх пулман.

Ҫапла вӗсем пациента пульницӑна илсе кайма тухнӑ. Анчах ҫул ҫинче тӑрук пациентӑн чӗри чарӑнса ларнӑ. Водитель машинӑна чарнӑ, тухтӑрсем пациент пурнӑҫӗшӗн кӗрешме тытӑннӑ. Телее, вӗсем унӑн чӗрине ӗҫлеттерсе янӑ. Пациента пульницӑна илсе ҫитернӗ.

forum.na-svyazi.ru форумри видеоран илнӗ сӑнӳкерчӗк

Чӑваш Енри пульницӑсене пӗрлештерни ҫынсемшӗнех лайӑх. Ҫакӑн пекрех хуравланӑ республикӑн сывлӑх сыхлав министрӗ Лариса Тарасова тӳрӗ лини ирттернӗ вӑхӑтра.

Министр ӗнентернӗ тӑрӑх, реорганизаци хыҫҫӑн кадр ыйтӑвӗ лайӑхланать, ҫавна май ҫынсен черетре тӑма тивмӗ. Реорганизаци вӑхӑтӗнче пульницӑсене хупса пӗтермӗҫ, пӗрремӗш санитарипе медицина пулӑшӑвӗ кирлӗ пулсан унччен хӑнӑхнӑ ҫӗрех каймалла, вӗсенче ҫав тухтӑрсемех ӗҫлӗҫ,

Ҫав вӑхӑтрах ансӑр текен специалистсем патне ҫӑмӑллӑн лекме май килӗ. Унччен, сӑмахран, эндокринолог, кардиолог, невролог патне хӑш-пӗр тӑрӑхра тепӗр пульницӑна е уйрӑм ҫын клиникине кайма тивнӗ. Е тата хальхи вӑхатри хаклӑ медицина тӗрӗслевӗ (КТ, МРТ, эксперт класлӑ ультросасӑ тӗрӗслевӗ, эндоскопи диагностики тата ытти те) витӗр пысӑках мар муниципалитетсенче те ӳлӗмрен ҫӑмӑллӑнах тухма май килӗ.

forum.na-svyazi.ru сӑнӳкерчӗкӗ

Нарӑс уйӑхӗн 1-мӗшӗнчен Шупашкарти 1-мӗш клиника пульницин поликлиники эрнере ҫичӗ кун ӗҫлеме пуҫлӗ. Ҫӗнӗ графикпа ӗҫлеме Трактор тӑвакансен проспектӗнчи 46-мӗш ҫуртра вырнаҫнӑ 1-мӗш поликлиника тытӑнӗ. Вӑл ҫынсене кашни кунах ирхи 8 сехетрен пуҫласа 8 сехет каҫхиччен йышӑнӗ.

Асӑннӑ поликлиникӑна асӑннӑ пульницӑн ытти поликлиникӑсем патне ҫирӗплетнӗ пациентсем те кайма пултараҫҫӗ.

cap.ru сайтри сӑн

Президент пепкелӗх центрне урӑх ҫын ертсе пыма тытӑннӑ. Ку должноҫе раштав уйӑхӗнче Эльвира Васильева йышӑннӑ.

Вӑл 1989 ҫулта И.Н.Ульянов ячӗллӗ ЧПУн медицина факультетне «Сиплев ӗҫӗ» специальноҫпе пӗтернӗ. Диплом илсенех Шупашкарти Ҫурҫӗр клиникинче акушер-гинекологра ӗҫлеме пуҫланӑ. 2008 ҫултанпа вара ача ҫуратмалли 5-мӗш ҫурт заведющийӗ пулнӑ. Вӑл – медицина ӑслӑлӑхӗсен кандидачӗ, Чӑваш Республикин тава тивӗҫлӗ тухтӑрӗ.

Палӑртмалла: унччен Президент пепкелӗх центрне Мускавран килнӗ Евгений Дубнер ертсе пынӑ.

«Чеб.ру» сайтри сӑн

Канашра юн тымарӗсен центрне уҫма палӑртнӑ. Вӑл Канашри медицина центрӗ ҫумӗнче пулӗ.

Иртнӗ эрнере унта республикӑн премьер-министрӗ Владимир Степанов пулнӑ. Вӑл ун чухне юн тымарӗсен центрӗ кӑҫал уҫӑлассине пӗлтернӗ.

Ҫӗнӗ центрта пысӑк технологиллӗ оборудовани пулӗ. Ҫав шутра – магнит-резонанс томографӗ те.

Патӑрьел, Елчӗк тата Шӑмӑршӑ районӗсенчи тӗп пульницӑсене пӗрлештересшӗн.

Ҫавна май Елчӗкри тӗп клубра нарӑс уйӑхӗн 3-мӗшӗнче халӑхпа пуҫтарӑнса калаҫасшӑн. Мероприяти 11 сехетрен пуҫласа 12 сехетчен пырӗ.

Халӑх итлевне йӗркелекенни — Чӑваш Енӗн Сывлӑх сыхлав министерстви.

vk.com/gov_cap_ru сӑнӳкерчӗкӗ

Шупашкарти тухтӑрсем ҫынсене начарланма пулӑшаҫҫӗ. Хулари тӗп пульницӑра Начарланма пулӑшакан шкул ӗҫлет. Унта хӑйсем тӗллӗн начарланайман ҫынсем пулӑшу ыйтса пыраҫҫӗ.

Пульницӑн тӗп тухтӑрӗ, Татьяна Маркелова эндокринолог вӗсене биоимпедансометри текен тӗрӗслеве тухма сӗннӗ, начарланас тесен мӗн ҫисе мӗн ӗҫмеллине вӗрентнӗ.

Тухтӑр каланӑ тӑрӑх, ӑшаланӑ тата ҫуллӑ апата сахал ҫимелле. Кунне икӗ литра яхӑн тӑрӑ шыв (лимон касӑкӗ хушса) ӗҫни апата лайӑх ирӗлме пулӑшать, иммунитета лайӑхлатать, апат ҫиес килнине чакарать.

Сывлӑх шкулне +7 (8352) 23-45-00 телефонпа шӑнкӑравласа ҫырӑнма пулать.