Надежда Быченкова архивӗнчи сӑнӳкерчӗк

Чӑваш Енре пурӑнакан ватӑсем усламҫӑ ӗҫне пуҫарса яма вӗренесшӗн.

«Серебряный старт» (чӑв. Кӗмӗл старт) — федераци проекчӗ. Унта ҫӗршыври 25 регион хутшӑнать. Пирӗн республикӑра унта лекес кӑмӑллисем 60 ҫултан иртнӗ 29 ҫын тупӑннӑ. Вӗсенчен 20-шне суйласа илнӗ.

Надежда Быченкова – Шупашкар хулинчи халӑхӑн социаллӑ ыйтӑвӗсене тивӗҫтерекен комплекслӑ центра ҫӳрет. Вӑл тӗрлӗ финанс чемпионачӗпе ӑмӑртӑвне унччен те питӗ хастар хутшӑннӑ. Хальхинче Надежда Анатольевна ҫӗнӗ проекта хутшӑнса пӑхас тенӗ. Хальлӗхе вӗсем вӗренеҫҫӗ.

pravdapfo.ru сайтра вырнаҫтарнӑ сӑнӳкерчӗк

Шупашкар районӗнче, «Шупашкар-Сурски» ҫул ҫинче, виҫӗ автомашина ҫапӑннӑ. Инкекре икӗ ача суранланнӑ, тепӗр иккӗшне сывлӑхне тӗрӗслеме пулницӑна илсе кайнӑ.

«Опель» автомобиль водителӗ хирӗҫ килекен ҫул ҫине тухса кайнӑ та КамАЗпа ҫапӑннӑ. Унтан ҫӑмӑл машина «Форд» ҫине пырса кӗнӗ.

«Опель» машинӑра ларса пынӑ 13-ри хӗрачапа 8-ти арҫын ачана пульницӑна илсе кайнӑ. «Фордри» 3-ри тата ҫулталӑкри ачана та сывлӑх сиплев учрежденине ӑсатнӑ.

Водительсем пурте урах пулнӑ.

«Контактра» халӑх тетелӗнчи сӑн

Елчӗк тӑрӑхӗнчи Патреккелте пурӑнакан пенсионера санитари авиацийӗпе Шупашкара илсе ҫитернӗ. Ку унӑн пурнӑҫне ҫӑлма пулӑшнӑ.

78 ҫулти арҫын аритмипе аптӑранӑ. Район больницинчи тухтӑрсем ӑна Шупашкара Республикӑри кардиологи диспансерне илсе кайма йышӑну тунӑ.

Пациента вертолетпа Шупашкара пӗр сехетрех илсе ҫитернӗ. Тухтӑрсем каланӑ тӑрӑх, пациента машинӑпа илсе ҫитерме вӑхӑт ытларах кирлӗ пулӗччӗ.

1obl.ru сайтри сӑн

Шупашкарта пурӑнакан 21 ҫулти каччӑ подстанцие чӗртсе яма хатӗрленнӗ. Ӑна тытса чарнӑ, ун тӗлӗшпе пуҫиле ӗҫ пуҫарнӑ.

Каччӑ хулари пӗр подстанцие чӗртсе яма хӑтланнӑ. Малтанлӑха палӑртнӑ тӑрӑх, ӑна ҫакна тума Украинӑри ятарлӑ службӑсем хӗтӗртнӗ.

Каччӑна ҫав каҫах Чӗмпӗр хулинче ФСБн Чӑваш Енри управленийӗн ӗҫченӗсем тытса чарнӑ.

vk.com/dramteatr21 сайтран илнӗ сӑнӳкерчӗк

Чӑваш артисчӗсем Йошкар-Олара иртнӗ Пӗтӗм Раҫҫейри ҫамрӑксен «Театральные встречи на Вознесенской» фестивальне хутшӑннӑ.

К.В. Иванов ячӗллӗ Чӑваш патшалӑх академи драма театрӗ унта «Аманнӑ шӑпа» спектакльпе хутшӑннӑ. Ҫав ӗҫе, театрта пӗлтернӗ тӑрӑх, жюри пысӑка хурса хакланӑ.

Алман Арсланов сӑнарне калӑпланӑ Николай Сергеева артиста ятарлӑ наградӑпа чысланӑ, Григорий Федоров «Иккӗмӗш планри чи лайӑх арҫын ролӗ» номинацире ҫӗнтернӗ, Светлана Андреева «Иккӗмӗш планри чи лайӑх хӗрарӑм ролӗ» номинацире палӑрнӑ. Спектакль режиссёрне Борис Манджиева «Чи лайӑх режиссура» номинацире чысланӑ.

www.cap.ru сӑнӳкерчӗкӗ

Чӑваш Енре «Управленческая команда» (чӑв. Ертсе пыракансен команди) конкурса пӗтӗмлетнӗ.

2025 ҫулти ҫӗнтерӳҫӗсен шутӗнче 5 ҫын:

- Ирина Коптева, Шупашкар районӗнчи Толиккассинчи вӑтам шкулӑн директорӗн воспитани енӗпе ӗҫлекен ҫумӗ;

- Александр Иванов, «ИТ-Консалтинг» тулли мар яваплӑ обществӑн администраци директорӗ;

- Александр Смирнов, «Форт Диалог» проектсен ертӳҫи;

- Денис Андреев, «Время СВОих» программӑна хутшӑннӑ ҫын, Ҫӗмӗрле районӗнчи дежурствӑпа диспетчер службин директорӗ ;

- Ренат Чебутаев, Шупашкарти 38-мӗш вӑтам шкул директорӗ.

Чӑваш Енӗн Инкеклӗ ӗҫсен министерствин сӑнӳкерчӗкӗ

Шупашкарта 17-ри пике шыва путма тӑнӑ арҫын ачана ҫӑлса хӑварнӑ.

Юпа уйӑхӗн 4-мӗшӗнче ҫав хӗрача пӗлӗшӗпе хулари Ботаника пахчипе уҫӑлса ҫӳренӗ. Ҫав вӑхӑтра вӗсем патне хӗрарӑмсем пырса пулӑшма ыйтнӑ. Вӗсем пӗвене икӗ арҫын ача кӗрсе кайнине, вӗсенчен пӗри теприне унтан тухма пулӑшма хӑтланни пирки пӗлтернӗ.

17-ри Александра Железина пӗр шухӑшласа тӑмасӑр пӗве патне ыткӑннӑ. Ӳкнӗ йывӑҫ тӑрӑх арҫын ача патне шуса пырса ӑна куртка ҫухавинчен ярса илсе ҫыран хӗрне туртса кӑларнӑ.

Арҫын ачасем пӗве хӗрне пулӑ тытма кайнӑ иккен, анчах вӑлта шыва кайсан ӑна туртса кӑларма хӑтланнӑ. Вӑлтана кӑларма хӑтланса та хӑй те анса кайнӑ, хӑйӗнпе тантӑш тусӗ ӑна ҫӑлма хӑтланнӑ, анчах вӑйӗ ҫитмен.

Маттур хӗрача, Александра Железина, В.М. Краснов ячӗллӗ Шупашкарти олимп резервӗн училищинче вӗренет.

t.me/bbbreaking сӑнӳкерчӗкӗ

Мускаври метрора акустика кабинисем вырнаҫтарнӑ. Унта кӗрсе телефонпа шӑплӑхра калаҫма пулать е ӗҫлеме те.

Пӗр кабинӑна пӗр ҫын вырнаҫаять. Унта телефона зарядкӑна лартма USB тата Type-C разъем та пур. Ларса ӗҫлеме пукан тата сӗтел вырнаҫтарнӑ. Вентиляци те пур.

Пӳлӗме 15 минутлӑха тара илес тесен алӑк ҫинчи QR-код сканерламалла. Ун пек кабина «Комосмольски» тата «Чулхула» станцисенче пур.

Ҫулталӑк вӗҫлениччен вӗсемпе тӳлевсӗр усӑ курма май пур.

«Контактри» сӑн

Патӑрьел округӗнчи Ҫӗнӗ Ахпӳрт шкулӗ ҫавра юбилейне паллӑ тунӑ. Вӑл пӗрремӗш вӗренекенӗсене 135 ҫул каялла йышӑннӑ.

Ун чухне ял Патӑрьел чиркӗвӗн прихучӗ йышӗнче шутланнӑ. Унӑн священникӗ Николай Лебедев ялта грамота шкулӗ уҫнӑ. Унта пӗрремӗш учителе — Макар Иванович Румянцева — ӗҫлеме янӑ.

Ку таранччен шкултан чаплӑ ҫынсем вӗренсе тухнӑ: ӑслӑлӑх докторӗсем, ӑслӑлӑх кандидачӗсем, спорт мастерӗсем, тава тивӗҫлӗ тухтӑрсемпе вӗрентекенсем, юристсем, культура тата ял хуҫалӑх ӗҫченӗсем, ҫар ҫыннисем...

ul.aif.ru сайтри сӑн

Шупашкар округӗнчи хӗрарӑм ултавҫӑсен аллине лексе самай пысӑк укҫа ҫухатнӑ. Вӑл палламан ҫынна 8,5 миллион тенкӗ куҫарса панӑ.

Ун патне темиҫе палламан ҫын шӑнкӑравланӑ: пӗри хӑйӗнпе «Госуслуги» порталӗн ӗҫченӗ тесе паллаштарнӑ, теприсем — «хуралӗн» тата «ФСБ» ӗҫченӗсем имӗш. Хайхискерсем 64-ри хӗрарӑма тупӑшне деклараци тумаллине пӗлтернӗ. Ҫакна тумасан унӑн укҫине вӑрлама пултараҫҫӗ-мӗн.

Хӗрарӑм ҫав ҫынсене ӗненсе пӗтӗм укҫине ултавҫӑсем янӑ курьер урлӑ парса янӑ. Пӗтӗмпе — 8,5 миллион тенкӗ. Укҫана каялла тавӑрса памасан тин вӑл ултавҫӑсен серепине ҫакланнине ӑнланнӑ.