bel.aif.ru сайтри сӑн

Республикӑра икӗ кун кӗркуннехи евӗр ҫанталӑк пулӗ. Ҫапла пӗлтерет «Ҫанталӑк 21» сайт.

Ыран, кӗҫнерникун, уяр пулӗ-ха, термометр 16-21 градус ӑшӑ кӑтартӗ. Анчах эрнекун ҫанталӑк тӑрук сивӗтсе пӑрахӗ: 7-12 градус кӑна ӑшӑ пулӗ. Ыран каҫхинех ҫумӑр ҫума тытӑнӗ. Ҫитменнине, ҫил вӑйланӗ, ӑна пула Шупашкар хулинче 4-5 градус кӑна ӑшӑ пек туйӑнӗ. Ӑшӑрах тумланма ан манӑр!

Шӑматкун ҫанталӑк кӑшт лайӑхланӗ, уяртӗ, 2-3 градус ӑшӑрах пулӗ, ҫумӑр ҫумӗ. Вырсарникун татах лайӑхланӗ:15-17 градус таран ӑшӑтӗ, вырӑнӑн-вырӑнӑн кӑна ҫумӑр ҫукалӗ.

Ҫапах та кӗркунне тесе кулянма иртерех. Ҫулла тата таврӑнӗ. Малтанлӑха палӑртнӑ тӑрӑх, ҫитес эрнере 25 градус таран ӑшӑ пулӗ.

lifeisphoto.ru сайтри сӑн

«Ҫанталӑк 21» сайт пӗлтернӗ тӑрӑх, канмалли кунсенче ҫумӑр ҫӑвӗ, каярахпа вара сивӗтӗ.

Ҫумӑр ытларах шӑматкун кӑнтӑрла хыҫҫӑн, ҫӗрле тата вырсарникун кӑнтӑрлаччен ҫӑвӗ. Ҫав вӑхӑтра аслати авӑтма, ҫил вӑйланма, пӑр ҫума пултарать.

Ҫитес икӗ каҫ ӑшӑ пулӗ. Тропика ӑшши теҫҫӗ ӑна. Ун чухне 17-22 градус ӑшӑ пулӗ. Ыран кӑнтӑрла термометр 22-27 градус кӑтартӗ. Вырсарникун кӑнтӑрла хыҫҫӑн ҫумӑр ҫума чарӑнӗ, пӗлӗтсем сирӗлӗҫ те хӗвел тухӗ. Ҫитес эрне пуҫламӑшӗнче республикӑра 20-25 градус ӑшӑ пулӗ.

Кӗҫнерникунран вара ҫанталӑк сивӗтӗ, ҫумӑр ҫума тытӑнӗ. Кӑнтӑрласерен 20 градус кӑна ӑшӑ пулӗ, каҫсерен вара – 10-12. Анчах ҫил вӑйланнипе тата сивӗрех пек туйӑнӗ.

cap.ru сӑнӳкерчӗкӗ

Пӗтӗм Раҫҫейри «Ҫулталӑкри йывӑҫ» сасӑлава хутшӑнакан чӑваш юманӗ иккӗмӗш вырӑна тухнӑ.

Уншӑн такам та сасӑларӗ. Хысна тытӑмӗнче ӗҫлекенсем яланхиллех питӗ хастар пулчӗҫ тесен те йӑнӑш мар, мӗншӗн тесен бюджетра тӑрӑшакансем ун пек сасӑлавсенчен пӑрӑнса юлмаҫҫӗ.

«Финишчен вӑхӑт нумаях юлмарӗ – икӗ эрне кӑна, чӑваш юманне вара пӗрремӗш вырӑнта пыракан йывӑҫпа 20 сасӑ кӑна уйӑрать. Эппин, ӑна мала тухма пулӑшар! Сасӑлама питӗ ансат: rosdrevo.ru сайта кӗмелле те 73-мӗш номере шыраса тупмалла та сасӑламалла», — тесе Чӑваш халӑх сайтӗнче Софья Савнеш автор та чӗнсе ҫырнӑччӗ.

Анчах сасӑлавра Белгород облаҫӗнчи юман ҫӗнтернӗ. Уншӑн пурӗ 13933 сасӑ пухӑннӑ. Чӑваш Енри киремет юманӗ 12593 сасӑ пухнӑ. Ленинград облаҫӗнчи Таня хырӗ 6479 сасӑ пухса виҫҫӗмӗш вырӑна тухнӑ.

«Ҫанталӑк 21» сайт пӗлтернӗ тӑрӑх, ку эрнере ҫуллахи ӑшӑ ҫанталӑкпа малалла тӑсӑлать.

Паян республикӑн кӑнтӑр-тухӑҫ енчи округсенче аслатиллӗ ҫумӑр ҫума пултарӗ. Ыран вара ҫанталӑк уяртӗ, 23-28 градус таран ӑшӑ пулӗ. Ытларикун ҫӗрле таврана тӗтре карса илӗ. Кӗҫнерникунран ҫанталӑк пушшех те ӑшӑтӗ: 30 градус таран шӑрӑхланӗ, уяр пулӗ. Шӑматкун кӑна республикӑра вырӑнӑн-вырӑнӑн ҫумӑр ҫума пултарӗ.

Малтанлӑха пӗлтернӗ тӑрӑх, тунтикунран ҫанталӑк сивӗтӗ.

«Ҫанталӑк 21» порталти сӑн

«Ҫанталӑк 21» сайт пӗлтернӗ тӑрӑх, ҫуллахи ҫанталӑк пире тепӗр эрне савӑнтарӗ.

Кӑҫалхти утӑ уйӑхӗ юлашки 9 ҫулта чи нӳрӗ уйӑх пулса тӑнӑ. Паян ирхине тӗтреллӗччӗ. Кӗҫӗр каллех тӗтре карса илӗ, ирхине вырӑнӑн-вырӑнӑн кӑштах ҫумӑр ҫума пултарать. Пӗтӗмӗшле илсен, ыран уяр пулӗ.

Вырсарникун 24-29 градус таран ӑшӑтӗ. Ҫӗрле те ӑшӑ пулӗ. Анчах тунтикну ир валли каллех ҫумӑр ҫума пултарать, кӑнтӑрла вара уяртӗ.

Ҫитес эрне тӑршшӗпех типӗ те ӑшӑ пулӗ. Шӑматкун кӑна ҫумӑр ҫӑвӗ. Малтанлӑха пӗлтернӗ тӑрӑх, ҫурла уйӑхӗн 9-мӗшӗнчен республикӑра самаях сивӗтӗ. Кун пирки сайтра тӗплӗнрех ҫырса кӑтартма шантарнӑ.

photocentra.ru сайтри сӑн

Ҫурла уйӑхӗ мӗнле пулӗ? «Ҫанталӑк 21» сайт прогноз хатӗрленӗ. Унпа сире те паллаштаратпӑр.

Пӗтӗмӗшле илсен, климат норминчен 1-2 градус ӑшӑрах пулӗ. Уйӑх пуҫламӑшӗнче республикӑна шӑрӑх килӗ. Иккӗмӗш декадӑра вара ҫанталӑк сивӗтӗ, ҫумӑр самай ҫӑвӗ. Ҫавна май халех кӗркунне пуҫланнӑ пекех туйӑнӗ. Анчах кулянма тӑхтӑр. Виҫҫӗмӗш декадӑра пире хӗвеллӗ те шӑрӑх ҫанталӑк савӑнтарӗ-ха

Чи шӑрӑх кунсем ҫурлан 3-4-мӗшӗсенче пулӗҫ, чи сиввисем вара 13-16-мӗшӗсене лекӗҫ. Пӗтӗмӗшле илсен, ҫурла уйӑхӗнче 5 кун аслатиллӗ ҫумӑр ҫӑвӗ.

«Ҫанталӑк 21» порталти сӑн

«Ҫанталӑк 21» сайт пӗлтернӗ тӑрӑх, ку эрнере канмалли кунсенчи пек пӑчӑ пулмӗ, ҫанталӑк кӑшт уҫӑлтарӗ. Тинех ҫӑмӑллӑн сывласа яма пулать.

Паян хӑш-пӗр ҫӗрте аслатиллӗ ҫумӑр ҫӑвӗ, ҫав вӑхӑтра ҫил вӑйланӗ. Ыран вара каллех уяртӗ, 22-27 градус таран ӑшӑ пулӗ. Юнкун кӑнтӑрла хыҫҫӑн вырӑнӑн-вырӑнӑн аслатиллӗ ҫумӑр ҫӑвӗ.

Кун хыҫҫӑн вара ҫанталак кӑштах сивӗтӗ. Кӗҫнерникун кунӗпе ҫумӑр ҫӑвӗ, термометр 20 градус кӑна кӑтартӗ.

Малтанлӑха палӑртнӑ тӑрӑх, ҫурла уйӑхӗн пуҫламӑшӗнче, 1-2-мӗшӗсенче, уяртӗ, 23-28 градус ӑшӑ пулӗ. Ҫурла уйӑхӗн 5-мӗшӗнчен вара сивӗтӗ. Кун пирки сайт тӗплӗнрех ҫырса кӑтартма шантарнӑ.

Чӑваш Енре шӑрӑх кунсем пуҫланӗҫ. Синопитиксене ӗненсен канмалли кунсенче пирӗн республикӑра 29-34 градус ӑшӑ пулӗ. Ҫанталӑк каҫхине те сулхӑнлатмӗ, 20 градусран та ӑшӑрах тӑрӗ. Вырсарникун каҫхине уйрӑмах пӑчӑ пулас пирки систереҫҫӗ.

Паян каҫхине вара пирӗн республикӑра вӑйлӑ ҫумӑр ҫумалла-мӗн, ун вӑхӑтӗнче аслати авӑтӗ, ҫил вӑйланӗ. Пӑр ҫума пултарасси пирки те пӗлтернӗ. Ыранах вара хӗвел пӑхса ярӗ. Кун та уяр пулӗ. Вырсарникун вырӑн-вырӑнпа ҫумӑр ҫусан та ҫанталӑк ӑшӑ пулмалла. Сывлӑш температури ытларикун кӑштах чакӗ. Ун чухне 23-28 градус ӑшӑ пулӗ.

Ҫурла уйӑхӗн пуҫламӑшӗнче Чӑваш Енре каллех шӑрӑх кунсем тӑрӗҫ. Ку вӑл — синоптиксене ӗненсен. Ҫанталӑк чӑннипех епле пулассине пурӑнсан курӑпӑр.

«Ҫанталӑк 21» порталти сӑн

«Ҫанталӑк 21» сайт пӗлтернӗ тӑрах, ку эрнере ҫанталӑк шӑрӑх пулӗ. Ку эрне тӑршшӗпех термометр 26-31 градус ӑшӑ кӑтартӗ, каҫсерен те сивех пулмӗ: 14-19 градус ӑшӑ тӑрӗ. Юнкун каҫхине тата ҫӗрле ҫумӑр ҫума пултарать, анчах ҫанталӑк сивӗтмӗ, пушшех те — нӳрӗке пула тата пӑчӑлантарӗ. Кӗҫнерникун ҫӗрле те ҫумӑр ҫума пултарать.

Канмалли кунсенче вырӑнӑн-вырӑнӑн аслатиллӗ ҫумӑр ҫӑвӗ. Ун чухне пирӗн республикӑна Вӑтам Азирен тропика сывлӑшӗ килӗ, ҫавна май тӳпе кӑвак мар, сӑрӑрах тӗслӗ пулӗ. Пӗр енчен, ку хӗвеле сывлӑша хӗртме кансӗрлӗ, тепӗр енчен, тропика каҫӗсем пулӗҫ: ҫӗрле те 20 градусран ытларах ӑшӑ тӑрӗ.

Малтанлӑха палӑртнӑ тӑрӑх, чи шӑрӑх кун ҫитес эрнери тунтикуна лекӗ. Кайран вара ҫумӑр ытларах ҫунӑран ҫанталӑк кӑштах уҫӑлтарӗ, анчах пур-пӗрех климат норминчен ӑшӑрах пулӗ.

photoforum.ru сайтри сӑн

Сивӗ, ҫумӑр ҫӑвать. Ҫу варринче чӑн-чӑн кӗрхи ҫанталӑк хуҫаланать! Телее, кӗрхи ҫанталӑк республикӑна нумайлӑха килмен

«Ҫанталӑк 21» сайт пӗлтернӗ тӑрӑх, ҫитес талӑкра ҫумӑр ҫӑвӗ. Ыран вара ирхине уяртӗ, кӑнтӑрла ӑмӑрланӗ, анчах ҫумӑр ҫӑвас хӑрушлӑх пӗчӗк. Ахӑртнех, сунчӑк кирлӗ пулмӗ. Ҫапах ӑшӑрах тӑхӑнӑр – ҫил ҫурҫӗр енчен самай вӑйлӑ вӗрӗ.

Вырсарникун тинех ӑшӑтӗ, термометр 24-29 градус ӑшӑ кӑтартӗ. Ҫитес эрне пуҫламӑшӗнче вара 30 градус ытларах шӑрӑх пулӗ. Ҫил те лӑпланӑ. Ҫавна май хӗвел ҫинче пушшех те шӑрӑх пек туйӑнӗ.

Малтанлӑха пӗлтернӗ тӑрӑх, шӑрӑх ҫанталӑк сахалтан та ҫак уйӑх вӗҫлениччен тӑрӗ.