Ултавҫӑсем ҫын хуйхи ҫинче те пуяҫҫӗ. Шӑпах ҫавӑн пек пулса тухнӑ Комсомольскинче пурӑнакан хӗрарӑмпа.
Унӑн упӑшки ятарлӑ ҫар операцийӗнче хыпарсӑр ҫухалнӑ. Хӗрарӑм унӑн шӑпи пирки пӗлес тесе халӑх тетелӗнчи юмӑҫпа ҫыхӑннӑ. Ростов облаҫӗнчи ултавҫӑ упӑшки пирки пӗлес тесе ятарлӑ йӑла ирттерме шантарнӑ. Куншӑн 200 пин ытла тенкӗ ыйтнӑ.
Анчах ку ултав кӑна пулнӑ. Халӑх тетелӗнчи юмӑҫ укҫа-тенке кӗсйине кӑна чикнӗ.
Каҫал тӑрӑхӗнчи хӗрарӑм ултав серепине лекнине ӑнлансан нарӑс уйӑхӗнче полицие кайса заявлени ҫырнӑ. Йӗрке хуралҫисем Чӑваш Енри хӗрарӑма шӑнман пӑр ҫине лартса янӑ ҫынна хӑвӑртах тупнӑ. Ун тӗлӗшпе пуҫиле ӗҫ пуҫарнӑ.
Ҫапла, шарлаттансем ҫын куҫҫулӗ ҫинче те пуясшӑн. Ҫавӑнпа асӑрханмалла, тӗнче тетелӗнчи пули-пулми ҫынна шанмалла мар.
Шупашкар хулинче пурӑнакан, тивӗҫлӗ канӑва тухнӑ мӑшӑр ултавҫӑсене 13 миллиона яхӑн тенкӗ парса янӑ.
Йӑлтах пӗр шӑнкӑравран пуҫланнӑ. Палламан арҫын ӗҫ стажне ҫирӗплетме, паспорт даннӑйӗсене калама ыйтнӑ. Кун хыҫҫӑн вара мӑшӑр патне палламан ҫынсем шӑнкӑравласа тапӑнма тытӑннӑ: «банк ӗҫченӗ», «ФСБ ӗҫченӗ»… Вӗсем мӑшӑра хӑратса пӗтернӗ: паспорт даннӑйӗсемпе ултавҫӑсем шыравра шутланакан, Украинӑна укҫа куҫарса тӑракан ҫын ҫине доверенноҫ тунӑ-мӗн. Упӑшкипе арӑмӗ хӑраса ӳкнипе палламан ҫынсем мӗн каланине йӑлтах туса пынӑ.
Хӗрарӑм пӗр хушӑ иккӗленме те тытӑннӑ-ха. Анчах лешсем каллех хӑратма пуҫланӑ, Украинӑна укҫа куҫарса тӑратӑр тесе айӑпланӑ. Ҫапла мӑшӑра Хусана кайса укҫа-тенке курьера пама ӳкӗте кӗртнӗ.
Кунпа вӗҫленмен-ха истори. Каярахпа палламан ҫынсем пӗр укҫа ҫинче нацистсен лозунгӗ пулнине ӗнентернӗ, пӗтӗм укҫана памалла тесе хушнӑ. Упӑшкипе арӑмӗ пухнӑ укҫине йӑлтах тыттарса янӑ.
Халӗ курьер кам пулнине палӑртаҫҫӗ. Ку тӗслӗх тӗлӗшпе вара пуҫиле ӗҫ пуҫарнӑ.
Ҫӗнӗ Шупашкарти 66 ҫулти хӗрарӑм, тухтӑр, ултавҫӑсене ӗненсе 6 миллион тенкӗсӗр тӑрса юлнӑ.
Ун патне мессенджерта палламан ҫын шӑнкӑравласа вӗсен ҫуртӗнче домофона улӑштарни пирки пӗлтернӗ. Хӗрарӑм 3 уҫӑ саккас панӑ, смс-ҫырупа килнӗ кода каланӑ. Кун хыҫҫӑн хайхи палламан ҫын, унччен кӑмӑллӑ калаҫнӑскер, ӑна хӑртма тытӑннӑ.
Кайран хӗрарӑм «Госуслуги» порталта унӑн харпӑр кабинетне такам кӗнӗ тесе хыпар илнӗ. Унта телефон номерне кӑтартнӑ, хӗрарӑм унпа шӑнкӑравланӑ. Хальхинче «Роскомнадзор» специалисчӗ калаҫнӑ, кӗҫех унпа «ахаль-махаль мар организацири ҫын» ҫыхӑнассине пӗлтернӗ.
Кун хыҫҫӑн хӗрарӑм «Росфинмониторинг», «ФСБ», ытти «служба» специалисчӗсемпе калаҫнӑ. Вӗсем каланипе 1 миллион ытла тенкӗ чикнӗ хутаҫа вӑл килӗ умӗнче палламан ҫынна тыттарса янӑ.
Ултавҫӑсем кунпа та чарӑнман. Юлнӑ укҫи-тенкине вӗсем Тӗп банка пама ӳкӗте кӗртнӗ. Анчах ку ӗҫпе хӑй пултараймасть тесе доверенноҫ ҫырма хушнӑ. Ҫапла хӗрарӑм нотариус патӗнче ҫак хута туса Хусана кайнӑ, унта документа аферистсен ҫыннине панӑ. Кун хыҫҫӑн ултавҫӑсем ҫак хутпа хӗрарӑмӑн счечӗ ҫинчен 4 миллион та 800 пин тенкӗ илнӗ.
Ҫу уйӑхӗн 14-мӗшӗнче Шупашкарта пурӑнакан 84 ҫулти арҫын патне палламан хӗрарӑм шӑнкӑравланӑ та «вӑрҫӑ ачисене» пӗр хутчен пособи парассине, ӑна илме СНИЛС номерне каламаллине пӗлтернӗ. Ватӑ ҫын ӗненнӗ.
Темиҫе кунран ун патне «ФСБ ӗҫченӗ» шӑнкӑравланӑ. Хайхискер СНИЛС номерӗпе ултавҫӑсем усӑ курнине каланӑ. Ҫавна май ӑна мӗнпур укҫине «деклараци тумаллине» пӗлтернӗ.
Ватӑ арҫын пӗтӗм укҫине – 1,7 миллон тенке, «налук службинчи курьера» тыттарса янӑ. Ун хыҫҫӑнах шӑнкӑравланӑ палламан ҫынпа ҫыхӑнма тӑрӑшнӑ – усси пулман. Ҫавӑн чухне тин вӑл хӑйне улталанине ӑнланнӑ.
Шупашкарта 17-ри хӗр ултавҫӑсен серепине лекнӗ: вӑл ашшӗ-амӑшӗн сейфне парса янӑ.
Сейфра вара аслашшӗпе асламӑшӗн (е кукашшӗпе кукамӑшӗн) венчет ҫӗррисем тата хваттер докуменчӗсем пулнӑ. Хӗрне улталанине ашшӗ сейфа документсем хума тытӑнсан кӑна пӗлнӗ. Сейф вырӑнта пулман. Ҫавӑн чухне тин хӗрӗ мӗн пулса иртнине каласа кӑтартнӑ.
Ака уйӑхӗн вӗҫӗнче ун патне палламан хӗрарӑм шӑнкӑравланӑ. Пульница ӗҫченӗ-мӗн. Медтӗрӗслев тухмалла тесе анкета даннӑйӗсене ыйтнӑ. Кун хыҫҫӑн хӗр патне «росфинмониторингран», «банкран», «вӑй ведомствисенчен» шӑнкӑравласа даннӑйсене террористсене панӑ тесе хӑратма пуҫланӑ.
Ҫемье килте укҫа упраман, хӗрӗн хӑйӗн те укҫа пулман, ҫавӑнпа ултавҫӑсем ӑна ашшӗ-амӑшӗн сейфне илсе курьера парса яма ӳкӗте кӗртнӗ.
Кун тӗлӗшпе пуҫиле ӗҫ пуҫарнӑ.
Шупашкарта 18 ҫулти студент ултавҫӑсене 6 миллион тенкӗ куҫарса панӑ. Ҫапла вӗҫленнӗ «ФСБ спецоперацине» хутшӑнни. Ултав серепине лекни пирки вӑл пӗр уйӑхран кӑна, асламӑшне (е кукамӑшне) каласа кӑтартнӑ хыҫҫӑн, пӗлнӗ.
Малтан ун патне «патшалӑх органӗн ӗҫченӗ» шӑнкӑравланӑ та СНИЛС номерӗсене тата электрон почтӑна калама ыйтнӑ. Социаллӑ тӳлев параҫҫӗ-мӗн. Унтан «ФСБ ӗҫченӗ», «банк ӗҫченӗ» шӑнкӑравланӑ. Вӗсем студента Украинӑна укҫа куҫаратӑн тесе хӑратса пӗтернӗ, кун пирки никама та калама хушман.
Палламан ҫынсем каланипе студент пухнӑ укҫине илсе «хӑрушсӑр счет» ҫине банкомат урлӑ куҫарнӑ. Вӑл «ФСБ спецоперацине хутшӑннине ӗненнӗ. Кайран вӑл Хусана кайса асламӑшӗн (е кукамӑшӗн) укҫине илсе хура тум тӑхӑннӑ «инкассатора» парса янӑ.
Ку тӗслӗх тӗлӗшпе пуҫиле ӗҫ пуҫарнӑ.
Шупашкарта пурӑнакан, республикӑри пысӑк производство комплексӗсенчен пӗринче инженерта ӗҫлекен 62 ҫулти хӗрарӑм Федерацин хӑрушсӑрлӑх службин ӗҫченӗсене пулӑшас тесе улталаннӑ. Тӗрӗссипе, унтисене хайхи пулӑшӑвӗ кирлӗ пулман. Хӗрарӑма ултавҫӑсем ҫавӑн пек ӗнентернӗ.
Пӗр уйӑха яхӑн маларах ун патне Пенси фондне ӗҫ кӗнекипе пымалла тесе шӑнкӑравланӑ, унччен вара электрон черете ҫырӑнмалла, ун валли СМС-ҫырури кода каламалла тенӗ.
Шӑнкӑравлакан хӗрарӑм инженерӑн СНИЛС номерне те каланӑ.
Кайран ФХС ӗҫченӗ текен арҫын шӑнкӑравланӑ, ултавҫӑсене тытса чарма пулӑшма ыйтнӑ. Вара вӑл хайхисем мӗн каланине итленӗ: банкран 1 миллион тенкӗ илнӗ, вӑл укҫана хваттер туянакан тусне вӑхӑтлӑха паратӑп тесе хӑйӗн хӗрне те, банк ӗҫченӗсене те ӗнентернӗ. Укҫана банкомат урлӑ такамсене куҫарса панӑ.
Шупашкарта 43 ҫулти хӗрарӑм хваттер туянмалли укҫана ултавҫӑсене куҫарса панӑ. Пӗтӗмпе – 6 миллион ытла тенкӗ.
Полицире акӑ мӗн каласа кӑтартнӑ вӑл. Ултавҫӑсем ун патне пӗр уйӑха яхӑн шӑнкӑравланӑ. Темӗн тӗрлӗ те суйнӑ: «Госуслуги» портал ӗҫченӗ тесе те, йӗрке хуралҫисем тесе те. Хӗрарӑма унӑн харпӑр кабинетне такамсем кӗнӗ тесе ӗнентернӗ, пуҫиле майпа явап тыттарассипе хӑратса пӗтернӗ. Хваттер илмешкӗн пухнӑ укҫине «хӑрушсӑр счет» ҫине куҫарма ӳкӗте кӗртнӗ.
Ӑна банк ӗҫченӗсем те, полицейскисем те чарма хӑтланнӑ. Йӗрке хуралҫисем тӑванӗсем патне те шӑнкӑравланӑ, ултавҫӑсем мӗнле схемӑпа ӗҫленине ӑнлантарнӑ. Анчах хӗрарӑм пур-пӗрех 6 миллион та 150 пин тенкӗ куҫарса панӑ.
Ку тӗслӗх тӗлӗшпе пуҫиле ӗҫ пуҫарнӑ.
40 ҫулти хӗрарӑм Аслӑ Британири арҫын вилмелле чирлӗ тесе ӗненнӗ те укҫасӑр тӑрса юлнӑ. Ҫапла вӑл ӑна 800 пин тенкӗ ытла куҫарса панӑ.
Ку Красноармейски округӗнчи хӗрарӑмпа пулса иртнӗ. Вӑл сусӑр ача ӳстерет, тӗрлӗ ыркӑмӑллӑх чатӗсенче тӑрать. Вӗсенчен пӗринче ун патне хӑйӗнпе «ют ҫӗршыв арҫынни» тесе паллаштарнӑ ҫын ҫырнӑ. Вӑл чирлӗ имӗш, виличчен сусӑр ачасене 2,5 млн доллар парса хӑварасшӑн, укҫана посылкӑпа янине пӗлтернӗ. Хайхи арҫын укҫан /5 пайне хӗрарӑма хӑйӗн валли хӑварма ирӗк панӑ.
Анчах хӗрарамӑн таможньӑшӑн, ытти тӑкакшӑн кӑна тӳлемелле имӗш. Ҫапла вӑл хӑй пухса пынӑ 820 ытла пин тенкине куҫарса панӑ.
30 ҫулти хӗрарӑм ултавҫӑсене 11 млн тенкӗ куҫарса панӑ. Хӑй вӑл – Пермь крайӗнчен, амӑшӗ патне хӑнана килнӗ. Хӑйне улталанине хайхискер тӳрех ӑнланман, амӑшӗ ҫине тӑнипе кӑна Куславккари полици уйрӑмне кайса пулӑшу ыйтнӑ.
Ҫак хӗрарӑм мессенджерта «ФСБ ӗҫченӗсемпе» калаҫнӑ, лешсем ӑна явап тыттарассипе хӑратса пӗтернӗ, укҫана «хӑрушсӑр счет» ҫине куҫарма хушнӑ. Хӗрарӑм вӗсене итлесе 3 млн тенкӗ куҫарнӑ, тепӗр 8 млн тенкине вара Пермь хулинчи скверта палламан ҫынна хӑй тыттарса янӑ.
Ку пуш уйӑхӗн варринче пулса иртнӗ. Ҫавӑнтанпа хӗрарӑм укҫа-тенке тавӑрса парасса шанса пурӑннӑ. Чӑваш Ене килсен амӑшӗ кӑна ӑна полицие кайма ӳкӗте кӗртнӗ.
+12.3 °C