Чӑваш Енри тухтӑр тата медицина блогерӗ Ксения Георгиева Пӗтӗм Раҫҫейри «Профилактика ҫути» конкурсра ҫӗнтернӗ. Унӑн «Ксения Георгиева тухтӑрпа сывӑ пул» проекчӗ «Профилактика тата сывӑ пурнӑҫ йӗрки пирки чи лайӑх тухтӑр блогӗ» номинацире ҫӗнтернӗ.
Палӑртса хӑварар: Ксения Георгиевӑн кӗске видороликӗсем ЧР Сывлӑх сыхлавӗн министерствин официаллӑ сообществинче VK-клипсенче тухаҫҫӗ. Унӑн роликӗсене нумай ҫын пӑхать.
Ксенийӑна ҫитӗнӳ тунӑ ятпа ЧР сывлӑх сыхлавӗн министрӗ Лариса Тарасова саламланӑ. Ҫӗнтерӳҫӗсене ака уйӑхӗн 20-мӗшӗнче Мускавра чыслӗҫ. Унта ун чухне «Ҫын тата эмел» Раҫҫей наци конгресӗ иртӗ.
Шупашкарти Куҫ микрохирургийӗн тухтӑрӗсем арҫын куҫӗнчен 20 сантиметр тӑршшӗ чӗрӗ хурт кӑларнӑ.
Вӗсенчен Чӗмпӗр облаҫӗнчи арҫын пулӑшу ыйтнӑ. Ӑна куҫ хупанки ҫинчи «мӑкӑль» канӑҫсӑрлантарнӑ. Тӗрӗслесен тухтӑрсем шалча пӑрҫи пысӑкӑш япала асӑрханӑ. Вӑл ыратманни шурӑ халатлисене пушшех те сисчӗвлентернӗ. Ҫав вырӑна шӑтарсан жгут евӗр япала курӑннӑ. Офтальмолог гельминта сиенлетесрен (ӑна пула аллерги пуҫӑнма пултарать) ӑна пинцетпа тытса кӑларнӑ. Куҫран кӑларнӑ хурт чӗрӗ пулнӑ, авкаланнӑ.
Пациент аса илсе ҫапла каласа кӑтартнӑ: ҫулла ҫурт тӑрринче ӗҫленӗ чухне ӑна вӑрӑм туна куҫран ҫыртнӑ. Кайран ҫав вырӑнта пӑнчӑ тухнӑ, вӑл ыратман, анчах ӳссе пынӑ.
Куҫ микрохирургийӗн тухтӑрӗсем кун пек тӗслӗхпе иккӗмӗш хут тӗл пулнӑ. Сиплемесен паразит ытти тӗртӗмпе органа куҫма пултарать.
Чӑваш Енри тухтӑрсем кӑвапа грыжипе тата ҫурӑлса кайнӑ аппендикспа асапланнӑ хӗрарӑма ҫӑлса хӑварнӑ.
Шупашкар районӗнчи больницине медицинӑра сайра тӗл пулакан йывӑр лару-тӑру пулса иртнӗ. Хирургсен пӗр вӑхӑтрах икӗ хӑрушӑ чирпе — хӗсӗннӗ кӑвапапа тата ҫурӑлса кайнӑ аппендицитпа — кӗрешме тивнӗ.
69 ҫулти хӗрарӑм больницӑна хырӑмӗ питӗ ыратнипе, ӑш пӑтраннипе тата вӑйӗ чакса кайнӑран лекнӗ. Ҫакӑ ӑна темиҫе кун асаплантарнӑ. Тухтӑрсем тӳрех васкавлӑн операци тума йышӑннӑ.
Операци вӑхӑтӗнче кӑвапа ҫинҫе пыршӑна хӗсӗнсе ларни палӑрнӑ. Телее, ӑна ҫӑлса хӑварма май килнӗ — пырша пайӗсем чӗрӗ юлнӑ. Анчах чи хӑруши аппендикс пулнӑ: гангрена пуҫланнӑ пирки вӑл татӑлнӑ, ҫакӑ вара перитонит патне ҫитернӗ.
Хирургсем аппендикса касса кӑларнӑ та хырӑм ӑшне тасатнӑ. Операци хыҫҫӑн хӗрарӑмӑн сывлӑхӗ хавшакран ӳпки шыҫнӑ, ҫавӑнпа ӑна реанимацие куҫарнӑ. Пилӗк кунран чирлӗ ҫын хӑйне лайӑхрах туйма пуҫланӑ, 40 кун сипленнӗ хыҫҫӑн ӑна киле кӑларнӑ.
Шупашкарти тухтӑрсем уксус ӗҫнӗ хӗрарӑма ҫӑлса хӑварнӑ. 70 ҫулти ватӑ уксуса ӑнсӑртран ӗҫнӗ имӗш. Тухтӑрсене вӑл ҫапла ӗнентернӗ.
Хӗрарӑм 70 процентлӑ уксуса пӗр апат кашӑкӗ ӗҫнӗ-мӗн. Телеграмри «Пуринчен малтан» каналта пӗлтеонӗ тӑрӑх, хӗрарӑм чутах вилмен: унӑн ҫӑварӗ, апат ҫулӗ пиҫсе кайнӑ. Васкавлӑ медицина пулӑшӑвӗ паракан тухтӑрсем хӗрарӑмӑн хырӑмлӑхне тасатса, интенсивлӑ инфузиллӗ терапи туса ирттернӗ.
Шурӑ халатлисем ҫине тӑни сая кайман: уксус ӗҫсе шар курнӑ хӗрарӑмӑн пурнӑҫне ҫӑлса хӑварма рултарнӑ. Малашне унӑн питӗ тимлӗ пулмалла: пули-пулми шӗвеке ӗҫмелле мар, кашни япалана хӑй вырӑнне тӗплӗн лартса упраиалла. Сывлӑхран пахи ним те ҫук – темле ӗҫес килсен те пули-пулми шӗвеке ӑша ямалла мар.
Шупашкарти тухтӑрсем ӑнсӑртран уксус ӗҫнӗ 70 ҫулти хӗрарӑмӑн пурнӑҫне ҫӑлнӑ. Ӑна пӗр тӑхтамасӑр Шупашкарти Васкавлӑ медпулӑшу пульницине илсе ҫитернӗ.
Хӗрарӑмӑн сывлӑхӗ йывӑр пулнӑ: ҫӑварӗ, апат ҫулӗ пиҫсе кайнӑ. Ҫакӑ йӑлтах – пӗр апат кашӑкӗ 70 процентлӑ уксус ӗҫнӗшӗн. Ку ӑнсӑртран пулса иртнӗ, хӗрарӑм каланӑ тӑрӑх, вӑл ӑна пӗлмесӗр ӗҫнӗ.
Тухтӑрсем пӗр тӑхтамасӑр пациентӑн пурнӑҫӗшӗн кӗрешме тытӑннӑ: хырӑмлӑхне тасатнӑ, интенсивлӑ инфузиллӗ терапи тунӑ. Кун хыҫҫӑн хӗрарӑмӑн сывлӑхӗ палӑрмаллах лайӑхланнӑ.
Шупашкарти тухтӑрсем пӗр ҫул аш-какай, пулӑ ҫимесӗр пурӑннӑ 24 ҫулти каччӑна ҫӑлнӑ.
Унӑн сывлӑхӗ чӑннипех те хӑрушлӑхра пулнӑ. Каччӑ питӗ вӑйлӑ начарлансан, вӑйсӑрлансан, япӑх ҫывӑрма тытӑнсан тӑванӗсем васкавлӑ медпулӑшу чӗннӗ. Пульницӑра анализ илнӗ те гемоглобин шайӗ икӗ хут пӗчӗк пулни палӑрнӑ. Ҫакна пула органсене кислород япӑх ҫитет, чӗре те хӑрушлӑхра. Каччӑ пӗр ҫул пахча-ҫимӗҫпе кӑна пурӑннӑ иккен.
Тухтӑрсем каччӑна рациона белоклӑ апат-ҫимӗҫ кӗртме сӗннӗ.
Нарӑс уйӑхӗн 15-мӗшӗнче каҫхине Кӳкеҫре васкавлӑ пулӑшу машини юр ӑшне путса ларнӑ. Ӑна ҫынсем тӗксе кӑларнӑ. Пӑтӑрмах Первомайски урамӗнчи 20-меш ҫуртӑн 1-мӗш корпусӗ патӗнче пулса иртнӗ.
Ҫула япӑх тасатнӑран васкавлӑ пулӑшу машини те юр ӑшне путса ларать тесе вырӑнти хастарсем Кӳкеҫӗн официаллӑ ушкӑнӗнче каласа кӑтартас тенӗ, анчах вырӑнти тӳре-шара хистенипе видеона кӑларса ҫапнӑ иккен, видео авторне вара хура списока кӗртсе хунӑ.
Шупашкарта пурӑнакан 36 ҫулти арҫын пӗр кун ирхине пысӑк температурӑпа тата ӳслӗкпе вӑранса кайнӑ. Хайхисен килӗнче антибиотик пулнӑ, унпа вӑл мӑшӑрне укол туса яма ыйтнӑ. Хӗрарӑм хирӗҫлемен.
Унччен те пулман — арҫын ӳчӗ ҫине шатра тапса тухнӑ, тути шыҫса ларнӑ, сывлӑш пулӗнме пуҫланӑ.
Вырӑна пырса ҫитнӗ васкавлӑ пулӑшу тухтӑрӗсем ку япала анафилактика шокӗ пулнине палӑртнӑ. Арҫын тӑнне ҫухатса ӗлкӗреймен, юн пусӑмӗ вара унӑн чакса кайнӑ. Арҫынна тухтӑрсем Шупашкарти тӗп пульницӑн реанимаци уйрӑмне илсе ҫитернӗ. Унта ӑна ҫӑлса хӑварма май килнӗ.
Чӑваш Енре пурӑнакансем больница хутне МАХ мессенджер урлӑ та хуптарма пултараҫҫӗ.
Тухтӑр патӗнче йышӑнура пӗрремӗш хут пулнӑ хыҫҫӑн врач телемедицина консультацине ирттерме палӑртма пултарать. Ятарлӑ чат-ботра палӑртнӑ вӑхӑтра ҫыхӑнма пулать.
Онлайн-консультацие палӑртнӑ хыҫҫӑн тухтӑрпа https://max.ru/tmkchuv_bot бот урлӑ ҫыхӑнмалла.
Шупашкарта 35 ҫулти арҫын ҫухалнӑ. Вӑл ӑҫтине нарӑс уйӑхӗн 11-мӗшӗнченпе пӗлмеҫҫӗ.
«Лиза Алерт» шыравпа ҫӑлав отрячӗ Константин Ярисова шырать. Константин Андреевич 176 см ҫуллӗш, вӑтам пӳ-силлӗ, ҫырӑ ҫӳҫлӗ, куҫӗ симӗс. Хӑй хура курткӑпа, тӗксӗм кӑвак джинс шӑлаварпа, хура кроссовкипе, хура рюкзакпа, хура кепкӑпа, пулнӑ.
+19.5 °C