Ҫак кунсенче М-12 тӳлевлӗ ҫул ҫинче строительсем Атӑл урлӑ хывнӑ кӗпер ҫинче асфальт сарса пӗтернӗ. Вӑл - ҫак ҫул ҫинчи чи вӑрӑм кӗпер: 3362 метр тӑршшӗ, 25 метр сарлакӑш.
Халӗ унта тимӗр картасем вырнаҫтараҫҫӗ. Кайран кӗпер ҫинче ҫутӑ тӑвӗҫ.
Палӑртмалла: ҫак кӗпере 2021 ҫулхи чӳк уйӑхӗнче тума пуҫланӑ. Ӑна ҫывӑх вӑхӑтра, раштав уйӑхӗн 19-мӗшӗнче, уҫасшӑн. Ҫавӑн чухнех машинӑсем Мускавран Хусана ҫӳреме тытӑнӗҫ. Хальхи вӑхӑтра ҫул Мускавран пуҫласа Арзамас таран уҫӑ.
Комсомольски районӗнчи Урмаелте пурӑнакан Ильгиз Пахалов шкул ачисем валли авӑнӑн 1-мӗшӗ тӗлне чӑн-чӑн парне тунӑ. Вӑл юханшыв урлӑ кӗпер хывнӑ. Ҫапла ачасем малашне шкула кӗске ҫулпа ҫӳреме пултараҫҫӗ. Унччен шӑпӑрлансем шкула тавран кайнӑ, темиҫе ҫухрӑм парӑнтарнӑ.
Кӗпер Ҫырма тата Сенгерей урамӗсене ҫыхӑнтарать. Ильгиз Пахалов кӗпере хӑйӗн укҫипе тунӑ. Ку ӗҫе Урмаел ял тӑрӑхӗн пуҫлӑхӗ Айрат Ямалетдинов пуҫарӑвӗпе пурнӑҫланӑ.
Тӑвай районӗнчи Лачкасси ялӗнче Тӑрмӑш юханшыв урлӑ каҫмалли кӗпер питӗ япӑх лару-тӑрура. Кун пирки район пуҫлӑхӗ Владимир Михайлов хӑй пӗлтернӗ.
Вӑл каланӑ тӑрӑх, администраци дефектлӑ ведомоҫ хатӗрлет. Тӳре-шара Чӑвашупрдор ӗҫченӗсемпе пӗрле кӗпере пӑхса ҫаврӑннӑ, проекта хатӗрленӗ хыҫҫӑн ӗҫ планне кӗртме шантарнӑ.
Кӗперӗ вара халӑха питӗ кирлӗ. Вӑл яла кӗнӗ ҫӗрте вырнаҫнӑ. Ун урлӑ машинӑсем те ҫӳреҫҫӗ.
Патӑрьел районӗнчи Еншик тата Тикеш ялӗсене ҫыхӑнтаракан кӗпер ҫӗмӗрӗлнӗ. Халӗ прокуратура унта тӗрӗслев ирттерет. Вырӑнти ҫынсем каланӑ тӑрӑх, вӑл ялтан яла ҫӳремелли чи кӗске ҫул шутланать. Ун урлӑ каҫсан 1 ҫухрӑм кӑна утмалла. Тавран вара 8,5 тата 12 ҫухрӑм каймалла.
Пӑла урлӑ хывнӑ ҫав кӗпер кивелнӗ пулин те унпа тата темиҫе ҫул йӗркеллех ҫӳреме пултарнӑ ҫынсем. Анчах такамсем ӑна ҫӗмӗрнӗ, унтан халӗ кайма ҫук.
Район администрацийӗ ку кӗпер вӗсен балансӗ ҫинче пулманнине каланӑ, ӑна пуҫаруллӑ хысна программипе кӑна ҫӗнетме май пуррине пӗлтернӗ.
Прокуратура тӗрӗслев ирттернӗ хыҫҫӑн йышӑну тӑвӗҫ.
Патӑрьел районӗнчи Ҫӑл Атӑк ялӗнче кӗпер ишӗлме пуҫланӑ. Тӳре-шара кун пирки 2 ҫул каяллах пӗлнӗ, анчах пӑр вырӑнтан хускалман.
Ҫынсем кӗпер пирки халӑх тетелне ҫырса хунӑ. Кун хыҫҫӑн ӗҫ кӑштах хускалнӑ - тӳре-шара вырӑна ҫитнӗ. Ҫул-йӗр ӗҫченӗсем те, ПАИ инспекторӗсем те пулнӑ. Вӗсем ҫулӑн пӗр пайне пӳлме, бетон блок хума йышӑннӑ. Тунтикун татах килме шантарнӑ.
Канаш районӗнчи Мӑкӑр кӗперне ЕРРНа федераци пӗлтерӗшлӗ культура еткерлӗхӗ пек кӗртнӗ.
Палӑртмалла: кӗпере 1916 ҫулта тунӑ. Унпа чукун ҫул пек усӑ курнӑ. Анчах 1986 ҫулта вӑл ӗҫлеме пӑрахнӑ. Кӗпер хӑйне евӗрлӗхӗпе, аркӑсен ҫӳллӗшӗпе палӑрса тӑрать.
Хальхи вӑхӑтра Мӑкӑр кӗперӗ туристсене илӗртет.
Шупашкарти Гагарин кӗперӗ, чи аялти пайӗ, арканма пуҫланӑ. Тӳре-шара вырӑна ҫитсе тӗрӗсленӗ.
Кӗпере тӗплӗн тӗрӗслеме палӑртнӑ. ЖКХ тата хула хӑтлӑхӗ тӗлӗшпе ӗҫлекен управлени директорӗ пӗлтернӗ тӑрӑх, ӑна ҫитес эрнере кӑна юсама пуҫлӗҫ.
Хула администрацийӗн пуҫлӑхӗ Денис Спирин каланӑ тӑрӑх, малтан Октябрь кӗперне юсама плана кӗртнӗ пулнӑ. Ун хыҫҫӑн кӑна – Гагарин кӗперне. Анчах 2025 ҫулти планра та Гагарин кӗперӗ ҫук.
Ейӳ вӑхӑтӗнче Элӗк районӗнчи Чӑваш Сурӑм ялӗнче пӗртен-пӗр кӗпер арканнӑ.
Ҫавна май ҫынсем ял масарӗ ҫине каяймаҫҫӗ, Янӑш ялне ҫитсе килеймеҫҫӗ, "Новый путь" ЯХПК уй-хирне каҫаймаҫҫӗ. Ӗнер ялти хастарсем арканнӑ кӗпер патне ҫитсе курнӑ. "Республикӑра ку инкек пирки илтмен ахӑртнех. Халӑх пулӑшасса кӗтет", - тенӗ хастарсем.
Красноармейски районӗнче Шетмӗ юханшывӗ урлӑ хывнӑ кӗпере юсама пуҫланӑ. Кун пирки ЧР Транспорт министерстви пӗлтерет.
Юсав ӗҫӗсем икӗ тапхӑрпа иртӗҫ. Пӗрремӗшӗ 2023 ҫулӑн иккӗмӗш ҫурринче пулӗ. Иккӗмӗш пайне 2024 ҫулхи авӑн уйӑхӗччен пурнӑҫлӗҫ.
Иртнӗ эрнере подрядчик бетон блоксем вырнаҫтарнӑ, кӗпере сӳтме пуҫланӑ, вӑхӑтлӑх ҫул-йӗр паллисене лартнӑ. Халӗ кӗпер ҫинче машинӑсене пӗр енпе кӑна яраҫҫӗ.
Республикӑра М-12 федераци ҫулӗн пӗр пайне тӑвас ӗҫ пырать. Строительсем кӗҫех Сӑр юханшывӗ урлӑ каҫмалли кӗпере туса пӗтерӗҫ.
Вӑл Ҫӗмӗрле хулинчен 20 ҫухрӑмра вырнаҫнӑ. ЧР Транспорт министерстви пӗлтернӗ тӑрӑх, пӗр ҫыранӗ тепринчен 30 метр ҫӳллӗрех. Строительсем вӗсене пӗрлештерӗҫ.
Ҫак кӗпере кӑҫал ҫулталӑк вӗҫӗнче уҫма палӑртнӑ.
+12.3 °C