Ҫурла уйӑхӗ вӗҫлениччен Хусанпа Мускав хушшинче хушма пуйӑс ҫӳрӗ. Ку йӑлтах - ҫулҫӳревҫӗсемшӗн меллӗ пултӑр тесе.

Ҫул ҫинче вӑл Владимир, Дзержинск, Чулхула, Канаш хулисенче, Вӑрмар поселокӗнче тата Симӗс Долта чарӑнӗ.

Пуйӑс Мускаври Ярославль вокзалӗнчен утӑ уйӑхӗн 25, 28-мӗшӗсенче, ҫурла уйӑхӗн 1, 4, 8, 11, 15, 18, 22, 25, 29-мӗшӗсенче 21 сехет 15 минутра тапранса кайӗ. Хусана тепӗр кун 12 сехет те 54 минутра ҫитӗ.

cap.ru сӑнӳкерчӗкӗ

Пӗтӗм Раҫҫейри "Шкул умӗнхи чи лайӑх вӗренӳ организацийӗ" конкурса пӗтӗмлетнӗ. Вӑл Питӗр хулинче иртнӗ.

Конкурсра Шупашкарти ача пахчисем те малти вырӑнсене йышӑннине палӑртма кӑмӑллӑ. Тӗп хулари 11-мӗш, 15-мӗш, 19-мӗш, 162-мӗш, 182-мӗш ача пахчисем чи лайӑххисен йышне кӗрсе диплома тата медале тивӗҫнӗ.

Чӑваш Енре федерацин Атӑлҫи тата Урал округӗсен представителӗсем патриотизм фестивальне пуҫтарӑнӗҫ. Вӑл утӑ уйӑхӗн 14-мӗшӗнчен пуҫӑнса утӑ уйӑхӗн 17-мӗшӗччен пырӗ. Мероприятире общество организацийӗсен хастарӗсем, «Твой Герой» (чӑв. Санӑн паттӑру) проект пайташӗсем тата ытти сумлӑ ҫын хутшӑнӗ.

Форум онлайн тата офлайн меслетпе иртӗ. Унта регионсенчи влаҫ органӗсенче тӑрӑшакансем, хастар общественниксем, ҫамрӑксемпе патриотизм воспитанийӗ енӗпе тӑрӑшакансем пурӗ 700-е яхӑн ҫын хутшӑнмалла.

Пирӗн республикӑра иртекен форум Мускавра утӑ уйӑхӗн 12-мӗшӗсенче Раҫҫей шайӗнче йӗркеленӗ «Твой Герой» патриотизм форумӗн тӑсӑмӗ пулӗ.

rosdrevo.ru сӑнӳкерчӗкӗ

Муркаш районӗнчи Ильинкӑри ватӑ юманшӑн сасӑлама Чӑваш халӑх сайчӗ унччен чӗнсе каланӑччӗ-ха.

Аса илтерер: 372 ҫул кашласа ларакан чӑваш юманӗ «Раҫҫейри ҫулталӑк йывӑҫҫи» конкурса (ӑна 2017 ҫулта ирттерме тытӑннӑ) хутшӑнать. 2020 ҫулта вӑл иккӗмӗш вырӑн йышӑннӑ.

Ҫав йывӑҫ ҫутҫанталӑкӑн хаклӑ объекчӗ шутланать, вӑл культурӑпа истори тата ӑслӑлӑх пӗлтерӗшӗллӗ.

Асӑннӑ йывӑҫа Раҫҫейри ватӑ йывӑҫсен наци реестрне кӗртнӗ, «Йывӑҫ – чӗрӗ ҫутҫанталӑкӑн палӑкӗ» пӗтӗм ҫӗршыври ят панӑ.

Конкурс https://rosdrevo.ru сайтра пырать. Чӑваш юманӗн конкурсри номерӗ — 42-мӗш.

Валерия Чумакова страницинчен илнӗ сӑнӳкерчӗк

Утӑ уйӑхӗн 7-8-мӗшӗсенче Чӑваш Енре «Атӑлҫи тӑрӑхӗнчи ӑнӑҫлӑ ҫемье» конкурс иртрӗ. Пирӗн пата Атӑлҫи федераци округӗнчи регионсенчи чи-чи маттур ҫемьсенчен пӗрисем килсе ҫитрӗҫ.

Конкурсра Тутарстанри Камашевсем ҫӗнтернӗ. Ҫемьере 9 ача ӳсет.

Чӑваш Ен чысне Сӗнтӗрвӑрри районӗнчи Никитинсем-Чучаковсем хӳтӗлерӗҫ. Ҫамрӑк ҫемьене «Атӑлҫи тӑрӑхӗнчи чи туслӑ ҫемье» номинацире чысланӑ. Талпӑнуллӑ Никитинсем-Чучаковсем ӳлӗмрен конкурса тата та хутшӑнасшӑн. Хальхине вӗсем паха опыт пулчӗ тесе хакланӑ.

trn-news.ru сӑнӳкерчӗкӗ

Раҫҫейре Краснодарти аэропорта уҫас ыйтӑва сӳтсе яваҫҫӗ. Авиагавань самолётсене ҫулталӑк ытла ӗнтӗ йышӑнмасть. Ҫакӑн пек йышӑнӑва ятарлӑ ҫар операцийӗ пуҫӑнсан тунӑччӗ.

Краснодар аэропорчӗ ӗҫлеменрен ҫынсен пуйӑспа, «Дон» М-4» автоҫулпа кайма е урӑх хуласем урлӑ вӗҫме тивет.

Сочинчи аэропорт авиапассажирсене виҫерен 4 хут ытларах йышӑннӑ.

Экспертсем шухӑшланӑ тӑрӑх, Краснодар аэропортне хупӑ тытма кирлех те мар. Ҫитменнине унта самолётсем вӗҫме тытӑнасса миллионшар ҫын кӗтет.

"Песни от всей души" кӑларӑмӑн видео скринӗ

Чӑваш халӑх артистки Елена Иовлева паян тин кӑна "Россия 1" телеканалпа эфира тухнӑ "Песни от всей души" кӑларӑмра пулнӑ. Ӑна Андрей Малахов ертсе пырать.

Вӑл "Финн полькине" чӑвашла куҫарнӑ, ӑна эфирта куракансен умӗнче юрланӑ. Ҫавӑн пекех Елена Иовлева ташласа та кӑтартнӑ. Вӑл куракансене хӑйӗн пурнӑҫӗпе кӗскен паллаштарнӑ.

Ҫӑлкуҫ: cap.ru

Запорожье облаҫӗнчи Бердянск тӑрӑхӗнчи ачасем пултаруллӑ ачасемпе ҫамрӑксен «Эткер» центрӗнче пулнӑ.

Асӑннӑ тӑрӑхри ачасем валли «Чи хастар ҫулҫӳревҫӗ» проекта пурнӑҫа кӗртеҫҫӗ. Унпа килӗшӳллӗн ҫамрӑк хӑнасем «Бригантина» сывлӑхпа вӗрентӳ лагерӗнче канаҫҫӗ, Чӑваш Енпе, пирӗн регионӑн культурипе тата историйӗпе паллашаҫҫӗ.

«Эткер» центрта ачасем унти тӗрлӗ лабораторипе (хими, биологи, мобильлӗ тата промышленность робот техникин), унти хальхи вӑхӑтри оборудованипе паллашнӑ, центрта ӗҫлекен ӑсталӑх лаҫҫисем ҫинчен пӗлнӗ.

Ачасем астрономи тата космос тытӑмӗсен, гидропоника пӳлӗмӗпе уйрӑмах кӑсӑкланса паллашнӑ.

Ыран, ҫӗртме уйӑхӗн 22-мӗшӗнче, 12 сехет те 15 минутра (Мускав вӑхӑчӗпе) Раҫҫейре Тӑван ҫӗршывӑн Аслӑ вӑрҫинче вилнисене шӑп тӑрса асӑнӗҫ. Вӑрҫӑра 27 миллион салтак пуҫ хунӑ.

Ҫав вӑхӑтра, ЧР Ӗҫлевпе социаллӑ хӳтлӗх министерстви пӗлтернӗ тӑрӑх, Раҫҫейӗпех телекурав, радио шӑпланӗ, суту-илӳ центрӗсенче кассӑсем ӗҫлеме пӑрахӗҫ, общество транспорчӗ чарӑнӗ. Предприятисенче те ӗҫ чарӑнса ларӗ.

РФ Ӗҫлев министерстви 2024 ҫулта мӗнле кантарасси пирки йышӑну проектне хатӗрленӗ.

Ҫӗнӗ ҫулти каникул раштавӑн 30-мӗшӗнче пуҫланса карлачӑн 8-мӗшӗнче вӗҫленӗ. Нарӑсӑн 23-мӗшӗ – эрнекун, ҫапла 3 кун канӑпӑр. Пушӑн 8-мӗшӗ те эрнекуна лекет, 3 кун ӗҫлеме тивмӗ.

Ака уйӑхӗнче юлашки эрне 6 ӗҫ кунӗллӗ пулӗ. Ҫапла ҫу уйӑхӗн 1-мӗшӗнчи уявра 4 кун кантарӗҫ. Ҫӗнтерӳ кунӗнче 4 кун ӗҫлемелле мар.

Ҫӗртмен 12-мӗшӗ – юнкун, 1 кун канмалла. 6 ӗҫ кунӗллӗ эрне чӳк пуҫламӑшӗнче пулӗ. Чӳкӗн 3-4-мӗшӗсем – кану кунӗсем.

Раштав уйӑхӗнче 29-31-мӗшӗсенче канӑпӑр.