www.cap.ru сайтран илне сӑнӳкерчӗк

Чӑваш Ен Элтеперӗ Олег Николаев искусствӑллӑ интеллектпа ҫыхӑннӑ конференцие хутшӑннӑ.

Вуннӑмӗш, юбилейлӑ, конференци Мускавра иртнӗ. «AI Journey 2025» (чӑв. Искусствӑллӑ интеллекчӗ тӗнчинчи ҫулҫӳрев) конференцие Раҫҫейӗн Перекет банкӗ искусствӑллӑ интеллект сфери енӗпе ӗҫлекен пӗтӗм тӗнчери альянспа (AI Alliance Network) пӗрле йӗркеленӗ. Форума хутшӑнакансене Владимир Путин Президент саламланӑ.

Мероприятие Раҫҫейри, Китайри, Индинчи тата ытти ҫӗршыври экспертсем хутшӑннӑ.

forum.na-svyazi.ru сӑнӳкерчӗкӗ

Лапсарти А.И. Тихонов олимп чемпионӗн ячӗллӗ спорт шкулӗнче Валерий Львов боксёра асра тытса асӑну хӑми уҫнӑ. Ӑна чӳк уйӑхӗн 14-мӗшӗнче вырнаҫтарнӑ.

Валерий Константинович асӑннӑ шкулта 2013 ҫултанпа ӗҫленӗ – спортпа массӑллӑ ӗҫ енӗпе директорӑн ҫумӗ пулнӑ, каярах инструктор-методист пулса тӑрӑшнӑ.

Асӑну хӑмине уҫма спортсменсем, тренерсем, спорт ветеранӗсем пырса ҫитнӗ.

Валерий Львов 1953 ҫулта Шупашкарта ҫуралнӑ. 1978 ҫулта Белградра тӗнче чемпионӗн ятне тивӗҫнӗ. Чӑваш Енӗн тата Мари Элӑн тава тивӗҫлӗ тренерӗ.

«Правда ПФО» сӑнӳкерчӗкӗ

Республикӑри пӗрлехи заказчик службин директорӗ пулнӑ Сергей Варлашкина ӗҫрен кӑларнӑ.

Асӑннӑ организаци Чӑваш Енӗн Строительство, архитектура тата ҫурт-йӗрпе коммуналлӑ хуҫалӑх министерствине пӑхӑнать.

Сергей Варлашкина ӗҫрен кӑларасси ҫинчен калакан йышӑнӑва чӳк уйӑхӗн 11-мӗшӗнче алӑ пуснӑ.

pravdapfo.ru сӑнӳкерчӗкӗ

Чӑваш Ен Элтеперӗн пресс-секретарӗсем пулнӑ Александр Кузинпа Борис Краснов «Социаллӑ архитекторсем» конкурсра палӑрнӑ. Мероприяти Мускавра иртнӗ.

Александр Кузин халӗ «Диалог-регионы» организацин проектсен ертӳҫи пулса тӑрӑшать, Борис Краснов «Воин» федерацин ҫамрӑксен центрӗн пресс-службине ертсе пырать.

Конкурса хутшӑнма ҫӗршывӑн тӗрлӗ регионӗнчи 7,5 пине яхӑн ҫын заявка панӑ. Финала 210 номинант лекнӗ, 74 ҫын ҫӗнтернӗ. Александр Кузин ҫӗнтерӳҫӗсен йышӗнче, Борис Краснов —финалистсен.

ЧР Элтеперӗн мӑшӑрӗ Наталья Николаева ертсе пыракан Хӗрарӑмсен пӗрлӗхне республикӑри Общество палатин председателӗ Ванифатий Шайкин Тав хучӗ панӑ. Ку – Элтепер суйлавне тӳпе хывнӑшӑн.

Кун пирки Наталья Николаева телеграм-каналӗнче пӗлтернӗ. Суйлав умӗн Чӑваш Енри Хӗрарӑмсен пӗрлӗхӗ тата Общество сӑнавӗн штабӗ «суйлава тӗрӗс те уҫӑмлӑ» ирттерес тӗлӗшпе пӗрле ӗҫлеме килӗшсе татӑлнӑ.

pravdapfo.ru сайтран илнӗ сӑнӳкерчӗк

Шӑмӑршӑ районӗнчи ҫак кӑсӑклӑ хыпара пурне те пӗлсе-илтсе тӑракан «Правда ПФО» тӗнче тетелӗнчи хаҫатри пӗлтернӗ.

Ҫитес эрнере асӑннӑ тӑрӑхра Депутатсен пухӑвӗн ларӑвӗ иртмелле иккен, унта муниципалитет пуҫлӑхне Сергей Галкина преми парас ыйтӑва пӑхса тухмалла-мӗн.

Александр Белов журналист пӗлтернӗ тӑрӑх, ҫав пуҫлӑх тӗлӗшпе пуҫарнӑ пуҫиле ӗҫе суда ярса панӑ. Хайхи этем 70 ҫулти ҫын ҫине алӑ ҫӗкленӗ иккен. Пуҫлӑхӑн ӗҫрен пӑрахма тивме пултарать иккен.

cap.ru сайтри сӑн

Паян ЧР ҫутҫанталӑк министрӗн пӗрремӗш ҫумне ӗҫрен кӑларнӑ. Хушӑва ЧР Министрсен Кабинечӗн председателӗ Сергей Артамонов алӑ пуснӑ.

Елена Хомченко министрӑн пӗрремӗш ҫумӗнче 2021 ҫулхи нарӑс уйӑхӗнченпе ӗҫленӗ. Ҫапла вӑл ку должноҫра 4,5 ытла ҫул вӑй хунӑ. Министерствӑна киличчен Госохотрыбслужбӑра аслӑ инспекторта ӗҫленӗ, ваккат та пулнӑ.

Хальхи вӑхӑтра ҫутҫанталӑк министрӗн 3 ҫум юлнӑ: Елена Дымза, Татьяна Лукина тата Николай Охотин.

cap.ru сайтри сӑн

ЧР Элтеперӗ Олег Николаев Министрсен Кабинечӗн председателӗн тепӗр ҫумне палӑртнӑ. Ку должноҫе Олег Марков йышӑннӑ. Аса илтерер: суйлав хыҫҫӑн Олег Николаев ҫӗнӗ правительствӑра ҫавсенех, пӗринсӗр пуҫне, хӑварнӑ. Ун чухне вӑл Максим Иванова должноҫрен кӑларнӑ. Олег Марков ун вырӑнне йышӑннӑ. Вӑл Транспорт, Строительство, Ҫутҫанталӑк министерствисен тата Патшалӑх ҫурт-йӗр инспекцийӗн кураторӗ пулӗ.

Олег Марков унччен вице-премьер пулнӑ ӗнтӗ. Ку должноҫе вӑл Михаил Игнатьев Элтепер пулнӑ чухне йышӑннӑ. Ҫавӑн пекех Марков строительство министрӗ пулнӑ, анчах халӗ унӑн министр портфелӗ ҫук.

cap.ru сайтри сӑн

Паянтан Ҫӗрпӳ округӗн администрацийӗн пуҫлӑхӗн тивӗҫӗсене Юрий Константинов пурнӑҫлӗ. Ӑна унчченхи ертӳҫе тытса чарнӑ хыҫҫӑн ку должноҫе вӑхӑтлӑха лартнӑ.

Аса илтерер: Ҫӗрпӳ округӗн пуҫлӑхне Алексей Иванова иртнӗ эрнере тытса чарнӑ. Ӑна икӗ статьяпа айӑпласшӑн: услам ӗҫне саккуна пӑсса хутшӑннӑшӑн тата должноҫпе усӑ курнӑшӑн. Хальхи вӑхӑтра ӑна хупса усраҫҫӗ.

Юрий Константинов Ҫӗрпӳ тӑрӑхне Шупашкартан килнӗ. Вӑл 2024 ҫулхи ҫӗртме уйӑхӗнченпе Шупашкар хула администрацийӗн пуҫлӑхӗн ҫумӗнче, аппарат ертӳҫинче ӗҫленӗ.

www.cap.ru сӑнӳкерчӗкӗ

Чӑваш Енре «Управленческая команда» (чӑв. Ертсе пыракансен команди) конкурса пӗтӗмлетнӗ.

2025 ҫулти ҫӗнтерӳҫӗсен шутӗнче 5 ҫын:

- Ирина Коптева, Шупашкар районӗнчи Толиккассинчи вӑтам шкулӑн директорӗн воспитани енӗпе ӗҫлекен ҫумӗ;

- Александр Иванов, «ИТ-Консалтинг» тулли мар яваплӑ обществӑн администраци директорӗ;

- Александр Смирнов, «Форт Диалог» проектсен ертӳҫи;

- Денис Андреев, «Время СВОих» программӑна хутшӑннӑ ҫын, Ҫӗмӗрле районӗнчи дежурствӑпа диспетчер службин директорӗ ;

- Ренат Чебутаев, Шупашкарти 38-мӗш вӑтам шкул директорӗ.