Инкелӗ лару-тӑру министерстви тунӑ сӑн

Ӗнер каҫхи 6 сехетре Шупашкар районӗнчи Чӑрӑшкассинче чутах ҫурт ҫунса кайман.

Инкеклӗ лару-тӑру министерстви пӗлтернӗ тӑрӑх, пушар 53 ҫулти хӗрарӑмӑн килӗнче тухнӑ. Ҫулӑм маччана сиенлетнӗ, япаласен, сӗтел-пуканӑн пӗр пайне тӗп тунӑ.

Пушарнӑйсем ҫулӑма ҫур сехетрен сӳнтернӗ, кил-ҫурта сыхласа хӑварма пултарнӑ. Кил хуҫи хӗрарӑмӗ, ҫемьери ытти ҫынсем шар курман.

Ҫулталӑк пуҫланнӑранпа республикӑра 878 пушар пулнӑ, вӗсенче 39 ҫын вилнӗ.

forum.na-svyazi.ru сайтран илнӗ сӑнӳкерчӗк

Чӑваш Енре килес ҫул приватизацилемелли куҫман объектсен списокне палӑртнӑ. Унта икӗ лаптӑка кӗртнӗ: 7 595 тӑваткал метр (кадастр номерӗ 21:26:110101:2) тата 619 тӑваткал метр (кадастр номерӗ 21:26:110109:235) лаптӑк йышӑнакан икӗ участок. Вӗсем иккӗшӗ те Тӑвайӗнче вырнаҫнӑ.

Ҫӗре сутсан республика хыснине 13,2 миллион тенкӗрен кая мар укҫа кӗрӗ.

Приватизацие пула 2016 ҫулта пирӗн республика 379 млн тенкӗ тупӑш илне, 2017 ҫулта — 120,4 млн тенкӗ, 2018 ҫулта — 98,3 млн тенкӗ, 2021 ҫулта — 34,5 млн тенкӗ.

"На связи" форумри сӑн

Авӑн уйӑхӗнче Шупашкартан Санкт-Петербурга самолет тӑтӑшрах вӗҫме тытӑнӗ. Сӑмах - «Победа» авиакомпани пирки.

Авӑн уйӑхӗн 1-30-мӗшӗсенче Санкт-Петербурга эрнере 6 рейс пулӗ. Самолет кашни кунах, юнкунсӑр пуҫне, вӗҫӗ.

Палӑртса хӑварар: хальхи вӑхӑтра Шупашкартан Питӗре самолет эрнере 4 хутчен вӗҫет: ытларикун, кӗҫнерникун, эрнекун тата шӑматкун.

Хӗле хатӗрленнине тӳре-шара канашлура сӳтсе явать. cap.ru сӑнӳкерчӗкӗ

Чӑваш Енри коммуналлӑ хуҫалӑхра ӗҫлекенсем асӑннӑ отрасль объекчӗсене хӗле хатӗрлессипе ҫине тӑраҫҫӗ. Ӗнерхи кун тӗлне илсен, ӗҫе 59,9 процент чухлӗ пурнӑҫланӑ.

Ӗҫ хӑвӑртлӑхӗ енчен Йӗпреҫ (29,0%), Сӗнтӗрвӑрри (31,4%), Ҫӗмӗрле (32,5%) тата Ҫӗрпӳ (34,6%) районӗсем юлса пыраҫҫӗ.

Коммуналлӑ хуҫалӑх объекчӗсене хӗле хатӗрлессипе Улатӑр, Элӗк, Патӑрьел, Комсомольски, Хӗрлӗ Чутай, Шӑмӑршӑ, Тӑвай районӗсем тата Улатӑр хули малта. Вӗсенче палӑртнӑ ӗҫ калӑпӑшӗн 70 процентне пурнӑҫланӑ.

apokrov.ru сайтри сӑн

Иртнӗ канмалли кунсенче республикӑра 9 ҫын пиҫсе кайнӑ. Ҫапла пӗлтерет ЧР Сывлӑх сыхлавӗн министерстви.

2 ҫулти ача кран уҫса вӗри шывпа пиҫсе кайнӑ. Тепӗр икӗ шӑпӑрлан ҫине вӗри чей тӑкӑнса кайнӑ.

Пӗр арҫын газ ҫутма тӑнӑ та конфорка сирпӗннӗ. Унӑн ӳчӗн 66 проценчӗ пиҫсе кайнӑ. Кӳршисем часрах васкавлӑ медпулӑшу чӗннӗ. Анчах арҫыннӑн сывлӑхӗ йывӑр пулнине кура ӑна тухтӑрсене хирӗҫ хӑйсен машинипе илсе кайнӑ.

Мунча хутнӑ чухне бензин сапса пиҫсе каякан та пулнӑ. Тепӗр ҫын вара перчетке тӑхӑнмасӑр наркӑмӑшлӑ пултӑран ҫулнӑ.

Тухтӑрсем пӗтӗм пациента медпулӑшу панӑ. Шар курнисем пульницӑра сипленеҫҫӗ.

cap.ru сӑнӳкерчӗкӗ

Иртнӗ эрне вӗҫӗнче Шупашкарта Маргелов генерал палӑкне уҫнӑ. Ӑна «Ҫӗнтерӳ» паркра вырнаҫтарнӑ.

Василий Маргелов Сывлӑшпа десант ҫарӗсен командирӗ пулнӑ. Вӑл 1908 ҫулта Украинӑри Екатеринославра (халӗ ҫав хула Днепропетровск ятлӑ) ҫуралнӑ. Тӑван ҫӗршывӑн аслӑ вӑрҫине хутшӑннӑ, Херсон хулине ирӗке кӑларма хутшӑннӑ. 1944 ҫулта Совет Союзӗн Геройӗ ята тивӗҫнӗ.

Палӑка уҫма хутшӑннӑ Чӑваш Ен Элтеперӗ Олег Николаев асӑннӑ пулӑм ветерансене сума сунине тата паян Раҫҫейӗн Ҫарпа десант ҫарӗсенче тӑракансене хисепленине палӑртать тесе каланӑ.

sakhalife.ru сайтри сӑн

Вӑрманти пушара чи лайӑх сӳнтерекен пушарнӑйсен конкурсӗ пулнӑ. Кӑҫалхипе вӑл ҫиччӗмӗш хут иртнӗ.

Конкурса 22 пушарнӑй хутшӑнма кӑмӑл тунӑ. Вӗсен йышӗнче Шӑмӑршӑ лесничествин пӗрремӗш категориллӗ вӑрманҫине Владимир Чернова ҫитекенни пулман.

Чи лайӑж пушарнӑй ята тивӗҫнӗ Владимир Чернов Пӗтӗм Раҫҫей шайӗнче иртекен конкурса хутшӑнса Чӑваш Ен чысне хӳтӗлӗ. Вӑл Мускав ҫывӑхӗнче авӑн уйӑхӗн пуҫламӑшӗнче пулӗ.

ҪҪХПИ тунӑ сӑн

Паян ҫӗрле «Сӑр» автоҫул ҫинче ҫынна вилмеллех ҫапса хӑварнӑ. Водитель вара вырӑнтан тарнӑ. Халӗ ӑна йӗрке хуралҫисем шыраҫҫӗ.

ҪҪХПИ пӗлтеренӗ тӑрӑх, инкек автоҫулӑн 28-мӗш ҫухрӑмӗнче ҫур ҫӗрте пулнӑ. Машина Ҫӗмӗрлерен Шупашкар еннелле кайма пултарнӑ. Сиенленнӗ машинӑна курсан йӗрке хуралҫисем 102 номерпе шӑнкӑравласа пӗлтерме ыйтаҫҫӗ.

"Лиза Алерт" сайтри сӑн

Ӗнер ирхине Улатӑр районӗнчи Кивӗ Эйпеҫ ялӗнче икӗ хӗрарӑм ҫырлана кайнӑ. Анчах вӗсенчен пӗри вӑрмантан тухайман - ҫухалса кайнӑ. Халӗ 72 ҫулти Юлия Витальевна Андреевӑна «Лиза Алерт» хастарӗсем, полицейскисем, ахаль ҫынсем шыраҫҫӗ.

Ҫанталӑк шӑрӑх пулни лару-тӑрӑва тата кӑткӑслатать. Ҫитменнине, вӑл тӑрӑхри вӑрманта чӑтлӑх нумай.

Хастарсем пӗлтернӗ тӑрӑх, шырама ҫынсем ҫитмеҫҫӗ. Паянхи ир тӗлне Юлия Андреевӑна тупайман-ха.

Яндекс.дзен сайтри сӑн

Утӑ уйӑхӗн 20-мӗшӗнче Катастрофа медицинин тата васкавлӑ медпулӑшу центрне шӑнкӑрав ҫитнӗ: Етӗрне районӗнче утарҫа пыл хурчӗсем тапӑннӑ.

Хайхи арҫын вӗсене вӗллене пуҫтарма шутланӑ. Анчах ятарлӑ тeм мар, футболкӑпа шорты тӑхӑннӑ. Пыл хурчӗсене темӗн килӗшмен - вӗсем хуҫине тапӑннӑ.

Вырӑна ҫитнӗ тухтӑрсем утарҫа тӳрех аллергирен укол тунӑ. Кайран пациента пульницӑна илсе ҫитернӗ.