Шупашкарта пурӑнакан 8 ҫулти Мия Кудряшова тӗнче чемпионки ята тивӗҫнӗ.
«Дебют» шахмат клубне ҫурекенскер Пӗтӗм тӗнчери шахмат федерацийӗн ӑмӑртӑвӗнче сакӑр ҫулчченхи хӗрачасем хушшинче ҫӗнтернӗ.
Ҫурла уйӑхӗнче вара вӑл «Шӑккалат кубокӗнче» мала тухнӑччӗ. Аса илтерер: ун чухне вӑл 9 ҫултан кӗҫӗнрех хӗрачасемпе тупӑшса 9 турта 8 очко пухнӑ, Ҫапла вара Раҫҫей кубокӗн Шупашкарти тапхӑрӗнче ҫӗнтернӗччӗ.
Ку канмалли кун, авӑнӑн 6-мӗшӗнче, «Советская Чувашия» хаҫат парнисене ҫӗнсе илессишӗн ҫӑмӑл атлетика эстафети пулӗ.
Йӑлана кӗнӗ пекех, спортсменсем Шупашкарти «Олимпийский» стадиона пухӑнӗҫ. Андриян Николаев космонавта халалланӑ эстафета кӑҫалхипе 87-мӗш хут иртӗ.
Унта ҫемье командисем, шкул ачисем, студентсем, спорт ветеранӗсем, журналистсем, патшалӑх служащийӗсем хутшӑнаҫҫӗ, тӗрлӗ дистанцире тупӑшаҫҫӗ.
Кунсӑр пуҫне стадионра ирхи 9 сехетре ГТО нормативне пама пулать. Ӑмӑртусем 10 сехетре пуҫланӗҫ. Регистраци – 8 сехетре.
Чӑваш Ен спортсменки Дина Александрова марафонра пурне те парӑнтарса финиша пӗрремӗш ҫитнӗ.
Марафон Исландин тӗп хулинче Рекъявикире иртнӗ. 33 ҫулти Дина 42,2 ҫухрӑма 2 сехет те 35 минут та 51 ҫеккунт кӑтартупа вӗҫленӗ. Ку — Рекъявикири марафон трасси ҫинчи ҫӗнӗ рекорд.
Палӑртса хӑварар: Дина Александрова Шупашкарта ҫуралса ӳснӗ, вӑл Олимп резервӗсен 8-мӗш спорт шкулӗнче ӑсталӑхне туптанӑ, унтан Курск хулинче тренировкӑсем тума пуҫланӑ та 2 ҫухрӑмлӑ дистанцире Раҫҫей чемпионки пулса тӑнӑ.
Улатӑр хулинче ҫуралса ӳснӗ Артемий Репкин подполковник параатлетика енӗпе иртнӗ Пӗтӗм тӗнчери ҫар спорчӗн канашӗн чемпионатӗнче палӑрнӑ. Тупӑшу Эквадорта пулнӑ. Пирӗн ентеш диск ывӑтассинче ӑмӑртнӑ, вӑл спортӑн ку тӗсӗнче кӗмӗл медаль ҫӗнсе илнӗ.
Сӑмах май, Артемий Репкин ятарлӑ ҫар операцине хутшӑннӑ, унта йывӑр аманнӑ. Сипленсе вӑй пухнӑ хыҫҫӑн вӑл спортзала занятитисене ҫӳреме пуҫланӑ. Хальхи вӑхӑтра вӑл Чӑваш Енри ҫар комиссарӗн пулӑшуҫинче ӗҫлет.
Чӑваш Ен спортсменӗ Сергей Козырев Раҫҫей первенствинчен пӑхӑр медальпе таврӑннӑ.
Ӑмӑрту Бурят Республикинче иртнӗ. Унта 24 ҫула ҫитмен, спорт кӗрешӗвӗпе кӑсӑкланакан 300 спортсмен вӑй виҫнӗ.
Чӑваш Ен чысне хӳтӗленӗ Сергей 97 килограмм тайманнисен категорийӗнче тупӑшнӑ.
Палӑртмалла: вӑл — кӗрешӳ енӗпе тӗнче класлӑ спорт мастерӗ. Ӑсталӑхне Валерий Кочков ячӗллӗ 5-мӗш спорт шкулӗнче туптать.
Шупашкарта иртекен Пӗтӗм Раҫҫӗйцри ГТО ӑмӑртӑвне пуҫтарӑннисем йышлӑн чирлесе ӳкнӗ.
Ӗнер, ҫурла уйӑхӗн 18-мӗшӗнче, темиҫе ачапа аслӑ ҫынна тухтӑрсен пулӑшӑве кирлӗ пулса тухнӑ. Ӑмӑртӑва килнисем хулари хӑна ҫурчӗсенчен пӗринче вырнаҫнӑ. Вӗсем пурте унта апатланнӑ.
Пӑтӑрмах тӗлӗшпе РФ Следстви комитечӗн Чӑваш Енри тӗпчевҫисем тӗрӗслев ирттереҫҫӗ. Тӗрӗслеве РФ Пуҫиле кодексӗн 236-мӗш статйин 1-мӗш пайӗпе пуҫарнӑ.
Чӑваш Енри ӑста повар Александр Гониашвили «Профессире — чи лайӑххи» Пӗтӗм Раҫҫейри конкурсра палӑрнӑ.
Вӑл Вологда хулинче иртнӗ, тупӑшӑва тӗрлӗ регионти 15 повар хутшӑннӑ.
Вологда облаҫӗнчи Константин Балдышев ҫӗнтерӳҫӗ ятне тивӗҫнӗ. Ӑна 1 миллион тенкӗпе хавхалантарнӑ. Свердловск облаҫӗнчи Михаил Осовалюк 500 пин тенке тивӗҫнӗ. Александр Гониашвили вара виҫҫӗмӗш вырӑна тухнӑ. Ӑна 300 пин тенкӗ парса чысланӑ.
Ҫурла уйӑхӗн 16-20-мӗшӗсенче ҫемье командисен хушшинче Пӗтӗм Раҫҫейри ГТО фестивалӗ иртӗ.Чӑваш Ен чысне Йӗпреҫ округӗнчи Ефимовсем хӳтӗлӗҫ
Фестиваль Шупашкарта «Атӑл» физкультурӑпа сывлӑха ҫирӗплетмелли комплексра иртӗ. Ӑна савӑнӑҫлӑ лару-тӑрура 13 сехетре уҫӗҫ.
Ӑмӑртӑва ҫӗршыври тӗрлӗ регионти ҫемьесем хутшӑнӗҫ. Ӳсӗмӗ - 8-69 ҫулсенчисем. Вӗсем ГТО дисциплинисенче тупӑшӗҫ.
Шупашкарти Мия Кудряшова «Шӑккалат кубокӗнче» ҫӗнтернӗ. Вӑл 9 ҫултан кӗҫӗнрех хӗрачасемпе тупӑшса 9 турта 8 очко пухнӑ, хушма кӑтартусемпе Чулхула облаҫӗнчи Элизабет Де Боноран иртсе кайнӑ. Ҫапла пирӗн ентеш Раҫҫей кубокӗн Шупашкарти тапхӑрӗнче ҫӗнтернӗ.
Мийӑна ӑмӑртура «шахмат принцесси» тесе ят панӑ. Вӑл турнирӑн кашни тапхӑрӗнче кӗрен тӗслӗ хитре кӗпесемпе тухнӑ. Шахмат хӑми умне ларсан вӑл хӑйне ҫирӗп тытнӑ.
Паян Етӗрне округӗнчи Совхозный поселокӗнче лаша чупӑвӗпе Чӑваш Ен Кубокӗн финалӗ иртнӗ. Йӑлана кӗнӗ спорт ӑмӑртӑвне ҫын нумай пухӑннӑ: ӑмӑртакансем те, куракансем те.
Тӗп парнене – ылтӑн кубока тата 300 пин тенке – Маршак ятлӑ тиха ҫӗнсе илнӗ. Унпа Александр Пыркин чупнӑ. Кӗмӗл медале Блейдж Лок тивӗҫнӗ, унӑн юланутҫи – Павел Матьянов. Пӑхӑр медале Флюид тата Николай Пыркин илнӗ.
Ӑмӑрту вӑхӑтӗнчех юрӑҫсен, пултарулӑх ушкӑнӗсен юрри-ташшипе киленме май пулнӑ.
+0.3 °C