Ҫӗмӗрлере пурӑнакан кинемей Анастасия Михайловна Федотова 100 ҫул тултарнӑ. Паянхи кун вӑл хӗрӗпе Валентина Ивановнӑпа пӗрле пурӑнать.
Анастасия Михайловна Чулхула облаҫӗнчи Княжиха ялӗнче ҫуралса ӳснӗ. Шкул хыҫҫӑн вӑл пилӗк ҫул ытла почтальонра ӗҫленӗ.
1947 ҫулта Анастасия качча кайнӑ. 1954 ҫулта мӑшӑрӗпе Ҫӗмӗрле хулинче тӗпленнӗ. Унта вӑл 20 ҫула яхӑн хула пульницинче сестра-хозяйкӑра ӗҫленӗ. Каярахпа автофургонсен комбинатӗнче травильщик пулнӑ. Ҫавӑнтанах тивӗҫлӗ канӑва тухнӑ.
Чӑваш Енри участковӑй Михаил Обломов Пӗтӗм Раҫҫейри «Халӑх участковӑйӗ» конкурсӑн финалне ҫитнӗ.
Вӑл РФ ШӖМӗн Ҫӗмӗрлери уйрӑмӗнче ӗҫлет. Ку тытӑмра 2020 ҫултанпа вӑй хурать. Участковӑй тивӗҫне 2021 ҫулхи нарӑс уйӑхӗнче пурнӑҫлама тытӑннӑ. Унӑн участокӗнче 4 пине яхӑн ҫын пурӑнать.
Халӗ сасӑлав пырать. Ентешӗмӗре ҫӗнтерме пулӑшас тесен ҫак каҫӑпа кайса сасӑламалла: https://www.kp.ru/media/1019449/?participant=6901d69292bb0c0008fdbb71&share.id=6901d69292bb0c0008fdbb6f&share.imageClass=beige&share.imageId=637777a8a0a078df2efad058632f1c53&share.template=.
Ҫӗмӗрлере пурӑнакансем ӑша шыва хваттере ӑшӑтмалли батарейӑран илеҫҫӗ иккен. Вырӑнти муниципалитетра тӑрӑшакансемпе «Чӑвашгаз», управляющи компани тата шалти ӗҫсен ӗҫченӗсем нумаях пулмасть тӗрӗслеве тухнӑ.
Чылай хваттерте батарейӑна кран вырнаҫтарнӑ иккен, вӗри шыв ҫынсем унтан илсе пурӑнаҫҫӗ.
Йӗркене пӑсакансене яваплисем кӑлтӑка ҫийӗнчех пӗтерме хушса хут ҫырса панӑ.
Кӑҫал «Халӑх участковӑйӗ» ята Михаил Обломов тивӗҫнӗ. Вӑл – Ҫӗмӗрлери участок уполномоченнӑйӗ, полицин аслӑ лейтенанчӗ. Михаил конкурсӑн регионти тапхӑрӗнче ҫӗнтернӗ. Унӑн участокӗнче – 4 пине яхӑн. Ҫулталӑк пуҫланнӑранпа участковӑй ҫынсен 300 ытла ыйтӑвне пӑхса тухнӑ. Кунсӑр пуҫне вӑл ватӑ ҫынсемпе ултавҫӑсем пирки те калаҫать.
Халӗ Михаил Обломов Чӑваш Ен чысне Раҫҫей конкурсӗнче хӳтӗлеме хатӗрленет.
Ҫӗмӗрлесен — кӑмӑллӑ хыпар. Хулари медицина центрне ҫамрӑк специалистсем ӗҫлеме килнӗ.
Вӗсем — Татьяна Фондеркина терапевт тата Татьяна Ушкова медсестра. Ҫамрӑк тухтӑрсем 13-мӗш терапи участокӗнче ӗҫлеме пуҫланӑ.
Татьяна Фондеркина — Хӗрлӗ Чутай районӗнчен. Кӑҫал вӑл И.Н.Ульянов ячӗллӗ Чӑваш патшалӑх университечӗн медицина факультетӗнчен вӗренсе тухнӑ.
Татьяна Ушкова вара — Ҫӗмӗрлеренех. Вӑл Шупашкарти медицина колледжӗнче тӗллевлӗ ӑс пухнӑ. Татьяна кӑҫал диплом илнӗ, кун хыҫҫӑнах Ҫӗмӗрлене ӗҫлеме таврӑннӑ.
Ӗнер Ҫӗмӗрле хулинче нумай хваттерлӗ ҫуртӑн иккӗмӗш хутӗнче вырнаҫнӑ пӗр хваттерте пушар тухнӑ.
Унти Интернационал урамӗнчи 33-мӗш ҫуртри пӗр пӳлӗмлӗ хваттерте инкек вӑхӑтӗнче икӗ ҫын пулнӑ: 90 ҫулти хваттер хуҫи тата унӑн кӳрши, 75-ри кинемей. Пушара сӳнтерме пырса ҫитнисем вӗсене урама илсе тухнӑ, вӗсене иккӗшне те тухтӑр пулӑшӑвӗ кирлӗ пулса тухнӑ.
Унсӑр пуҫне ҫӳлти хутсенче пурӑнакан ҫынсене, пурӗ ҫичӗ ҫынна, эвакуациленӗ.
Малтанласа палӑртнӑ тӑрӑх, хваттерте электричество пӑралукӗ юсавсӑр пулнӑ.
Ҫӗмӗрле хулинче пурӑнакан Ядуванкинсем изумруд туйне паллӑ тунӑ.
Сергей Ивановичпа Зинаида Александровна 55 ҫул пӗрле пурӑнаҫҫӗ. Вӗсем шкулта чухнех туслӑ ӳснӗ. Сергей купӑс калама, юрлама, ташлама ӑста пулнӑ. Хитре, ӗҫчен Зинаида вара кӳршӗ ялта пурӑннӑ. Каччӑ ӑна куҫ хывнӑ.
Салтаксен таврӑнсан Сергей хӗре качча тухма ыйтнӑ. Зинаида килӗшнӗ. Ҫапла 1970 ҫулта Ядуванкинсен ҫемйи чӑмӑртаннӑ. Мӑшӑр малтан – СУ-8 организацире, унтан Ҫӗмӗрлери автофургонсем туса кӑларакан савутра ӗҫленӗ.
Ядуванкинсем икӗ ывӑл ӳстернӗ. Халӗ пӗртен-пӗр мӑнукӗпе савӑнса пурӑнаҫҫӗ.
Чӑваш Енре юлашки вӑхӑтра ҫулсерен ирттерекен кӗмӗл волонтёрсен республикӑри конкурсне пӗтӗмлетнӗ.
Конкурса заявкӑсене республикӑн Ӗҫ тата социаллӑ хӳтлӗх министерстви ҫурла уйӑхӗн 18-мӗшӗнчен пуҫласа пӗр уйӑх хушши йышӑннӑ.
«Ҫӗнтерӳ волонтёрӗ» номинацире Шупашкарти Людмила Порфирьева ҫӗнтернӗ. Ватӑ хӗрарӑм салтаксене нумай пулашать иккен.
«Наставник — волонтер» номинацире Патӑрьел районӗнчи Мидхать Шакиров ҫӗнтернӗ. Вӑл ачасене ӳнер урлӑ Тӑван ҫӗршыва юратма вӗрентет иккен.
Ҫӗмӗрле тӑрӑхӗнчи Людмила Осипова — «эко-волонтер». Вӑл «ЭкоЛогики «от А до Я» ятлӑ шкул шухӑшласа кӑларнӑ.
«Социаллӑ экспресс» номинацире ҫӗнтернӗ Улатӑрти Ирина Сидякина хастар пулса ӗмӗре вӑрӑмлатма вӗрентет.
Ҫӗнтерӳҫӗсене кӗмӗл волонтёрсен «Кӗмӗл чун» республикӑри тӑваттӑмӗш форумӗнче чыслӗҫ. Мероприяти хальхинче Ҫӗмӗрле хулинче иртӗ.
Ҫӗмӗрле хулинче модельлӗ вулавӑш уҫӑлнӑ. Унӑн дизайнне вырӑнти ӳнерҫӗ Сергей Разгудаев хатӗрленӗ.
Унта хӑтлӑ та хӑйне евӗр стильлӗ. Вуламалли зона, интернета тухмалли май туса панӑ ӗҫ вырӑнӗсем, ача-пӑча кӗтесӗ тата мероприятисем ирттермелли вырӑн пур.
Фасада росписьпе илемлетни, интерьерлӑ панносем, стенасем ҫинчи живопиҫ – ҫаксене йӑлтах Сергей Разгудаев хатӗрленӗ.
Территорисене аталанма пулӑшакан фонд Чӑваш Енӗн заявкине ырланӑ май республикӑри ишӗлекен 20 ҫуртри ҫынсене ҫӗнӗ ҫӗре куҫарма йышӑннӑ.
Ӗнер иртнӗ ларура фонд тата тепӗр 6 регионӑн заявкине ырланӑ, ҫав шутра Чӑваш Енӗнне те.
Кӑҫалхи программӑна Шупашкарти пӗр ҫурт та лекеймен. Халӗ вара Ҫӗнӗ Шупашкарти, Канашри, Ҫӗмӗрлери, Вӑрнар тата Ҫӗрпӳ районӗсенчи 20 ҫурт лекнӗ, вӗсенче 256 ҫын пурӑнать-мӗн.
Вӗсен адресӗ ҫапларах:
Ҫӗнӗ Шупашкар – Силикат урамӗнчи 12-мӗш тата 14-мӗш ҫуртсем;
Вӑрнар – Ашмаров урамӗнчи 6-мӗш тата Путевой урамри 23-мӗш ҫуртсем;
Ҫӗрпӳ – Гагарин урамӗнчи 35-мӗш, Гоголь урамӗнчи 13-мӗш, Ҫаран урамӗнчи 5-мӗш ҫуртсем;
Ҫӗрпӳ районӗнчи Хирти Тукай ялӗнчи Ҫамрӑксен урамӗнчи 13-мӗш ҫурт;
Канаш – Кабалин урамӗнчи 5-мӗш ҫурт;
Ҫӗмӗрле – Киров урамӗнчи 75-мӗш, Красноармейски урамӗнчи 1-мӗш тата 17-мӗш ҫуртсем, Мопр урамӗнчи 23-мӗш, Свердлов урамӗнчи 92-мӗш, 92а, 105-мӗш, Стройучасток урамри 9-мӗш, Тургенев урамӗнчи 17-мӗш, Угольник урамӗнчи 5-мӗш, Францев урамӗнчи 1а ҫуртсем.
-0.7 °C