Раштав уйӑхӗн 21-мӗшӗнче Чӑваш академи драма театрӗнче чӑваш халӑх артисчӗн Иван Ивановӑн юбилей каҫӗ пулӗ. Ҫав каҫ юбиляра саламлӗҫ, унтан «Карчӑксем качча каяҫҫӗ» спектакле кӑтартӗҫ. Унта юбиляр Юманкка сӑнарне калӑплать.
Иван Иванов 1955 ҫулхи раштав уйӑхӗн 21-мӗшӗнче Сӗнтӗрвӑрри районӗнчи Карапаш ялӗнче ҫуралнӑ. Мускаври М.С. Щепкин ячӗллӗ Аслӑ театр училищинчен 1983 ҫулта вӗренсе тухнӑранпах Чӑваш академи драма театрӗнче ӗҫлет.
Чӑваш Енре ҫуралса ӳснӗ, тӗнчипе ятлӑ-сумлӑ тӗпчевҫӗ Никита Бичурин ҫуралнӑранпа килес ҫулхи авӑн уйӑхӗнче 250 ҫул ҫитӗ. Ҫавна пирӗн республикӑра сумлӑн уявлама палӑртаҫҫӗ.
Чӑваш Енре тӗрлӗ мероприяти ирттернӗ, ун валли ӗҫлӗ ушкӑн туса хурӗҫ. Кун пек йышӑнӑва Чӑваш Ен Элтеперӗ Олег Николаев раштав уйӑхӗн 6-мӗшӗнче алӑ пуснӑ.
Никита Яковлевич, — монголовед, синолог, прозаик, очеркист, сӑвӑҫ. 1777 ҫулхи авӑн уйӑхӗн 9-мӗшӗнче Ҫӗрпӳ уесӗнчи (халӗ Чӑваш Енӗн Шупашкар районӗ) Типнер ялӗнче ҫуралнӑ. 1853 ҫулхи ҫу уйӑхӗн 23-мӗшӗнче Санкт-Петербург хулинче вилнӗ.
Бичурин ӗҫӗсене Раҫҫейре кӑна мар, Европӑра та хакланӑ. 1828 ҫулта ӑна Раҫҫей ӑслӑлӑхсен академийӗн член-корреспондентне суйласа илнӗ. 1831 ҫулта Парижри Ази обществин шутне кӗртнӗ. 1834, 1839, 1843, 1849 ҫулсенче вӑл Раҫҫейӗн ӑслӑлӑх шайӗнчи чи пысӑк паллине, Демидов премине, тивӗҫнӗ.
Ӗнер, раштав уйӑхӗн 7-мӗшӗнче, Чӑваш Республикин тава тивӗҫлӗ артисткин Надежда Воюцкаян юбилейне халалланӑ каҫ иртнӗ. Унта «Пӗртен-пӗр шанӑҫ» спектакль кӑтартнӑ. Спектакльте Надежда Сильвестровна Елена Владимировна ролӗнче вылянӑ.
Надежда Воюцкая 1960 ҫулхи чӳк уйӑхӗн 25-мӗшӗнче Вӑрнар районӗнчи Шинер ялӗнче ҫуралнӑ. 1983 ҫулта М.С. Щепкин ячӗллӗ Аслӑ театр училищинчен (институтӗнчен) вӗренсе тухнӑ та ҫавӑнтанпа Чӑваш академи драма театрӗнче ӗҫлет.
Юбиляра театр директорӗ Елена Николаева, Вӑрнар муниципалитет тӑрӑхӗн пуҫлӑхӗ Надежда Никандрова, Вӑрнарсен ентешлӗхӗн ертӳҫи Валерий Кузьмин тата ыттисем саламланӑ.
Елчӗк округӗнчи Кивӗ Эйпеҫ ялӗнче пурӑнакан Кудряшовсем кевер туя паллӑ тунӑ. Вӗсем 5 ача ҫуратса ӳстернӗ. Халӗ 7 мӑнукпа тата вӗсен 6 ачипе савӑнса пурӑнаҫҫӗ.
Петр Михайлович тивӗҫлӗ канӑва тухиччен тӗрлӗ предприятире сварщикре ӗҫленӗ. Нина Зиноновна вара колхозра вӑй хунӑ. Тӑрӑшса ӗҫленӗшӗн Хисеп хӑми ҫине пӗрре мар лекнӗ. Вӑл вырӑнти тата районти депутата суйланнӑ. Нина Зиноновна — ӗҫ ветеранӗ. 1973 ҫулта ӑна «Хисеп палли» орденпа чысланӑ.
Мӑшӑр ҫирӗп ҫемье вӑрттӑнлӑхне уҫнӑ. «Пӗр-пӗрне итлеме тата илтме пӗлмелле», — теҫҫӗ Кудряшовсем.
Чӑваш Енре Улатӑр хулин 475 ҫулхине уявлама хатӗрленеҫҫӗ. Асӑннӑ хулана йӗркеленӗренпе 475 ҫул ҫитнине 2027 ҫулта уявлӗҫ.
Ҫавна май пирӗн республикӑра ӗҫлӗ ушкӑн туса хунӑ, унта камсем кӗрессине палӑртнӑ.
Йӗркелӳпе техника ӗҫӗсемшӗн Чӑваш Енӗн Транспорт тата ҫул-йӗр хуҫалӑхӗн министерстви яваплӑ пулӗ.
Елчӗк округӗнчи Элпууҫ ялӗнче пурӑнакан Столяровсем «тимӗр туя» паллӑ тунӑ. Вӗсем пӗрлешнӗренпе 65 ҫул ҫитнӗ.
Анатолий Ивановичпа Зоя Ивановна ӗмӗр тӑршшӗпех тӑван тӑрӑхӗнче пурӑнаҫҫӗ, колхозра ӗҫлесе тивӗҫлӗ канӑва тухнӑ. Вӗсем виҫӗ ача ҫуратса ӳстернӗ, халӗ 6 мӑнукпа, 6 кӗҫӗн мӑнукпа савӑнса пурӑнаҫҫӗ.
Чӑваш академи драма театрӗн артистки Надежда Воюцкая ӗнер, чӳк уйӑхӗн 25-мӗшӗнче, 65 ҫул тултарнӑ. Ҫавна май театрта раштав уйӑхӗн 7-мӗшӗнче унӑн юбилей каҫӗ иртӗ. Унта «Пӗртен-пӗр шанӑҫ» спектакль кӑтартӗҫ. Спектакльте Надежда Сильвестровна Елена Владимировна ролӗнче вылять.
Надежда Воюцкая 1960 ҫулхи чӳк уйӑхӗн 25-мӗшӗнче Вӑрнар районӗнчи Шинер ялӗнче ҫуралнӑ. 1983 ҫулта М.С. Щепкин ячӗллӗ Аслӑ театр училищинчен (институтӗнчен) вӗренсе тухнӑ та ҫавӑнтанпа Чӑваш академи драма театрӗнче ӗҫлет.
Канаш округӗнчи Энтрияль ялӗнче пурӑнакан кинемей, «Амӑшлӑх медалӗн» кавалерӗ, ӗҫ ветеранӗ тата тыл ӗҫченӗ Васелиса Рублева 100 ҫул тултарнӑ.
Васелиса Карповна ҫак ялтах 1925 ҫулхи чӳкӗн 20-мӗшӗнче ҫуралнӑ, нумай ачаллӑ ҫемьере ӳснӗ. Ҫамрӑклӑхӗ Тӑван ҫӗршывӑн Аслӑ вӑрҫи тӗлне лекнӗ. Хӗре Тӑвай ҫывӑхне окоп чавма илсе кайнӑ. Вӑл Вӑрнарта тата Етӗрнере вӑрман хатӗрленӗ ҫӗрте те ӗҫленӗ.
1943 ҫулта Васелиса Григорий Фадеев тракториста качча тухнӑ. Анчах шӑпа вӗсене пӗрле 5 ҫул кӑна пурӑнма пӳрнӗ. Ҫамрӑк хӗрарӑм икӗ ачапа юлнӑ, виҫҫӗмӗшӗ ҫире пулнӑ. Кайран вӑл тепре качча кайнӑ, Виталий Рублевпа тӑватӑ ача ҫуратнӑ. Тивӗҫлӗ канӑва тухиччен колхозра ӗҫленӗ, счетовод, кладовщик пулнӑ.
Паянхи кун вӑл кӗҫӗн хӗрӗпе Розӑпа пурӑнать. Халӗ унӑн – 14 мӑнук, 21 кӗҫӗн мӑнук, тата вӗсен 7 ачи.
Ҫӗмӗрлере пурӑнакан кинемей Анастасия Михайловна Федотова 100 ҫул тултарнӑ. Паянхи кун вӑл хӗрӗпе Валентина Ивановнӑпа пӗрле пурӑнать.
Анастасия Михайловна Чулхула облаҫӗнчи Княжиха ялӗнче ҫуралса ӳснӗ. Шкул хыҫҫӑн вӑл пилӗк ҫул ытла почтальонра ӗҫленӗ.
1947 ҫулта Анастасия качча кайнӑ. 1954 ҫулта мӑшӑрӗпе Ҫӗмӗрле хулинче тӗпленнӗ. Унта вӑл 20 ҫула яхӑн хула пульницинче сестра-хозяйкӑра ӗҫленӗ. Каярахпа автофургонсен комбинатӗнче травильщик пулнӑ. Ҫавӑнтанах тивӗҫлӗ канӑва тухнӑ.
Чӳк уйӑхӗн 21-мӗшӗнче Чӑваш наци ӑслӑлӑхпа ӳнер академи президенчӗ Евгений Ерагин 70 ҫул тултарнӑ.
Евгений Ефставьевич — педагог, краевед, Чӑваш Республикин тава тивӗҫлӗ учителӗ, Чӑваш Республикин культурӑн тава тивӗҫлӗ ӗҫченӗ, Чӑваш халӑх академикӗ.
Вӑл Муркаш районӗнчи Ярак ялӗнче ҫуралнӑ. Чӑваш патшалӑх ял хуҫалӑх институтӗнче, Чӑваш патшалӑх университетӗнче вӗреннӗ. Инженер-механикра, чӑваш чӗлхи учителӗнче, Чӑваш наци музейӗнче ӑслӑлӑх ӗҫченӗнче тарӑшнӑ.
Таврапӗлӳлӗхпе кӑсӑкланать, 20-е яхӑн кӗнеке авторӗ, «Виръял» юхӑма ертсе пырать.
+7.3 °C