Хӗрлӗ Чутай округӗнчи Ҫӗнӗ Атикассинче пурӑнакан Клавдия Ижетникова 101-мӗш ҫуралнӑ кунне паллӑ тунӑ.
Вӑл ача чухне вӗрентекен пулма ӗмӗтленнӗ. Ӗмӗтне пурнӑҫланӑ. Анчах 1942 ҫулта вӑл хӑйӗн ирӗкӗпе фронта кайнӑ. Унта аманнӑ, киле кӑкӑр тӗлӗнчи виҫӗ ванчӑкпа таврӑннӑ. Кун хыҫҫӑн Клавдия шкулта ачасене малалла вӗрентнӗ.
Паянхи кун Клавдия Гавриловна виҫӗ ачипе, ултӑ мӑнукӗпе, 11 кӗҫӗн мӑнукӗпе савӑнса пурӑнать.
Элӗк округӗнчи Чулкаҫ ялӗнче пурӑнакан Андрей Аркадьев раштавӑн 6-мӗшӗнче 101 ҫул тултарнӑ. Вӑл колхозниксен ҫемйинче ҫуралнӑ, 1942 ҫулхи ака уйӑхӗнче вӑрҫа кайнӑ. Ҫар училищинче вӗреннӗ хыҫҫӑн вӑл фронта лекнӗ. Паттӑрлӑх кӑтартнӑшӑн ӑна I степень Тӑван ҫӗршыв вӑрҫин орденӗпе чысланӑ. Тӑван ялне 1948 ҫулта тӑврӑннӑ. Ҫав ҫулах ҫемье ҫавӑрнӑ. Мӑшӑрӗпе Нонна Семеновнӑпа икӗ хӗр те пӗр ҫуратса ӳстернӗ.
Вӑрнар округӗнчи Мӑчамӑш ялӗнче пурӑнакан фронтовик Павел Князев 100 ҫулхи юбилейне паллӑ тунӑ.
Павел Иванрвич Тӑван ҫӗршывӑн Аслӑ вӑрҫи вӑхӑтӗнче I Беларуҫ фронтӗнче ҫапӑҫнӑ, Хӗвеланӑҫ Прусси операцине хутшӑннӑ. Ҫӗнтерӗве вӑл Кенигсбергра кӗтсе илнӗ. Фронтран таврӑнсан «Победа» колхозра 25 ҫул ӗҫленӗ. Тӳрӗ чунпа ӗҫленӗшӗн ӑна орденсемпе, медальсемпе чысланӑ.
Чӑваш Енри коммунистсем Хӗрлӗ Чутай округӗнчи Хурапыр ялӗнче Сталин бюстне вырнаҫтарнӑ. Ӑна Тӑван ҫӗршывӑн Аслӑ вӑрҫине хутшӑннӑ, Хӗрлӗ Ҫӑлтӑр орден кавалерӗн Ефим Николаевич Дадюковӑн килӗ умне лартнӑ.
Бюста Николай Шемякин скульптор Дадюков мӑнукӗн укҫипе хатӗрленӗ. Округри коммунистсем те пулӑшу кӳнӗ.
Сӑмах май, Сталинӑн тепӗр бюсчӗ Канаш округӗнчи Вӑтапуҫ ялӗнче пур. Вӑл Шемякин килӗ умӗнче вырнаҫнӑ.
Патӑрьел округӗнчи Шӑнкӑртамра пурӑнакан Нурулла Резяпов авӑнӑн 27-мӗшӗнче 100 ҫул тултарнӑ.
Вӑл - Тӑван ҫӗршывӑн Аслӑ вӑрҫин ветеранӗ, фронта 17 ҫулта лекнӗ. Кайран Япони вӑрҫине хутшӑннӑ. Нурулла Велиуллович киле 1947 ҫулта кӑна таврӑннӑ.
Кун хыҫҫӑн вӑл тӗрлӗ ҫӗрте ӗҫленӗ: платникре, колхозра, склад заведующийӗнче. Тивӗҫлӗ канӑва тухсан ялти туберкулез пульницинче 20 ҫул вӑй хунӑ. Паянхи кун вӑл 23 мӑнукӗпе, 24 кӗҫӗн мӑнукӗпе савӑнса пурӑнать.
Етӗрнере пурӑнакан ветеран Надежда Танина 100 ҫул тултарнӑ. 18 ҫул тултарсанах ӑна Хӗрлӗ Ҫара илнӗ, хӗр зенитчицӑна вӗреннӗ хыҫҫӑн Мускаври фронта лекнӗ. Вӑрҫӑ пӗтсен кӑна киле таврӑннӑ вӑл.
Унӑн мӑшӑрӗ те Федор Танин Тӑван ҫӗршывӑн Аслӑ вӑрҫине хутшӑннӑ, Берлина ҫитнӗ. Вӗсем вӑрҫӑ хыҫҫӑн пӗрлешнӗ, икӗ хӗр ҫуратса ӳстернӗ.
Надежда Танина II степень Тӑван ҫӗршыв вӑрҫин орденне, «Германие ҫӗнтернӗшӗн» медале тивӗҫнӗ.
Шупашкарта пурӑнакан ветеран Леонид Егоров 100 ҫул тултарнӑ. Ӑна юбиляйпе саламлама тӳре-шара та килнӗ.
Леонид Иванович Мари Элте ҫуралнӑ. 10-мӗш класс хыҫҫӑн вӑл ҫар-инженери училищине вӗренме кӗнӗ. Тӑван ҫӗршывӑн Аслӑ вӑрҫи вӑхӑтӗнче вӑл баржӑсем пушатнӑ, ҫар госпиталӗнче разнорабочире ӗҫленӗ. 1942 ҫулта ӑна ҫар службине илнӗ, вӑл салтаксем валли казарма та тунӑ. 1962-2969 ҫулсенче Леонид Егоров стратеги пӗлтерӗшлӗ ракета ҫарӗсенче службӑра тӑнӑ. Пӗтӗмӗшле ӗҫ стажӗ унӑн – 40 ҫул ытла.
Етӗрне хулинче пурӑнакан ветеран Иван Ермолаев 105 ҫул тултарнӑ. Иван Васильевич Йӗпреҫ районӗнчи Пысӑк Упакасси ялӗнче колхозниксен ҫемйинче ҫуралнӑ. 1939 ҫулта ӑна салтака илнӗ. Киле таврӑнма ӗлкӗреймен - вӑрҫӑ пуҫланнӑ. Вӑл Чехословакие ирӗке кӑларнӑ ҫӗре хутшӑннӑ. Ҫӗнтерӗве Хемниц хулинче кӗтсе илнӗ. 1946 ҫулта аслӑ старшинана демобилизациленӗ.
Иван Васильевича I степень Тӑван ҫӗршыв вӑрҫин орденӗпе, «Паттӑрлӑхшӑн» медальпе чысланӑ.
Йӗпреҫ округӗнчи Алшик ялӗнче пурӑнакан ветерана Василий Иванова киле пырса Ҫӗнтерӳ кунӗпе саламланӑ, концерт лартса панӑ. Урамра лайӑхах мар ҫанталӑк хуҫаланнӑ пулсан та концерт ветеранӑн кӑмӑлне ҫӗкленӗ.
Вӑрҫӑ пуҫланнӑ чухне Василий Иванов 15 ҫулта кӑна пулнӑ. Фронта вӑл 17-ре кайнӑ, Инҫет Хӗвелтухӑҫ фронтӗнче пулнӑ. 1945 ҫулта Ҫӗнтерӳ кунне питӗ лайӑх астӑвать. Пилоткӑсем ҫӳлелле вӗҫнӗ, «Ура!» кӑшкӑрнӑ. Ҫавӑнтан пӗлнӗ вӑл вӑрҫӑ пӗтнине.
Василий Иванович халӗ 98 ҫулта. Вӑрҫӑ ҫулӗсене вӑл куҫҫуль витӗр аса илет.
Концерт кадетсем марш утнипе, вӑрҫӑ юррисем янӑранипе вӗҫленнӗ.
Элӗк округӗнчи Чулкаҫ ялӗнче пурӑнакан ветерана Андрей Аркадьева килӗ умне пырса Ҫӗнтерӳпе саламланӑ, концерт лартса панӑ. Патшалӑх автоинспекцийӗн ӗҫченӗсем Ҫӗнтерӳ ялавӗн копине, 30 метр тӑршшӗскере, ветеран патне илсе ҫитернӗ.
«Священная война» юрӑ шӑраннӑ май инспекторсем ялава сарса хунӑ, Андрей Аркадьевича тата унӑн мӑшӑрне Нонна Семеновнӑна ҫапла каланӑ: «Равнение на середину!» Ветеран вӑрҫӑ вӑхӑтне аса илнӗ, Новороссийск патӗнче аманни ҫинчен каласа панӑ.
Ҫанталӑк ҫумӑрлӑ тӑрсан та пултарулӑх коллективӗ ватӑсене патриотлӑх юррисемпе савӑнтарнӑ. Куракансем ял ҫыннисем пулнӑ.
+0.3 °C