К.В. Иванов ячӗллӗ Чӑваш патшалах академи драма театрӗ ҫамрӑксене Мускава вӗренме яма суйласа илессине эпир унччен пӗлтернӗччӗ-ха. Халӗ эпир телейлисем камсем иккенне те пӗлтӗмӗр. Ун пирки Марина Карягина халах тетелӗнчи хӑйӗн страницинче пӗлтернӗ.
Мускаври Щукин ячӗллӗ Театр институтӗнче Анастасия Азанова, Александр Кузьмин, Елена Михайлова, Степан Никифоров, Анастасия Пашкова, Нина Яковлева Мускавра тӳлевсӗр вӗренӗҫ. Тепӗр тӑватӑ ҫултан вӗсем К.В.Иванов ячӗллӗ Чӑваш патшалӑх академи драма театрне таврӑнӗҫ.
Паян, ҫӗртме уйӑхӗн 27-мӗшӗнче, 15 сехетре Чӑваш Енӗн Наци вулавӑшӗнче «ВӐХӐТ. КИНО. ПУРӐНӐҪ» тематика каҫне йыхравлаҫҫӗ.
Вулавӑш ӗҫчене Антонина Андреева халӑх тетелӗнче пӗлтернӗ тӑрӑх, Чӑваш автономи облаҫне йӗркелесе яраканӗсенчен пӗрин, Ҫеҫпӗл Мишши, пурнӑҫӗ ҫинчен ӳкернӗ «Ҫеҫпӗл» илемлӗ фильм ӳкернӗренпе 55 ҫул пулать.
Тематика каҫне пяан ирттерме палӑртни ахальтен мар. Паян — Ҫеҫпӗл рольне калӑпланӑ Иосиф Дмитриев-Трер ҫуралнӑ кун.
Республика кунӗнче Чӑваш Республикин тава тивӗҫлӗ артистки Ирина Шоркина та килнӗ. Вӑл хальхи вӑхӑтра Мускавра пурӑнать.
Артистка ятарласа Мускавран уява Етӗрне хулине килнӗ. Вӑл ҫак тӑрӑхра ҫуралса ӳснӗ.
«Республика кунӗ Шупашкарта кӑна мар, тӑван Етӗрнере те иртрӗ. Унта вӑрттӑн, никама систермесӗр кайрӑм. Ҫапах ҫынсем палласа сӑн ӳкерӗнме пычӗҫ», - ҫапла ҫырнӑ юрӑҫ халӑх тетелӗнчи хӑйӗн страницинче.
К.В. Иванов ячӗллӗ Чӑваш патшалӑх академи драма театрӗнче 9-15 ҫулсенчи ачасем валли «Театральное лето» (чӑв. Театр ҫӑвӗ) театр студийӗ уҫӑлӗ.
Ачасем театр ӳнерӗпе паллашӗҫ, чаршав хыҫӗнче пулса иртекен вӑрттӑнлӑхсене пӗлӗҫ, сцена ҫине тухмалли тумтир тата ытти ҫинчен ҫӗннине, хальччен илтменнине пӗлӗс.
Профессилле актерсем вӗсене сцена ҫинче артистла тытма вӗрентӗҫ. Унсӑр пуҫне ачасене хӑюллӑн калаҫма, хускалма, ушкӑнпа ӗслеме хӑнӑхтарӗҫ.
Программа виҫӗ сменӑран тӑрӗ. Театр смени ҫӗртме уйӑхӗн 16-30-мӗшӗсенче, утӑ уйӑхӗн 1-14-мӗшӗсенче тата ҫурла уйӑхӗн 11-22-мӗшӗсенче ирхи 9 сехетрен 15 сехетчен ӗҫлӗ.
Ыйтса пӗлмелли телефон номерӗ: (8352) 62-02-21.
Ӗнер, ҫӗртме уйӑхӗн 8-мӗшӗнче, чӑваш театрӗн мухтавӗ, тӗлӗнсе каймалла пултаруллӑ сцена ӑсти, РСФСР халӑх артистчӗ Нина Яковлева 85 ҫул тултарнӑ.
«Хаклӑ Нина Михайловна! Сире халӑх юратать, сирӗн пултарулӑхран тӗлӗнет, сирӗнпе мухтанать, савӑнать.
Кашни кун сирӗншӗн ырӑ тӗлӗнтермӗш илсе килтӗр. Пурнӑҫӑр такӑр та телейлӗ пултӑр. Пирӗнпе юнашар нумай-нумай ҫул савӑнса пурӑнмалла, ӗҫлемелле пултӑр», — тесе саламланӑ ӑна Чӑваш патшалӑх академи драма театрӗ халӑх тетелӗнчи хӑйӗн странцинче.
Чӑваш патшалӑх академи драма театрӗнче Мускаври Борис Щукин ячӗллӗ театр институтне вӗренме кӗме ӗмӗтленекенсене суйласа илмелли пӗрремӗш тур иртӗ. Артист пулас текенсене ҫӗртме уйӑхӗн 18-мӗшӗнче 12 сехетре хаклӗҫ.
Ҫамрӑксен пултарулӑхне хак параканни – асӑннӑ аслӑ шкулта ӗҫлекен Валерий Маркин. Вӑл – актер ӑсталӑхӗн кафедрин доценчӗ, «Актёр ӑсталӑхӗ» курсӑн илемлӗх ертӳҫи.
Студентсем Мускавра 4 ҫул вӗренӗҫ, унтан вӗсене Чӑваш патшалӑх академи драма театрӗ ӗҫе илӗ. Вӗреннӗ вӑхӑтра Чӑваш Ен стипенди тӳлесе тӑрӗ тата общежитипе тивӗҫтерӗ.
Чӑваш Ен Пуҫлӑхӗн Олег Николаевӑн Указӗпе килӗшӳллӗн наукӑра, литературӑра тата ӳнер ӗҫӗнче тарӑн тӗпчевсем тата пысӑк пахалӑхлӑ произведенисем хайланӑ ҫынсем патшалӑх стипендине илсе тӑрӗҫ. Кун пирки Чӑваш патшалӑх академи драма театрӗ халӑх тетелӗнчи хӑйӗн страницинче хыпарланӑ.
Пултаруллӑ ҫынсен йышӗнче Чӑваш академи драма театрӗн артисчӗсем те пур-мӗн: Алексей Герасимов тата Светлана Лукиянова
Паян Юрий Суриков артиста юлашки ҫула ӑсатнӑ.
Юрий Константинович — Чӑваш Республикин тава тивӗҫлӗ артисчӗ. Вӑл 40 ҫул ытла Чӑваш патшалӑх юрӑпа ташӑ ансамблӗнче ӗҫленӗ. Пултаруллӑ музыкант тӗрлӗ стиле, оркестр вӑрттӑнлӑхне, контрабаспа калассин кӑткӑс техника мелӗсене тата аван ӑнланнӑ, бас-гитарӑпа каланӑ.
Вӑл концертпа хамӑр ҫӗршывӑн тӗрле кӗтесӗнче ҫеҫ мар, чикӗ леш енче те нумай хутчен пулнӑ.
Чӑваш патшалах оперӑпа балет театрӗнче ӗҫлекен икӗ артиста «Чӑваш Республикин халӑх артисчӗ» ят панӑ.
Ят-сума тивӗҫнисем — Татьяна Бахтина вокалист (солист) тата Татьяна Прытченкова вокалист (солист).
Хисеплӗ ят парасси ҫинчен калакан 73-мӗш номерлӗ Хушӑва республика Элтеперӗ Олег Николаев ӗнер, ҫу уйӑхӗн 20-мӗшӗнче, алӑ пуснӑ. Документа республикӑн влаҫ органӗсен официаллӑ порталӗнче вырнаҫтарнӑ.
Чӑваш патшалӑх оперӑпа балет театрӗн артистне «Чӑваш Республикин тава тивӗҫлӗ артисчӗ» ят панӑ.
Ку хисепле ята Илья Гурьев вокалист тивӗҫнӗ. Ӑна театр ӳнеринч тава тивӗҫлӗ ӗҫсемшӗн чыслас тенӗ.
Илья Гурьев 1986 ҫулта ҫуралнӑ. 2021-2005 ҫулсенче Вологдӑри музыка училищинче дирижёрпа хор уйрӑмӗнче вӗреннӗ, 2005-2010 ҫулсенче Чӑваш патшалӑх университетӗнчи ӳнер факультетӗнче ӑс пухнӑ.
2009 ҫултанпа Чӑваш патшалӑх оперӑпа балет театрӗнче ӗҫлеме пуҫланӑ.
-10.7 °C