ЧР вӗренӳ министрӗн тепӗр ҫум пулӗ. Ҫапла хушу кӑларнӑ ЧР Элтеперӗ Олег Николаев.

Министр ҫумӗ икӗ пая ерте пырӗ. Вӗсем ҫамрӑксен политики, ҫамрӑксен юхӑмӗн, патриотлӑх воспитанийӗн аталанӑвӗ енӗпе ӗҫлеҫҫӗ.

Хальхи вӑхӑтра Дмитрий Захаров министрӑн пӗрремӗш ҫумсӑр пуҫне тепӗр икӗ ҫум пур. Ҫӗнӗ должноҫе кам йышӑнасси хальлӗхе паллӑ мар.

ЧР Патшалӑх Канашӗн патшалӑх строительстви тата вырӑнти хӑйтытӑмлӑх енӗпе ӗҫлекен комитечӗ саккун проектне сӗннӗ: иноагентсене Тӗп суйлав комиссийӗн пайташӗ пулма чармалла.

Ку проекта ырласан Тӗп суйлав комиссийӗн пайташне иноагентсен йышне кӗртсен вӑл тӳрех ӗҫлеме пӑрахӗ.

Сӑмах май, Патшалӑх Канашӗн черетлӗ сессийӗ нарӑсӑн 16-мӗшӗнче пулӗ. Ку саккун проектне унта пӑхса тухӗҫ-и е ҫук-и - паллӑ мар.

poembook.ru сайтри сӑн

Синоптиксем пӗлтернӗ тӑрӑх, ҫитес эрнере ҫанталӑк сивӗрех пулӗ. Эрне 7 градус сивӗрен пуҫланӗ. Ҫӗрлесерен 9 градус таран сивӗтӗ.

Канмалли кунсем тӗлне палӑрмаллах сивӗтӗ. Кӑнтӑрла термометр 8 градус кӑтартӗ, ҫӗрле - 15 градус. Ҫил ҫеккунтра 6 метр хӑвӑртлӑхпа вӗрӗ.

"Советский Чувашия" хаҫат сӑнӳкерчӗкӗ

Виктор Чугаров-Чалтӑр Чӑваш чӗлхи клубне ертсе пыма пӑрахнӑ. Ку хыпара Игорь Алексеев халӑх тетелӗнчи хӑйӗн страницинче пӗлтернӗ.

Игорь хыпарланӑ тӑрӑх, вӑл ку яваплӑха хӑй ҫине илме темиҫе ҫынна сӗнсе пӑхнӑ, анчах килӗшекен хальлӗхе тупӑнман.

Игорь Алексеев «Хыпар» издательство ҫуртӗнче ӗҫлекенсем ку яваплӑха хӑйсем ҫине илмӗҫ-ши тесе тӗмсӗлнӗ. Клубра хаҫат-журналта пичетленнӗ статьясене тишкерме пулать тесе шухӑшлать вӑл.

Поста вуланисем тӳлевсӗр ӗҫе туса пыма ҫӑмӑл маррине палӑртаҫҫӗ.

foto.cheb.ru сайтри сӑн

Шупашкарта Алькешре тата Кӑнтӑр поселокӗнче пурӑнакансене пӑшӑрхантаракан ыйтусенчен пӗри - икӗ поселока ҫыхӑнтаракан ҫул. Вӑл хӑҫан пулӗ?

Нумаях пулмасть тӳре-шара унти халӑхпа тӗл пулнӑ. Ҫынсем вӗсенчен ҫул хӑҫан пуласси пирки ыйтнӑ.

Проект экспертиза витӗр тухнӑ-мӗн. Кӗҫех "Стройка 21" фирмӑпа килӗшӳ алӑ пусӗҫ. Ҫула 2025 ҫулччен туса пӗтермелле.

sreda24.ru сайтри сӑн

Шупашкарти 32 ҫулти таксист ултавҫӑсен тӗлне лекнӗ. Ун патне саккас килнӗ: хӗре Канаша леҫсе ямалла.

Клиента кӗтсе ларнӑ чухне ун патне шӑнкӑрав килнӗ - хӗрӗн ӗҫри пуҫлӑхӗ-мӗн. Хайхискер уншӑн укҫа куҫарса парассине каланӑ. Ҫапла таксист картта номерне те, смспа килнӗ кодсене те пӗлтерне. Кун хыҫҫӑн унӑн номерӗ ҫинчен 24 пин тенкӗ ҫухалнӑ.

Ултавҫӑ кунпа ҫырлахман-ха. Вӑл каллех шӑнкӑравланӑ. Кун хыҫҫӑн картта ҫинчен тепӗр 9 пин тенкӗ ҫухалнӑ.

Ку тӗслӗх тӗлӗшпе пуҫиле ӗҫ пуҫарнӑ.

Суд приставӗсен архивӗнчи сӑн

Вӑрмар районӗнчи 51 ҫулти арҫын ачишӗн алимент тӳлеменнипе явап тытнӑ.

Алимент тӳлеменшӗн малтан ӑна административлӑ майпа явап тыттарнӑ. Анчах кун хыҫҫӑн та вӑл парӑма татма васкаман. Хайхискер ӗҫ тупма та тӑрӑшман.

Ҫапла унӑн парӑмӗ 1 миллион та 100 пин тенкӗ таран пухӑннӑ. Хальхинче те ӑна суд тунӑ. Ӑна 6 уйӑх ӗҫлесе татмалла тунӑ. Шалӑвӗн 5 проценчӗ патшалӑх хыснине кайӗ.

Вӗренӳ институчӗн сӑнӳкерчӗкӗ

Чӑваш Енри тата республика тулашӗнчи шкулсенче вӗренекенсем валли «Упрар тӑван чӗлхемӗре» оратор ӑсталӑхӗн конкурсне иртет. Унта 5-6-мӗш класӗсенче чӑваш чӗлхи вӗренекен ачасем хутшӑнаҫҫӗ.

Конкурса хутшӑнмалли темӑсем:

«Тавах сана, вӗрентекенӗм», «Ачалӑх – телейлӗ тӗнче», «Тӑван енӗм паттӑр ҫынсемпе пуян». Видеокалаҫу 2–4 минут тӑсӑлмалла, ӑна чӑвашла ҫырса илмелле.

Материалсене республикӑн Вӗренӳ институтӗнче йышӑнаҫҫӗ.

cap.ru сӑнӳкерчӗкӗ

Ҫӗмӗрлере ҫура хӗр шоу-бизнесра ӗҫлет.

Ҫав хӗр – Екатерина Решнова. Вӑл унччен «СТС» телеканалӑн фильмӗсенче вылянӑ, шоусене хутшӑннӑ. Нумаях пулмасть Екатерина «Дети» камитри тӗп сӑнара калӑпланӑ.

2019 ҫулта Екатерина Герман Сидаковӑн Драма шкулӗнче вӗреннӗ. 2019 ҫултанпа вӑл Антон Чехов театрӗнче актрисӑра ӗҫлет. Унсӑр пуҫне Катя «Девушки с Макаровым» кинокартинӑра Марина сӑнарне калӑпланӑ, «Развод» фильмра – Олеся рольне, «Быть» фильмра – Варя.

cap.ru сӑнӳкерчӗкӗ

Нарӑс уйӑхӗн 9-мӗшӗнче пирӗн ҫӗршывра Граждан авиацийӗнче ӗҫлекенӗн кунӗ пулчӗ. Шупашкарти аэропортра тӑрӑшакан Владимир Скачков кӑҫал 72 ҫул тултарать. Вӑл 40 ҫул ӗнтӗ унта вӑй хурать.

Халӗ Владимир Яковлевич производствӑпа диспетчер службине ертсе пырать. Унта рейс каярах юлса пулассине е расписание улшӑну кӗртнине пуринчен малтан пӗлеҫҫӗ. Служба сывлӑшри 2100 метр ҫӳллӗшне тата ҫӗр ҫинчи 45 км инҫӗше сӑнаса тӑрать.

Владимир Скачков хӑй вӑхӑтӗнче «Ан-2» самолёт лётчикӗ пулнӑ, каярах «Ан-24» тата «Ту-134» самолётсемпе вӗҫнӗ. Пӗтӗм Совет Союзне, Европӑна ҫитнӗ, Арабсен Эмиратне, Турцие, Китая тата ытти ҫӗршыва вӗҫнӗ.

«Тӳпене юратни вӑл – ӗмӗрлӗхе. Мана тӗрлӗ саманара ӗҫлеме тиврӗ: Шупашкарти аэропорт расписанийӗнче 60 ытла йӗрке пулнине те, 2015 ҫулта вара пӗртен-пӗр Мускав рейсӗ ҫеҫ тӑрса юлнине те. Ун чухне аран-аран 30-40 пассажир пулнине те. Паян аэропорт ҫӗнӗлле аталаннишӗн савӑнатӑп», – тенӗ Владимир Сачков.