www.cap.ru сӑнӳкерчӗкӗ

Чӑваш Енӗн промышленность тата энергетика министрӗ Сергей Лекарев хӑйӗн ирӗкӗпе ӗҫрен кайнине Чӑваш халӑх сайчӗ пӗлтернӗччӗ-ха. Ку должноҫре тивӗҫе пурнӑҫлама Марат Якушева шаннӑ.

«Марат Рифкатович экономикӑн чӑн секторне аван ӑнланать, юлашки ҫулсенче вӑл Шупашкарти аш-какай комбинатне ӑнӑҫлӑ ертсе пычӗ», — ырласа ҫырнӑ республика ертӳҫи Олег Николаев.

Чӑваш Енӗн премьер-министрӗ Сергей Артамонов хыпарланӑ тӑрӑх, Марат Якушев республикӑри промышленность предприятийӗсене чӗрӗк ӗмӗр ытла ертсе пынӑ.

islamnews.ru сӑнӳкерчӗкӗ

Азербайджанра ҫывӑх тӑвансене мӑшӑрланма чарнӑ. Пирӗншӗн, чӑвашсемшӗн (чӑвашсемшӗн кӑна-и, вырӑссемшӗн те) кун пек хыпар тӗлӗнмеллисен йышӗнчен-ха. Ара, пирӗн халӑхӑмӑр ун пек аташмасть. «Ҫичӗ ӑру таран хутшӑнса пурӑнмалла, ҫичӗ ӑру таран пӗрлешме юрамасть», — тесе кукамай хамӑра та калатчӗ.

Иккӗмӗш сыпӑкри тӑвансене мӑшӑрланма кӑҫалхи утӑ уйӑхӗнченпе чарнӑ хыҫҫӑн Азербайджанра ҫемье ҫавӑрнисен шучӗ икӗ хут чакнӑ. Асӑннӑ уйӑхра унта 2694 мӑшӑр ҫемье ҫавӑрнӑ, ку вӑл ҫӗртме уйӑхӗнчинчен икӗ хута яхӑн сахалрах-мӗн.

cap.ru сайтри сӑн

ЧР промышленноҫ тата энергетика министрӗ Сергей Лекарев хӑйӗн ирӗкӗпе должноҫрен кайнӑ. ЧР Элтеперӗ Олег Николаев халӑх тетелӗнчи страницинче пӗлтернӗ тӑрӑх, ку вӑл урӑх ӗҫе куҫнипе ҫыхӑннӑ.

Сӑмах май, Чӑваш Енре Промышленноҫ министерствине 5 ҫул каялла, Олег Николаев Элтепер пулса тӑрсан, йӗркеленӗ. Ку таранччен унта нумай министр улшӑннӑ, Сергей Лекарев улттӑмӗш пулнӑ. Унччен Игорь Воропаев, Александр Доманин, Евгений Герасимов, Александр Кондратьев, Борис Марковцев министр пулнӑ.

Сергей Лекарев биографийӗпе тӗплӗнрех РУВИКИн чӑваш уйрӑмӗнче паллашма пулать.

cap.ru сайтри сӑн

Суйлав комиссийӗ сасӑлава пӗтӗмлетнӗ. Кандидатурине хӑй тӗллӗн тӑратнӑ Олег Николаевшӑн сасӑлава килнӗ ҫынсен 67,06 проценчӗ сасӑланӑ (пӗтӗмпе 355 975 ҫын).

Иккӗмӗш вырӑнта — ЛДПР парти кандидачӗ Константин Степанов (14,23%). Виҫҫӗмӗш вырӑнта «Ҫӗнӗ ҫынсем» парти пайташӗ Максим Морозов (8,37%). «Пенсионерсен партийӗнчи» Владимир Ильиншӑн 29 517 ҫын сасӑланӑ (5,56%). Юлашки вырӑнта «Симӗссисен» партийӗнчи Владимир Савинов, уншӑн 16 704 ҫын сасӑланӑ (3,15%).

Ҫӗнӗ Шупашкарта пурӑнакан Никита Кунов «Ну-ка, все вместе!» телекӑларӑма хутшӑнать.

Никита – артист тата музыка продюсерӗ. Хальхи вӑхӑтра вӑл Чӑваш Енре мар, Мускавра пурӑнать.

Ҫак кунсенче кӑларӑмӑн 7-мӗш сезонӗ пуҫланать. Хамӑрӑн ентеше жюри йышӗнче курӑпӑр.

"Контактри" сӑн

Шупашкар хӗрӗ Мария Комарова ТНТ каналпа кӑтартакан «Погоня» кӑларӑма хутшӑннӑ.

Кӑларӑм ыран, авӑнӑн 14-мӗшӗнче, эфира тухӗ.

Мария – кулӑш ӑсти, стендап-комик тата блогер. Студент чухне вӑл КВНра вылянӑ. Анчах ку проект уншӑн – ҫӗнӗлӗх.

«Погоня» кӑларӑма хутшӑнакансен (ҫак йышра – артистсем, блогерсем) хӑвалакансенчен тармалла. Кама тытаймаҫҫӗ – ҫав ҫӗнтерет.

Кӑларӑм 80 минута тӑсӑлать. Кашни минутшӑн 5 пин тенкӗ тӳлеҫҫӗ. Ҫапла ҫӗнтерӳҫӗ 80 минутра 300 пин тенкӗ выляса илеет.

«Чӑваш Ен» ПТРК тунӑ видео скринӗ

Ҫӗмӗрле округӗнчи Тӑванкасра ЧР ӑслӑлӑхӑн тава тивӗҫлӗ ӗҫченне, Чӑваш Республикин Патшалӑх премийӗн лауреатне, чӑваш литературоведне Георгий Федорова халалласа унӑн бюстне уҫнӑ.

Вӑл Канашри педучилище хыҫҫӑн шкулта ачасене 16 ҫул вӗрентнӗ. 1987 ҫулта Чӑваш патшалӑх гуманитари ӑслӑлӑхӗсен институтӗнче ӗҫлеме тытӑннӑ. 1997 ҫулта доктор диссертацине хӳтӗленӗ хыҫҫӑн И.Н. Ульянов ячӗллӗ ЧПУра ҫӗнӗ уйрӑм уҫнӑ.

Георгий Федоров – 250 ытла ӑслӑлӑх ӗҫӗн, монографисемпе вӗренӳ кӗнекисен, хрестоматисен авторӗ. Вӑл тӑван литературӑна та тӳпе хывнӑ: сӑвӑ-калав, романсем ҫырнӑ. Чӑваш ҫыравҫисен пӗрлӗхӗнче критика секцине ертсе пынӑ.

Бюста уҫнӑ чухне студентсем унӑн сӑввисене илемлӗ вуланӑ.

miloserdie.ru сайтри сӑн

Ҫӗмӗрле округӗнчи Вырӑс Улхаш ялӗнче тилӗ виллине тупнӑ та экспертизӑна янӑ. Вӑл урнӑ чирпе аптӑрани паллӑ пулнӑ.

Паянтан Вырӑс Улхашӗнче – карантин. Хушӑва ЧР Элтеперӗ Олег Николаев алӑ пуснӑ. Ялтан 1,6 ҫухрӑм радиусри территори ку чир енчен хӑрушӑ пулнине палӑртнӑ.

Хальхи вӑхӑтра ветеринарсем чире сарӑлма парас мар тесе ӗҫлеҫҫӗ. Карантин пулнӑ чухне чӗрчунсен куравне йӗркелеме, вӗсене сутма юрамасть.

Сӑмах май, авӑнӑн 9-мӗшӗнченпе Ҫӗнӗ Шупашкарта та карантин. Унта «Агния» сад юлташлӑхӗ патӗнче тилӗ виллине тупнӑ, вӑл урнӑ чирпе аптӑранине палӑртнӑ.

inosmi.ru сайтри сӑн

Шупашкарти 74 ҫулти хӗрарӑм ултавҫӑсене ӗненсе 3,5 миллион тенкӗ ҫухатнӑ.

Ун патне палламан ҫынсем ҫурла уйӑхӗн вӗҫӗнчех шӑнкӑравланӑ. «Домофон ӗҫлет-и?» – тесе кӑсӑкланнӑ. Ӑна вара чӑнах та юсамалла пулнӑ иккен. Хӗрарӑм смс-ҫырупа килнӗ кода пӗлтернӗ. Кайран ун патне татах палламан ҫынсем шӑнкӑравланӑ. Пӗри ҫӗнӗ телефон туянса тӗрлӗ счет ҫине укҫа куҫарма хушнӑ.

Ҫак кунсенче хӗрарӑм патне «ФСБ ӗҫченӗ» шӑнкӑравланӑ. Хльхинче такамсем пенсионеркӑн хваттерне сутма хӑтланнине хӑратнӑ. Хӗрарӑм кун пирки хӗрне пӗлтермен, тӳрех риэлтор патне ҫул тытнӑ. Вӑл хваттере мӗншӗн сутма палӑртнине ӑна та каламан.

Ултавҫӑсен серепине лекнине ӑнлансан ватӑ хӗрарӑм полицие кайнӑ.

«Контактри» сӑн

Етӗрне округӗнчи Аптекпуҫ ялӗнче пурӑнакан 102 ҫулти Антонина Никифорова суйлава хутшӑннӑ. Ун патне суйлав комиссийӗн пайташӗсем килех пынӑ.

Кинемей кандидатсемпе тӗплӗн паллашнӑ та бюллетень ҫинче хӑйӗн сассине палӑртнӑ. «Вӑт ку чӑн-чӑн ӑс-хал тата граждан позицийӗ!» - ҫапла палӑртнӑ округ хаҫачӗ «Ӗҫ ялавӗ».

Аса илтерер: паян Чӑваш Ен Элтеперӗн суйлавӗ пуҫланнӑ. Вӑл авӑн уйӑхӗн 14-мӗшӗччен пулӗ.