www.chgign.ru сӑнӳкерчӗкӗ

Чӑваш патшалӑх гуманитари ӑслӑлӑхӗсен институтӗнче пӗлтернӗ тӑрӑх, «СЛАВЯНО-ТЮРКСКИЙ МИР: ИСТОРИЯ И СОВРЕМЕННОСТЬ» (чӑв. Славянсемпе тӗрӗксен тӗнчи: истори тата хальхи самана) ятпа пӗтӗм Раҫҫейри ӑслӑлӑхпа практика конференцийӗ иртӗ. Халех мар, ҫулла. 2024 ҫулхи ҫӗртме уйӑхӗнче.

Конференцие Чӑваш Енӗн Вӗренӳ министерстви, Чӑваш патшалӑх гуманитари ӑслӑлӑхсен институчӗ тата «Пӗлӳ» Раҫҫейри обществӑн Чӑваш Енри уйрӑмӗ ирттерӗҫ.

Форум славянсемпе тӗрӗксен историйӗпе культурине тӗпчекен гуманитарисене пӗр ҫӗре пухӗ.

t.me/nikamran каналтан илнӗ сӑнӳкерчӗк

Куславкка муниципаллӑ округӗнчи Аманик ялӗнче халӑх инструменчӗсемпе паллаштаракан ӑсталӑх урокӗ иртнӗ.

Телеграмри «Пуринчен малтан. Ҫывӑрса юлмасан» каналта пӗлтернӗ тӑрӑх, Юрий Трифонов ертсе пыракан «Аккорд» ансамбль ачасене музыка инструменчӗсем пирки каласа панӑ, вӗсен кӑткӑс енӗсемпе, вӑрттанлӑхӗсемпе паллаштарнӑ.

Ӑсталӑх урокне хутшӑннӑ ачасенчен хӑшӗсем тӳрех кружока ҫырӑннӑ-мӗн.

cap.ru сайтри сӑн

Ҫитес ҫул нарӑс уйӑхӗн 10-мӗшӗнче Пӗтӗм Раҫҫейри «Йӗлтӗр йӗрӗ» иртӗ. Раштавӑн 5-мӗшӗнче патшалӑх пулӑшӑвӗсен порталӗнче унта хутшӑнакансен регистрацилеме пуҫланӑ. Вӑл 2024 ҫулхи нарӑс уйӑхӗн 8-мӗшӗччен пырӗ.

Ҫак мелпе ҫӗршыври 73 регионта пурӑнакансем регистрациленме пултараҫҫӗ. Заявлени парсан унӑн статусне ҫавӑнтах сӑнама пулать.

«Йӗлтӗр йӗрӗнче» 18 ҫултан кӗҫӗнреххисем 5 ҫухрӑм чупӗҫ. Аслисем вара 10 ҫухрӑм чупӗҫ. Тӗп старт Шупашкарта Станци ҫумӗнчи урамра 10-мӗш ҫуртра иртӗ.

culture.cap.ru сӑнӳкерчӗкӗ

Раштав уйӑхӗн 12-мӗшӗнче Чӑваш Енӗн Наци вулавӑшӗнчи «Варкӑш» литература клубӗнче «Ҫӗнӗ касӑн шухӑ яшӗсем» кӗнекене хӑтлӗҫ. Кӗнеке Чӑваш кӗнеке издательствинче кун ҫути курнӑ. 2022 ҫулта ҫав ӗҫ ачасемпе ҫамрӑксем валли ҫырнӑ алҫырусен республикӑри конкурсӗнче ҫӗнтернӗ.

Кӗнеке авторӗ — Юрий Исаев. Вӑл — учёнӑй, филологи наукисен докторӗ, Чӑваш Республикин Вӗренӳ институчӗн директорӗ.

Хӑтлав 18 сехетре пуҫланӗ.

forum.na-svyazi.ru сӑнӳкерчӗкӗ

Ӗнер, раштав уйӑхӗн 10-мӗшӗнче, Шупашкарти пӗр ҫемьери виҫӗ ҫынна сӗрӗм тивнӗ.

Васкавлӑ пулӑшу тухтӑрӗсенчен ҫемье каҫхи вунӑ сехет тӗлӗнче пулӑшу ыйтнӑ. Хулари Гузовский урамӗнчи 10 ҫуртри хваттерте пурӑнаканскерсене: 43 ҫулхи хӗрарӑма, унӑн 11 ҫулти хӗрне тата 3 ҫулти ывӑлне — сӗрӗм тивнӗ. Ачасене Республикӑри ача-пӑча пульницине илсе кайнӑ, вӗсен амӑшне — Васкавлӑ медицина пулӑшӑвӗ паракан пульницӑна.

Каҫхине ҫемье ваннӑйӗнче ҫӑвӑннӑ. Ҫав вӑхӑтра хваттерте газ плити тата колонки ӗҫленӗ. Сывлӑш лайӑх ҫӳременрен кил хуҫисене сӗрӗм тивнӗ.

РИА Новости архивӗнчи сӑн

«Ҫулталӑк тӑршшӗпех, хам ача кӗтнине пӗлнӗренпе, хама васкатма тӑрӑшмарӑм, тепӗр хутчен шухӑшласа пӑхма шанчӑк патӑм. Анчах пулмарӗ. Шел те, юлашки ҫулсенче мана ҫӑмӑл атлетика киленӳ пама пӑрахрӗ. Ҫапла спорт карьерине официаллӑ майпа вӗҫлетӗп. Сектора таврӑнмӑп», - тесе ҫырнӑ Анжелика Сидорова спортсменка хӑйӗн Телеграм-каналӗнче шӑматкун.

Ҫапла, вӑл спортран каять. Халӗ Анжелика – 32 ҫулта. Кӑҫал авӑн уйӑхӗн 27-мӗшӗнче вӑл ывӑл ҫуратнӑ. Сидорова – метр ҫӳллӗшне шӑчӑпа сикнӗ историри тӑваттӑмӗш хӗрарӑм. Вӑл – Токиора иртнӗ Олимп вӑййисен кӗмӗл призерӗ, тӗнче тата Европа чемпионки. 2014 ҫултанпа Анжелика ӑмӑртусенче Чӑваш Ене тата Мускава хӳтӗленӗ.

Инкеклӗ лару-тӑру министерстви тунӑ сӑн

Канмалли кунсенче Канаш муниципалитет округӗнчи Кӑшнаруй ялӗнче икӗ пӳлӗмлӗ хваттер ҫуннӑ. Инкек шӑматкун каҫхи 10 сехет ҫурӑра пулнӑ.

Ҫулӑм йывӑҫ урая тӗп тунӑ. Пушара сӳнтерсен 27 ҫулти арҫын виллине тупнӑ. Вӑл унта пурӑннӑ. Малтанлӑха пӗлтернӗ тӑрӑх, кил хуҫи ӑшӑнмалли электричество кӑмаки ҫутнӑ, вӑл юсавсӑр пулнӑ.

Инкеклӗ лару-тӑру министерстви пӗлтернӗ тӑрӑх, республикӑра канмалли кунсенче 19 пушар пулнӑ.

gubdaily.ru сайтри сӑн

Шупашкарта пурӑнакан 36 ҫулти хӗрарӑма суя мелпе ача-пӑча пособине илсе тӑнӑшӑн айӑпласшӑн. Ун тӗлӗшпе пуҫиле ӗҫ пуҫарнӑ.

ШӖМ пӗлтернӗ тӑрӑх, ҫак хӗрарӑм виҫӗ ҫул патшалӑхран уйӑхсерен пособи илсе тӑнӑ. Ҫак тапхӑрта вӑл упӑшкин тупӑшне кӑтартакан суя справкӑсем тӑратнӑ. Ҫапла вӑл ачи 3 ҫул тултариччен 300 пин тенкӗ ытла илнӗ.

Справка суя пулнине ШӖМӗн экономика хӑрушсӑрлӑхӗн тата коррупципе кӗрешекен пай ӗҫченӗсем тупса палӑртнӑ. Следстви пухнӑ материала Шупашкарти Ленин районӗн судне ярса панӑ.

Раштав уйӑхӗн пӗрремӗш декадинче хальхи пек сивӗ 2002 ҫултанпа пулман. Шӑматкун чи сивӗ кун пулнӑ – термометр вӑтамран 25,5 градус кӑтартнӑ.

Кӗҫӗр 23 градус сивӗ пулнӑ, кӑштах ӑшӑтнӑ. Анчах сивӗ ҫиле пула сивӗрех туйӑнать. Паян кӑнтӑрла 20 градус сивӗ пулӗ. Чи ҫиллӗ кунсем раштавӑн 12-13-мӗшӗсенче пулӗҫ.

Ыран хушӑран юр ҫӑвӗ. Юнкун хӗвел тухӗ, анчах пӗр кунлӑха кӑна. Кӗҫнерникун юр ҫӑвӗ.

Эрнекунпа шӑматкун юр ҫӑвӗ. Икӗ кунра 15 см хулӑнӑш юр ҫума пултарать. Эрне вӗҫнелле термометр 7-12 градус сивӗ кӑтартӗ, ҫил лӑпланӗ.

Малтанлӑха пӗлтернӗ тӑрӑх, ҫитес эрнере ӑшӑтӗ. Ҫапла уйӑх вӗҫӗчченех пулӗ. Юн хулӑнӑшӗ ӳссех пырӗ.

cap.ru сӑнӳкерчӗкӗ

Раштав уйӑхӗн 8-мӗшӗнче Чӑваш Енӗн Культура тата ӳнер институтӗнче «Книга моих путешествий» (чӑв. Манӑн ҫулҫӳревӗн кӗнеки) проекта хутшӑннӑ ачасемпе тӗлпулу иртнӗ.

Экскурси турне хутшӑннӑ ачасем тӑван еспубликӑмӑрпа ҫывӑхах та тарӑнрах паллашма пултарнӑ. Проекта йӗркелекенсем культура, спорт, вӗренӳ, медиатехнологи, нимелӗх енӗпе 10 направлени хатӗрленӗ.

Тӗлпулӑва республикӑн культура министӗн пӗрремӗш ҫумӗ Татьяна Казакова ертсе пынӑ. Сумлӑ хӑнасен йышӗнче Чӑваш Енӗн халӑх артистки Августа Уляндина тата «Хитре» бренда пуҫарса янӑ Екатерина Малинина пулнӑ.

Ҫамрӑк туристсене «Подвиг тружеников Чувашии» кӗнеке, «Вышитая карта России» пазл атта тӗрлемелли пуху парнеленӗ.