Кӳкеҫпе Явӑш хушшинчи М-7 ҫулӑн сыпӑкне 2025 ҫулта реконструкци тума пуҫласси пирки ЧР Транспорт министерстви пӗлтӗр пӗлтернӗччӗ. Унта развязка тата 4 полоса пулмалла.

«Контактра» халӑх тетелӗнчи Росавтодорӑн ушкӑнӗнче пост айӗнче кун пирки ыйту пулнӑ. Ҫапларах хуравланӑ: М-7 ҫулӑн 642-659 ҫухрӑмӗсене 2029-2033 ҫулсенче реконструкцилеме пӑхса хӑварнӑ.

Сӑмах май, ҫак ҫул сыпӑкӗн реконструкци проектне 2019 ҫулта саккас панӑ, ӑна ырласа ҫирӗплетнӗ.

culture.cap.ru сайтран илнӗксӑнӳкерчӗк

Ф.П. Павлов ячӗллӗ музыка училищинче вӗренекенсем Елена Межова (Певчая) фолк-юрӑҫпа тӗл пулнӑ. Вӑл Раҫҫейри тӗрлӗ наградӑна тивӗҫме ӗлкӗрнӗ. Хальхинче «Звезда» телепроектра ӳкерӗнме кайма тухнӑ, хӑй пӗлӳ илнӗ вӗренӳ заведенине ҫула май тенӗ пек кӗрсе тухнӑ.

Юрӑҫ вырӑс фольклорне кӑмӑллать, автор юррисене ҫӗршыври тӗрлӗ музыка платформи ҫине вырнаҫтарать.

Ҫамрӑксене юрӑҫ сонграйтинг, продакшн, дистрибьюшн, монетизаци тата ытти япала мӗне пӗлтерни ҫинчен те каласа кӑтартнӑ.

Шупашкар муниципаллӑ округӗнчи Апаш тӑрӑхӗнче пурӑнакансем хӑйсен паллӑ ентеше Борис Алексеева, СССР халӑх артистне, асӑннӑ тӑрӑхри Паҫпак ялӗнче ҫуралса ӳснӗскере ырӑпа аса тытаҫҫӗ.

Апашри халӑх театрӗнче пӗлтернӗ тӑрӑх, 4 ҫул каялла театра Борис Алексеев ятне панӑ, 3 ҫул каялла халӑх артисчӗн ентешӗсем Борис Алексеев ячӗпе Паҫпак ялӗнче палӑк лартнӑ. Апаш халӑх театрӗн артисчӗсем чапа тухнӑ артист ятне тивӗҫтерес енӗпе ырӑ йӑлана малалла тӑсма шут тытнӑ, театр логотипӗпе ятарласа футболкӑсем туса хатӗрленӗ.

Антонина Андреева страницинчен илнӗ сӑнӳкерчӗк

Н.В. Никольский ячӗллӗ Шупашкар професси колледжӗнче 1 курсра вӗренекенсем паян Наци вулавӑшӗнчи «Чӗре йыхравӗ. Ҫеҫпӗл Мишшине халалласа» куравра пулнӑ . Экскурси хыҫҫӑн вӗсем «Ҫеҫпӗл-125» ӑс-хакӑл тата пултарулӑх программине хутшӑннӑ. Кун пирки вулавӑш ӗҫченӗ Антонина Андреева халӑх тетелӗнчи хӑйӗн страницинче пӗлтернӗ.

«Студентсем экскурси вӑхӑтӗнче тимлӗ итлерӗҫ, ҫавӑнпа программӑри ӗҫсене хавхаланса, тӗплӗн пурнӑҫларӗҫ, Ҫеҫпӗл сӑввисене те туйӑмлӑн вуларӗҫ.

Пулас педагогсем пурте маттур пулчӗҫ!» — хыпарланӑ Антонина Андреева.

cap.ru сӑнӳкерчӗкӗ

Пирӗн республикӑри авторсен коллективӗ культура тытӑмӗнче премие тивӗҫнӗ. Ӑна Михаил Мишустин премьер-министр аллинчен ЧР культура министрӗ Светлана Каликова тивӗҫнӗ.

Унпа пӗрле Чӑваш наци музейӗн директорӗ Ирина Меньшикова премие илнӗ. Вӗсем ӑна «Раҫҫейӗн тӗрленӗ картти» проекта пурнӑҫланӑшӑн тивӗҫнӗ.

Палӑртмалла: пӗтӗмпе 7 проект пурнӑҫланӑ 16 ҫын преми илнӗ. Унӑн пӗтӗмӗшле виҫи – 1 миллион тенкӗ.

Инкеклӗ лару-тӑру министерстви тунӑ сӑн

Шупашкарти Якимов ҫырминче пурӑнакан арҫын кӑвайт ҫинче апат пӗҫерсе пушар тунӑ. Унӑн хӑмаран ҫапса тунӑ пӳрчӗ ҫунса кайнӑ. Ку инкек ӗнер кӑнтӑрла пулнӑ. Юрать-ха, кил хуҫи хӑй, 65 ҫулти арҫын, чӗрех юлнӑ.

Тепӗр ҫур сехетрен Канаш округӗнчи пушарнӑйсен ҫулӑма сӳнтерме тивнӗ. Ҫатӑрка Ҫырми ялӗнче 76 ҫулти арҫыннӑн мунчи ҫунма пуҫланӑ. Пушарта сарай та ҫунса кайнӑ. Телее, суранланнисем пулман.

Кӳкеҫри сусӑр ачасен интернат шкулӗнче ике педагог ачана пусахласах сулахай алӑран сылтӑм алӑпа ҫырма вӗрентнӗ. Ку видеокамера ҫине лекнӗ.

Педагог ачана пӑвнӑ, аллине ҫатӑрласа тытса вӑйпах парта ҫумне пӑчӑртанӑ. Хӑш-пӗр ҫӗре тепӗр вӗрентекен те хутшӑннӑ.

ЧР Вӗренӳ министерстви ку тӗслех тӗлӗшпе комментари панӑ. Икӗ педагога та ӗҫрен кӑларнӑ. Вӗсене явап тыттарасшӑн.

Палӑртмалла: ку пӑтӑрмах пуличчен шкулта вӗрентекенсемпе «профессире ҫунса кайни» пирки калаҫу пулнӑ.

"Контактри" сӑн

Мари Элте пурӑнакан арҫынна Республикӑри кардиологи диспансерне илсе килнӗ. Вӑл хӑйне питӗ япӑх туйнӑ: йывӑррӑн сывланӑ.

Диагностика унӑн чӗрин клапанӗпе япӑх пулнине кӑтартнӑ. Операци тумасан арҫын темиҫе эрне ҫеҫ пурӑнма пултарнине каланӑ.

Кӳршӗ республика ҫыннине часрах операци тунӑ. Опытлӑ кардиохирургсен командине Николай Трофимов ертсе пынӑ. Операци 4 сехет пынӑ.

«Клапана юсаса мана пурнӑҫа каялла тавӑрчӗҫ», - пӗлтернӗ Иван ятлӑ пациент. Вӑл халӗ хӑйне аванах туять.

www.cap.ru сӑнӳкерчӗкӗ

Чӑваш Енри пултарулӑх коллективӗсем халӑх коллективӗ ята хӳтӗлӗҫ.

Карлач уйӑхӗн 21-30-мӗшӗсенче Республикӑри халӑх пултарулӑхӗн центрӗнче (вӑл Шупашкарти Трактор тӑвакансен культура ҫуртӗнче вырнаҫнӑ) Шупашкарти тӗп клуб тытӑмӗнчи, «Салют» культура ҫуртӗнчи, Вӑрмар тата Ҫӗрпӳ муниципаллӑ округсенчи халӑх коллективӗсен концерчӗсем иртӗҫ.

Кӑрлач уйӑхӗн 21-23-мӗшӗсенче Шупашкарти тӗп клуб тытӑмӗн йышӗнчи 7 коллективӑн пултарулӑхне хаклӗҫ. Ҫав шутра «Уяв» фольклор ансамблӗ, «Мадригал» академи камера хорӗ, «Нарспи» юрӑ ансамблӗ, «Сарпике» ташӑ ансамблӗ, «Тантӑш» ача-пӑча ташӑ ансамблӗ.

Кандинский нейросеть сӑнӳкерчӗкӗ

Усӑ курман ҫӗрсем кӑҫалхи кӑрлач уйӑхӗн 1-мӗшӗ хыҫҫӑн муниципалитет харпӑрлӑхне куҫӗҫ.

Хуҫасӑр ҫӗр пайӗ — хӑй вӑхӑтӗнче колхоз ҫӗре пулнӑ лаптӑк. Хӑй вӑхӑтӗнче ҫӗре ҫынсене валеҫсе тухрӗҫ. Хӑшӗҫем унпа уйрӑлса тухса фермер хуҫалӑхӗ йӗркелесе пӑхрӗҫ. Анчах ӗҫлесе кайма пурин те май килмерӗ. Ҫер пайне Куҫман пурлӑхӑн пӗрлехи патшалӑх реестрӗнче ҫыртарманнисем те пур.

Росреестрӑн Чӑваш Енри управленийӗнче пӗлтернӗ тӑрӑх, усӑ курман ҫӗр пайӗсене муниципалитет харпӑрлӑхне куҫарма халӗ унчченхи пек суд тӑрӑх ҫӳреме тивмӗ.