"Контактри" сӑн

Вологдӑра пурӑнакан хӗрарӑм нимӗҫ овчаркипе Мартӑпа Чӑваш Ене, Етӗрне тӑрӑхне, мӑнукӗ патне килнӗ. Йытӑ – унӑн шанчӑклӑ тусӗ, 12 ҫул пӗрле. Анчах пӗррехинче, йытта уҫӑлма кӑларсан, вӑл ҫухалнӑ. Хӗрарӑм кулянса ӳкнӗ, полицие кайса пулӑшу ыйтнӑ.

Темиҫе кунран полицин аслӑ лейтенанчӗ Эмиль Глазков 8 ҫухрӑмри ялта тупнӑ, ӑна машинӑна лартса хуҫи патне илсе килнӗ.

rutube.ru сайтри сӑн

Ҫӗмӗрлере пурӑнакан 25 ҫулти арҫын ют ҫӗршыври машина туянма шутланӑ. Вӑл тӗнче тетелӗнче пӗлтерӳ тупнӑ.

Кӗҫех вӑл «сутуҫӑпа» калаҫма тытӑннӑ. Килӗшӳ ҫырмалла тесе палламан ҫын унран укҫа ыйтнӑ та ыйтнӑ. Ҫапла арҫын вӑл калана счетсем ҫине 1 миллиона яхӑн тенкӗ куҫарнӑ. Анчах машинӑна кӗтсе илеймен.

Ку тӗслӗх тӗлӗшпе пуҫиле ӗҫ пуҫарнӑ.

saratov.sledcom.ru сайтри сӑн

Улатӑрта пурӑнакан 21 ҫулти хӗрарӑма 2-ри тата 3-ри хӗрӗсене хӗненӗшӗн айӑпланӑ. Ӑна тӗрмене хупмасӑр 3 ҫул та 1 уйӑхлӑха айӑпланӑ. Кунсӑр пуҫне унӑн 10 пин штраф тӳлемелле.

Суд палӑртнӑ тӑрӑх, хӗрарӑм ҫу уйӑхӗн 4-25-мӗшӗсенче пӗчӗк ачисене пӗрре мар хӗненӗ. Вӑл амӑшӗн тивӗҫӗсене йӗркеллӗ пурнӑҫламан.

Следстви вӑхӑтӗнче хӗрарӑм айӑпне йышӑннӑ. Следстви пынӑ вӑхӑтра ачасем ашшӗпе пурӑннӑ тесе каланӑччӗ унччен. Халӗ вӗсем социаллӑ учрежденире.

www.cap.ru сӑнӳкерчӗкӗ

Чӑваш Ен Элтеперӗ Олег Николаев вӑтам професси вӗренӗвӗн кунӗпе саламланӑ.

«Эсир, хастар чунлӑ та пултаруллӑ педагогсемпе наставниксем, хӑвӑрӑн тарӑн пӗлӗвӗрпе паха опытӑра ҫитӗнекен ӑрӑва парса, экономика отраслӗсене пысӑк ӑсталӑхлӑ кадрсемпе тивӗҫтерсе ҫӗршывӑмӑрӑн пуласлӑхне хывас ӗҫре пӗлтерӗшлӗ вырӑн йышӑнса тӑратӑр.

Сирӗн ӗҫӗр – професси ҫеҫ мар, чун туртни те. Эсир студентсене ҫи-тӗнӳсем тума хавхалантаратӑр, вӗсене хӑйсен пултарулӑхне туллин уҫса пама тата пурнӑҫра ӑнӑҫуллӑ пулма пулӑшатӑр», — тенӗ Элтепер республикӑн влаҫ органӗсен официалла порталӗнче вырнаҫтарнӑ саламра.

Сӑмах май каласан, паянвӑтам професси вӗренӗвӗн тытӑмӗнче 1500 ытла преподавательпе производство вӗрентӳҫи вӑй хурать иккен.

mintrud.cap.ru сӑнӳкерчӗкӗ

Ӗнер, Пӗтӗм тӗнчери втатисен кунӗнче, республикӑн ӗҫ тата социаллӑ хӳтлӗх министрӗ Алёна Елизарова отрасльти ветерансемпе тӗл пулнӑ. Уява халалланӑ ҫавра сӗтеле Шупашкар хулинчи халӑхан социаллӑ ыйтӑвӗсене тивӗҫтерекен комплекслӑ центрта ирттернӗ.

Министр ӗҫ ветеранӗсем обществӑра пысӑк вырӑн йышӑннине палӑртса, вӗсен опычӗ социаллӑ сферӑра та кирлине асӑнса хӑварнӑ.

«Эпир сирӗн эткерлӗхе хаклама тата упраса хӑварма тивӗҫ», — тенӗ министр.

mintrud.cap.ru сӑнӳкерчӗкӗ

Чӑваш Енре чи хастар кӗмӗл волонтерсене палӑртнӑ. Конкурса пӗтӗмпе 32 хастар ватӑ хутшӑннӑ. Вӗсене 4 номинацире хакланӑ.

«Ҫӗнтерӳ волонтерӗ» номинацире Етӗрне тӑрӑхӗнчи Мария Кольцова «Хӑвӑн ӑшшуна ыттисене парнеле» программӑпа палӑрнӑ.

«Волонтер-наставник» номинацире Элӗк тӑрӑхӗнчи Виталий Ефимов «Шахмат — ӑнӑҫу ҫулӗн шанчӑклӑ ҫӑлкуҫӗ» практикӑпа мала тухнӑ. Шупашкарти Ирина Александрова — чи лайӑх «Эко-волонтёр». «Социаллӑ экспресс» номинацире те Шупашкарти кинемей ҫӗнтернӗ¸ вӑл — Алевтина Степанова. Ватӑ ҫын «Ретрогварди» театр студине ҫӳрет.

Ҫӗнтерӳҫӗсене кӗмӗл волонтерсен республикари форумӗнче чыслӗҫ. Вӑл авӑн уйӑхӗн 9-мӗшӗнче 11 сехетре Ҫамрӑксен театрӗнче пуҫланӗ.

Тверь облаҫӗнчи Васькино яле ҫывӑхӗнче шыравҫӑсем 1941 ҫулта вилнӗ салтакӑн, Чӑваш Енре ҫуралнӑскерӗн, ӳт юлашкисене тупнӑ. Ҫак кунсенче вӗсем унӑн ывӑлӗпе тӗл пулса ашшӗн медальонне панӑ.

Ҫак салтак Иван Васильевич Волков Вӑрнар районӗнчи Мӑн Явӑш ялӗнчен пулнӑ, 1910 ҫулта ҫуралнӑ. Вӑл стрелоксен дивизийӗнче ҫапӑҫнӑ.

Ывӑлӗ Владимир Иванович ашшӗне астумасть. Анчах унӑн вӑл 1933 ҫулта ҫырнӑ ҫырӑвӗ пур. Ӑна тата медальон бланкне танлаштарнӑ та – пӗр почерках. Ҫапла салтак унӑн ашшӗ пулнине палӑртма май килнӗ.

e-mordovia.ru сайтри сӑн

Юпа уйӑхӗн 2-мӗшӗнче республикӑра сирена янӑрӗ. Халӑха лӑпкӑ пулма ыйтаҫҫӗ: ку тӗрӗслев кӑна пулӗ.

Сиренӑсем 10 сехет те 40 минутра тата 11 сехетре янӑрӗҫ. Ҫак сасса илтсен ним те тумалла мар.

Сӑмах май, юпа уйӑхӗн 3-4-мӗшӗсенче респуликӑра инкеклӗ лару-тӑру службисен команда-штаб тренировки иртӗ.

"Контактри" сӑн

Патӑрьел округӗнчи Турханти психоневрологи интерначӗ территорие хӑтлӑлатас енӗпе иртнӗ конкурсра ҫӗнтернӗ. Унта ӗҫлекенсем территорие хитрелетес тесе тӑрӑшаҫҫӗ.

«Кунта пурӑнакансен тӗрлӗ сӑлтава пула кил ҫук, интернат тулашне тухса ҫӳреймеҫҫӗ. Хитре, чечек ҫурнӑ клумбӑсене курсан вӗсен кӑмӑлӗ ҫӗкленет», - тенӗ интернат директорӗ Наталия Дружинина.

Кандинский нейросеть ӳкерчӗкӗ

Чӑваш Енӗн Шалти ӗҫсен министерстви массӑллӑ информаци хатӗрӗсене тишкерекен тата халӑхпа ҫыхӑну тытакан специалиста ӗҫе илессине пӗлтернӗ.

Асӑннӑ енӗпе тӑрӑшас кӑмӑллӑ ҫыннӑн ӗҫ опычӗ 5 ҫултан кая мар пулмалла. Судпа айӑпланнӑ ҫын та унта ӗҫе вырнаҫаймӗ.

Информаци тата халӑхпа ҫыхӑну тытакан пайра ӗҫлес ӗмӗтлӗ ҫыннӑн халӑхпа ҫыхӑну тытас енӗпе аслӑ пӗлӳллӗ пулмалла.

Ӗҫ укҫи (тупӑшран илекен налука шута илмесен) 26 953 тенкӗ.

Ыйтса пӗлмелли телефон номерӗсем ҫапларах: 8 999 756 00 21, 8 (8352) 24-14-30