Шупашкарӑн 555 ҫулхи юбилейӗ тӗлне Чӑваш кӗнеке издательстви кӗнеке-альбом кӑларнӑ. Вӑл - вырӑсла тата чӑвашла. Пӗтӗмпе - 44 страница.

Кӗнеке авторӗ - географи ӑслӑлӑхӗсен кандидачӗ Зоя Трифонова. Умсӑмаха тата хыҫсӑмаха Владимир Степанов ҫырнӑ. Ӳнерҫи - Наталия Орлова.

Кӗнекере Шупашкарӑн историне 1469 ҫултанпа ҫырса панӑ.

culture.cap.ru сӑнӳкерчӗкӗ

Ҫитес уйӑхра пирӗн республикӑна Пушкӑрт Республикинчи артистсем килӗҫ. Унти «Нур» театр пирӗн тӑрӑхра гастрольпе пулӗ.

Ӗхпӳри патшалӑх театрӗ тутар театрӗ шутланать. Шупашкарта ҫав коллектив авӑн уйӑхӗн 26-28-мӗшӗсенче пулӗ.

К.В. Иванов ячӗллӗ Чӑваш патшалӑх академи драма театрӗн сцени ҫинче хӑнасем «Галиябану», «Там, где сбываются мечты» тата «Фатима» спектакльсем кӑтартӗҫ.

t.me/chuv_kray каналтан илнӗ сӑнӳкерчӗк

Шупашкар хулине йӗркеленӗренпе 555 ҫул ҫитнине халалласа «Чебоксарский хит» (чӑв. Шупашкар хичӗ) юрӑ конкурсӗ иртессине эпир унччен пӗлтернӗччӗ-ха. Аса илтерер: конкурса хутшӑнакансен хӑйсен ӗҫӗсене е вырӑсла, е чӑвашла тӑратмалла пулнӑ.

Унта «Сказки Гримм» ушкӑнӑн тата Ольга Журавлёван композицийӗ ҫӗнтернӗ. Уншӑн 524 ҫын, е сасӑлава хутшӑннисенчен 24,83 проценчӗ, сасӑланӑ.

Ҫӗнтерӳҫӗ-юрӑпа артистсем Шупашкар 555 ҫул тултарнине халалланӑ гала-концертра сцена ҫине тухӗҫ.

Ирина Филатова депутат страницинчен илнӗ сӑнӳкерчӗк

Чӑваш Енри артистсене пули-пулми тумланса тухма чарӗҫ. Дресс-кода тӗрлӗ ҫулхисем валли ирттерекен мероприятисен вӑхӑтӗнче пӑхӑнмалла. Кунта сӑмах тӗпрен илсен патшалӑхӑн тата муниципалитетсен площадкисенчеи мероприятисем пирки пырать.

Ҫӗнӗлӗх ҫинчен Раҫҫейӗн Патшалӑх Думин депутачӗ Ирина Филатова Телеграмра пӗлтернӗ.

Раҫҫейӗн Культура министерстви сцена ҫине тухакан артистсен килӗшӳллӗрех пулмалли пирки сӗнсе регионсене ҫыру янӑ. Сӗнӗве Раҫҫейӗн 12 регионӗнче, ҫав шутра Чӑваш Енре те, шута илме йышӑннӑ та. Хӑш-пӗр регионта (сӑмахран, Белгород облаҫӗнче) мероприятисен репетицине тӳре-шара хутшӑнать, артистсем сцена ҫине епле тухнине хаклать. Ун пек мелпе Байкал тӑрӑхӗнче, Калуга тата Волгоград облаҫӗсенче те усӑ курма тытӑнасшӑн.

Кӳкеҫре тата тепӗр умрал хатӗрлеме пуҫланине Чӑваш халӑх сайчӗ пӗлтернӗччӗ-ха.

Аса илтерер: Совет урамӗнчи 87-мӗш ҫурт стени ҫине «В бой идут одни старики» фильмри Маэстро рольне вылянӑ Леонид Быковӑн сӑнарне ӳкерсе хунӑ. Халӗ асӑннӑ урамри 63-мӗш ҫурт ҫине хӗр сӑнне вырнаҫтарнӑ. Алӑра вара Кӳкеҫен логотипне тытса тӑрать.

Пӗлӗтри акӑшсене «Хуркайӑк ҫулӗ» халаппа ҫыхӑнтарнӑ. Вӗсене сакӑр штук ӳкернине — вӗҫсӗрлӗхпе.

Ӗҫӗн художникӗ — Сергей Петров, графика дизайнерӗ, эскиза хатӗрлекенни — Артём Павлетич.

Ксения Кокель художник Атӑлҫи тӑрӑхӗнчи «ФормART» фестивале хутшӑнать. Унта вӑл «Мой дом – моя крепость». (чӑв. Манӑн кил — манӑн крепость) ӗҫе тӑратнӑ.

Ентешӗмӗр ӗҫӗшӗн сасӑлас тесен 8 (800) 301-50-23 тӳлевсӗр номерпе шӑнкӑравламалла та хутшӑнаканӑн номерне, 6 цифрӑна, суйламалла.

Сасӑлав ҫурла уйӑхӗн 1-мӗшӗнче пуҫланнӑ, 10-мӗшӗнче вӗҫленӗ.

Конкурса хутшӑнакан ӗҫе художник Шупашкарти Хевеш урамӗнчи 30-мӗш ҫурт ҫине вырнаҫтарнӑ.

culture.cap.ru сӑнӳкерчӗкӗ

Чӑваш Енӗн Наци вулавӑшӗ ҫамрӑк поэтсен «Мцыри» пӗтӗм Раҫҫейри XX уҫӑ фестивалӗн регионти тапхӑрне ирттерет.

Фестивале йӗркелекенӗсем «Мцыри» НП, «Потенциал нации» (чӑв. Наци хӑвачӗ) общество канашӗ, Мускаври культура ӗҫченӗсен профессие союзӗ, Литература ӗҫченӗсен «Русское литературное общество» (чӑв. Вырӑс литература обществи) ассоциацийӗ.

Ку фестивале шучӗпе 20-мӗш хут ирттерсен те суйлав турне Чӑваш Ен пуҫласа хутшӑнать. Вӑл куҫӑнсӑр тата куҫӑн тапхӑрсенчен тӑрӗ. Ҫурла уйӑхӗн 1-мӗшӗнчен пуҫласа авӑн уйӑхӗн 10-мӗшӗччен куҫӑнсӑр пай иртӗ. Унта Чӑваш Енре тата Атӑлҫи тӑрӑхӗнче пурӑнакан 14-27 ҫулсенчи ҫамрӑксем хутшӑнайӗҫ.

«Контактра» халӑх ушкӑнӗнчи «Чӑваш Республики» пабликран илнӗ сӑнӳкерчӗк

Вӑрнар районӗнчи Нурӑсри шкул-интернатра пуҫламӑш класс ачисене вӗрентекен Галина Захарова ҫамрӑксен туризмне аталантармалли конкурсра ҫӗнтерсе «Мускав – Раҫҫейӗн технологи тӗп хули» тура тивӗҫнӗ.

Ҫул ҫӳрев вӑхӑтӗнче Галина Николаевна истори палӑкӗсемпе, Мускавӑн хальхи вӑхӑтри ҫитӗнӗвӗпе паллашнӑ. Хӗрарӑм Криптографи музейӗнче пулса информацие хӳтӗлес ӗҫри ҫӗнӗ технологисем пирки пӗлнӗ. Роботсемпе интерактив занятийӗсене хутшӑннӑ, искусство ӑс-тӑнӗ енчен наука мӗн тери вӑйлӑ аталаннинчен тӗлӗннӗ.

Галина Захарова ВДНХ паркӗнчи архитектура сооруженийӗсене те килӗштернӗ. Европӑри пысӑк океанариумсенчен пӗринче, «Москвариумра», пулнӑ.

Ольга Иванован халӑх тетелӗнчи страницинчен илнӗ сӑнӳкерчӗк

Нумаях пулмасть Чӑваш кӗнеке издательствинче Улькка Эльменӗн «Интернетри юрату» кӗнеки кун ҫути курнӑ.

Издательствӑн редакторӗ Ольга Иванова халӑх тетелӗнчи хӑйӗн страницинче пӗлтернӗ тӑрӑх, Улькка Эльменӗн алҫырӑвӗ ачасемпе ҫамрӑксем валли чӑвашла ҫырнӑ произведенисен 2023 ҫулхи конкурсӗнче ҫӗнтернӗ.

«Улькка Эльменӗн ҫӗнӗ кӗнеки яшсемпе хӗрсемшӗн кӑна мар, ашшӗ-амӑшӗшӗн те интереслӗ, усӑллӑ пулӗ, мӗншӗн тесен автор повеҫре паянхи ҫивӗч ыйтусене хускатнӑ, кулленхи йывӑрлӑхсене татса памалли ҫул-йӗре тӗпченӗ, сӑнарсене ӗнентерӳллӗ калӑпланӑ», — тесе хыпарланӑ кӗнеке иззадтельствин ӗҫченӗ.

Чӑваш кӗнеке издательствин сӑнӳкерчӗкӗ

Чӑваш кӗнеке издательствинче «Юманлӑх ҫулҫӑ тӑкмарӗ» романӑн иккӗмӗш кӗнеки пичетленсе тухнӑ.

Издательствӑра хыпаралнӑ тӑрӑх, Алексей Афанасьевӑн «Юманлӑх ҫулҫӑ тӑкмарӗ» романӗ кивелми произведенисен шутне кӗрет. Чӑваш Республикин наци библиотеки хатӗрленӗ «Вуламалли 100 кӗнеке» списока та ахальтен лекмен вӑл. Вулакансем ыйтнипе Чӑваш кӗнеке издательстви ӑна тепӗр хут кӑларма йышӑннӑ. Пӗлтӗр пӗрремӗш кӗнеки кун ҫути курнӑ, кӑҫал — иккӗмӗшӗ.

Кӗнеке авторӗ – Тутарстанри Потап-Тӑмпӑрлӑ чӑваш ялӗнче ҫуралса ӳснӗ Алексей Афанасьев прозаик, поэт тата куҫаруҫӑ. Вӑл ҫамрӑк чух шкулта ачасене удмурт чӗлхине вӗрентнӗ. «Нарспи» поэмӑна, «Айтар» драмӑна тата ытти хӑш-пӗр произведение удмуртла куҫарнӑ.