«Контактри» сӑн

Чӑваш Енӗн маунтинбайк енӗпе пӗрлештернӗ команди Раҫҫейри ҫамрӑксен спартакиадинче ылтӑн медаль ҫӗнсе илнӗ.

Вӗсем ҫӗршыври 13 командӑна парӑнтарса пьедесталӑн чи ҫӳлти картлашки ҫине хӑпарнӑ. Иккӗмӗш вырӑна Мускав облаҫӗн команди тухнӑ. Виҫҫӗмӗш вырӑна вара Мусаври спортсменӗсем йышӑннӑ.

Командӑран уйрӑмах ҫак спортсменсене палӑртмалла: кросс-кантрире 21 ҫухрӑма парӑнтарса ылтӑн медаль ҫӗнсе илнӗ Элина Семенова тата пӑхӑр медале тивӗҫнӗ Алина Карлова, 25 ҫухрӑмлӑ дистанцире 6-мӗш вырӑн йышӑннӑ Никита Петров.

"Контактри" сӑн

Чӑваш Енри спортсменка Мальвина Петрова Суздальте 84 ҫухрӑм чупса ҫӗнтернӗ.

Дистанцие вӑл 9 сехет те 41 минут та 51 ҫеккунтра парӑнтарнӑ.

Палӑртмалла: ҫулсерен иртекен Golden Ring Ultra Trail 100 (GRUT) трейлинг фестивале 8 пин ытла спортсмен хутшӑннӑ. Вӗсен йышӗнче Мальвина финиша пӗрремӗш ҫитнӗ.

Ку дистанци GRUTри йывӑр трассӑсенчен пӗри шутланать, унта опытлӑ трейланнерсем хутшӑнаҫҫӗ.

"Правда ПФО" сӑнӳкерчӗкӗ

Чӑваш Ен йӗлтӗрпе роллер ҫулнетумалли контракта пӑрахӑҫланӑ. Ӗҫ хакӗ 1 миллиард тенке таран тӑнӑ. Ҫав ҫула туса пӗтерме те вӑхӑт ҫитнӗ, анчах Республикӑн перлехи заказчик служби Мускав облаҫӗнчи «Геолайн Технологии» обществипе контракта татнӑ.

Ҫула маларах Росстройконтроль тӗрӗсленӗ те кӑлтӑк тупса палӑртнӑ. Аялти сий татӑк-татӑкӑн ишӗлет иккен.

Унта, сӑмах май каласан, килес ҫулхи нарӑс уйӑхӗнче ҫӗршыв шайӗнчи биатлон ӑмӑртӑвне ирттерме палӑртнӑ. Вӑл хыпара Раҫҫейӗн биатлонистсен союзӗ 2025-2026 ҫулсенчи календарь планне тӗпе хурса хыпарланӑччӗ.

«Контактри» сӑн

Чӑваш Енри спортсменка Дина Александрова Мускавра иртнӗ «Пысӑк чупу фестивалӗнче» ҫӗнтернӗ. Вӑл 15 ҫухрӑма 50 минут та 57 ҫеккунтра парӑнтарса финиша пӗрремӗш ҫитнӗ.

Дина — вӑтам тата вӑрӑм дистанцисене чупакан спортсменка. Вӑл кросс енӗпе Раҫҫей чемпионкин, Раҫҫей спорт мастерӗн ятне ҫӗнсе илнӗ. Дина кӑҫалхи ака уйӑхӗнче Швейцарири Цюрих хулинче иртнӗ марафонра та ҫӗнтернӗ.

Палӑртма кӑмӑллӑ: «Пысӑк чупу фестивалӗнче» ҫӗнтернӗшӗн ӑна «Москвич» машина парнеленӗ.

pravdapfo.ru сӑнӳкерчӗкӗ

Шупашкарти «Спартак» стадиона укса тӳлесе кӗмелле. Чупма юратакансем унччен тӳлевсӗрех кӗнӗ, чун каниччен чупма пултарнӑ. Халӗ вара 1 сехетшӗн 130 тенкӗ тӳлемелле.

Ҫӗнӗ йӗрке ута уйӑхӗн 7-мӗшӗнчен вӑя кӗнӗ. Стадиона чупма пырас тесен малтан регистрациленмелле тата укҫа тӳлемелле иккен.

Чӑваш Ен прокуратури стадион укҫа тӳлеттерме йышӑнни саккунпа килӗшӳллӗн пулса пынипе пыманнине тӗрӗслеме йышӑннӑ.

«Контактри» сӑн

ШӖМре ӗҫлекен Ксения Васильева Пӗтӗм тӗнчери «Шурӑ каҫсем» марафонра ҫӗнтернӗ. Вӑл 20-22 ҫулсенчи спортсменкӑсемпе ӑмӑртнӑ. Ксения 42 ҫухрӑм та 195 метра 3 сехет те 1 минут та 38 ҫеккунтра парӑнтарнӑ.

Маршрут Санкт-Петербурги паллӑ вырӑнсем патӗнчен иртнӗ. Марафона 50 ытла ҫӗршыври 20 пине яхӑн спортсмен хутшӑннӑ.

Палӑртмалла: Ксения ачаранах спортпа туслӑ, вӑл триатлона, служба биатлонне тата ҫӑмӑл атлетикӑна юратать.

Людмила Михуткина ветерансен хушшинче иртнӗ ӑмӑртуран виҫӗ медальпе таврӑннӑ.

Хӗрлӗ Чутай округӗнчи спортсменка Беларуҫ Республикинче ҫӑмӑл атлетика енӗпе иртнӗ чемпионатра тупӑшнӑ.

Вӑл 75-79 ҫулсенчи хӗрарӑмсен йышӗнче ӑмӑртнӑ.

Пирӗҫ ентеш пьедесталӑн чи ҫӳлти картлашки ҫине виҫӗ хутчен тӑнӑ. Вӑл 100 метр чупса, сӑнӑ ывӑтса тата 5 пин метра хӑвӑрт утса ҫӗнтернӗ.

Спортсменсем Атӑл урлӑ ишсе каҫнине курас килет-и?

Шупашкарта «CHEBSWIM-2025» ӑмӑрту ҫӗртме уйӑхӗн 28-мӗшӗнче иртӗ. Унта профессионал спортсменсем тата ишме кӑмӑллакансем хутшӑнӗҫ. Вӗсем 2200 метр парӑнтарӗҫ.

Палӑртса хӑварар: хальччен Артур Димитриевӑн рекордне ҫӗнетекен пулман. Вӑл – тӗнче класлӑ спорт мастерӗ. Артур Атӑл урлӑ 29 минут та 52 ҫеккунтра ишсе каҫнӑ.

Надежда Лаврентьева архивӗнчи сӑнӳкерчӗк

Вӑрнар районӗнчи Ярмушка ялӗнче пурӑнакан 61 ҫулти Надежда Лаврентьева тӗнче чемпионки пулса тӑнӑ.

Китайри Тайбэй хулинче ҫу уйӑхӗн 17-30-мӗшӗсенче Ветерансен пӗтӗм тӗнчери вӑййи иртнӗ. Унта 107 ҫӗршыври 25 пин ветеран хутшӑннӑ.

Пирӗн ентешӗмӗр унта икӗ ылтӑн медаль ҫӗнсе илнӗ. Надежда Лаврентьева 5 тата 10 километра утассипе мала тухнӑ. Ӑна 30 градус шӑрӑх та хӑратман.

Тамара Дербушева. championat.com сӑнӳкерчӗкӗ

Раҫҫейӗн битатлонистсен союзӗ ҫӗнӗ, 2025-2026 ҫулти, ӑмӑртусен календарь планне ҫирӗплетнӗ. Хальхинче биалтонистсем 40 хутчен ӑмӑртӗҫ. Иртсе кайнӑ тапхӑрта календарьти плана 45 ӑмӑрту кӗртнӗччӗ. Спортсменсене ун чухлӗ ӑмӑртӑва хутшӑнма ҫӑмӑл мар. Иртсе кайнӑ тапхӑрта пӗртен-пӗр спортсмен, Тамара Дербушева, ҫеҫ кашнине хутшӑнса пынӑччӗ. Арҫынсем те сиктерннӗччӗ.

Пирӗншӗн, Чаваш Республикишӗн, ырӑ хыпар та пур. Раҫҫейӗн битатлонистсен союзӗн президенчӗ Виктор Майгуров 2026 ҫулхи нарӑс уйӑхӗнче Пӗтӗм Раҫҫейри ӑмӑртӑва пирен патра ирттерессине пӗлтернӗ. Унта Сочире иртекен Содружество кубокӗн Альфа-Банк тапхарне кайманнисем килӗҫ.