Шупашарти халӑхӑн социаллӑ ыйтӑвӗсене тивӗҫтерекен комплекслӑ центрӑн социаллӑ ӗҫченӗсен тӗрлӗ ватта пулӑшма тивет.

Евдокия Тихонова ятлӑ кинемей вара сӑвӑ ҫырма юратать. Сӑвӑ шӑрҫалакан ватӑ чӑвашла ҫырать. Ҫавна май вӑл хӑйӗн социаллӑ ӗҫченне Людмила Борисовӑна сӑвӑ вуласа кӗтсе илет.

Хӑйӗн сӑввисем урлӑ ватӑ ҫын социаллӑ ӗҫчене тав тунине палӑртать. Нумаях пулмасть вӑл ҫакӑн пек шӑрҫаланӑ:

«Эх Люда, Людочка,

Сан пеки никам та ҫук

Санпала калаҫма

Чунӑма ӑшӑтма.

Вӑрӑм ӗмӗр эп сунатӑп,

Нихӑҫан та эпӗ манмӑп».

tver.mk.ru сайтри сӑн

Шупашкарта пурӑнакан 35 ҫулти хӗрарӑм полицие пынӑ. Вӑл ултавҫӑсен аллине лекнӗ.

Вӑл тӳлевсӗр пӗлтерӳсен сайтӗнче ӗҫ шыранӑ, резюме хӑварнӑ. Кӗҫех ун патне хӗр шӑнкӑравланӑ, килтен тухмасӑрах тупӑш тума сӗннӗ. Анчах малтан онлайн мелпе вӗренмелле, унта вара укҫа хывмалла имӗш. Кайран ку тупӑш пама тытӑнассине ӗнентернӗ.

Хӗрарӑм ӑна ӗненсе темиҫе банкра кредитсем илнӗ, укҫине лешӗ каланӑ счет ҫине куҫарнӑ. Темиҫе уйӑхра вӑл пӗр пус та ӗҫлесе илеймен, укҫине вара самаях хывнӑ – 2 миллион тенке яхӑн.

Чӑваш академи драма театрӗн сӑнӳкерчӗкӗ

К.В. Иванов ячӗллӗ Чӑваш патшалӑх театрӗнче ӗҫлеме ҫынсем кирлӗ. Ку хыпара культура учрежденийӗ халӑх тетелӗнчи хӑйӗн страницинче хыпарланӑ.

Чӑваш академи драма театрне сцена машинисчӗсем тӳрех 4 ҫын кирлӗ. Вӗсене уйӑхсерен 60 пинтен кая мар тӳлеме шантараҫҫӗ. Ҫӗвӗҫ те кирлӗ. Театр костюмӗсене ҫӗлекен ҫак ҫыннӑн уйӑхри ӗҫ укҫи 40 пинтен кая лармӗ.

Вера Иванова сӑнӳкерчӗкӗ

Шупашкарта пурӑнакан Валерий Хаталов паян 98 ҫул тултарнӑ. Ӑна ҫав ятпа Шупашкар хулинчи халӑхӑн социаллӑ ыйтӑвӗсене тивӗҫтерекен комплекслӑ центр ӗҫченӗсем ӑшшӑн саламланӑ, Чӑваш Ен Элтеперӗн Олег Николаевӑн саламлӑ открыткине ҫитерсе панӑ.

Ивановӑра ҫуралнӑ арҫын Шупашкарти столовӑйсен, ресторансен тата кафесен трестӗнче ӗҫленӗ, унта вӑл чылай ҫул директор пулнӑ. Унӑн мӑшӑрӗ тахҫанах леш тӗнчене уйрӑлса кайнӑ, виҫӗ пӳлӗмлӗ хваттерте вӑл пӗчченех пурӑнать. Анчах ӑна пулӑшма хӗрӗ Галина Валерьевна пырса ҫӳрет.

Арҫын хӑй вӑхӑтӗнче гипсран багетсем ӑсталассипе питӗ пултаруллӑ пулнӑ. Унӑн хваттерӗнче музейри пекех — мӗн чухлӗ картина! 200 литр кӗрекен аквариума та вӑл гипсран ӑсталанӑ. Ҫав япалана тунӑранпа 64 ҫул ӗнтӗ.

Валерий Хаталовӑн чун киленӗҫӗ тата нумай пулнӑ. Пӗринче вӑл вӗсене ҫырсах шутланӑ. 38 таран тупнӑ. Ҫав шутра — йывӑҫ сыпасси те, сунара ҫӳресси те, видеосем ӳкерсе монтажласси те.

cheb-centr.soc.cap.ru сӑнӳкерчӗкӗ

Шупашкар хулинчи халӑхӑн социаллӑ ыйтӑвӗсене тивӗҫтерекен комплекслӑ центра ҫӳрекен ватӑсем кашни кунах тӗрлӗ хӑнӑхтару тӑваҫҫӗ.

«Килте те тума пулать-ха. Анчах кунта йышпа пӗрле хаваслӑрах та, хусканусене те тӗрӗс пурнӑҫлатпӑр», — теҫҫӗ кинемейсем.

Ватӑсем асӑрханӑ тӑрӑх, физкультурӑпа туслӑ ҫынсем тантӑшӗсенчен ҫамрӑкрах курӑнаҫҫӗ. Вӗсен вӑй-халӗ тапса тӑрать, куҫӗ ҫиҫет, кӑмӑлӗ те лайӑх. Паян ватӑсем куҫ валли хусканусем тума вӗреннӗ.

"Контактри" сӑн

Шупашкарти полицейскисен служба йытти, Измир ятлӑскер, 70 пин тенкӗ вӑрланӑ ҫынна тытса чарма пулӑшнӑ.

20 ҫулти каччӑ кафере апатлансан енчӗкне сӗтел ҫинче манса хӑварнӑ. Унта вара 70 пине яхӑн тенкӗ пулнӑ.

Видеокамерӑна пӑхсан вӑрланӑ арҫынна палӑртнӑ. Йытӑ унӑн йӗрӗ ҫине ӳксе ун патне илсе ҫитернӗ. Чӑнах та, енчӗкӗ те, укҫи те ҫав ҫын патӗнче пулнӑ.

Шупашкарти 10-мӗш шкул умне Андриян Николаев космонавтӑн бюстне лартнӑ. Ӑна Андриян Григорьевичӑн ҫуралнӑ кунӗнче, авӑн уйӑхӗн 5-мӗшӗнче, вырнаҫтарнӑ.

Унӑн бюсчӗ унта унччен те пулнӑ-ха, анчах хӑш-пӗр пайӗ хӑйпӑнса ӳкнӗ. Ачасемпе вӗрентекенсем ӑна хӑйсен вӑйӗпе реставраци тума хӑтланнӑ, анчах ку пулӑшман. Кӑҫал вара ҫӗнӗ бюст лартнӑ.

Палӑртмалла: 10-мӗш шкул 1999 ҫултанпа Андриян Николаев ячӗпе хисепленет. Космонавт ҫуралнӑранпа кӑҫал 95 ҫул ҫитнӗ.

u-f.ru сайри сӑн

Шупашкарти 40 ҫулти арҫын, сварщикре ӗҫлекенскер, юрату шыраса укҫасӑр тӑрса юлнӑ. Вӑл паллашу сайтӗнче Америкӑри хӗрарӑмпа паллашнӑ. Унтан вӗсем мессенджерта ҫырӑннӑ.

Кӗҫех хӗрарӑм ӑна юратни пирки пӗлтернӗ, ун патне посылкӑпа хаклӑ парне янине каланӑ.Анчах вӑл таможньӑра чарӑнса тӑнӑ-мӗн, ӑна илме укҫа тӳлемелле.

Арҫын иккӗленнӗ, полицие пырса каласа кӑтартнӑ. Полицейскисем ку, ахӑртнех, ултавҫӑ пулнине каланӑ, ӑна ҫыхӑнӑва татма хушнӑ.

Арҫын итлесе ҫапла тунӑ-ха, анчах «савнийӗ» ун патне тепӗр номертен ҫырса янӑ, ҫапла каллех калаҫса кайнӑ. Кайран сварщик пӗлӗшӗсенчен 98 пин илсе «савнийӗ» кӑтартнӑ счет ҫине куҫарнӑ. Укҫине илсен «Америкӑри савни» ҫухалнӑ.

Нм\умай ача ашшӗ. cap.ru сайтри сӑн

Ҫурла уйӑхӗн 27-мӗшӗнче Ҫӗнӗ Шупашкарта пурӑнакан ҫемьере виҫӗреш ҫуралнӑ. Кӑҫал кун пекки ҫак хулара – пӗрремӗш хут.

Артемпа Анна Манучарян ҫемйинче икӗ арҫын ача тата хӗрача ҫуралнӑ. Пепкесем Шупашкарта ҫут тӗнчене килнӗ. Ҫапла Манучарянсем харӑсах нумай ачаллӑ ҫемье пулса тӑнӑ. Ачасем ҫуралнине ӗнентерекен хута администрацин ЗАГС пайӗнче панӑ.

Сӑмах май, Ҫӗнӗ Шупашкарта пӗлтӗр те виҫӗреш пулнӑ.

Аня Спиридонова архивӗнчи сӑн

Кӗркунне ҫӑвӗпе мӗн ӗҫленин тухӑҫне курма пулать. Шупашкарта пурӑнакан Аня Спиридонова хӑй ӳстернӗ пахча ҫимӗҫ мӗн пысӑкӑш пулнине сӑн ӳкерсе халӑх тетелӗнчи страницине вырнаҫтарнӑ.

Вӗсен пахчинче кавӑнсем хальлӗхе 200 тата 250 килограмм таяҫҫӗ. Вӗсене татман-ха, ҫавӑнпа малалла ӳсеҫҫӗ. Мӗн пысӑкӑш пулассине, тен, Аня кайран татах кӑтартӗ.