mk103.med.cap.ru сӑнӳкерчӗкӗ

Шупашкарта васкавлӑ пулӑшура ӗҫлекен тухтӑрсем чӗри тапма чарӑннӑ ҫынна вилӗмрен ҫӑлса хӑварнӑ.

Раштав уйӑхӗн 18-мӗшӗнче шурӑ халатлисем 45 ҫулти арҫын патне кайнӑ. Вӑл йывӑррӑн сывланӑ, унӑн тути кӑвакарса кайнӑ. Тухтӑрсем пырса ҫитсе ӑна пулӑшма тытӑннӑ вӑхӑтра арҫын тӑнне ҫухатнӑ, сывлама пӑрахнӑ.

Маргарита Давыдова тухтӑрпа Екатерина Баринова фельдшер парӑнман. Вӗсем чӗрепе ӳпке реанимацийӗ ирттерме йышӑннӑ. Тепӗр 10 минутран арҫыннӑн чӗри ӗҫлесе кайнӑ.

Кайран ӑна пульницӑна илсе кайнӑ. Халӗ вӑл унта сипленет.

21.rospotrebnadzor.ru сайтри сӑн

Республикӑра ОРВИпе чирлекен нумайланнӑ. Ытларахӑшӗ – ачасем. Кун пирки Роспотребнадзор пӗлтерет.

Иртнӗ эрнере республикӑра 151 ҫын гриппа чирленине палӑртнӑ. Вӗсенчен 51-шӗ- аслӑ ӳсӗмри ҫынсем, 100-шӗ – 17 ҫул тултарманнисем. Ведомство палӑртна тӑрӑх, ӳпке шыҫҫипе те чирлекен нумай. Ҫавна май Шупашкарти пӗр шкул дистанци мелӗпе вӗренет. Республикӑри тӗрлӗ округри 37 шкулти 1-5 класс дистанци мелӗ ҫине куҫнӑ.

Ҫӗрпӳри Юлия Иванова. cap.ru сайтри сӑн

Чӑваш Енре пилӗк ҫулта 400 яхӑн земство тухтӑрӗпе фельдшерӗ ӗҫлеме пуҫланӑ. ЧР сывлӑх сыхлавӗн министрӗ Владимир Степанов пӗлтернӗ тӑрӑх, «Земство тухтӑрӗ» тата «Земство фельдшерӗ» программӑсемпе килӗшӳллӗн республикӑри ял-салари пульницӑсене 250 ытла тухтӑр тата 130 фельдшер ӗҫлеме кайнӑ.

Земство тухтӑрӗсем 1 миллион тенке тивӗҫеҫҫӗ, земство фельдшерӗсем вара – 500 пин тенке. Иртнӗ эрнере РФ Президенчӗ Владимир Путин ҫак хисепсене икӗ хут пысӑклатма сӗннӗ, анчах – Раҫҫейри ҫӗнӗ регионсенче кӑна.

cap.ru сӑнӳкерчӗкӗ

Вӑрнар муниципаллӑ округӗнче икӗ фельдшерпа акушер пункчӗ уҫӑлнӑ. Услапа тата Кӑкшӑм ялӗсенче пурӑнакансем ҫакна тахҫантанпах кӗтнӗ.

Услапасен райцентра ҫитме 25 ҫухрӑм парӑнтармалла, кӑкшӑмсен вара - 23 ҫухрӑм. Ялта ФАП пулни питӗ меллӗ. Ҫак икӗ медпунктра 900 ытла ҫын медпулӑшу илӗ.

Условисем вара питӗ хӑтлӑ. Кӑкшӑмсем ФАПшӑн кӑна мар, унта ӗҫлекен Светлана Ильиничнӑшӑн та савӑнаҫҫӗ. Вӑл унта 30 ҫул вӑй хурать. Малашне фельдшер пациентсене хӑтлӑ пӳлӗмсенче йышӑнӗ.

Телеграмри t.me/nikamran каналтан илнӗ сӑнӳкерчӗк

Ҫӗнӗ Шупашкарти шӑл тухтӑрӗсем «Айболит тухтӑрӑн стоматологийӗ» ачасене ҫӗнӗ кӗнекепе паллаштарнӑ.

Кӑларӑма Людмила Исаева поэт пулӑшнипе хатӗрленӗ. Унра Ҫӗнӗ Шупашкарти ӳнер шкулӗн вӗренекенӗсен ӳкерчӗкӗсемпе илемлетнӗ. Кӗнекене «Шӑла пӗчӗкрен упра» проектпа килӗшӳллӗн кун ҫути кӑтартнӑ.

«Айболит тухтӑрӑн стоматологийӗ» кӗнекепе паллашсан ачасем шӑл тухтӑрӗсенчен хӑрама пӑрахӗҫ тесе шухӑшлаҫҫӗ.

cap.ru сӑнӳкерчӗкӗ

Шупашкар муниципалитет округӗнчи Ойкас ялӗнче пурӑнакансем малашне ҫӗнӗ ФАПа пулӑшу ыйтма ҫӳрӗҫ. Унти фельдшер Зоя Григорьева 30 ҫул ӗҫлет. Унччен вӑл пациентсене кивӗ медпунктра йышӑннӑ. Ҫавӑнпа вӑл ҫӗнӗ ФАП лайӑх пулнинн никамран лайӑх пӗлет.

Хальхи ФАПсенче пысӑк хӑвӑртлӑхлӑ тӗнче тетелӗ те пур. Ку фельдшерсене районти пульница тухтӑрӗсемпе консультаци ирттерме май парать.

Ку ФАП Шупашкар муниципалитет округӗнче - 11-мӗш. Унта эмелсемпе медикаментсем - лейкопластырьтен пуҫласа пурнӑҫшӑн пӗлтерӗшлӗ препаратсем таранах - илме пулать.

Ҫулталӑк вӗҫлениччен Шупашкар муниципалитет округӗнче тепӗр виҫӗ ФАП уҫӗҫ. Иккӗшне графикрен маларах туса пыраҫҫӗ.

Шупашкарти Президент пепкелӗх центрӗнче ӗҫлекен Светлана Павлова ҫӗршыври чи лайӑх лаборант ятне тивӗҫнӗ. Наградӑна вӑл РФ сывлӑх сыхлавӗн министрӗн Михаил Мурашкӑн аллинчен илнӗ. Чыслав «Наци сывлӑх сыхлавӗ» конгресра иртнӗ.

Республикӑри ӳтпе венерологи диспансерӗн дерматологӗ Гелия Гималиева «Чи лайӑх инфекционист» номинацире 3-мӗш вырӑна тивӗҫнӗ. Улатӑр округӗнчи тӗп пульницӑн офтальмологӗ Наталья Кононцева «Чи лайӑх офтальмолог» номинацире 3-мӗш пулнӑ.

«Пурнӑҫ ҫулӗпе» хаҫат сӑнӳкерчӗкӗ

Элӗк муниципалллӑ округӗнчи Ҫулавӑҫри Виталий Самохвалов сусӑр пулин те пуҫ усмасть.

65 ҫулти арҫын икӗ урасӑр. Чире пула малтан унӑн пӗр урине татнӑ, тепӗр 7 ҫултан – теприне. Апла пулин те арҫын пуҫ усмасӑр малалла ӑнтӑлать. Паян вӑл вутӑ та ҫурать.

«Кил хуҫалӑхӗнчи пур ӗҫе те парӑнтарать. Вӑл пӗчченех вутӑ татса ҫурма пултарать. Ҫурт-йӗр те хӑпартать Виталий Аркадьевич. Хӑй вӑхӑтӗнче чирленӗ чухнех илемлӗ ҫурт тӑвассипе тимленӗ. Ӑна пӗчченех кирпӗчрен купаланӑ. Халӗ ку ҫуртра ҫемьепе пурӑнаҫҫӗ. Кил хуҫи ачисене пулӑшма та вӑй-хал ҫитерет. Ольга хӗрӗ кил-ҫурт ҫавӑрнӑ ҫӗре хутшӑннӑ», – ҫырса кӑтартнӑ пуҫ усман арҫын ҫинчен «Пурнӑҫ ҫулӗпе» хаҫатра Елена Иванова.

чувашинформ.рф сайтри сӑн

Шӑмӑршӑ муниципалитет округӗнчи Ярӑславра тата Энтриелте модульлӗ медпунктсем уҫӑлнӑ.

Ярӑславра 348 ҫын пурӑнать. Ял райцентртан 5 ҫухрӑмра вырнаҫнӑ. Унччен медпункт кивӗ клубра пулнӑ. Халӗ вара ҫынсем хӑтлӑ медпункта ҫӳреҫҫӗ.

Энтриелсем те ҫӗнӗ ФАПшӑн савӑнаҫҫӗ. Унта Канашри медучилищӗне пӗтернӗ Екатерина Романова «Земство фельдшерӗ» программӑпа килӗшӳллӗн ӗҫлеме килнӗ. Унӑн ӗҫ стажӗ 3 уйӑх кӑна пулсан та вӑл кунта хӑнӑхнӑ. Энтриелте 300 ҫын пурӑнать. Ытларахӑшӗ - ватӑ ҫынсем. Райпульницӑна ҫитме 4 ҫухрӑм кӑна. Ҫапах пурте унта ҫитеймеҫҫӗ. Ялта ФАП пурринчен пахараххи ним те ҫук ҫав.

cap.ru сӑнӳкерчӗкӗ

Етӗрне муниципаллӑ округӗнчи Вӑрманкас-Асламас ялӗнче фельдшерпа акушер пункчӗ уҫӑлнӑ. Ку - ял ҫыннисемшӗн пысӑк савӑнӑҫ.

Вӑрманкас-Асламас ялӗнче унччен ФАП пулнӑ. Ӑна иртнӗ ӗмӗрӗн 60-мӗш ҫулӗсенчех хута янӑ. Кивӗскер хальхи стандартсемпе килӗшсе тӑман. Ялта 200 ытла ҫын пурӑнать. Вӗсен йышӗнче ваттисемпе сусӑрсем пур. Район пульницине ҫитме инҫе - 30 ҫухрӑм.

Ҫӗнӗ ФАПа ҫуркунне тума пуҫланӑ. Ӗҫе темиҫе уйӑхра вӗҫленӗ. Таврари территорие хӑтлӑлатма ҫынсем те пулӑшнӑ. Ҫӗнӗ ФАПра пӗтӗм услови пур. Вӑл - Етӗрне муниципаллӑ округӗнчи 15-мӗш фельдшерпа акушер пункчӗ.