Паян Атӑл леш енче санатори ҫывӑхӗнче икӗ каччӑ ҫухалнӑ. Кун пирки «Про Город» хаҫата халӑх корреспонденчӗ пӗлтернӗ.
Малтанлӑха пӗлтернӗ тӑрӑх, 20 ҫулти икӗ каччӑ шывра путнӑ. Вӗсене пӗр ҫын ҫӑлма тӑрӑшнӑ, анчах май килмен.
Инкек 14 сехет ҫурӑра пулнӑ. Ҫав вӑхӑтра ҫил вӑйланнӑ, пысӑк хумсем тухнӑ. Унта пулнӑ ҫынсем икӗ каччӑна хум хупланине, ун хыҫҫӑн вӗсем ишсе тухайманнине курнӑ. Вырӑна полицейскисем, тухтӑрсем, ҫӑлавҫӑсем килнӗ.
Шӑрӑх ҫанталӑкра нумайӑшӗ шыв хӗрринче канать, шыва кӗрет. Шел те, инкек ҫине-ҫинех пулать. Ӗнер кӑна Ҫӗмӗрлере ватӑ арҫын путса вилни пирки пӗлтернӗччӗ.
Утӑ уйӑхӗн 3-мӗшӗнче Канаш муниципаллӑ округӗнчи Асхва ялӗнче инкек пулнӑ. Ун ҫывӑхӗнчи пӗвере хӗрарӑм путса вилнӗ. Вӑл 39 ҫулта пулнӑ.
Ҫӑлавҫӑсем асӑрхануллӑ пулма ыйтаҫҫӗ. «Ушкӑнпа каннӑ чухне пӗр-пӗрне асӑрхӑр. Ӳсӗр чухне шыва кӗме, инҫете ишме ан хӑтланӑр», - теҫҫӗ вӗсем.
Ку пӑтӑрмах 5 кун каяллах пулнӑ-ха. Ҫӗртме уйӑхӗн 12-мӗшӗнче ирхине Атӑлта кимӗ ҫаврӑнса ӳкнӗ. Кун пирки ҫӑлавҫӑсем патне ирхи 4 сехет те 25 минутра шӑнкӑравласа пӗлтернӗ.
Кимӗ Йӑлӑм ҫывӑхӗнче ҫаврӑнса ӳкнӗ. Ҫав кун икӗ байдарка ҫине ларса виҫӗ ҫын тренировкӑна тухса кайнӑ. Вӑйлӑ хум кимӗсенчен пӗрне ҫавӑрса ҫапнӑ. Шар курнисем ҫӑлавҫӑсем патне шӑнкӑравлама пултарнӑ.
Республикӑн шыравпа ҫӑлав службин ҫӑлавҫисем «Беркут» мотор кимми инкек вырӑнне вӗҫтернӗ. Ҫӑлав жилечӗ тӑхӑннӑ ҫамрӑксене вӗсем ҫывӑхри кимӗ станцине илсе ҫитернӗ.
Ҫӗртме уйӑхӗн 12-мӗшӗнче Шупашкр муниципаллӑ округӗнчи Пикшик ялӗ ҫывӑхӗнчи пӗвере чарлан тетелте ҫыхланса ларни пирки пӗлтернӗ. Кайӑка ҫӑлавҫӑсен пулӑшма тивнӗ.
Вӗсем шыв айӗнчи тетеле касса чарлана ирӗке кӑларнӑ. Анчах вӑйран кайнӑ кайӑк ирӗке тухсан та часах вӗҫеймен.
Чӑваш Енри ҫӑлавпа шырав служби тетелпе пулӑ тытма юраманни пирки асӑрхаттарать. Сӑлтавсенчен пӗри – шыв-шурта кайӑксем пулӑ тытни, вӗсем вара тетелпе ҫыхланса ларма пултараҫҫӗ.
Шӑрӑх ҫанталӑкра шывра чӑмпӑлтатас килет. Анчах, шел те, асӑрханмасан инкек пулать.
Ҫӗртмен 8-мӗшӗнче Шупашкарта Пионер пӗвинче 39 ҫулти арҫын путса вилнӗ. Унӑн виллине водолазсем кӑларна.
Паян кӑнтӑрла ҫӑлавҫӑсене Шупашкарти Ботаника садӗнче арҫын шыва кӗнӗ те путма пуҫлани ҫинчен шӑнкӑравласа пӗлтернӗ. Юрать-ха, ӑна вӗсем ҫӑлма ӗлкӗрнӗ.
Палӑртмалла: ҫулталӑк пуҫланнӑранпа шывра 4 ҫын путса вилнӗ.
Иртнӗ шӑматкун Ҫӗрпӳ хулинче 20 ҫулти каччӑ мотоблок тыткӑнне лекнӗ. Унӑн ури хӗсӗнсе ларнӑ.
Хӑй кӑларса пӑхнӑ - тухман, ял ҫыннисем пулӑшнӑ - кӑлӑхах. Васкавлӑ медпулӑшу та чӗннӗ - каллех усси пулман.
40-мӗш пушарпа ҫӑлав чаҫӗн ҫӑлавҫисем ҫамрӑк арҫынна мотоблок тыткӑнӗнчен хӑтарнӑ. Вӗсем ятарлӑ инструментсемпе усӑ курса ӑна пулӑшнӑ. Кайран каччӑна медиксен бригадине панӑ.
Ӗнер ҫӑлавҫӑсем Атӑлта путма пуҫланӑ пулӑҫа пулӑшнӑ. Кун пирки ЧР Инкеклӗ лару-тӑру министерстви пӗлтерет.
Ку ирхине 7 сехет ҫурӑра Чӑваш Енпе Тутарстан чиккинче Куславкка хули патӗнче пулнӑ. Зеленодольск хулинче пурӑнакан 44 ҫулти арҫын мотобуксировщикпе пынӑ. Ҫӗрле пӑр шӑннӑ тесе шаннӑ. Анчах вӑл шыва кӗрсе ӳкнӗ.
Юрать-ха, ӑна ҫӑлма ӗлкӗрнӗ. Шӑнса кӳтнӗскере ҫӑлавҫӑсем Волжскри пульницӑна ӑсатнӑ.
Сӗнтӗрвӑрри округӗнче ҫӑлавҫӑсем пӑр ҫинчи икӗ пулӑҫа ҫӑлнӑ. Ку пуш уйӑхӗн 22-мӗшӗнче пулнӑ.
Вӗсем пулӑ тытма ларнӑ кӑна – пӑр катӑлса шыва май ишме пуҫланӑ. Арҫынсем ҫыран хӗррине хӑйсем тӗллӗн тухайман, ҫӑлавҫӑсем патне шӑнкӑравланӑ. Специалистсем вӗсем патне кимӗпе ҫитсе пулӑшнӑ.
Ҫӑлавҫӑсем хальхи вӑхӑтра пӑр ҫӳхе пулни пирки асӑрхаттараҫҫӗ. Ытларах ҫыран хӗрринче, юханшывсем пӗрлешнӗ вырӑнта.
Нарӑс уйӑхӗн 8-мӗшӗнче 17 сехет те 5 минутра ҫӑлав службине шӑнкӑрав килнӗ: Куславкка округӗнче, Атӑл ҫинче, арҫын пулла кайсан юрҫӳренӗпе юр ӑшне кӗрсе ларнӑ та тухайман. Вӑл 3 сехет хӑй тӗллӗн тухма хӑтланнӑ. Анчах пултарайман.
Юлашкинчен пулӑҫ юлташӗнчен пулӑшу ыйтнӑ, лешӗ ҫӑлавҫӑсем патне шӑнкӑравлама сӗннӗ.
Ҫӑлавҫӑсем вырӑна ҫитсен юрҫӳрене юр ӑшӗнчен кӑларнӑ та пулӑҫа ҫыран хӗррине ҫитме пулӑшнӑ.
Шупашкарти Заовражное микрорайонта пӗр хӗр нарӑс уйӑхӗн 4-мӗшӗнче уҫӑлма тесе тухнӑ. Вӑл Атӑлӑн сулахай енне тӳррӗн утса каҫас тенӗ. Анчах ҫухалса кайнӑ.
Пӑтӑрмаха ҫакланнине ӑнланса илсен хайхискер Чӑваш Республикин ҫӑлавпа шырав службине шӑнкӑравланӑ.
Кӗҫех ҫӑлавҫӑсем мӗскӗне шырама тухса кайнӑ. Анчах хӗре юрҫӳренпе ярӑнма тухнӑ арҫын тӗл пулнӑ. Вӑл ӑна ҫыран хӗрне илсе ҫитернӗ.
-10.7 °C