Кун пек те пулать-ши вара тесе тӗлӗнме ан васкӑр. Теплерен ун пекки те пулать иккен.
Шупашкартан Ҫӗнӗ Шупашкара ҫитме ҫул укҫи йӳнелнӗ. Малашне вара хак йӳнелмелле: аллӑн укҫа тӳлесен 41 тенкӗ пулӗ, карттӑпа чухне — 37 тенкӗ.
Республикӑн влаҫ органӗсен официаллӑ порталӗнче пӗлтернӗ тӑрӑх, Чӑваш транспорт управленийӗ республикӑн Конкурентлӑ политика тата тариф енӗпе ӗҫлекен службӑна хака пӑхса тухма ыйтса ҫыру янӑ иккен.
Пӗрлехи тариф пултӑр тесе республикӑн Министрсен Кабинечӗ хака ҫавӑн пек ҫирӗплетесси ҫинчен йышӑну проекчӗ хатӗрленӗ. Ку вӑл троллейбуспа кайнипе пӗр хак пулассине пӗлтерет. Пӗрлехи проездной хакӗ 2500 тенкӗ пулӗ.
Унччен пассажирсен аллӑн укҫан тӳлесен 60 тенкӗ, карттӑпа чухне 55 тенкӗ кӑларса хума тивет.
Паян ҫӗрле, ҫур ҫӗр иртни 12 сехет те 44 минутра Шупашкар хулинче Мускав кӗперӗ ҫинче 47 ҫулти хӗрарӑма машина ҫапса кайнӑ. Шел те, вӑл васкавлӑ медпулӑшу киличчен вырӑнтах вилнӗ.
«Лада Гранта» машина рулӗ умӗнче 18 ҫулти каччӑ пулнӑ. Хӗрарӑм ҫул ҫинчех утса пынӑ. Мӗншӗн унта утнӑ вӑл – паллӑ мар.
Ҫакӑ паллӑ: ҫамрӑк водитель пысӑк хӑвӑртлӑхпа пынӑ, «Элара» савут патӗнчех машинӑсенчен хӑваласа иртсе кайнӑ, «шашкӑлла» вылянӑн пынӑ. Хӗрарӑма таптаса кайнӑ хыҫҫӑн вӑл 100 метртран кӑна чарӑннӑ. Хӗрарӑм вара айккинелле вӑркӑннӑ.
Палӑртмалла: ҫав вырӑнта сехетре 40 ҫухрӑм хӑвӑртлӑхпа ҫӳреме юранине кӑтартакан паллӑ ларать. Водитель медосвидетельствовани витӗр тухнӑ: вӑл урӑ пулнӑ.
Шупашкар хулинче ӗнер, каҫхи пилӗк сехет ҫитеспе, икӗ ача самокатпа машина урапи айне лекнӗ.
Арҫын ачапа хӗрача пӗр самокат ҫине тӑрса урам тӑрӑх вӗҫтерсе пынӑ. Инкек Кӑкшӑм урамӗнчи 11-мӗш ҫурт патӗнчи картишӗнче пулса иртнӗ.
Пӑтӑрмах сӑлтавне ҫул-йӗр хӑрушсӑрлӑхӗн инспекторӗсем палӑртӗҫ-ха. Ҫуртсен картишӗнче машинӑсен те хӑвӑртлӑха чакармалла-ха, тепӗр тесен ачи-пӑчи те питӗ тимсӗр.
«Haval M6» автомобиль рулӗ умӗнче 57 ҫулти водитель пулнӑ. 11 ҫулти арҫын ача самокат рулӗ умӗнче пулнӑ, унпа пӗрле 16 ҫулти хӗрача тӑрса пынӑ.
Инкеке ҫакланнӑ хыҫҫӑн суранланнӑскерсене пульницӑна ӑсатнӑ. Ачасем ҫине пырса кӗнӗ машина водителӗ инкек вӑхӑтӗнче урах пулнӑ.
Халӗ ку пӑтӑрмаха йӗрке хуралҫисем малалла тӗпчеҫҫӗ.
Кӑҫал Чӑваш Республики хула урамӗсемпе ҫӳреме троллейбус-гармошка туянни пирки пӗлтернӗччӗ. Аса илтерер: ӑна тӗрӗслес тӗллевпе ҫу уйӑхӗн 21-мӗшӗнче ҫула кӑларнӑ. Вӑл малтан 60-мӗш маршрутпа Ҫӗнӗ Шупашкарпа Шупашкар хушшинче ҫӳренӗ. Ҫӗртме уйӑхӗн 1-мӗшӗнчен вара троллейбуса Шупашкарти 1-мӗш маршрут ҫине куҫарнӑ. Унта пассажирсем ытларах ҫӳреҫҫӗ.
Троллейбус-гармошкӑна 150 ҫын таран кӗме пултарать. Вӑл электролинисӗр 30 ҫухрӑм ытла ҫӳрет.
Тестировани акӑ мӗн кӑтартнӑ: ҫак троллейбусра, ахаль троллейбуспа танлаштарсан, пассажирсем ҫӳресси 1,5 хут ӳснӗ. Эппин, тухӑҫлӑ ӗҫлет ку транспорт.
«Пуласлӑхра ҫакнашкал пысӑк 4-5 троллейбус туянни Шупашкар хула агломерацинче транспорт аталанӑвӗшӗн пӗлтерӗшлӗ утӑм пулӗччӗ», — тенӗ Чӑваш транспорт управленийӗн директорӗ Евгений Мореплавцев.
Кӗҫех Ҫӗнӗ Шупашкар хулинче ҫӗнӗ маршрут уҫӑлӗ. Ку хула ҫыннисемшӗн меллӗ пулассинче иккӗленӳ ҫук.
Ҫурла уйӑхӗн 17-мӗшӗнче, ҫитес тунтикун, спутник хулара 58-мӗш маршрут ҫула тухӗ. ЧР Транспорт министерстви пӗлтернӗ тӑрах, вӑл хулари пӗлтерӗшлӗ вырӑнсене ҫыхӑнтарӗ: Чумкасси ялӗпе Атӑл ҫыран хӗррине. Маршрут Хӗвелтухӑҫ, 10-мӗш Пилӗкҫуллӑх, Тӗкӗрҫ, Винокуров, Пионер, Совет тата Парк урамӗсем урлӑ иртӗ. Автобус «Теплица», «Орион» ҫурт», «Ача-пӑча музыка шкулӗ», «Искусствӑсен шкулӗ», «Ача-пӑча хули», «Тӗкӗрҫ рашчи», «Библиотека», «Ҫӗнтерӳ тӳремӗ« тата «Стадион» ятлӑ чарӑнусенче чарӑнӗ.
Аса илтерер: ҫурла уйӑхӗн 1-мӗшӗнчен Шупашкарта 23-мӗш автобус ҫӳреме пуҫланӑ. Вӑл Энергетиксен поселокне «Груша» микрорайонпа ҫыхӑнтарать.
Вӑрмар районӗнче Вӑтам Енӗш юханшывӗ урлӑ кӗпер тума палӑртнӑ. Ӗҫе 2027-2028 ҫулсенче пурнӑҫламалла. Чӑваш Енӗн Патшалӑхӑн тариф службинче пӗлтернӗ тӑрӑх, ку тӗллевпе 266 миллион тенкӗ укҫа уйӑрнӑ.
Ӗҫе пурнӑҫлакан строительство организацине пурнӑҫлама конкурса Республикӑн закупкӑсен центрӗ ирттернӗ. Кӗпере Вӑтам Енӗш юханшывӗ урлӑ «Атӑл» – Вӑрмар – Канаш – Йӗпреҫ – Улатӑр ҫул ҫинче тӑвӗҫ.
Уҫӑ конкурс ҫӗнтерӳҫине кӑҫалхи авӑн уйӑхӗн 1-мӗшӗччен палӑртмалла.
Кӗпере 2027 ҫулхи ака уйӑхӗнчен пуҫласа чӳк уйӑхӗччен тата 2028 ҫулхи ҫӗртме-ҫурла уйӑхӗсенче тумалла. Кӗпер тунӑ вӑхӑтра вӑхӑтлӑх ҫӳремелли ҫул пулӗ. Кайран, ӗҫе вӗҫлесен, ӑна малтанхи евӗр йӗркене кӗртсе хӑвармалла, юханшыва кӳнӗ сиене те саплаштармалла.
Авӑн уйӑхӗн 1-мӗшӗнченпе Шупашкар хулинче 33-мӗш автобус маршручӗ вӑрӑмланӗ – вӑл «Ялав» ҫурт-йӗр комплексӗ таран ҫитме тытӑнӗ.
Хальхи вӑхӑтра вӑл «Ҫӗнӗ хула» микрорайонта Илья Прокопьев урамӗнче чарӑнса ҫаврӑнать. Авӑн уйӑхӗн 1-мӗшӗнчен вара унӑн маршручӗ Шупашкар проспекчӗпе малалла кайса «Ялавра» вӗҫленӗ. Ҫапла «Юрӑ-кӗвӗллӗ», «Ялав МКР» тата «Шкул» чарӑнусем хушӑнӗҫ. Маршрут ҫинче 10 автобус пулӗ, пӗрре – резервра.
Халӗ ҫак маршрута пӑхса тӑракана шыраҫҫӗ, ҫавна май аукцион ирттереҫҫӗ. Ҫӗнӗ перевозчикпа ҫулталӑклӑха килӗшӳ тӑвӗҫ – кӑҫалхи авӑн уйӑхӗн 1-мӗшӗнчен пуҫласа 2027 ҫулхи ҫурла уйӑхӗн 31-мӗшӗччен. Аукционӑн малтанхи хакӗ – 2,2 миллион тенкӗ.
Сӑмах май, унччен ку маршрутшӑн Шупашкар хула администрацийӗ яваплӑ пулнӑ, халӗ вара – ЧР Транспорт министерстви.
Кӑҫалхи раштав уйӑхӗн 1-мӗшӗнчен Шупашкар хулинчен Ҫӗнӗ Шупашкара ҫӳрекен 101-мӗш маршрут ҫинче кӑштах улшӑнусем пулӗҫ. Ку ҫул-йӗре мар, транспорта пырса тивет.
Реестр тӑрӑх, вӑтам класлӑ автобуссем вырӑнне пысӑк автобуссем ҫула тухӗҫ. Маршрут ҫинче пӗтӗмпе 25 транспорт пулӗ, кунсӑр пуҫне – резервра икӗ автобус.
Ахӑртнех, раштав уйӑхӗн 1-мӗшӗнчен маршрута Чӑваш транспорт управленине куҫӗ. Хальлӗхе маршрута «Коммерциллӗ маршрут перевозкисем» тулли мар яваплӑ общество пӑхса тӑрать.
Кивелмен, япӑхман, ҫӗрмен, тутӑхман, япӑхсӑра тухман япала ҫук ҫав ӗнтӗ. Шупашкарта, ав, паян ҫутӑ юпи тӳнсе кайнӑ. Килсене ҫутӑ парса тӑма туса лартни мар-ха.
Шупашкар хулинчи Сӗнтӗрварри шосси ҫинче троллейбуссем чарӑнса ларнӑ. Унта троллейбуссем ҫӳреме карнӑ ҫутӑ пӑралукне тытса тӑракан юпа тӳнсе кайнӑ. Асӑннӑ транспорт электричествӑсӑр ҫуреймест те ирӗксӗрех чарӑнса ларма тивнӗ.
Пӑтӑрмах пирки МАХри «Первый чувашский» каналта пӗлтернӗ. Кӗске хыпарта юсав ӗҫне пуҫаннипе пуҫӑнманни пирки нимӗн те каламан. Ахӑртнех, ятарлӑ службӑсем вырӑна пырса ҫитнех пулӗ ӗнтӗ. Хальччен, тен, юпана тӑратса та лартнӑ пулӗ е ун вырӑнне урӑххине, тен, вырнаҫтарнӑ-тӑр. Троллейбус халӑха турттаракан транспорт та ӗҫе вӑраха ямаҫҫӗ пулӗ.
Шупашкарта Мускав кӗперне юсама тытӑннӑ. Ҫавна май ун тӑрах машинӑсем пӗр йӗрпе ҫеҫ ҫӳреме пултарӗҫ. Кун пирки хула администрацийӗн пуҫлӑхӗ Станислав Трофимов МАХри хӑйӗн каналӗнче пӗлтернӗ.
Ҫул-йӗре юсакансем асфальтӑн ҫӗнӗ сийне сарӗҫ, япӑхса кайнӑ ҫӗвӗсене ылмаштарӗҫ.
Кӗпер ҫинче юсав ӗҫе пуҫланнӑ пирки паянтан ун тӑрӑх транспорт каҫса ҫӳрессипе хӑш-пӗр чару йышӑннӑ. Кӗпере пӗтӗмпех хупса хурасшӑн мар, ӑна пӗчӗккӗн юсаса пырӗҫ. Малтан кӗперӗн варринчи пайне юсӗҫ, унтан тулаш енне куҫӗҫ.
Мускав кӗперне «Автодор» предприяти юсӗ, мӗнпур ӗҫе 2027 ҫулхи ака уйӑхӗн вӗҫӗччен туса пӗтермелле. Ку вӑл — документра ҫырса хунине ӗненсен. Тепӗр чухне юсав е строительство ӗҫне вӑхӑтра вӗҫлеменни те пулать.
-0.7 °C